2 SAMUEL 13

Si Amnon dohot si Tamar

1Adong do sada iboto ni si Absalom, anak ni si Daud, goarna si Tamar, na nitadohon ni si Absalom. Tubu ma di roha ni si Amnon, anak ni si Daud sian dadaborunia na asing, manghaholongi si Tamar 2jana por rohania mida si Tamar. Tapi nada tarbaen songon i, angke nada marbagas dope si Tamar jana nada tola margaul dohot halaklahi. Sai torus ma i manggohi roha ni si Amnon jabat do ujungna gabe marnyae ia.

3Adong do dongan ni si Amnon na malo situtu marakal, goarna si Jonadab, anak ni si Simea angkang ni si Daud. 4Didok si Jonadab ma tu si Amnon, “Biasi sai songon i marsak idaon anak ni raja i ganop ari? Aha do na masamu?”

Dialusi si Amnon ma, “Na ro do rohangku manghaholongi si Tamar, iboto ni si Absalom kahanggingki.”

5Dung i didok si Jonadab ma tusia, “Modom ma ho di podoman, tarsongon na marnyae. Muda ro amanta mangaligi ho, dokkon ma tusia, ‘Paloas ma jolo amang ro si Tamar mangalehen au mangan. Anggo tarbaen do mangaligi ia mangalompa sipanganon i dison, lobas au ma mangan.’ ” 6Dung i modom ma si Amnon di podoman, tarsongon na marnyae.

Jadi di na ro Raja Daud mangaligisa, didok si Amnon ma tu amangnia i, “Paloas ma jolo amang ro si Tamar lalu marmasak kue dison anso tarbaen au mangaligi ia, anso lobas au mangan.”

7Dung i disuru palalu si Daud ma tona on tu si Tamar di bagas godang, “Kehe ho jolo tu bagas ni ibotomu si Amnon, jana baen ma panganon disia.” 8Dung i kehe ma si Tamar tusi jana didapot ia ma si Amnon modom di podomanna. Dibuat si Tamar ma saotik topung na marragi, lalu dipature ia ma di jolo ni si Amnon, kue situtungon. 9Dung i diparuar ia ma roti i sian huali lalu dilehen ia. Tapi nada ra si Amnon mangankon. Didok ia, “Suru ma haruar sude sian on!” 10Dung haruar sude halak sian bilik ia, didok si Amnon ma tu si Tamar, “Oban ma tuson angka kue i, tu podomankon, jana sulangi au!” Diihutkon si Tamar ma songon i. 11Tapi dompak na manyurduhon kue i si Tamar tusia, digolom si Amnon ma ia lalu didok tusia, “Rap modom ma hita!”

12“Ulang,” ning anak boru i. “Ulang au paksa mambaen karejo na songon i hodarna! Nada adong jungada masa na songon i di Israel. 13Anggo tarjadi na songon i, tu dia ma hubunihon bohingkon? Boti muse, laing na so marbohi be dohot ho di Israel. Gumonan do dokkon tu raja i, loasonna do au gabe dadaborumu.” 14Tapi nada ra si Amnon mangihutkon i, jana hara ni na gumogo ia, dipaksa ia ma ibotonia i mamake gogo, lalu diparroha-roha ia.

15Tapi dung salpu, goyak sajo ma roha ni si Amnon mida si Tamar jana gumodang do goyak ni rohania ulang pado holong ni rohania hian. Dung i didok ia ma tu ibotonia i, “Haruar ho!”

16Dialusi si Tamar ma, “Ulang songon i ho! Muda dipaorot ho au gumodang dope hajahatan i sian na dung dibaenmi!”

Tapi nada ditangihon si Amnon. 17Dipiohon ia ma pangoloinia sandiri jana didok ia tusi, “Oban anakboru on haruar, jana kuncihon pintu i!” 18Dibaen pangoloinia ma parentania i.

Anggo si Tamar marbaju juba na ginjang do ia jana na martangan panjang. Songon i do somalna pakean ni angka bujing-bujing na so marbagas dope di hatiha i. 19Dung i disaburkon si Tamar ma abu tu ulunia, disibak ia baju jubania i, jana kehe ma ia diholipi ia bohinia dohot tangannia dua-dua lalu tangis-tangis. 20Disi diida si Absalom ia, disapai ma tusia, “Adong he dibaen si Amnon tu ho na so patut? Tuk ma i da ito, ulang be pikirkon i. Ibotomu do i, jadi ulang paboa-boa pangalaho i sanga na tu ise pe.” Dung i kehe ma si Tamar mamunjung di bagas ni si Absalom, marsak ma ia jana lungunan.

