1 RAJA-RAJA 8

Poti Parjanjian i dioban tu Bagas Ni Debata

(2 Juj. 5:2–6:2)

1Dung i disuru Raja Salomo ma angka hatobangan ni ganop marga ni Israel ro manopot ia di Jerusalem laho mangalap Poti Parjanjian ni Tuhan i sian Sion, Kota Ni si Daud, anso dioban tu Bagas Ni Debata. 2Jadi di hatiha Ari Pesta Undung-undung Bulung Rata di bulan Etanim marlagut ma halahi sude. 3Dung i diangkat angka malim i ma Poti Parjanjian i, 4lalu dioban tu Bagas Ni Debata. Bandar Parmianan Ni Tuhan i pe dohot parkokasna dipaimbar angka halak Levi dohot angka malim ma i tu Bagas Ni Debata. 5Raja Salomo dohot sude halak Israel, marlagut ma di jolo ni Poti Parjanjian i laho pasahatkon tu Tuhan, biri-biri dohot lombu bahat situtu jabat nada taretong hara ni bahatna. 6Dung songon i dioban angka malim ma Poti Parjanjian i tu bagasan Bagas Ni Debata jana dipayakkon halahi ma i di Bilik Na Sun Badia di toru ni gambaran ni angka kerub i. 7Hirbang do habong ni kherubim i manutupi poti i dohot hayu pamorsanna. 8Hayu pamorsanna i ginjang do, gabe angkon jongjong di jolo ni Bilik Na Sun Badia i do iba anso tarida lopus tu ujungna i. (Lopus tu sadari on, laing tarida do hayu i disi.)

9Di bagasan Poti Parjanjian i nada adong bagi aha asing ni na dua batu. Madung dipamasuk si Musa hian do batu i di Dolok Sinai, di na nibaen ni Tuhan i janji dohot bangso Israel dompak di pardalanan ni halahi haruar sian Mesir.

10Di hatiha haruar angka malim i, tompu ma gok ombun Bagas Ni Debata i, 11na silo mardongan hagodangan ni haroro ni Tuhan gabe nada tarbaen malim i be masuk mangulahi mangkarejohon karejo ni halahi. 12Gabe martangiang ma si Salomo, ninna ma,

“Ho do na mambaen mataniari di langit, ale Tuhan.

Tapi jopan do rohaMu tinggal di ombun na golap.

13Dison hupajongjong di Ho tarsongon bagas godang

baen inganan ma i di Ho sapanjangna.”

Marpidato si Salomo tu halak na bahat

(2 Juj. 6:3-11)

14Dompak marjongjongan dope angka jolma i disi, humusor ma si Salomo adop halahi giot mangido pasupasu sian Debata. 15-16Didokkon si Salomo ma, “Nahinan madung marjanji Ho Tuhan tu damang si Daud songon on, ‘Sian dung Huoban bangsongKu ruar sian Mesir, di sude luat ni Israel, nada adong sada pe kota na Hupili na gabe inganan na angkon disi pajongjongon bagas parsombaan tu Au. Tapi ho ale Daud, madung Hupili ho laho mamarenta bangsongKu.’ Pinuji ma Tuhan Debata ni Israel na dung patulus janjiNa i!”

17Dung i didok si Salomo ma mangulahi, “Madung ditahi roha ni damang si Daud, giot pajongjong bagas parsombaan di Tuhan Debata ni Israel. 18Tapi didok Tuhan i do tusia, ‘Denggan do maksudmi nian. 19Tapi nada ho, angkon anakmu do na pajongjong bagasKi.’ ”

20Antong saonnari madung dipatulus Tuhan i janjiNa. Madung gabe raja au di Israel manggonti damang, jana madung hupajongjong muse bagas parsombaan di Tuhan Debata ni Israel. 21Di bagasan Bagas Ni Debata i madung hupasingkop inganan ni Poti Parjanjian ni Tuhan. Songon na dung rap taboto, di bagasan Poti i do disimpan dua batu lei na marisi parjanjian ni Tuhan dohot ompunta di na niobanNia halahi haruar sian Mesir.

