1 RAJA-RAJA 6

Si Salomo pauli Bagas Ni Debata

1Di bulan Ziv, i ma bulan paduahon, di taon paopatkon mamarenta si Salomo, opat ratus salapan pulu taon dung ditinggalkon bangso Israel Mesir, mamungka ma si Salomo markarejo pajongjong Bagas Ni Debata. 2Ukuranna di bagasan songon on ma, ginjangna 27 meter, bidangna 9 meter, gincatna 13,5 meter. 3Bilik jolo-jolo ni Bagas Ni Debata i ginjangna 4,5 meter jana bidangna 9 meter, dos dohot bidang ni bagas i. 4Di dingding ni bagas i adong angka jandela na umbidang tu bagasan. 5Di dingding sabola sian pudi dohot sian topi sabola sian duru dipauli angka bilik tamba-tambana na martingkat tolu, ganop tirket 2,2 meter gincatna. 6Bidang ni ganop bilik di tirket parjolo 2,2 meter, di tirket paduahon 2,7 meter jana di tirket patoluhon 3,1 meter. Dingding ni tirket partoru humapal sian dingding ni tirket na di ginjangna, gabe momo ma pasangon angka balok tu bilik tamba-tambana i, nada pola mangalubangi dingding ni Bagas Ni Debata i.

7Angka batu na dipake tu bagas i madung dipasingkop hian di inganan pambuatan ni batu i. Jadi salolot martukang bagas i, sora ni toko, kampak dohot parkokas bosi nada adong i tarbege.

8Pintu ni angka bilik tamba-tambana i di tirket partoru di sabola Selatan ni Bagas Ni Debata i do, jana adong do tangga tu tirket paduahon dohot patoluhon. 9Ujungna dibaen loteng sian papan jana marbingke hayu ares Libanon.

Songon i ma dibaen si Salomo pasidung Bagas Ni Debata i. 10Sidung muse ma angka bilik tamba-tambana na martirket tolu i na nipauli sian duru ni dingding ni bagas i na dipadomu dohot angka balok sian hayu ares Libanon.

11Dung i didokkon Tuhan ma tu si Salomo, 12“Muda burju ho patulus uhum dohot parentangKu, baenonKu do tu ho sanga aha na dung Hujanjihon tu amangmu si Daud. 13Maringanan ma Au di bagas na nipauliMi gabe tongtong Au di tonga-tonga ni bangsongKu Israel. Nada tinggalkononKu halahi.”

Angka panjamaan di Bagas Ni Debata

(2 Juj. 3:8-14)

14Songon on ma dibaen si Salomo pasidungkon Bagas Ni Debata i. 15Sude dingding sabola sian bagasan dilampis dohot hayu ares Libanon, mamungka sian lante lalu tu loteng. Lantena dibaen sian hayu ares na somal. 16Di bagasan bagas i sabola sian pudi dibaen bilik na mamake pamolat sian hayu ares, mamungka sian lante lalu tu loteng. Digoar ma bilik i, Bilik Na Sun Badia, ginjangna 9 meter. 17Bilik na di jolo ni Bilik Na Sun Badia i ginjangna salapan bolas meter. 18Dingding sabola sian bagasan ni bagas i sude dilampis dohot hayu ares Libanon, jana nada tarida dingding batu i. Pangalampis i dipajeges dope marhite ukiran ni batu ni labu dohot angka bunga na kombang.

19Bilik Na Sun Badia na dipauli di bagasan Bagas Ni Debata i dipasingkop baen inganan ni Poti Parjanjian ni Tuhan do. 20-22Anggo bilik i ginjangna, bidangna dohot gincatna rap sambilan meter be. Langgatanna dibaen sian hayu ares Libanon. Di pintu laho masuk tu bilik i dipahirtang rante sere. Sude Bagas Ni Debata i sabola sian bagasan dohot Bilik Na Sun Badia bope langgatanna dilampis do dohot sere.

23Di bagasan Bilik Na Sun Badia i dibaen muse dua patung ni angka kerub na nibaen sian hayu zetun. Gincat ni patung na dua i rap 4,4 meter be, 24-26ukuranna dohot potonganna dos. Rap marhabong dua be, ganop habong 2,2 meter ginjangna. Jarak ni habong patung na sada tu habong ni patung na sada nari 4,4 meter. 27Hombar do dipayakkon patung na dua i di Bilik Na Sun Badia i, gabe dais do ujung ni habong na sada tu dingding, ujung ni habong na sada nari padais di tonga-tonga ni bilik i. 28Patung na marhabong i dua-dua dilampis dohot sere.

29Sude dingding sabola sian bagasan di Bagas Ni Debata i dipajeges dohot ukiran ni gambar ni angka kerub, angka batang ni kurma dohot bunga-bunga na kombang. 30Lantena i pe dilampis do dohot sere.

31Di pintu hamasuhan tu Bilik Na Sun Badia i, dibaen dua pintu sian hayu zetun. Bagian parginjang ni pintu i potonganna mangalondut pincur di tonga-tonga. 32Pintu na dua i dihiasi do dohot ukiran ni angka kerub, batang ni kurma dohot bunga-bunga na kombang. Papan ni pintu i dohot patung ni angka kerub bope ukiran ni batang ni kurma i dilampis do sude dohot sere.

33Di pintu hamasuhan tu bagasan bilik parjolo i, i ma bilik na bidang i dibaen do bingke ni pintu i maropat sogi potonganna sian hayu zetun. 34Dibaen muse ma sian hayu ares na somal dua karambar pintu rap tarlompit dua-dua. 35Di papan ni pintu i diukirkon angka kerub, batang ni kurma dohot bunga-bunga na kombang. Sude do ukiran i marlampis sere.

36Di jolo ni Bagas Ni Debata i dibaen do alaman. Dihuliangi tembok do alaman i, na dibaen sian salampis hayu ares Libanon ganop tolu lampis batu.

37Di bagasan taon paopatkon, di bulan Ziv dibaen ma batu ojahan ni Bagas Ni Debata, 38jana di taon pasabolaskon di bulan Bul, i ma bulan pasalapankon sidung ma Bagas Ni Debata i hombar tu na dung ditahi hian; jadi pitu taon ma lolotna paulihon Bagas Ni Debata i.

Currently Selected:

1 RAJA-RAJA 6: LAIAKB

Highlight

Copy

Compare