PANGARATAION 12

Hum sada sajo Inganan Paribadatan

1“Angka on ma aturan na angkon sioloanmunu salolot mangolu hamu di tano na giot silehenon ni Tuhan di hamu, i ma Debata na nisomba ni ompumunu. Parate-atehon hamu ma angka aturan i! 2Muda dung masuk hamu tu luat i, angkon roncohononmunu do angka inganan pamelean, inganan ni bangso na maringanan disi mamele angka debata ni halahi di ginjang ni angka dolok na timbo, di angka tor, dohot di toru ni angka hayu na rumbun. 3Parrumpakkon hamu ma angka langgatan ni halahi jana ropuhi hamu angka tiang batu na nietong ni halahi keramat. Tutungi hamu ma angka na manggambarkon Asera debata ni halahi jana sarsarkon hamu ma angka patung ni halahi, lopus nada tarbaen be marsomba tu barang-barang i di inganan i.

4Muda marsomba hamu tu Tuhan Debatamunu i, ulang tiru-tiru hamu pambaen ni halahi di na mamele angka debata ni halahi. 5Sian sude luat na masuk tu angka marga ni Israel, pilion ni Tuhan ma sada inganan maribadat di bangsonta anso tarbaen hita ro tu adopan ni Tuhan laho manyomba Ia. 6Angkon tu inganan i ma obanonmunu angka haul situtungon dohot angka haul na asing, haul parsampuluan maradu angka haul na asing, haul panggarar ni haulmu haul sian na nionjar ni rohamunu dohot lombu sanga biri-biri na parjolo sorang. 7Laing di inganan i muse, di adopan ni Tuhan Debatamunu na dung mamasumasu hamu, hamu rap dohot dongan sabagasmunu, disi ma mangan mandai rasoki sian pandapotan ni karejomunu.

8Muda dung dapot hatiha i, ulang be baen hamu songon na saonnari. Lopus saonnari sude hamu marroha-roha dope na maribadat i, 9dibaen nada masuk dope hamu tu tano na giot silehenon ni Tuhan Debatamunu tu hamu, i ma ingananmunu, disi ma tarbaen hamu mangolu di bagasan sonang. 10Dung ditaripari hamu Batang aek Jordan, urupan ni Tuhan ma hamu mambuat dohot mangingani tano na di bariba ni batang aek i. OndihononNia do hamu sian sasude musumunu, jana di bagasan sonang ma hamu mangolu. 11Angkon tusi ma hamu kehe maroban sude na dung huparentahon: Haul situtungon dohot haul na asing, haul parsampuluan dohot haul na marhapunjungan na dung nijanjihonmunu tu Tuhan. 12Sai marjop ni roha ma hamu di inganan i, di adopan ni Tuhan, rap dohot angka dakdanakmunu, angka naposomunu dohot angka halak Levi na maringanan di hutamunu, dibaen nada dapot bagian angka halak Levi di tanomunu i. 13Nada tola obanonmunu haulmunu tu sandok inganan na nipilimunu sandiri, 14tapi haulkon hamu ma di sada inganan sajo na ditontuhon ni Tuhan di luat ni sada sian margamunu. Hum tusi sajo do tola obanonmunu haul situtungon dohot patuluskon angka na asing na huparentahon tu hamu.

15Tapi anggo manyambol pahan-pahananmunu hamu dohot mangankon juhutna i tola do sanga na di dia ingananmunu. Tola do panganonmunu sabahat ni na nilehen ni Tuhan di hamu. Hamu sude, na ias dohot na so ias mangihutkon aturan ni ugamo, tola do mangankon juhut i, tudos songon na mangankon juhut ni hije sanga ursa. 16Tapi anggo mudar ni binatang i ulang cubo-cubo hamu mangankonsa; tapi angkon diduruskon do i tu tano songon aek. 17Nada tola sanga na aha pe panganonmunu di bagas ingananmunu sian sude na nihaulkonmunu tu Tuhan: Haul parsampuluan sian gandummunu, anggurmunu, miak zetunmunu, lombu sanga biri-birimunu na parjolo sorang, haul panggarar ni haulmunu, haul sian na nionjar ni rohamunu, sanga hasil na asing pe. 18Hamu dohot angka dakdanakmunu, rap dohot angka naposomunu dohot angka halak Levi na maringanan di angka hutamunu, angkon di adopan ni Tuhan Debatamunu sajo panganonmunu angka haul i, i ma di inganan paribadatan na sada i na nitontuhon ni Tuhan Debatamunu. Jana angkon marjop ni roha do hamu di inganan i hara ni sude usahomunu. 19Denggan ma jagohon hamu anso ulang jabat tarlalap hamu tu horong Levi salolot mangolu hamu di tano i.

20Muda dipabidang Tuhan Debatamunu parbalohan ni tanomunu i songon na nijanjihonNa i, tola ma hamu mangan juhut, sanga andigan giotmunu. 21Muda madao tu umpamana inganan paribadatan na sada i, tola ma hamu sanga na sadihari manyambol sada sian lombu sanga biri-biri na dung dilehen ni Tuhan di hamu, jana juhutna i pe tola ma panganonmunu di bagas, songon na dung hudok tu hamu. 22Ganop halak, na ias sanga na so ias mangihutkon aturan ni ugamo, tola do mangankon juhut, tudos tu na mangankon juhut ni hije sanga ursa. 23Hum juhut na laing marmudar do na so tola panganonmunu, angke di mudar i do hosa, jadi nada tola hamu mangankon ngolu i rap dohot juhutna. 24Ulang cubo-cubo hamu mangankon mudar, tapi duruskon hamu ma i tu tano songon aek. 25Muda dioloi hamu parenta i, sonang ma roha ni Tuhan jana sonang ma hamu dohot pomparanmunu. 26Sude haul na dung dijanjihon hamu tu Tuhan, angkon obanonmunu do tu inganan paribadatan na sada i. 27Angka haul na abis ditutung dohot angka haul na nipangan juhutna, angkon haulkononmunu do i di ginjang ni langgatan ni Tuhan jana mudarna i niduruskon tu ginjang ni langgatan i. 28Muda dihaburjuhon hamu ma patuluskon sudena i na dung huparentahon tu hamu, gabe na patulus na denggan ma hamu na tumbuk di Tuhan Debatamunu, jana gabe sonang ma hamu rap dohot pomparanmunu ro di salolot-lolotna.”

Sipaingot tu na mamele patung

29“Di na mamorangi luat i hamu, abiskonon ni Tuhan Debatamunu i ma angka bangso na maringanan disi, gabe tarbuat hamu ma luat i jana taringani hamu. 30Dung diabiskon Tuhan angka bangso i, angkon jamot-jamot do hamu. Ulang cubo-cubo hamu manangkas-nangkasi pambaen ni halahi manyomba debata ni halahi dohot maksud laho maniru halahi. Ulang ale! Mangalapi hamatean do pangalaho na songon i! 31Ulang cubo-cubo hamu maniru pambaen ni halahi marsomba tu angka debata ni halahi laho manyomba Tuhan Debatamunu, angke dompak marsomba, dipatupa halahi do angka pangalaho na jorbut na nihagigihon ni Tuhan. Salang angka dakdanak ni halahi sandiri pe antong ditutung halahi do di ginjang ni langgatan gabe songon haul tu angka debata ni halahi i.

32Sai patulus hamu ma sandok na dung huparentahon tu hamu; ulang tambai sanga urahi hamu saotik pe.

Currently Selected:

PANGARATAION 12: LAIAKB

Highlight

Copy

Compare