1 RAJA-RAJA 5

Pangkobasion ni si Salomo giot pajongjong Bagas Ni Debata

(2 Juj. 2:1-18)

1Torus do Raja Hiram sian Tirus, marale-ale dohot Raja Daud. Jadi dung tarbege tu Raja Hiram, hape si Salomo do gabe raja manggonti si Daud amangna i, disuru ia ma suruannia manopot si Salomo. 2Dung i gabe martona ma si Salomo tu si Hiram, 3“Raja Hiram na niparsangapan! Tontu na dung diboto tuan i do, anggo damang si Daud angkon na sai marporang do ia mangalo musu di angka luat na humaliang ia. Hara ni i ma dibaen na so sanga tarpajongjong damang bagas inganan parsombaan tu Tuhan Debatania, salolot so dilehen Tuhan dope hamonangan tusia mangalo sude musuna. 4Tapi anggo saonnari, madung dilehen Tuhan Debatangku hadamean di sude luat na hurajai. Nada adong na marmusu tu au, jana nada adong muse be hasusaan. 5Madung dijanjihon Tuhan tu damang si Daud, ‘Anakmu na giot angkatonKi gabe raja gontimu, i do na giot pajongjong bagas paribadatan di Au.’ Hara ni i, Raja Hiram na niparsangapan, au si Salomo, madung huputuskon laho pajongjong bagas i. 6Madung diboto raja i anggo rayatku nada adong na malo manaba hayu songon rayat ni tuan i. Hara ni i hupangido anso ra nian tuan i manyuru rayat ni tuan i manaba hayu Ares Libanon i di au. Husuru pe rayatku mangurupi halahi, jana sanga sadia gaji na nitontuhon ni tuan i di halahi, hugarari pe.”

7Jop situtu roha ni Raja Hiram manjagit barita i. Ning ia ma, “Nipuji ma Tuhan sadari on angke madung dilehen ia di si Daud sada anak na bisuk gabe raja ni bangso na godang i.” 8Dung i ditongos si Hiram ma alusnia tu si Salomo, “Madung hujagit barita pangidoan ni tuan i, jana huoloi ma i. Hupasingkop pe hayu Ares Libanon dohot hayu Ares na somal songon na nipangido ni tuan i. 9Obanon ni angka rayatki ma hayu i mijur sian Libanon tu laut. Ditambat halahi ma hayu i disi gabe rakit, dung i diumbang ma i manopi-nopi lalu tu inganan na nitontuhon ni tuan i. Disi ma nibukaan angka rakit i jana dilehen tu rayat ni tuan i anso dipauli satorusna. Hupangido sian tuan i anso dipasingkop panganon ni angka halak sabagas godangku.”

10Dung i dilehen si Hiram ma di si Salomo sude hayu Ares Libanon dohot hayu Ares na somal sanga sadia na porlu disia. 11Jana baen sipanganon ni angka halak ni si Hiram i ganop taon dilehen si Salomo ma tu si Hiram 200.000 kaleng gandum dohot 400.000 liter miak zetun na tulen.

12Tutu do dipatulus Tuhan i janjiNa jana dilehen bisuk tu si Salomo. Gabe tubu ma parale-aleon na togu di si Hiram dohot si Salomo lalu dipudun halahi ma janji ni halahi.

13Dilehen si Salomo ma 30.000 halak halaklahi sian sude Israel na markarejo paksa, jana 14diangkat si Adoniram gabe panjago ni halahi. Dibagi si Salomo ma halahi gabe tolu bagian, sabagian sampulu ribu halak. Ganop rombongan margonti ma tinggal sasabulan di Libanon jana dua bulan di bagas. 15Dilehen si Salomo dope 80.000 halak na manuhil batu sian dolok dohot 70.000 halak mamorsan batu i. 16Diangkat ia ma 3.300 halak gabe mandur manjago karejo i. 17Hombar tu parenta ni si Salomo i dituhil halahi ma batu na godang-godang jana na jeges na gabe ojahan ni Bagas Ni Debata i. 18Songon i ma parkarejo na nisuru ni si Salomo dohot parkarejo na nisuru ni si Hiram dohot angka halak na sian kota Gebal pasingkop batu dohot hayu laho pauli Bagas Ni Debata i.

Currently Selected:

1 RAJA-RAJA 5: LAIAKB

Highlight

Copy

Compare