1 RAJA-RAJA 9
9
Dipatidahon Debata mangulahi diriNia tu si Salomo
(2 Juj. 7:11-22)
1Dung sidung dipajongjong si Salomo Bagas Ni Debata dohot bagas godang ni raja i dohot sude na nisangkaphonNia, 2dipatidahon Tuhan ma mangulahi diriNia tu si Salomo songon na tarjadi di Gibeon. 3Didokkon Tuhan ma tu si Salomo, “Madung Hubege tangiangmu, jana rap dohot on Hupatangkas ma, bahaso bagas na dung nipajongjongmon gabe inganan na mardohonan ma on salolot-lolotna muda giot manyomba Au. Huparate-atehon jana Hujagohon pe inganan on. 4Muda disomba ho Au mardongan roha na ias songon amamu si Daud jana dioloi ho angka uhum dohot parentangKu, 5patulusonKu do janjingKu na tu amamu si Daud i bahaso na tongtong do adong sahalak sian pomparanNia na gabe raja di Israel. 6Tapi muda dihudukkon ho sanga pomparanmu Au jana nada dioloi angka uhum dohot parentangKu gabe manyomba tu angka debata na asing, 7gabe paruaronKu ma bangsongKu Israel sian luat na dung Hulehen di halahi. Au pe tinggalkononKu ma bagas parsombaan na dung Hudokkon gabe inganan na dung mardohonan laho marsomba tu Au. Sanga didia pe halak Israel angkon dilayasi jana dipartatai halak. 8Bagas parsombaan on, angkon gabe tiranggong, pola tehe sude halak na mamolus disi gabe homang jana tarsonggot. Dohonon ni halahi ma, ‘Biasi dibaen Tuhan i songon i tu luat on dohot tu bagas parsombaan on?’ 9Alusan ni halak ma, ‘Hara ni na dung ditinggalkon halahi do Tuhan Debata ni halahi, na maroban ompung ni halahi ruar sian Mesir. Madung disomba halahi angka debata sileban. Hara ni i ma baen diparo Tuhan Parmaraan tu halahi.’ ”
Dos roha ni si Salomo dohot Raja Hiram
(2 Juj. 8:1-2)
10Dua pulu taon honokna si Salomo pauli Bagas Ni Debata dohot bagas godang ni raja i. 11Sude hayu ares na sian Libanon dohot hayu ares na somal bope sude sere na porlu di si Salomo sipakeon tu pambangunan i madung dilehen Raja Hiram disia. Dung sidung karejo i, dilehen Raja Salomo ma tu si Hiram dua pulu kota na di Luat Galilea. 12Dung i kehe ma si Hiram mangaligi, tapi nada jop rohania mida na nilehenna i. 13Ning ia ma tu si Salomo, “Kahanggingku, songon on ma pangalaho ni angka kota na nilehenmi di au?” Hara ni i ma baen na laing didok goar ni luat i Kabul.#9:13 KABUL: Goar on tarbege songon “Kebal” astuanna di hata Ibrani “Inda Mararga”. 14Lobi dope sian opat ribu kilogram sere na nitongos ni si Hiram tu si Salomo.
Denggan ni angka usaho na asing-asing dope sian si Salomo
(2 Juj. 8:3-18)
15Karejo paksa do dibaen Raja Salomo di na pajongjong Bagas Ni Debata dohot bagas godang ni raja i, benteng ni kota i bope dohot manimbun tano sabola Selatan ni kota i. Dos do pangalahona dibaen ia di na pajongjong kota Hasor, Megido dohot Geser. (16Kota Geser i ma kota na niporangi bope na nitaluhon ni halak Mesir najolo, dibunu do halak kota i jana disurbu kota i. Di pudi ni ari dipasahat ma kota i gabe silehen-lehen tu borunia na marbagas dohot si Salomo. 17Gabe si Salomo ma pauli kota i mangulahi.) Marhite karejo paksa muse do dipajongjong si Salomo mangulahi kota Bet-Horon. 18Baalat, Tamar na di Halongonan Juda 19angka kota inganan ni balanjo, angka kota inganan ni kudo dohot angka kareta porang ni raja, dohot sude angka na asing di Jerusalem, Libanon maradu sude sanga di dia sajo pe di bagasan harajaannia, songon na dung disangkaphonnia. 20-21Na mangkarejohon karejo paksa i, dipili si Salomo do sian pomparan ni bangso Kanaan na so dibunu ni halak Israel di na laho mangingani luat i halahi. I ma angka bangso Amori, Het, Peris, Hewi dohot bangso Jebus, lopus sadari on tongtong do gabe hatoban pomparan ni i. 22Anggo halak Israel nada diloas si Salomo gabe hatoban, dibaen do karejo ni halahi gabe tentara, pagawe, panglima, komandan ni pasukan na markareta dohot pasukan na markudo.
23Lima ratus lima pulu pagawe na gabe hasahatan ni halak na karejo paksa di piga-piga inganan sipaulion ni si Salomo.
24Tano na di Habincaran ni kota i ditimbun si Salomo do i dung mimbar daborunia boru ni raja Mesir i sian Kota Ni si Daud tu bagas ni raja na nipajongjong ni si Salomo disia.
25Tolu noli sataon dipasahat si Salomo do haul situtungon dohot haul haluaan di ginjang ni langgatan na nipajongjongnia di Tuhan i. Songon i ma dibaen si Salomo pasidungkon karejo na pauli Bagas Ni Debata.
26Di angkatan lautnia, dipauli Raja Salomo do angka kapal di Esion-Geber na di lambung ni Elot di topi ni Laut Rara na di Luat Edom. 27Disuru Raja Hiram do angka angkatan laut na ummalo, sian angka kapalnia, anso marlayar dohot angkatan laut ni si Salomo. 28Kehe ma halahi marlayar tu Ofir, dioban halahi ma sian i opat bolas ribu kilogram sere di si Salomo.
Currently Selected:
1 RAJA-RAJA 9: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
