2 SAMUEL 12

Tona ni si Natan dohot panolsolion ni si Daud

1Dung i disuru Tuhan ma Panurirang Natan tu si Daud. Didapotkon si Natan ma ia jana didok ma, “Adong ma dua halak na maringanan di sada kota; na sada halak na kayo, na sada nari na pogos. 2Bahat do pahan-pahanan dohot biri-biri ni na kayo i 3hape anggo na pogos i hum sada do anak ni biri-birinia, na nitobusannia. Dipahan-pahan ia ma anak ni biri-biri i lopus magodang di bagasan bagasnia rap dohot angka dakdanaknia. Dohot do anak ni biri-biri i mangankon sian panganon ni halahi i, minum pe sian mangkuknia do, jana modom di ampuannia; dibaen ia do, songon borunia sandiri. 4Sanoli di sada ari, ro ma da koum ni na kayo i. Nada ra na kayo i manyambol biri-biri sanga lombunia i sandiri dohot mangalompasa baen di koumnia i. Jadi dibuat ia ma anak ni biri-biri ni na pogos i, i ma dilompa ia baen di koumnia i.”

5Umbege i, gabe muruk ma si Daud tu na kayo i jana didok ia ma: 6“Angkon gontion ni na mambaen songon i anak ni biri-biri i opat lompit jana angkon niuhum mate!”

7Didok si Natan ma tu si Daud, “Ho ma da i! Jana on ma na nidok ni Debata ni Israel, ‘Madung Hubaen ho gabe raja di Israel jana Hupalua ho sian si Saul. 8Madung Hulehen di ho harajaan dohot angka dadaboru ni si Saul, jana Hubaen dope ho gabe raja di Israel dohot Juda. Sugari nian muda laing na hurang dope i, laing pasti do lehenonKu muse di ho sabahat ni i. 9Biasi dipasiding ho angka na Huparentahon? Biasi dibaen ho hajahatan i? Disuru bunu ho si Uria di parporangan; dipadiar ho ma ia dibunu halak Amon, lalu dibuat ho dadaborunia i! 10Dibaen nada dioloi ho Au, jana hara ni na nibuatmu dadaboru ni si Uria, jadi gabe sai adong ma na mate hona bunu sian ganop sundut ni pomparanmu. 11Husumpahon ma angkon paroonKu sori mago tu ho na ro sian tonga-tonga ni pangisi ni bagasmu sandiri. BuatonKu ma angka dadaborumu di jolo ni matamu jana lehenonKu ma i tu halak na asing na mangangkupi halahi modom di arian raya. 12Madung dibaen ho dosa di na buni, tapi padalanonKu ma na Huondamkon i torang di adopan ni sude Israel.’ ”

13Dung i didok si Daud ma tu si Natan, “Madung mardosa au maradopkon Tuhan.”

Dialusi si Natan ma, “Madung diampuni Tuhan raja i; jadi nada jabat mate be raja i. 14Tapi dibaen madung sanga layas Tuhan dibaen raja i hara ni pangalaho i, gabe mate do anak ni raja na sorang i.” 15Dung i mulak ma si Natan tu bagasnia.

Mate anak ni si Daud

Marnyae ma anak ni si Daud na nitubuhon ni si Batseba tading-tadingan ni si Uria i jana sian Tuhan do nyaena i. 16Dung i ditangiangkon si Daud ma tu Tuhan anso malum dakdanak i. Puaso ma ia jana ganop borngin sai modom di lante ni biliknia ma ia sasaborngin. 17Dung i marroan ma angka halak na godang na di bagas godang i mandapotkon ia jana dielek-elek halahi ma anso ra ia jongjong, tapi ditulak ia do i jana nada ra ia mangan rap dohot halahi. 18Dung saminggu, jumolo ma dakdanak i, jana mabiar do angka naposo ni si Daud i paboahon tusia. Didok halahi, “Dompak mangolu dope dakdanak i, nada ra be raja i mangalusi muda mangkuling hita tusia. Mur ma saonnari dung jumolo anaknia i! Ulang-ulang palalu roha muse noma ia tusia sandiri!”

19Di na niida ni si Daud marhusipi angka naposonia i, diboto ia ma na dung mate dakdanak i. Lalu disapai ia ma tu halahi, “Tutu dehe na dung mate dakdanak i?”

“Tutu do rajanami,” ning halahi mangalusi.

20Jongjong ma si Daud sian lante i, kehe ma ia maridi lalu disuri ia obuknia, lalu margonti pakean. Dung i kehe ma ia maribadat tu Bagas Ni Tuhan. Dung i kehe ma ia mulak tu bagas godang jana dipangido ia ma diparade panganon disi, jana mangan ma ia. 21Marnida i, gabe didok angka naposonia ma tusia, “Nada mangarti hami. Dompak mangolu dakdanak i, puaso raja i jana ditangisi raja i ia, hape disi jumolo dakdanak i, manigor jongjong ma raja i jana mangan!”

22“Olo,” ning si Daud mangalusi, “Tutu do puaso au jana tangis dompak mangolu dakdanak i, harana didok rohangku: Betak na ibo do roha ni Tuhan mida au jana padiaronNia mangolu dakdanak i. 23Tapi saonnari dung marujung ngolunia, aha be gunana sai torus au puaso? Tarpangolu au dope ia lakna mangulahi? Sanoli on kehe muse do au tu inganannia i, hape anggo ia inda na mulak be tu au.”

Sorang si Salomo

24Dung i diapoi si Daud ma roha ni si Batseba dadaborunia i, lalu rap modom ma halahi. Sorang ma anak ni si Batseba halaklahi, dibaen si Daud ma goarna si Salomo. Holong do roha ni Tuhan di dakdanak i, 25jana disuru Tuhan ma Panurirang Natan mambaen goar ni dakdanak i si Jediya,#12:25 JEDIYA: Astuan ni goar on di hata Ibrani: “Dihaholongi Tuhan”. angke holong do roha ni Tuhan antong disia.

Si Daud mangarampas Raba

(1 Juj. 20:1-3)

26Marporang dope di hatiha i anggo si Joab mangalo Raba kota sabungan ni Luat Amon jana dirampas ia ma kota hundulan ni harajaan i. 27Jadi disuru ia ma utusan tu si Daud paboahon songon on, “Madung huroro mangalo Raba, jana madung dapot au simpanan ni aek ni halahi. 28Saonnari, pangidoan anso nian ra raja i palagutkon tentaranta na deba nari i, dohot mamimpin serangan laho manaluhon kota i. Muda songon i, gabe nada adong be sanoli on halak na mandok, bahaso au na mangarampas kota i.” 29Dipalagut si Daud ma tentarania sude jana kehe ma halahi tu Raba mamorangi lalu manaluhon kota i. 30Dibuat si Daud ma tuku sian ulu ni raja ni halahi i jana dibaen ia ma tu ulunia sandiri. Adong do hira-hira 35 kilo borat ni tuku i na marsusun batu intan na jeges-jeges. Dioban si Daud muse dope bahat sajo barang na hona rampas sian kota i. 31Tamba ni i dioban muse dope halak kota i jana disuru maroban gargaji, pangkur bosi, dohot kapak bosi jana dibaen ma halahi markarejo di inganan partukangan ni batu bata. Laing songon i ma dibaen ia tu angka kota ni halak Amon na asing. Dung salpu i, mulak ma si Daud dohot sude tentarania i tu Jerusalem.

Currently Selected:

2 SAMUEL 12: LAIAKB

Highlight

Copy

Compare