2 SAMUEL 14

Diatur si Joab hamumulak ni si Absalom

1Diboto si Joab anak ni si Zeruya do na lungun sajo roha ni si Daud tu si Absalom, 2jadi gabe disuru alap ia ma sada anakboru na pistar na maringanan di Tekoa. Dung lalu anakboru i, didok si Joab ma tusia, “Angkon baenonmu tarsongon na marsak-marsak ho; pake ma pakean siluluton jana ulang pake miak na huskus. Baen ma songon sada anakboru na dung lolot tangis hara ni parmate ni haholongan ni rohana. 3Dung i kehe ma ho mandapotkon raja i jana palalu ma sanga aha sidokkononkon tu ho.” Dung i dipajojor si Joab ma tusia sanga aha na giot sidokkononnia i.

4Kehe ma anakboru i mangadop tu raja i jana manungkap ma ia marsomba jana didok ia ma, “Rajanami na niparsangapan, diurupi raja jolo iba on!”

5“Aha do i?” ning raja i mangalusi.

Dialusi anakboru i ma, “Sada anakboru na mabalu jana na pogos do au. Madung jumolo halaklahingku. 6Adong do dua anakku halaklahi, jana di sada ari marbadai ma halahi. Jadi hara ni na so adong halak manyirang halahi, dibunu na sada ma na sahalak nari. 7Jana saonnari gabe sude ma koum sisolkotku mangalo au jana marsituntut anso hupasahat anakki tu halahi anso bolas matehonon ni halahi, hara ni na dung dibunu ia angginia i. Muda baenon ni halahi ma songon i, gabe mamunjung noma sasada au, so adong be sada anak pe. Soadahonon ni halahi ma arop ni rohangku na sasada i jana nada adong be anak halaklahi na tinggal di halaklahingku laho patoruskon pomparannia.”

8“Mulak ma ho,” ning raja i mangalusi, “Huurus pe parkaro i.”

9“Rajanami,” ning anakboru i, “Sanga aha pe na giot baenon ni raja i, laing au dohot isi ni bagasku noma na mananggung hasalaanna; anggo raja i dohot pangisi ni bagas ni raja i nada adong marsala.”

10Dialusi raja i ma, “Muda adong halak na mangancam ho, oban ma halakna i tu au, jadi nada hahuaonnia be ho muse.”

11Didok anakboru i ma, “Sugari nian ditangiangkon raja i ma jolo tu Tuhan Debata ni raja i, anso ulang jabat dibaen halak na giot mamalos hamamate ni anakki nian hajahatan na gumodang dope marhite na mamunu anakku na sada nari i.”

Dialusi si Daud ma, “Mangasahon Tuhan na mangolu i, indada hahuaon anakmi, haru hum saotik pe.”

12Dung i didok anakboru i ma, “Sugari laing dipatola raja i ma au mandok hata saotik nari.”

“Denggan,” ninna raja i mangalusi.

13Didok anakboru i ma, “Marhite hata i, madung dioku raja i sandiri bahaso na marsala raja i hara ni na so paloaskon anak ni raja i mulak sian hagiloanna. Biasi dibaen raja i na songon i tu bangso ni Debata? 14Na muli mate do hita on sude; tarsongon aek na sabur tu tano do hita jana nada tarpalagut be. Debata pe nada pangoluonNia be mangulahi anggo halak na dung mate. Jadi siusahahonon ni raja i do antong anso tarbaen halak na tarbuang mulak mangulahi. 15Umbaen na mangadop pe au tu raja i, harana adong do halak mangancam au. Jadi marpikir ma au, dumenggan ma sugari mangkobari au dohot raja i mardongan arop ni roha na bolas oloan do pangidoan on. 16Anggo hupikir tangihonon jana paluaon ni raja i do au sian halak na marusaho giot mamunu au, dohot anakki. Na giot paorot hami sian tano na nilehen ni Debata tu bangsoNa on do maksud ni halahi. 17Pos do rohangku rajanami laing janji ni raja i noma na manjamin haluaanku angke na songon surusuruan ni Debata do raja i na tuk gogo paasingkon na denggan dohot na jat. Sai didongani Tuhan Debata ni raja i ma antong nian raja i!”

