1 RAJA-RAJA 7

Bagas ni si Salomo

1Laing dipajongjong si Salomo dope bagas godang disia. Tolu bolas taon honokna si Salomo pauli bagas godang i. 2-3Di bagas godang i dibaen ia do sada bilik na margoar “Bale Tombak Libanon”.#7:2 BALE TOMBAK LIBANON: I ma sada bilik di bagas ni si Salomo dipake do i di angka ari hagodangan digoar do bilik i Bale Tombak Libanon, betak hara ni dingding i dilampis dohot hayu ares Libanon. Ukuranna: Ginjangna 44 meter, bidangna 22 meter jana gincatna 13,5 meter. Di ruangan i adong do tolu baris tiang sian hayu ares Libanon, ganop baris tiang i lima bolas bahatna, di ginjang ni tiang i ma dibaen angka langit-langit na nibaen sian hayu ares Libanon. Lotengna dibaen sian hayu na sarupa manutup angka langit-langitna i. 4-5Di dingding siamun siambirang ni ruangan i dibaen do angka jandela; tolu baris di dingding na sabariba, patongtang dohot tolu baris na di dingding na sada nari. Bingke ni pintu dohot jandela i maropat sogi do marginjang dibaen.

6Dipauli si Salomo muse ma “Bale Pilar” na asing, ginjangna 22 meter jana bidangna 13,5 meter. Di jolo ni ruangan i adong emperna na martarup dohot martangga di jolona i.

7Ruangan na asing, i ma “Bale Habangsa” na digoari muse Bale Pangadilan. Anggo ruangan i mamungka sian lante lalu tu langit-langitna i dilampis dohot hayu ares Libanon do. Di ruangan on ma si Salomo mamutuskon angka parkaro siadilan.

8Anggo inganan ni si Salomo dibaen do songon bagas na asing i, jana alaman na asing di pudi ni Bale Pangadilan i do i. Di dongan saripenia, boru ni raja Mesir i dipauli si Salomo ma sada bagas dos dohot bagas na asing i.

9Sude bagas i dohot alaman na godang i, mamungka sian ojahanna lalu tu tarupna, sian angka batu na jeges-jeges do dibaen. Dipauli hian do batu i di inganan partukangan ni batu, digotapi mangihutkon ukuran sabola sian bagasan dohot sian ruar dipahornop dohot gargaji. 10Ojahan ni angka bagas i dibaen do sian batu na godang-godang, na dipauli hian di partukangan batu i. Anggo ginjang ni batu i adong na tolu satonga meter adong muse na opat meter. 11Di ginjangna i dipayakkon angka batu na asing mangihutkon ukuran jana ditutup dohot hayu ares Libanon. 12Alaman ni bagas ni raja i dohot alaman parbagasan di Bagas Ni Debata dohot di bilik jolo-jolo i adong do dingding na nilampis dohot salampis hayu ares Libanon manutup ganop-ganop tolu lampis batu.

Karejo ni si Hiram pasingkopkon Bagas Ni Debata

13Disuru Raja Salomo ma mangalap sada bayo na margoar si Hiram sian kota Tirus. Tukang na malo do bayo i pauli barang-barang sian tumbaga. 14Amangnia hian pe tukang tumbaga do sian Tirus jana inangnia boru Naftali. Na malo do si Hiram i manjama karejonia jana bahat do parbinotoannia di sude karejo pauli parkokas. Dipangido si Salomo ma tusia, laho manguluhon sude karejo na marpardomuan tu barang-barang na sian tumbaga jana dioloi si Hiram ma i.

Dua tiang na godang sian tumbaga

(2 Juj. 3:15-17)

15Dituang si Hiram ma dua tiang tumbaga rap 8 meter gincatna jana 5,3 meter lilitna. 16Dibaen ia muse ma dua hiasan di gincat ni ulu ni tiang i, rap 2,2 meter gincatna. 17Dibaen ia muse ma dua jala-jala di gincat ni hiasan na di ulu ni tiang i. Songon kawat na marpudun jana songon rante do jala-jala i. Sada-sada be ma di ganop tiang. 18Dibaen ia muse ma parbatu ni dalimo humaliang dua jala-jala na manutupi hiasan na adong di gincat ni tiang i.

19Hiasan na adong di gincat ni tiang i dibaen songon bunga bakung, gincatna 1,8 meter, 20i ma hiasan na adong di gincat ni tiang na dua i, mamolus jala-jala na mangaliliti hiasan i. Adong muse do 200 parbatu ni dalimo di ganop lilit ni hiasan i.

21-22Dipayakkon ia ma ulu ni tiang na songon bunga bakung i di gincat ni tiang i. Dibaen ma tiang na dua i di jolo ni pintu hamasuhan tu Bagas Ni Debata. Tiang na sabola Selatan digoari ia Jakin#7:21-22 JAKIN: Muda didok goar on, songon hata Ibrani na marastuan “Ia (Debata) na manotopkon.” jana tiang na sabola sian Utara digoari Boas.#7:21-22 BOAS: Muda didok goar on songon hata Ibrani na marastuan “Hagogoan sian Debata”. Dung i sidung ma karejo i.

