Nɔ̀ɓà 4
4
Ɖíìváà-nyɔ̀ ɓě mɔ̀à Kóhà nììn xwíníín-dyù ɓěɔ̀ kɛɛ nììn kũ̀à
1Hwɛ̀ ké Bounɓoɔ̀ cɛ̃ɛ ma Mózè kè Eɖóún gbo, ké ɔ ɖá, 2“Ɓě zɛɖɛ Kóhà nììn xwíníín-dyù ɓěɔ̀ ɖé Ɖíìváà-nyɔ̀ ɓěɔ̀ hwìɛ̀ dyììn ɖé kà wa ɓǎà gbǒ-xwíníín ɓěɔ̀ nyu nìɛ̀ kɛɛ mú. 3Wa mɛ mɔ̀ gàa-dyù ɓě ɓɛ́ wa nyuá zɔ̃ kpáɖá-nyɔ ɓaɖa-bùè ké zɔ̃ kpáɖá-nyɔ sɔ̃́ ɓaɖa-bùè dyɛ̀ìn nyɛ. Wa mɛ mɔ̀ nyɔ séín ɓě ɓɛ́ wa ɓɛ́ìn ɖé jàɖàìn-gbò kɔ̃̀ mú ḿ kè ní nyɔ ɓěɔ̀ dyéàìn nyɛɛ mú kũ̀à nyuɛ kɛ.
4“Kóhà nììn xwíníín-dyù ɓěɔ̀ nììn kũ̀à wa kɔ̃̀ ɖé ní jàɖàìn-gbòɔ̀ múɛɛ ɓá ɖɛ zi mú hwɛ̀ǐn ɓěɔ̀ jè dyí. 5Ɔ dyiá jàɖàìn-gbòɔ̀ daí-zàìn-tì jǔǐn, Eɖóún kè ɔ dyú-gàà ɓěɔ̀ mɛ dyá ɖéɛ xwíníín, ɓɛ́ wa ké faà-ɖɔ̀ nìà ɓó gma-gbɔ̀ɖɔ̀ɔ̀ dyúa kɛɛ dyií zà, ɓɛ́ wa kéɛ gma-gbɔ̀ɖɔ̀ɔ̀ kɔ̃in soɖo. 6Ɔ ɖǎ ná nìǐn, wa mɛ soɖoɛ dyóún-ɓìɖǐɛ̀ kúɖúù ɖò kɔ̃in, nìí ɓɛ́ wa ké ɓùɖǔù-ɖɔ̀ ɖò ɓóɛ kɔ̃in soɖo, ɓɛ́ wa kéɛ ɔ ɓéɖéìn-cù ɓěɔ̀ ɖé gbɛ̌ɛ̀ ɓě nìà ɔ wĩin nyɛɛ mú sṹ.
7“Ké wa mɛ soɖo ɓùɖǔù-ɖɔ̀ ɓó téɓèɖè kɔ̃̀ kɔ̃ ɓɛ́ wa dèà bɛɖɛɛ̀ ɓɛ́ wa nyíà mɔ̄ Bounɓoɔ̀ kɛɛ kɔ̃ dyi, ɓɛ́ wa ké ɓó péɖétè ɓěɔ̀ kè kópò ɓěɔ̀ kè gbòɖòò ɓěɔ̀ ɔ kè kɛ̀ɓɛ̀ɛ̀ ɓě nìà ɓó náá-ɖɛ̀-sàǎ-zàìn-ɖɛ̀ ɓěɔ̀ bììɛɛ dè. Ní bɛɖɛɛ̀ɔ̀ mɛ nì téɓèɖèɔ̀ kɔ̃ kánáá pū. 8Sɔ̀ìn ɓóɛ gboɛɛ, wa mɛ soɖoɛ ɖɔ zĩ-zã kɔ̃in, ɓɛ́ wa ké dyóún-ɓìɖǐɛ̀ kúɖúù ɓó ɖɔɔ̀ kɔ̃in soɖo. Ɔ ɖǎ ná nìǐn, wa mɛ sṹɛ ɓéɖéìn-cù ɓěɔ̀ ɖé gbɛ̌ɛ̀ ɓě nìà ɔ wĩin nyɛɛ mú.