18Dialusi raja i ma, “Adong na giot sisapaanku tu ho, tigor ma jolo alusi.”

“Didokkon raja i ma,” ning anakboru i mangalusi.

19Disapai raja i ma, “Si Joab dehe na marsuru ho?”

Dialusi anakboru i ma, “Mangasahon hosa ni raja i, nada tarbaen au mangelak sian sapa-sapa ni rajangku. Tutu do i, na dipaboa ni si Joab do tu au sanga aha na angkon baenonku dohot sidokkononku. 20Tapi songon i pe dibaen ia, anso laing salose do pangalaho i dohot denggan. Na bisuk do antong raja i songon surusuruan ni Debata, tarbaen umboto sasude na masa.”

21Dung i dipio raja i ma si Joab jana didokkon ma tusia, “Huoloi pe pangidoan ni rohami. Kehe ma ho mangalap si Absalom jana oban ma ia tuson.”

22Manungkap ma si Joab di jolo ni si Daud, lalu mandok, “Sai dipasupasu Debata nian raja i! Saonnari ma huboto na jop do hape roha ni raja i mida au, dibaen madung dipatulus pangidoanki.” 23Dung i kehe ma si Joab tu Gesur mangalap si Absalom mulak tu Jerusalem. 24Tapi nada dipatola raja i si Absalom maringanan di bagas godang. “Nada ra au mangaligi i,” ninna raja i. Jadi torus mulak tu bagas do si Absalom, jana nada pola mangadop be ia tu raja i.

Si Absalom dipadame dohot si Daud

25Tarpuji do si Absalom songon halak na jumeges di sandok Israel. Nada adong halak na jumeges be ulang ia. Sian palakpak ni patnia lopus tu ambubu ni ulunia nada adong tihasna. 26Obuknia na bolbolan, jana angkon pangkasonnia do i sanoli sataon, angke maginjangtu jana maborattu dihilala ia. Lobi do dua kilo borat ni obuknia na digusting i mangihutkon timbangan ni raja. 27Adong do tolu anak ni si Absalom jana sada borunia na jogi situtu rupana, goarna si Tamar.

28Madung dua taon si Absalom maringanan di Jerusalem tapi laing na so marsuo dope ia dohot raja i. 29Jadi sanoli dipiohon ia ma si Joab, laho marsuru ia nian mangadu tu raja i, hape nada ra si Joab ro. Dipiohon si Absalom ma ia sanoli nari, hape laing nada ra si Joab ro. 30Dung i didok ia ma tu angka naposonia, “Diboto hamu dehe ladang ni si Joab na di hombar ni ladangku panyuanan ni bajaure i? Kehe ma hamu, surbu hamu ma ladangna i.” Jadi kehe ma halahi manyurbusa.

31Jadi gabe ro ma si Joab tu bagas ni si Absalom laho manyapaisa, “Biasi disurbu angka hatobanmi ladangku?”

32Dialusi si Absalom ma, “Hara ni na so ra i do ho ro di na husuru pio i. Na giot suruonku do ho nian mangadop tu raja i laho palaluhon sapa-sapangkon. ‘Aha do gunana morot au sian Gesur di na ro au tuson? Gumonan hian do laing disi au.’ ” Dung i dipaudut si Absalom ma, “Usahahon ma anso tarbaen au mangadop tu raja i, jana muda laing na marsala dope au, rade do au mate hona uhum.”

33Dung i kehe ma si Joab mangadop tu Raja Daud jana dipalalu ia ma pangidoan ni si Absalom i. Dung i dipiohon raja i ma si Absalom, jana ro ma antong si Absalom manungkap di adopan ni raja i. Jana dijaluangi raja i muse ma ia marhite na mangummasa.

Currently Selected:

2 SAMUEL 14: LAIAKB

Highlight

Copy

Compare