Kula tumbaga

(2 Juj. 4:2-5)

23Dung i dipauli si Hiram muse ma kula na tingko na nibaen sian tumbaga, na marukuran songon on, bagasna 2,2 meter langka tongana 4,4 meter jana marhatingkoan 13,2 meter. 24Tapi sian ruar ni kula tumbaga i, dihiasi do dohot gambar ni dua baris batu ni labu, dituang rap dohot kula i. 25Kula tumbaga i di ginjang ni dua bolas lombu do dibaen, tolu mangadop tu Utara, jana tolu mangadop tu Hasundutan, tolu mangadop tu Selatan, jana tolu nari mangadop tu Habincaran, jana ihur ni angka lombu i dompak bagasan. 26Hapal ni kula i 75 millimeter. Topina songon topi ni mangkuk na londut tu ruar songon bunga bakung na kombang. Masuk do di bak i opat pulu ribu liter aek.

Angka kareta

27Dibaen si Hiram muse dope sampulu kareta tumbaga. Ganop kareta unjur dohot tohangna rap 1,8 meter dohot gincatna 1,3 meter. 28Di ginjangna i dibaen papan na maropat sogi na dipauli marbingke. 29Dihiasi do papan i dohot ukiran ni singa, lombu dohot angka kerub, di angka bingkena i – di ginjang dohot di toru ni gambar ni singa dohot lombu i gantung ma ukiran ni bunga-bunga di topi-topi. 30Ganop kareta opat rodana na sian tumbaga, sumbu ni roda i sian tumbaga. Di suhi-suhi na opat di kareta i adong do tiang pangolat na nibaen sian tumbaga na margambar bunga-bunga di topina i. 31Sabola sian ginjang di angka tiang pangolat i adong do bingke na tingko inganan ni sambong; 45 sentimeter. Gincat ni bingke i 63 sentimeter; 45 sentimeter di ginjang ni papan i, jana 18 sentimeter di toruna. Adong do ukiran di bingke i. 32Gincat ni angka rodana i onom pulu onom sentimeter; ingananna di toru ni papan-papan i. Sumbu ni roda dohot kareta i na sada do i. 33Anggo angka rodana i suman do tu roda ni kareta porang; lilit ni roda, jari-jari sumbu bope pardomuan ni jari-jari ni roda i sude dibaen sian tumbaga do. 34Ganop suhi sian toru ni kareta i adong do opat sitiopan sada bagian do i dohot kareta i. 35Humaliang di ginjang kareta i adong topina dua pulu dua sentimeter bidangna; tiang pangolat i dohot papan-papan i sude sabagian do i dohot kareta i. 36Angka tiang pangolat dohot papan-papan i dihias do i dohot gambar ni angka kerub, singa dohot batang ni kurma sanga di dia na kosong baen inganan ni i, ihut tusi ma bunga-bunga humaliang. 37Songon i ma dipambaeni angka kareta i. Sarupa do sude – dos ukuran dohot potonganna.

38Dipauli si Hiram dope sampulu sambong na godang, sada be ganop kareta. Ganop sambong langka tongana 1,8 meter masuk salapan ratus liter aek.

39Dibaen si Hiram ma lima kareta i di sabola Selatan ni Bagas Ni Debata jana na lima nari di Utara. Kula tumbaga i dipayakkon disuhi sabola sian Tenggara.

Angka parkokas di Bagas Ni Debata

(2 Juj. 4:11–5:1)

40Dipauli si Hiram muse ma dua huali, sodok-sodok dohot angka sambong. Dung songon i sidung ma karejonia di si Salomo na hasaya tu Bagas Ni Debata. Angka on ma parkokas na nipaulinia:

41Dua tiang na godang.

Dua ulu ni tiang na songon mangkuk na nibaen tu ginjang ni tiang na dua i.

Rante na didandan di ganop ulu ni tiang i.

42Opat ratus dalimo tumbaga na nisusun dua baris, ganop be saratus dalimo humaliang rante na didandan i di ganop ulu ni tiang.

43Sampulu kareta.

Sampulu sambong na godang.

44Kula tumbaga.

Dua bolas lombu tumbaga na manjujung kula i.

Angka huali, panyodok dohot angka sambong.

45Sude parkokas tu Bagas Ni Debata i na nipauli ni si Hiram, di Raja Salomo, dibaen sian tumbaga do na digosok lopus marlinang. 46Mangihutkon parenta ni raja do sudena i, na dituang di tuangan ni tumbaga na di antara ni Sukot dohot Zaretan di Rura Jordan. 47Nada disuru si Salomo manimbang angka barang na sian tumbaga i, hara ni na mabahattu. Jadi nada binoto dokdok ni barang-barang i. 48-50Disuru si Salomo dope pauli angka parkokas sian sere, na hasaya di Bagas Ni Debata, i ma:

Langgatan.

Meja ni roti sihaulkonon tu Debata.

Sampulu tiang ni lampu di jolo ni Bilik Na Sun Badia,

i ma lima di sabola Selatan jana lima di sabola Utara.

Bunga-bunga.

Angka lampu.

Angka gampit-gampit.

Angka mangkuk.

Parkokas pangintopi ni lampu.

Angka sambong.

Pinggan pardupaan.

Inganan ni banggar.

Encel-encel ni pintu ni Bilik Na Sun Badia dohot pintu-pintu parruar ni Bagas Ni Debata.

51Dung sidung dipauli Raja Salomo Bagas Ni Debata disimpan ia ma di bagasan gudang na di bagas i sude perak, sere, dohot angka barang-barang na asing dope na dung dipasahat si Daud amangnia i tu Tuhan.

Currently Selected:

1 RAJA-RAJA 7: LAIAKB

Highlight

Copy

Compare