Nɔ̀ɓà 3
3
Eɖóún nììn dyú-gàà ɓěɔ̀
1Ti ɓɛ́ Bounɓoɔ̀ wùɖù zɔ̃̌ɔ̀ kà Mózè gbo ɖé Sányà-tòɖòɔ̀ dyaa, kǎà Eɖóún kè Mózè nììn gbǒ-xwíníínɔ̀ jè nyu kà nìɛ̀. 2Eɖóún ɓéɖé ma dyú-gàà hĩinyɛ. Wa nyɛ́nɛ́ mɔ̀ Náɖà mɔ̀à nyíɔ́-dyùɔ̀ kɛ kè Àbíhùɛ̀ kè Ɛ̀ɖɛ̀ázà ɔ kè Ìfámà. 3Nyɔ ɓěa mɔ̀ Eɖóúnɛ̀ dyú-gàà ɓě ɓɛ́ ɔ po ma cáná dúún, ɓɛ́ wa ké sáa-zà-nyɔ̀ ɓě jǔɛ. Ɔ po ma wa kũ̀à kɔ̃ún, ɓɛ́ wa ké ɖé sáa-zà-pàɔ̀ mú kũ̀à nyu. 4Kɛɛ Náɖà kè Àbíhùɛ̀ mɛ́ìn ma ɓó Bounɓoɔ̀ dyúa, ɖé Sányà Gbǎùn-fúɖúáɔ̀ kɔ̃, sepóɛɖé wa fɔ̃ ma nyɔ́ún-nɔ̀mɔ̀-ɖɛ̀ kɔ̃̀ nyɛ Bounɓoɔ̀ se ma wuɖu kɔ̃ zà kɛɛ jè. Wa se ma dyú ɖò ɓíɖíi sè. Ɔ jèɛɛ, Ɛ̀ɖɛ̀ázà kè Ìfámà ɖòùn mɔ̀ ma sáa-zà-nyɔ̀ ti ɓɛ́ wa ɓǎ Eɖóún nì ma cĩ́ɛń keɛ.
Wa gã Ɖíìváà-nyɔ̀ ɓěɔ̀ ɓɛ́ wa ké sáa-zà-nyɔ̀ ɓěɔ̀ gbo kpá
5Ti ɖòɛ̀ ɓaɖaa, Bounɓoɔ̀ cɛ̃ɛ ma Mózè gbo, ké ɔ ɖá, 6“Dyà Ɖíìváà nììn xwéɖé-dùɔ̀ ɓó Eɖóún mɔ̀à sáa-zà-nyɔ̀ vɛ̀nɛ̀ɔ̀ kɛɛ gbo, ɓɛ́ wa ké ɔ gbo kpá. 7Wa mɔ̀ nyɔ ké kũ̀à ɓě ɓɛ́ ɔ kè nyɔ séín ɓěɔ̀ mɔ́ wa ké nyu ɖé ní jàɖàìn-gbòɔ̀ múɛɛ nyu-nyɔ̀ jǔ. Ɔ mɔ̀ jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛ. 8Wa mɔ̀ nyɔ ɓéɖé ɖɛ séín dè ɖé ní jàɖàìn-gbòɔ̀ múin nyɛɛ jè kpé gbo. Ké wa mɔ̀ nyɔ ké kũ̀à ɓěɔ̀ nyu ɓó Éézùɖùɛ̀-dyù ɓěɔ̀ bìì ɖé ní jàɖàìn-gbòɔ̀ mú. 9Hwɔ̀ìn Ɖíìváà-nyɔ̀ ɓěɔ̀ ɖé Eɖóún kè ɔ dyú-gàà ɓěɔ̀ gbo dyí sɔ̀ìn ɖé Éézùɖùɛ̀-dyù ɓěɔ̀ hwìɛ̀. Wa nììn kũ̀à wa ɓéɖé wa ké nyuɛɛ mɔ̀ Eɖóún kè ɔ dyú-gàà ɓěɔ̀ gbo-kpá-kpá. 10M̀ mɛ po Eɖóún kè ɔ dyú-gàà ɓěɔ̀ wáká, ɓɛ́ wa ké sáa-zà-kũ̀àɔ̀ nyu. Kɛɛ nyɔ kà kò ɖò dyi ní jàɖàìn-gbòɔ̀ bũ̌in xwɛ̃́ìn ní, wa mɛ ɖáɓá nyɔɔ̀.”
11Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, 12“Dyéɛ, ḿ ɖǎ Ɖíìváà-nyɔ̀ ɓěɔ̀ gã, ké ḿ ɖǎ wa ɖé Éézùɖùɛ̀-dyù ɓěɔ̀ hwìɛ̀ zà. Wa ɖǎ Éézùɖùɛ̀-dyù ɓěɔ̀ nyíɔ́-dyù séín ɓěɔ̀ pá dyí ɖú. Ɖíìváà-nyɔ̀ ɓěɔ̀ mɔ̀ ní kɔ̃̀ɔ̀-ɖɛ̀, 13sepóɛɖé nyíɔ́-dyù séín ɓěɔ̀ mɔ̀ ma ní kɔ̃̀ɔ̀-ɖɛ̀ kĩ́ín. Wé kɔ̃̀ ɓaɖa ɓɛ́ ḿ ɖáɓá zɔ̃̌ɔ̀ kà nyíɔ́-dyù séín ɓěɔ̀ ɖé Íjè-ɓòɖòɔ̀ kɔ̃ɛɛ, ḿ po ma nyíɔ́-dyù séín nì ɖé Éézùɖùɛ̀-dyù ɓěɔ̀ hwìɛ̀ kɛɛ wáká ɓó ḿ bìì, kɛbì ɔ mɛ mɔ̀ nyɔǔn-dyù mɔɔ nyúà-ɖɛ̀ kɛ. Ɖíìváà-nyɔ̀ ɓěɔ̀ mɔ̀ ní kɔ̃̀ɔ̀-ɖɛ̀ ɓó kàǔn. Mɔ̄ mɔ̀ Bounɓoɔ̀.”
Ɖíìváà-nyɔ̀ ɓěɔ̀ zɛɖɛ-zɛɖɛ
14Hwɛ̀ ké Bounɓoɔ̀ cɛ̃ɛ ma Mózè gbo ɖé Sányà Gbǎùn-fúɖúáɔ̀ kɔ̃, ké ɔ ɖá, 15“Zɛɖɛ Ɖíìváà xwéɖé-dùɔ̀ gàa-dyù séín ɓěɔ̀ dyììn ɖé wa ɓǎ ɓěɛ̀ gbǒ-xwíníín ɖò-ɖò ɓěɔ̀ mú. Gàa-dyù séín ɓě ɓɛ́ wa nyuá dɛ̀nɛ̀ dyúáɖò mɔɔ zi kɔ̃ɛɛ, m̀ mɛ zɛɖɛ wa.” 16Ké Mózè zɛɖɛ ma wa kà Bounɓoɔ̀ nyuɛ ma kà ɔ gbo cɛ̃ɛ kɛ. 17Ɖíìváà nììn dyú ɓěɔ̀ nyɛ́nɛ́ mɔ̀ Gésɔ̀ùn kè Kóhà ɔ kè Mɛ̀wáɖáwìɖì. 18Ké Gésɔ̀ùn nììn dyú ɓěɔ̀ nyɛ́nɛ́ kɛà kɛ̀ dyììn ɖé waà gbǒ-xwíníín ɓěɔ̀ mú. Wa mɔ̀ Ɖínì kè Símì. 19Ké Kóhà nììn dyú ɓěɔ̀ nyɛ́nɛ́ kɛà kɛ̀ dyììn ɖé waà gbǒ-xwíníín ɓěɔ̀ mú. Wa mɔ̀ Ámànàùn kè Ízà kè Hɛ́bɔ̀nɔ̀ ɔ kè Dyùzíè. 20Ké Mɛ̀wáɖáwìɖì nììn dyú ɓěɔ̀ nyɛ́nɛ́ kɛà kɛ̀ dyììn ɖé waà gbǒ-xwíníín ɓěɔ̀ mú. Wa mɔ̀ Máɖì kè Músì. Nyɔ ɓěa mɔ̀ Ɖíìváà nììn xwíníín-dyù ɓě ɓɛ́ wa mɔ̀ gbǒ-xwíníín ɓěɛ̀ ɓǎ kɛ.