9“Ké wa mɛ ɖú ɓùɖǔù-ɖɔ̀ ɖò dyí ɖe, ɓɛ́ wa kéɛ ɖáùnpò-kɔ̃-dè-ɖɛ̀ɔ̀ kè ɖáùnpò ɓě mɔ̀à ce-tò-nyɔ̀ɛɛ kɔ̃in soɖo. Ké kà dyúáɖòɔ̀ kǎà wa mɛ nyu ɖáùnpò tĩ́ɔ-dyí-zàìn-ɖɛ̀ ɓěɔ̀ kèɛ̀ tɛ́nɛ́ɛ̀ ɓěɔ̀ ɔ kèɛ̀ ɔ́ɖè-cànàɔ̀ mú-po-ɖɛ̀ séín ɓěɔ̀. 10Ɔ ɖǎ ná nìǐn, wa mɛ bĩìn ɖáùnpò-kɔ̃-dè-ɖɛ̀ɔ̀ kè ɖɛ séín ɓáa dyíɛɛ dyóún-ɓìɖǐɛ̀ kúɖúù dyi, ɓɛ́ wa kéɛ ɓóɛ ɔ ɓéɖéìn-ɖɛ̀ɔ̀ kɔ̃ dè.
11“Ké wa mɛ soɖo góò-gbàà mɔ̀à nyɔ́ún-nɔ̀mɔ̀-ɖɛ̀ kɔ̃-fɔ̃̀ìn-ɖɛ̀ɔ̀ kɛɛ ɓùɖǔù-ɖɔ̀ kɔ̃in, ɓɛ́ wa ké dyóún-ɓìɖǐɛ̀ kúɖúù ɓóɛ kɔ̃in soɖo, ɓɛ́ wa kéɛ nììn ɓéɖéìn-cù ɓěɔ̀ ɖé gbɛ̌ɛ̀ ɓě nìà ɔ wĩin nyɛɛ mú sṹ.
12“Ké wa mɛ ɖú ɖɛ tɔ̀ɔ̀ séín ɓě mɔ̀à kũ̀à-mú-nyùìn-ɖɛ̀ ɖé ní jàɖàìn-gbòɔ̀ múɛɛ dyí, ɓɛ́ wa ké wa ɓùɖǔù-ɖɔ̀ bũ̌in bĩìn, ɓɛ́ wa kéɛ dyóún-ɓìɖǐɛ̀ kúɖúù kɔ̃in soɖo, ɓɛ́ wa kéɛ ɓóɛ ɓéɖéìn-ɖɛ̀ɔ̀ kɔ̃ dè.
13“Ké wa mɛ zà tĩ́ɔɔ̀ ɓó sáa-kɔ̃-zàìn-gbààɔ̀ kɔ̃, ɓɛ́ wa kéɛ ɓùɖǔù-ɖɔ̀ ɖò kɔ̃in soɖo. 14Ɔ ɖǎ ná nìǐn, wa mɛ po kũ̀à-mú-nyùìn-ɖɛ̀ séín ɓá sáa-kɔ̃-zàìn-gbààɔ̀ dyíɛɛ ɓóɛ kɔ̃. Wa mɔ̀ nyɛ-kɛ̀nɛ̀-mú-ɓéɖéìn-jìà ɓěɔ̀ kè tó-tàɓàìn-ɖɛ̀ ɓěɔ̀ kè síɔ́ɓò ɓěɔ̀ ɔ kè gbòɖòò ɓěɔ̀. Ɔ ɖǎ ná nìǐn, wa mɛ soɖoɛ dyóún-ɓìɖǐɛ̀ kúɖúù kɔ̃in, ɓɛ́ wa kéɛ ɓéɖéìn-cù ɓěɔ̀ ɖé gbɛ̌ɛ̀ ɓě nìà ɔ wĩin nyɛɛ mú sṹ.