Tangiang ni si Salomo

(2 Juj. 6:12-42)

22Dung i diida sude halak Israel do, humusor ma si Salomo adop langgatan i lalu dipahortang ia tangannia dua-dua tu ginjang, 23lalu martangiang, “Ale Tuhan Debata ni Israel, di langit dohot di tano on, nada adong debata na songon Ho. Dipatulus Ho do janjiMu jana dipatidahon Ho do holongMu tu sude bangsoMu na sai burju jana mangoloi tu Ho sian nasa rohana. 24Tongtong do ditiop Ho janjiMu tu damang si Daud; sadari on, sude hata na dung didokkonMi madung dipatulus Ho. 25-26Madung dijanjihon Ho muse tu damang muda dihaburjuhon pomparanna do mangoloi Ho laing songon ia, gabe tongtong ma adong sahalak sian pomparannia na gabe raja di Israel. Saonnari ale Tuhan Debata ni Israel hupangido tu Ho, anso patulusonMu nian na nijanjihonMu tu damang si Daud naposoMi.”

27“Tapi ale Debata, tarbaen Ho ma he tinggal di tano on? Haru sude langit i, hurang bidang dope gabe ingananMu, mur ma bagas na hupauli on! 28Antong tangihon ma tangiang ni naposoMu ale Tuhan Debatangku jana oloi ma pangidoanki sadari on. 29-30Arian na borngin Ho ma manjagohon bagas parsombaan on na dung dipiliMu di Ho muda martangiang dohot bangsoMi mangadop tu bagas on, dung i muse muda ro au dohot bangsoMi martangiang manopot Ho tu bagas on sai tangihon ma hami jana sesa dosanami haru di banua ginjang pe ingananMu.”

31“Muda hona tuhas sada halak, marsala tu halak na asing jana dioban tu langgatanmu di bagasan bagas parsombaan on anso disumpahon ia na so marsala ia, 32o, ale Tuhan, tangihon ma sian banua ginjang jana ho ma manimbang parkaro ni angka naposoMon. Tu angka na marsala baen ma uhuman na patut disia jana tu halak na so marsala, sai palua ma.”

33“Muda talu ma halak Israel dibaen angka musuna hara ni na mardosa halahi, gabe ro halahi mangido pangurupiMu jana martangiang tu bagas parsombaan on, sian toruk ni roha mangido ampun tu Ho, 34sai tangihon ma i di banua ginjang. Sai ampuni ma dosa ni bangsoMi, jana oban halahi mulak tu luat na dung nilehenMu tu ompu ni halahi.”

35“Muda diantak Ho udan hara ni dosa ni bangsoMi tu Ho, gabe disolsoli halahi dosa ni halahi gabe ro halahi tu bagas parsombaan on jana martangiang di bagasan toruk ni rohana tu Ho, 36sai tangihon ma i di banua ginjang. Sai sesa ma angka dosa ni bangsoMu Israel dohot raja ni halahi. Ajari ma halahi mambaen na tigor. Dung i ale Tuhan paro ma udan di luatMon, luat na dung nilehenMu tu bangsoMu gabe teanan ni halahi ro di salolot ni lolotna.”

37“Muda masa ma di luat on, haleon sanga bala, suan-suanan pe disego-sego angin na milas, wereng sanga siapor, muda diporangi musu bangsoMi sanga hona nyae, 38sai tangihon ma tangiang ni halahi. Muda adong sian tonga-tonga ni bangsoMu Israel na marsak roha lalu martangiang tu Ho jana pahortang tanganna adop bagas parsombaan on, 39sai tangihon ma di ingananMu na di banua ginjang sesa ma dosa ni halahi jana urupi halahi. Hum Ho do na umboto roha ni jolma. Hara ni i baen ma tu ganop halak na patut disia. 40Anso sude bangsoMu mabiar jana burju mangoloi Ho, salolot maringanan halahi di luat na dung nilehenMu tu ompungnami.”

41-42“Muda adong sada halak na leban na maringanan di luat na asing umbege taringot tu hagodanganMu dohot taringot tu angka hahomangan na dung nibaenMu tu bangsoMu gabe ro ia tu luat on laho pasangap Ho, jana martangiang adop bagas on, 43sai tangihon ma di ingananMu di banua ginjang tangiang ni halahi jana oloi ma pangidoanna. Gabe songon bangsoMu Israel sude bangso na di tano on, mananda jana mangoloi Ho anso diboto halahi bagas na Hupauli on, i ma inganan paribadatan tu Ho.”

44“Muda disuru Ho bangsoMu marporang mangalo musu sanga di dia pe halahi, diadopkon halahi tu kota na nipiliMu jana martangiang adop bagas na Hupauli on di Ho, 45sai tangihon ma tangiang ni halahi di banua ginjang jana lehen ma hamonangan di halahi.”