21Gésɔ̀ùn nììn xwíníín-dyù ɓěɔ̀ mɔ̀ Ɖínì nììn gbǒ-xwíníín-nyɔ̀ ɓěɔ̀ kè Símì nììn gbǒ-xwíníín-nyɔ̀ ɓěɔ̀. Nyɔ ɓěa mɔ̀ Gésɔ̀ùn nììn xwíníín-dyù ɓěɔ̀. 22Waà gàa-dyù séín ɓě ɓɛ́ wa nyuá dɛ̀nɛ̀ dyúáɖò mɔɔ zi kɔ̃ɛɛ poìn dyí mɔ̀ nyɔ-kpò táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ hm̀m̌. 23Gésɔ̀ùn nììn gbǒ-xwíníín-nyɔ̀ ɓěɔ̀ nììn jàɖàìn-gbò ɓěɔ̀ ɓéɖé ɓɛ́ wa ké ma ɖé Bounɓoɔ̀ nììn jàɖàìn-gbòɔ̀ ɖeín dyí hwɔ, hwɔ ɖéɛ dyóɖó-dyi-kpáìn-naínɔ̀ dyí. 24Ɛ̀ɖìásà ɓɛ́ ɔ mɔ̀ ma Ɖáèɛ̀ dyú-gàà kɛɛ mɔ̀ Gésɔ̀ùn nììn gbǒ-xwíníínɔ̀ nyɔ vɛ̀nɛ̀. 25Ɖɛ ɓě kɔ̃̀ jè Gésɔ̀ùn nììn xwíníín-dyù ɓěɔ̀ kɔ̃̀ ma kpé gbo ɓá Bounɓoɔ̀ jàɖàìn-gbòɔ̀ dyíɛɛ mɔ̀ jàɖàìn-gbòɔ̀ faà-ɖɔ̀ ɓěɔ̀ kèɛ̀ kɔ̃in-ɓáìn-ɖɛ̀ ɓěɔ̀ kè faà-ɖɔ̀ ɓó jàɖàìn-gbò-wɔ̃̀ɔ̀ jè 26kè gba-gba nìà jàɖàìn-gbòɔ̀ kè sáa-kɔ̃-zàìn-gbààɔ̀ ɖeiɛɛ faà-ɖɔ̀ ɓěɔ̀ kè kɔ̃̀pã́ùn gànáɔ̀ gbǒ-wɔ̃̀ɔ̀ faà-ɖɔ̀ɔ̀ ɔ kè jàɖàìn-gbòɔ̀ ɖúú ɓěɔ̀. Wa mɔ̀ ma kũ̀à séín ɓá ɖɛ ɓěa dyíɛɛ nyu-nyɔ̀.
27Kóhà nììn xwíníín-dyù ɓěɔ̀ mɔ̀ Ámànàùn nììn gbǒ-xwíníín-nyɔ̀ ɓěɔ̀ kè Ízà nììn gbǒ-xwíníín-nyɔ̀ ɓěɔ̀ kè Hɛ́bɔ̀nɔ̀ nììn gbǒ-xwíníín-nyɔ̀ ɓěɔ̀ ɔ kè Dyùzíè nììn gbǒ-xwíníín-nyɔ̀ ɓěɔ̀. Nyɔ ɓěa mɔ̀ Kóhà nììn xwíníín-dyù ɓěɔ̀. 28Waà gàa-dyù séín ɓě ɓɛ́ wa nyuá dɛ̀nɛ̀ dyúáɖò mɔɔ zi kɔ̃ɛɛ poìn dyí mɔ̀ ma nyɔ-kpò táázĩ̀ìn mɛ̀nɛ̌ìn-tã kè hɔ̃dɛ̀ɖɛ̀ mɛ̀nɛ̌ìn-ɖò. Wa nììn kũ̀à mɔ̀ ɓɛ́ wa ké ɖɛ ɓě nìà ɖé Bounɓoɔ̀ jàɖàìn-gbòɔ̀ múɛɛ dyí gmɔ̀. 29Kóhà nììn gbǒ-xwíníín-nyɔ̀ ɓěɔ̀ nììn jàɖàìn-gbò ɓěɔ̀ ɓéɖé ɓɛ́ wa ké ma ɖé Bounɓoɔ̀ jàɖàìn-gbòɔ̀ zɔ̃̌in-wàkáɔ̀ kɔ̃ dyí hwɔ. 30Ɛ̀ɖìzáfàùn ɓɛ́ ɔ mɔ̀ ma Dyùzíèɛ̀ dyú-gàà kɛɛ mɔ̀ Kóhà nììn gbǒ-xwíníínɔ̀ nyɔ vɛ̀nɛ̀. 