15“Ti ɓɛ́ Eɖóún kè ɔ dyú-gàà ɓěɔ̀ ɖǎ ɖɛ hwɛ̀ǐn-hwɛ̀ǐn ɓě nìà ɖé ní jàɖàìn-gbòɔ̀ múɛɛ ɖɛ kɔ̃in soɖoɛ hwɔɛɛ, ɔ dyiá ti jǔ ɓɛ́ Éézùɖùɛ̀-dyù ɓěɔ̀ kéá daí sɔ̀ìn ní, nìí, Kóhàà xwíníín-dyù ɓěɔ̀ mɔ̀ nyɔ mɛ ɓéɖé ɖɛ ɓěa, kɛɛ wa mɛ ɓɔ́ mú-hwɛ̀-ɖɛ̀ ɓěɔ̀ ɖò dyi tìnìɛ̀n, wa ní kɔ̃̀ ɖà mɛ́. Jàɖàìn-gbòɔ̀ ɖɛ ɓě ɓɛ́ Kóhàà xwíníín-dyù ɓěɔ̀ kéà ɓéɖéɛɛ nìàǒ wɛ̀.
16“Ké Ɛ̀ɖɛ̀ázà mɔ̀à Eɖóún mɔ̀à sáa-zà-nyɔ̀ vɛ̀nɛ̀ɔ̀ kɛɛ dyú-gààɔ̀ kɛɛ mɔ̀ nyɔ kɔ̃̀ ní jàɖàìn-gbò gànáɔ̀ kè ɖɛ séín nì ɖéɛ múɛɛ jè kpé gbo. Ɖɛ ɓěɔ̀ ɖíɛ́ ɓě mɔ̀ cáná ɓá ɖáùnpò ɓěɔ̀ jè dyíɛ kè nyɔ́ún-nɔ̀mɔ̀-ɖɛ̀ɔ̀ kè ɖii-ɖɛ̀-sàǎ-zàìn-ɖɛ̀ ɓɛ́ wa kéà nyu ɓó wé séín ɓaɖaa ɔ kè bũ̌-po-cànàɔ̀.”
17Ké Bounɓoɔ̀ cɛ̃ɛ ma Mózè kè Eɖóún gbo ɖe, ké ɔ ɖá, 18“Ɓěǐn ɖá ɓɛ́ Kóhà nììn gbǒ-xwíníín gànáɔ̀ ké mú gbɔɔ̀ ɖé Ɖíìváà-nyɔ̀ ɓěɔ̀ hwìɛ̀. 19Ɔ jèɛɛ, ti wa mu mú-hwɛ̀-ɖɛ̀ ɓěɔ̀ bũ̌in xwɛ̃́ìn nyɛɛ, ɖɛ ɓě mɛ nyu ɓá wa jè dyí ɓɛ́ wa ké se mɛ́ɛ kɛà kɛ̀. Eɖóún kè ɔ dyú-gàà ɓěɔ̀ mɛ mu ɖé jàɖàìn-gbòɔ̀ mú, ɓɛ́ wa ké Kóhàà xwíníín-dyù ɓěɔ̀ nììn kũ̀à wa ɖò-ɖò ké nyuɛ kè ɖɛ wa ɖò-ɖò ké ɓéɖéɛɛ wa da zàìn. 20Kɛɛ wa mɛ ɓɔ́ ɖé dyáa, ɓɛ́ wa ké mú-hwɛ̀-ɖɛ̀ ɓěɔ̀ dya gmɔ̀. Wa mɛ ɓɔ́ ɖɛ ɓěɔ̀ dyéɖé ɖaɓaa dyɛ mɔ̀ùn, wa ní kɔ̃̀ ɖà mɛ́.”