21Dibege si Daud ma taringot tu na masa i, jana sun ma muruknia. 22Marhosom situtu ma si Absalom tu si Amnon jana nada ra be ia pangkulingkonsa hara ni na nibaennia i na so patut tu si Tamar, ibotonia i.

Palalu hosom si Absalom

23Dung dua taon mambaen pesta panggusting ni imbulu ni biri-biri ma si Absalom di Baal-Hasor, na di lambung ni kota Efraim. Jana diontang ia ma sude anak ni raja i. 24Mangadop ma ia tu Raja Daud jana didok ia ma, “Mambaen pesta panggusting ni imbulu ni biri-biri do au, amang. Laing dohot ma amang ro tu pesta i, dohot angka halak na godang-godang na di bagas godang on.”

25Tapi dialusi raja i ma, “Ulang antong, amang! Angke muda sude hami kehe, gabe susa do ho hara ni hami.” Torus ma disosoi si Absalom, tapi laing hot do nada ra amangnia i dohot. Hum dipartuai ia ma karejo i.

26Dung i didok si Absalom ma, “Antong anggo songon i noma, paloas ma angkangku si Amnon rap dohot hami.”

Didok raja i ma, “Ia pe nada pola porlu dohot.” 27Tapi hara ni na torus disosoi si Absalom, ujungna dipaloas si Daud ma si Amnon dohot sude anaknia na asing i rap dohot si Absalom.

[Dung i diparade si Absalom ma sipanganon na tabo.]#13:27 [DUNG I DIPARADE SI ABSALOM MA ...]: Nada adong hata on tarsurat di Bibel Ibrani, tapi sian Bibel terjemahan Junani do i dibuat. 28Diparentahon ia ma tu angka naposonia songon on, “Parate-atehon hamu denggan, muda dung mabuk si Amnon hara ni na minum anggur, hulehen pe tandana, bunu hamu ma ia. Ulang mabiar hamu. Au sandiri do na martanggung jawab di pangalaho on. Ulang ganggu-ganggu rohamunu tapi baen hamu mardongan habaranion!” 29Dipatulus angka naposonia ma parenta ni si Absalom i jana dibunu halahi ma si Amnon. Marnida i, marsitengget bagalna be ma angka anak ni si Daud na deba nari i palua dirina.

30Jadi taran na mardalan laho mulak i dope halahi, dipaboa halak ma tu si Daud, “Madung dibunu si Absalom sude anak ni raja i – sada pe nada adong be na mangolu!” 31Jongjong ma raja i, disibakkon ia ma pakeannia hara ni marsakna, ditinggangkon ia ma dirinia tu lante i. Dohot do sude parhobasnia marsisibakkon pakeanna be. 32Tapi ro ma si Jonadab anak ni si Simea angkang ni si Daud i mandok, “Ulang ganggu raja i, jana ulang diambang roha ni raja i na dung mate sude anak ni raja i. Hum si Amnon do na mate, harana anggo i madung torang do, i ma na nihagiotan ni si Absalom mamungka sian na nibaen ni si Amnon na so patut tu si Tamar ibotonia i. 33Jadi ulang porsaya raja i na mate sude anak ni raja i, angke hum sasada si Amnon sajo do na mate.”

34Jadi anggo si Absalom di hatiha i do ia gilo maporus.

Diida panjago ni bagas godang i ma bahat halak ro manuat sian dolok sabola Horonaim. Jadi kehe ma panjago i tu raja i paboahon i. 35Dung i didok si Jonadab ma tu si Daud, “Indu ma angka anak ni raja i! Tutu do songon na hudok nangkinan i!” 36Hum didok ia songon i, marmasuhan ma angka dakdanak ni si Daud i tu kamar inganan ni si Daud i. Dipungka halahi ma tangis, jana tangis muse ma si Daud dohot angka naposonia i marsingotngot.

37-38Maporus ma si Absalom tu bagas godang ni raja ni tano Gesur, i ma si Talmai anak ni si Amihur. Tolu taon honokna ia disi maringanan. Lolot do sai marsak si Daud mangarsakkon si Amnon, 39tapi dung disalpui ia hamamarsaknia i, gabe sun ma lungun ni rohania tu si Absalom.

Currently Selected:

2 SAMUEL 13: LAIAKB

Highlight

Copy

Compare