31Ɖɛ ɓě kɔ̃̀ jè wa kɔ̃̀à kpé gboɛɛ mɔ̀ gma-gbɔ̀ɖɔ̀ɔ̀ kè téɓèɖèɔ̀ kè ɖáùnpò-kɔ̃-dè-ɖɛ̀ɔ̀ kè sáa-kɔ̃-zàìn-gbààɔ̀ kè nyɔ́ún-nɔ̀mɔ̀-ɖɛ̀ kɔ̃-fɔ̃̀ìn-gbààɔ̀ kè ɖɛ ɓě ɓɛ́ sáa-zà-nyɔ̀ ɓěɔ̀ nyùìn kà kũ̀à mú ɖé Bounɓoɔ̀ jàɖàìn-gbòɔ̀ múɛ ɔ kè faà-ɖɔ̀ nìà ɖé Pá Hwɛ̀ Mú Mìɔɔ̀ wɔ̃ɔ̀ gboɛ. Wa mɔ̀ ma kũ̀à séín ɓá ɖɛ ɓěa dyíɛɛ nyu-nyɔ̀.
32Ɛ̀ɖɛ̀ázà mɔ̀à Eɖóún ɓɛ́ ɔ mɔ̀à sáa-zà-nyɔ̀ vɛ̀nɛ̀ɔ̀ kɛɛ dyú-gààɔ̀ kɛɛ mɔ̀ Ɖíìváà-nyɔ̀ ɓěɔ̀ nììn nyɔ vɛ̀nɛ̀. Ɔ mɔ̀ ma nyɔ ɓě ɓɛ́ wa mɔ̀à ɖé Bounɓoɔ̀ jàɖàìn-gbòɔ̀ mú-kũ̀à-nyu-nyɔ̀ ɓěɛɛ wuɖuí-kɔ̃̀-nyɔ̀.
33Mɛ̀wáɖáwìɖì nììn xwíníín-dyù ɓěɔ̀ mɔ̀ Máɖì nììn gbǒ-xwíníín-nyɔ̀ ɓěɔ̀ kè Músì nììn gbǒ-xwíníín-nyɔ̀ ɓěɔ̀. Nyɔ ɓěa mɔ̀ Mɛ̀wáɖáwìɖì nììn xwíníín-dyù ɓěɔ̀. 34Waà gàa-dyù séín ɓě ɓɛ́ wa nyuá dɛ̀nɛ̀ dyúáɖò mɔɔ zi kɔ̃ɛɛ mɔ̀ nyɔ-kpò táázĩ̀ìn mɛ̀nɛ̌ìn-ɖò kè hɔ̃dɛ̀ɖɛ̀ sɔ̃́. 35Zúwìɖìè ɓɛ́ ɔ mɔ̀ ma Áɓìháìɛ̀ dyú-gàà kɛɛ mɔ̀ Mɛ̀wáɖáwìɖì nììn gbǒ-xwíníínɔ̀ nyɔ vɛ̀nɛ̀. Wa nììn jàɖàìn-gbò ɓěɔ̀ ɓéɖé ɓɛ́ wa ké ma ɖé Bounɓoɔ̀ jàɖàìn-gbòɔ̀ xwía-wàkáɔ̀ kɔ̃ dyí hwɔ. 36Ɖɛ ɓě ɓɛ́ Mɛ̀wáɖáwìɖì nììn gbǒ-xwíníínɔ̀ kɔ̃̀ ma kpé gboɛɛ mɔ̀ Bounɓoɔ̀ cu-pĩ̀à ɓěɔ̀ kèɛ̀ kɔ̃-cɛ̃̀ìn-cù ɓěɔ̀ kèɛ̀ cúè-ɓò ɓěɔ̀ kè waà kɔ̃-dè-ɖɛ̀ ɓěɔ̀ ɔ kè ɖɛ tɔ̀ɔ̀ séín ɓá wa dyíɛ. Wa mɔ̀ ma kũ̀à séín ɓá ɖɛ ɓěa dyíɛɛ nyu-nyɔ̀. 37Ɖɛ tɔ̀ɔ̀ ɓě wa kɔ̃̀ ma kpé gboɛɛ mɔ̀ Bounɓoɔ̀ jàɖàìn-gbòɔ̀ gba-gbaɔ̀ nììn cúè-ɓò ɓěɔ̀ kè wa nììn kɔ̃-dè-ɖɛ̀ ɓěɔ̀ kè waà ɓóɖóún-kɔ-cù ɓěɔ̀ ɔ kè waà ɖúú ɓěɔ̀.