Ɖíìváà-nyɔ̀ mɔ̀à Gésɔ̀ùn nììn xwíníín-dyù ɓěɔ̀ kɛɛ nììn kũ̀à
21Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, 22“Zɛɖɛ Gésɔ̀ùn nììn xwíníín-dyù ɓěɔ̀ ɖekè dyììn ɖé kà wa ɓǎà gbǒ-xwíníín ɓěɔ̀ nyu nìɛ̀ kɛɛ mú. 23Wa mɛ mɔ̀ gàa-dyù ɓě nyuá zɔ̃ kpáɖá-nyɔ ɓaɖa-bùè ké zɔ̃ kpáɖá-nyɔ sɔ̃́ ɓaɖa-bùè dyɛ̀ìn nyɛ. Wa mɛ mɔ̀ nyɔ séín ɓě ɓɛ́ wa ɓɛ́ìn ɖé jàɖàìn-gbò kɔ̃̀ mú ḿ kè ní nyɔ ɓěɔ̀ dyéàìn nyɛɛ mú kũ̀à nyuɛ kɛ. 24Gésɔ̀ùn nììn xwíníín-dyù ɓěɔ̀ mɔ̀ nyɔ kɔ̃̀ wa ké ɖɛ ɓěɛ̀ ɓéɖé-nyɔ̀ jǔ. 25Ɖɛ ɓěɔ̀ mɔ̀ faà-ɖɔ̀ ɓě nìà ɖé ní jàɖàìn-gbòɔ̀ múɛ kè jàɖàìn-gbòɔ̀ kɔ̃in-ɓáìn-ɖɛ̀ɔ̀ kè dyóún-ɓìɖǐɛ̀ kúɖúù ɓě ɓáìn jàɖàìn-gbòɔ̀ kɔ̃in nyɛ kè faà-ɖɔ̀ ɓó jàɖàìn-gbò-wɔ̃̀ɔ̀ jè 26kè gba-gba nìà jàɖàìn-gbòɔ̀ kè sáa-kɔ̃-zàìn-gbààɔ̀ ɖeiɛɛ faà-ɖɔ̀ ɓěɔ̀ kè kɔ̃̀pã́ùn gànáɔ̀ gbǒ-wɔ̃̀ɔ̀ faà-ɖɔ̀ɔ̀ kè jàɖàìn-gbòɔ̀ ɖúú ɓěɔ̀ ɔ kè ɖɛ séín ɓá jàɖàìn-gbòɔ̀ ɖɔ ɓěɔ̀ jè dyíɛ. Wa mɔ̀ nyɔ mɛ nyu kũ̀à ɓě ɓá ɖɛ séín ɓěɛ̀ dyíɛ. 27Eɖóún kè ɔ dyú-gàà ɓěɔ̀ mɛ dyéɛ jè gbo, ɓɛ́ Gésɔ̀ùn nììn xwíníín-dyù ɓěɔ̀ ké waà kũ̀à ɓěɔ̀ nyu. Ké wa mɛ zàìn gbɛ̌ ɓě wa ɓéɖé ɓɛ́ wa ké kpaa wa da. 28Kǎà Gésɔ̀ùn nììn xwíníín-dyù ɓěɔ̀ nììn kũ̀à wa kɔ̃̀ wa ké nyu ɓá ní jàɖàìn-gbòɔ̀ jè dyíɛɛ jè nyu nìɛ̀. Wa mɛ nyu kũ̀à ɓěɔ̀ kà Ìfámà mɔ̀à Eɖóún mɔ̀à sáa-zà-nyɔ̀ vɛ̀nɛ̀ɔ̀ kɛɛ dyú-gààɔ̀ kɛɛ muɛ wa da zàìn nyuùn wɛ̃.”
Ɖíìváà-nyɔ̀ ɓě mɔ̀à Mɛ̀wáɖáwìɖì nììn xwíníín-dyù ɓěɔ̀ kɛɛ nììn kũ̀à
29Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Zɛɖɛ Mɛ̀wáɖáwìɖì nììn xwíníín-dyù ɓěɔ̀ ɖekè dyììn ɖé kà wa ɓǎà gbǒ-xwíníín ɓěɔ̀ nyu nìɛ̀ kɛɛ mú. 30Wa mɛ mɔ̀ gàa-dyù ɓě nyuá zɔ̃ kpáɖá-nyɔ ɓaɖa-bùè ké zɔ̃ kpáɖá-nyɔ sɔ̃́ ɓaɖa-bùè dyɛ̀ìn nyɛ. Wa mɛ mɔ̀ nyɔ séín ɓě ɓɛ́ wa ɓɛ́ìn ɖé ní jàɖàìn-gbòɔ̀ mú kũ̀à nyuɛ kɛ. 31Ké kũ̀à ɓě ɓɛ́ wa kɔ̃̀ kpé gboɛɛ kɛà kɛ̀. Wa mɛ ɓéɖé jàɖàìn-gbòɔ̀ cu-pĩ̀à ɓěɔ̀ kèɛ̀ kɔ̃-cɛ̃̀ìn-cù ɓěɔ̀ kèɛ̀ cúè-ɓò ɓěɔ̀ kè waà kɔ̃-dè-ɖɛ̀ ɓěɔ̀ 32ké gba-gbaɔ̀ nììn cúè-ɓò ɓěɔ̀ kè wa nììn kɔ̃-dè-ɖɛ̀ ɓěɔ̀ kè waà ɓóɖóún-kɔ-cù ɓěɔ̀ kè waà ɖúú ɓěɔ̀ ɔ kè ɖɛ séín ɓá jàɖàìn-gbòɔ̀ cu ɓěɔ̀ jè dyíɛ. M̀ mɛ cɛ̃ ɖɛ ɓɛ́ nyɔ ɖò-ɖò kɔ̃̀ ɔ ké ɓéɖéɛɛ jè ɔ gbo. 33Kǎà Mɛ̀wáɖáwìɖì nììn xwíníín-dyù ɓěɔ̀ nììn kũ̀à wa kɔ̃̀ wa ké nyu ɓá ní jàɖàìn-gbòɔ̀ jè dyíɛɛ jè nyu nìɛ̀. Ìfámà mɔ̀à Eɖóún mɔ̀à sáa-zà-nyɔ̀ vɛ̀nɛ̀ɔ̀ kɛɛ dyú-gààɔ̀ kɛɛ mɛ mɔ̀ waà kũ̀à ɓěɔ̀ da-zà-nyɔ̀.”
Ɖíìváà-nyɔ̀ ɓěɔ̀ zɛɖɛ-zɛɖɛ ɖe
34Ké Mózè kè Eɖóún kè Éézùɖùɛ̀-nyɔ̀ ɓěɔ̀ nyɔ vɛ̀nɛ̀ ɓěɔ̀ zɛɖɛ ma Kóhà nììn xwíníín-dyù ɓěɔ̀ dyììn ɖé kà wa ɓǎà gbǒ-xwíníín ɓěɔ̀ nyu nìɛ̀ kɛɛ mú. 35Wa mɔ̀ ma gàa-dyù ɓě nyuá ma zɔ̃ kpáɖá-nyɔ ɓaɖa-bùè ké zɔ̃ kpáɖá-nyɔ sɔ̃́ ɓaɖa-bùè dyɛ̀ìn nyɛ. Wa mɔ̀ nyɔ séín ɓě ɓɛ́ wa ɓɛ́ìn ma ɖé Bounɓoɔ̀ jàɖàìn-gbòɔ̀ mú kũ̀à nyuɛ kɛ. 36Ké wa séín poìn dyí mɔ̀ nyɔ-kpò táázĩ̀ìn sɔ̃́ kè hɔ̃dɛ̀ɖɛ̀ mɛ̀nɛ̌ìn-sɔ̃́ kè kpáɖá-nyɔ sɔ̃́ ɓaɖa-bùè. 37Kǎà Kóhà nììn xwíníín-dyù ɓěɔ̀ nyu ma jĩ̀ɛ̀ dyììn ɖé waà gbǒ-xwíníín ɓěɔ̀ mú. Wa mɔ̀ nyɔ ɓě ɓɛ́ wa nyu ma ɖé Bounɓoɔ̀ jàɖàìn-gbòɔ̀ mú kũ̀à kɛ. Wa mɔ̀ nyɔ ɓě ɓɛ́ Mózè kè Eɖóún zɛɖɛ ma kà Bounɓoɔ̀ nyuɛ ma kà Mózè gbo cɛ̃ɛ kɛ.