46“Muda mardosa bangsoMi tu Ho, sian sahalak pe nada adong na so mardosa, hara ni murukMu gabe dipadiar Ho ditaluhon musu halahi, jana dioban halahi gabe taban-taban tu luat na dao sanga na donok.”

47-48“Muda di luat i halahi, sian ias dohot sian situtu ni roha ni halahi maninggalkon angka dosa ni halahi, dioku halahi dosa dohot hajahatan ni halahi, martangiang halahi tu Ho adop luat on na dung nilehenMu tu ompungnami adop kota na nipiliMu dohot adop bagas parsombaan on na dung hupajongjong di Ho, 49sai tangihon ma tangiang ni halahi di banua ginjang jana ibo ma rohaMu di halahi, 50sai sesa ma sude dosa bope durako ni halahi adop Ho, jana baen angka musu ni halahi mambaen na denggan tu halahi. 51BangsoMu sandiri do halahi na dung niobanMu haruar sian Mesir na songon naroko i.”

52“Sai parate-atehon ma ale Tuhan Debata bangsoMi dohot rajana. Ibo ma rohaMu tangihon ma tangiang ni halahi ganop pio-pio halahi mangido pangurupion tu Ho. 53Sian sude bangso madung dipili Ho halahi gabe bangsoMu sandiri, songon na dung didokMi marhite naposoMu si Musa, di hatiha ditogu Ho ompungnami haruar sian Mesir.”

Tangiang panutup

54Songon i ma si Salomo martangiang jana marsinggang di jolo ni langgatan i lalu dipahortang ia tangannia tu ginjang. Dung songon i jongjong ma ia jana 55mardongan sora na gogo mangido pasupasu na sian Debata di sude halak na marlagut disi di hatiha i, ninna ma, 56“Pinuji ma Tuhan na dung mangalehen hasonangan tu bangsoNa songon na dung dijanjihonNia marhite si Musa naposoNa i. Sude janji i denggan do jana madung dipatulus Ia. 57Sai Tuhan Debata ma donganta songon na dung didongani Ia ompunta, sai ulang ma ditinggalkon Ia hita. 58Sai dibaen Ia ma hita gabe halak na burju tuSia anso sude ngolunta mangihutkon hagiotNia jana burju patulus angka tona dohot parenta na dung nilehenNia tu ompunta. 59Sai diingot Tuhan Debatanta ma tangiang dohot pangidoan na dung hupalalu tuSia. Sai dipasupasu Ia ma halak Israel dohot rajana jana dilehen Ia sanga aha na porlu di halahi ganop ari. 60Marhite na songon i gabe sude ma bangso na di tano on umboto, hum Tuhan i sajo do Debata – nada adong na asing. 61Antong, hamu sude bangsoNa sai tongtong ma oloi hamu Tuhan, Debatanta jana sai burju ma oloi hamu angka uhum dohot parentaNia, songon na dung nibaenmunu sadari on.”

Bagas parsombaan i dipasahat tu Debata

(2 Juj. 7:4-10)

62Dung songon i, dipasahat Raja Salomo dohot sude halak na marlagut disi ma haul tu Tuhan. 63Na gabe haul haluaan dipasahat Raja Salomo ma tu Tuhan 22.000 lombu dohot 120.000 biri-biri. Songon i ma dibaen Raja Salomo dohot sude Israel pasahatkon bagas parsombaan i tu Debata. 64Laing di ari i do dibaen si Salomo upacara pamasumasuon di alaman na di jolo ni Bagas Ni Debata. Dung i dipasahat ia ma di alaman i haul situtungon, haul gandum dohot tabo-tabo ni binatang baen haul haluaan. Sudena dipasahat ia disi dibaen mamenektu do langgatan tumbaga i inganan ni sude haul i.

65Di Bagas Ni Debata i do dibaen si Salomo dohot sude halak Israel, Pesta Undung-undung Bulung Rata pitu ari honokna. Bahat situtu do bilangan ni halak na marlagut disi, sian luat saginjang ni Dalan Hamat di Utara, lalu tu parbalohan ni Mesir di Selatan. 66Di ari pasalapankon diloas si Salomo ma marmulahan jolma i. Sude halahi mandok horas tusia lalu mulak be tu bagasna mardongan jop ni roha, hara ni pasupasu na nilehen ni Tuhan tu naposoNa si Daud dohot tu bangsoNa Israel.

Currently Selected:

1 RAJA-RAJA 8: LAIAKB

Highlight

Copy

Compare