38Nyɔ ɓě kɔ̃̀ nììn jàɖàìn-gbò ké ma kà ɓó Bounɓoɔ̀ jàɖàìn-gbòɔ̀ dyúa dyi nyànà ɖéɛ dyóɖó-xwáɖáún-wóɖóìn-wàkáɔ̀ kɔ̃ɛɛ mɔ̀ ma Mózè kè Eɖóún ɔ kè Eɖóúnɛ̀ dyú-gàà ɓěɔ̀. Wa mɔ̀ nyɔ ɓéɖé ma sáa-zà-kũ̀à nì ma ɖé Bounɓoɔ̀ jàɖàìn-gbòɔ̀ múɛɛ jè kpé gbo. Wa mɔ̀ ma ɖɛ kã̀ìn séín ɓá Éézùɖùɛ̀-nyɔ̀ ɓěɔ̀ dyíɛɛ wa bìì nyu-nyɔ̀. Ɔ jǔ ké nyɔ kà kò ɖò dyi Bounɓoɔ̀ jàɖàìn-gbòɔ̀ bũ̌in xwɛ̃́ìn ní, wa mɛ ɖáɓá nyɔɔ̀. 39Ti ɓɛ́ Mózè kè Eɖóún zɛɖɛ ma kà Ɖíìváà-nyɔ̀ séín ɓěɔ̀ dyììn ɖé waà gbǒ-xwíníín ɓěɔ̀ mú kà Bounɓoɔ̀ nyuɛ ma kà cɛ̃ɛ kɛɛ, waà gàa-dyù ɓě ɓɛ́ wa nyuá dɛ̀nɛ̀ dyúáɖò mɔɔ zi kɔ̃ɛɛ mɔ̀ ma nyɔ-kpò táázĩ̀ìn kpáɖá-nyɔ sè sɔ̃́.
Ɖíìváà-nyɔ̀ ɓěɔ̀ ɖú nyíɔ́-dyù ɓěɔ̀ pá dyí
40Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo ɖe, ké ɔ ɖá, “Zɛɖɛ Éézùɖùɛ̀-dyù ɓěɔ̀ nyíɔ́-dyù-gàà séín ɓě ɓɛ́ wa nyuá dɛ̀nɛ̀ dyúáɖò mɔɔ zi kɔ̃ɛ. M̀ mɛ céè wa ɖò-ɖò séínɛ̀ nyɛ́nɛ́ céè-ɖɛ̀ ɖò mú. 41Ké m̀ mɛ po Ɖíìváà-nyɔ̀ ɓěɔ̀ wáká ɓó ḿ bìì, ɓɛ́ wa ké nyíɔ́-dyù-gàà séín nì ɖé Éézùɖùɛ̀-dyù ɓěɔ̀ hwìɛ̀ kɛɛ pá dyí ɖú. Ké m̀ mɛ po Ɖíìváà-nyɔ̀ ɓěɔ̀ nììn nyúà-ɖɛ̀ ɓěɔ̀ wáká ɓó ḿ bìì, ɓɛ́ wa ké Éézùɖùɛ̀-dyù ɓěɔ̀ nììn nyúà-ɖɛ̀ ɓěɔ̀ nyíɔ́-dyù ɓěɔ̀ pá dyí ɖú. Mɔ̄ mɔ̀ Bounɓoɔ̀.” 42Ɔ jèɛɛ, Mózè zɛɖɛ ma Éézùɖùɛ̀-nyɔ̀ ɓěɔ̀ nyíɔ́-dyù ɓěɔ̀ kà Bounɓoɔ̀ nyuɛ ma kà ɔ gbo cɛ̃ɛ kɛ. 43Ké Éézùɖùɛ̀-nyɔ̀ ɓěɔ̀ nyíɔ́-dyù-gàà séín ɓɛ́ wa nyuá ma dɛ̀nɛ̀ dyúáɖò mɔɔ zi kɔ̃, kɔ̃̀ nyɛ́nɛ́ Mózè céè ma céè-ɖɛ̀ɔ̀ múɛɛ mɔ̀ nyɔ-kpò táázĩ̀ìn kpáɖá-nyɔ sè sɔ̃́ kè hɔ̃dɛ̀ɖɛ̀ sɔ̃́ kè kpáɖá-nyɔ tã ɓaɖa-bùè sè tã.
44Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, 45“Po Ɖíìváà-nyɔ̀ ɓěɔ̀ wáká, ɓɛ́ wa ké ní kɔ̃̀ɔ̀-ɖɛ̀ jǔ, ɓɛ́ wa ké Éézùɖùɛ̀-dyù ɓěɔ̀ nyíɔ́-dyù-gàà ɓěɔ̀ pá dyí ɖú. Ké m̀ mɛ po Ɖíìváà-nyɔ̀ ɓěɔ̀ nyúà-ɖɛ̀ ɓěɔ̀ wáká, ɓɛ́ wa ké ní kɔ̃̀ɔ̀-ɖɛ̀ jǔ, ɓɛ́ wa ké Éézùɖùɛ̀-dyù ɓěɔ̀ nyúà-ɖɛ̀ ɓěɔ̀ nyíɔ́-dyù ɓěɔ̀ pá dyí ɖú. Mɔ̄ mɔ̀ Bounɓoɔ̀. 46Kà ɓɛ́ Éézùɖùɛ̀-dyù ɓěɔ̀ nyíɔ́-dyù ɓěɔ̀ vòà dyí mìɔ, ké wa zĩ̀ìn kà Ɖíìváà-nyɔ̀ ɓěɔ̀ nyɔ-kpò hɔ̃dɛ̀ɖɛ̀ sɔ̃́ kè kpáɖá-nyɔ tã ɓaɖa-bùè sè tã kɔ̃ɛɛ, wa mɛ gbǎà gàa-dyù ɓěɔ̀ nyɔ jĩ̀ kà ɓɛ́ wa zĩ̀ìn kà wa kɔ̃ɛ. 47M̀ mɛ kpɔ̃ cɛ́kò hm̀m̌ wa ɖò-ɖò xwaún dyììn ɖé kà sáa-zà-nyɔ̀ ɓěɔ̀ nììn cɛ́kò nyu nìɛ̀ kɛɛ mú. Géwàɖà-pĩ̀à kpáɖá-nyɔ ɖò sɔ̀ cɛ́kò dyúáɖò mú. 48Ké m̀ mɛ nyí wíɖíɔ̀ Eɖóún kè ɔ dyú-gàà ɓěɔ̀, ɓɛ́ ɔ ké nyíɔ́-dyù-gàà zi kɔ̃ ɓěɔ̀ gbǎàìn-wìɖì jǔ.” 49Ɔ jèɛɛ, Mózè kpɔ̃ ma wíɖí ɓá ma kà nyíɔ́-dyù ɓěɔ̀ gbǎà jè dyíɛɛ sɔ̀ìn ɖé nyɔ jĩ̀ kà ɓɛ́ wa zĩ̀ìn ma kà Ɖíìváà-nyɔ̀ ɓě ɓɛ́ wa ɖǎ ma kà gbǎà kɛ kɔ̃ɛɛ xwaún. 50Wíɖí ɓɛ́ ɔ kpɔ̃ ma kà Éézùɖùɛ̀-nyɔ̀ ɓěɔ̀ nyíɔ́-dyù ɓěɔ̀ xwaún wɛ̃ɛ mɔ̀ ma cɛ́kò táázĩ̀ìn ɖò kè hɔ̃dɛ̀ɖɛ̀ tã kè kpáɖá-nyɔ tã sè hm̀m̌ dyììn ɖé kà sáa-zà-nyɔ̀ ɓěɔ̀ nììn cɛ́kò nyu nìɛ̀ kɛɛ mú. 51Ké Mózè ɖú ma wa gbǎàìn-wìɖìɔ̀ dyí, ké ɔ nyíɛ ma Eɖóún kè ɔ dyú-gàà ɓěɔ̀ kà Bounɓoɔ̀ nyuɛ ma kà ɔ gbo cɛ̃ɛ kɛ.
Currently Selected:
Nɔ̀ɓà 3: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