38Ké wa zɛɖɛ ma Gésɔ̀ùn nììn xwíníín-dyù ɓěɔ̀ dyììn ɖé kà wa ɓǎà gbǒ-xwíníín ɓěɔ̀ nyu nìɛ̀ kɛɛ mú. 39Wa mɔ̀ gàa-dyù ɓě nyuá zɔ̃ kpáɖá-nyɔ ɓaɖa-bùè ké zɔ̃ kpáɖá-nyɔ sɔ̃́ ɓaɖa-bùè dyɛ̀ìn nyɛ. Wa mɔ̀ nyɔ séín ɓě ɓɛ́ wa ɓɛ́ìn ɖé Bounɓoɔ̀ jàɖàìn-gbòɔ̀ mú kũ̀à nyuɛ kɛ. 40Ké wa séín poìn dyí mɔ̀ nyɔ-kpò táázĩ̀ìn sɔ̃́ kè hɔ̃dɛ̀ɖɛ̀ mɛ̀nɛ̌ìn-ɖò kè kpáɖá-nyɔ ɓaɖa-bùè. 41Kǎà Gésɔ̀ùn nììn xwíníín-dyù ɓěɔ̀ nyu ma jĩ̀ɛ̀ dyììn ɖé waà gbǒ-xwíníín ɓěɔ̀ mú. Wa mɔ̀ nyɔ ɓě ɓɛ́ wa nyu ma ɖé Bounɓoɔ̀ jàɖàìn-gbòɔ̀ mú kũ̀à kɛ. Wa mɔ̀ nyɔ ɓě ɓɛ́ Mózè kè Eɖóún zɛɖɛ ma kà Bounɓoɔ̀ nyuɛ ma kà cɛ̃ɛ kɛ.
42Ké wa zɛɖɛ ma Mɛ̀wáɖáwìɖì nììn xwíníín-dyù ɓěɔ̀ dyììn ɖé kà wa ɓǎà gbǒ-xwíníín ɓěɔ̀ nyu nìɛ̀ kɛɛ mú. 43Wa mɔ̀ gàa-dyù ɓě nyuá zɔ̃ kpáɖá-nyɔ ɓaɖa-bùè ké zɔ̃ kpáɖá-nyɔ sɔ̃́ ɓaɖa-bùè dyɛ̀ìn nyɛ. Wa mɔ̀ nyɔ séín ɓě ɓɛ́ wa ɓɛ́ìn ɖé Bounɓoɔ̀ jàɖàìn-gbòɔ̀ mú kũ̀à nyuɛ kɛ. 44Wa séín poìn dyí mɔ̀ nyɔ-kpò táázĩ̀ìn tã kè hɔ̃dɛ̀ɖɛ̀ sɔ̃́. 45Kǎà Mɛ̀wáɖáwìɖì nììn xwíníín-dyù ɓě ɓɛ́ Mózè kè Eɖóún zɛɖɛ ma dyììn ɖé waà gbǒ-xwíníín ɓěɔ̀ múɛɛ nyu jĩ̀ɛ̀. Wa nyuɛ ma kà Bounɓoɔ̀ nyuɛ ma kà Mózè gbo cɛ̃ɛ kɛ.
46Ɖíìváà-nyɔ̀ jĩ̀ kà ɓɛ́ Mózè kè Eɖóún kè Éézùɖùɛ̀-nyɔ̀ vɛ̀nɛ̀ ɓěɔ̀ zɛɖɛ ma dyììn ɖé wa ɓǎà gbǒ-xwíníín ɓěɔ̀ múɛɛ 47mɔ̀ gàa-dyù ɓě nyuá zɔ̃ kpáɖá-nyɔ ɓaɖa-bùè ké zɔ̃ kpáɖá-nyɔ sɔ̃́ ɓaɖa-bùè dyɛ̀ìn nyɛ. Wa mɔ̀ nyɔ séín ɓě ɓɛ́ wa ɓɛ́ìn ɖé Bounɓoɔ̀ jàɖàìn-gbòɔ̀ mú kũ̀à-nyu-nyuɔ̀ xwa kɛ. 48Nyɔ ɓě ɓɛ́ wa zɛɖɛ ma kà kɛɛ mɔ̀ nyɔ-kpò táázĩ̀ìn mɛ̀nɛ̌ìn-tã kè hɔ̃dɛ̀ɖɛ̀ hm̀m̌ kè kpáɖá-nyɔ hĩinyɛ. 49Kà Bounɓoɔ̀ nyuɛ ma Mózè gbo cɛ̃ɛ kɛɛ, kǎà ɔ nyu ma wa zɛɖɛɛ, ké kǎà ɔ nyu ma wa kũ̀à ɓě nyíɛ. Nyɔ ɖò-ɖò séín ɓéɖé ma ɔ nììn kũ̀à ɔ ké nyuɛ, mɔɔ ɖɛ ɔ ké ɓéɖéɛ.
Currently Selected:
Nɔ̀ɓà 4: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
