PANGARATAION 14

Pambaenan na so jadi di siluluton

1“Bangso ni Tuhan Debatamunu do hamu. Jadi muda marsiluluton hamu salaho tu halak na monding, ulang ma jomahi hamu kulitmunu, sanga dicukur hamu ulumunu sian jolo songon na nibaen ni angka bangso na asing. 2Bangso na badia do hamu di Tuhan Debatamunu; sian sandok bangso na di ginjang tano on, hamu do na nipili ni Tuhan gabe bangso hapunjunganNia.”

Binatang na haram dohot na so haram

(Ham. 11:1-47)

3“Binatang na nidok ni Tuhan na haram, nada tola panganonmunu. 4Angka on ma binatang na tola sipanganonmunu: lombu, biri-biri, hambeng, 5ursa, biri-biri harangan, hambeng harangan sanga hije, dohot 6sanga na binatang dia na mabola dua sisilonna jana manjampal. 7Anggo binatang na so marbola dua sisilonna jana nada manjampal, nada tola panganon. Ulang pangan hamu unto, kelinci sanga marmut. Angkon etongon do binatang i haram, angke haru pe manjampal tapi nada marbola sisilonna. 8Ulang pangan hamu babi. Angkon etongon do binatang i haram, angke haru marbola pe sisilonna hape nada manjampal. Nada tola panganon binatang i, salang bangkena pe nada tola jamaon.

9Sandok ihan na marhapi-hapi jana na marsisik tola do panganon. 10Binatang na mangolu di bagasan aek tapi nada marhapi-hapi dohot marsisik, nada tola panganon jana angkon haram do i etongon.

11Sandok ragam ni unggas na so haram, sipanganon do i. 12-18Tapi adong do angka ragam ni unggas na so tola panganon, i ma: unggas halihi sibangar, sipaut, sude bangso halihi, garuda bosar, sigak, unggas unto, samar; onggang dohot sude bangso ni bango, undan, siburuk tasik dohot arip-arip.

19Sude binatang na marruas jana marhabong angkon etongonmunu do i na haram, na so tola panganon. 20Binatang na marruas na so haram tola do i panganonmunu.

21Bangke ni binatang nada tola panganonmunu. Tapi anggo halak na asing na maringanan di tonga-tongamunu tola do i panganonna jana tola muse do i gadisonmunu tu halak na asing. Bangso ni Tuhan do hamu antong, na marhapunjungan di Debata.

Nada tola lompaon anak ni biri-biri dohot hambeng di bagasan susu ni indukna.”

Aturan taringot tu haul parsampuluan

22“Ganop taon angkon paindingonmunu do saparsampulu ni sude suha ni sabamunu. 23Dung i kehe ma hamu tu inganan paribadatan na dung ditontuhon Tuhan Debatamunu. Di inganan i ma, di adopan ni Tuhan, angkon panganonmunu haul parsampuluan ni gandum, anggur, miak zetun maradu lombu dohot biri-birimunu na parjolo sorang. Patulus hamu ma i anso sai tongtong hamu marsiajar pasangapkon Tuhan Debatamunu. 24Muda madaotu inganan paribadatan i sian bagasmunu, gabe nada taroban hamu sisaparsampulu ni suha ni tanomunu i tu inganan i, anggo i 25gadis hamu ma na saparsampulu ni suhana i jana oban hamu ma hepengna i tu inganan paribadatan i. 26Tobusi hamu ma disi sanga aha por ni rohamunu – juhut ni lombu, biri-biri, anggur, dohot siinumon na mambaen mabuk – laing di inganan i di adopan ni Tuhan, angkon marsonang-sonang do hamu mangan dohot pangisi ni bagasmunu.

27Ulang padiar hamu malarat halak Levi na maringanan di angka hutamunu; ingot hamu na so adong do tano ni halahi sandiri. 28Sanoli tolu taon, di ujung ni taon, oban hamu ma saparsampulu ni suha ni pandapotanmunu jana palagut hamu ma i di angka hutamunu be. 29I ma panganon baen di halak Levi, angke nada adong antong tano ni halahi, songon i di halak na asing, di na so marama so marina dohot di angka na mabalu na maringanan di angka hutamunu. Tola do halahi ro dohot mambuat sandok na porlu di halahi. Muda dibaen hamu songon i gabe pasupasuon ni Tuhan Debatamunu ma hamu di sude na nikarejohonmunu.”

Currently Selected:

PANGARATAION 14: LAIAKB

Highlight

Copy

Compare