Nɔ̀ɓà 2
2
Kà xwéɖé-dù ɓěɔ̀ nyu ma waà jàɖàìn-gbò ɓěɔ̀ páún poɛ kɛ
1Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè kè Eɖóún gbo, ké ɔ ɖá, 2“Éézùɖùɛ̀-dyù ɓěɔ̀ xwéɖé-dù ɖò-ɖò ɓěɔ̀ mɛ nyànàìn waà jàɖàìn-gbò ɓěɔ̀ dyi dyììn ɖé kà wa ɓǎà gbǒ-xwíníín ɓěɔ̀ nyu nìɛ̀ kɛɛ mú, ɖé wa mìɔùn nììn xwéɖé-dùɔ̀ kè waà gbǒ-xwíníínɔ̀ kɔ́ɖɔ̀ ɓěɔ̀ xwíɖíi. Waà jàɖàìn-gbò ɓěɔ̀ wɔ̃ mɛ gmɔ̀ìn ɖé ní jàɖàìn-gbò nìà ɓó wa hwòɖǒǔn wɛ̃ɛ gbo.
3“Júɖà nììn xwéɖé-dùɔ̀ kè xwéɖé-dù ɓě nì ɔ xwíɖíiɛɛ kpoo kò-kò ɓěɔ̀ mɛ nyànàìn wa nììn jàɖàìn-gbò ɓěɔ̀ dyi hwɔ ɖé ní jàɖàìn-gbòɔ̀ dyóɖó-xwáɖáún-wóɖóìn-naínɔ̀ dyí, ɖé wa nììn kɔ́ɖɔ̀ɔ̀ xwíɖíi. Násɔ̀ùn mɔ̀à Ámìnáɖàà dyú-gààɔ̀ kɛɛ mɔ̀ Júɖà nììn xwéɖé-dùɔ̀ nyɔ vɛ̀nɛ̀. 4Júɖà-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ tã ɓaɖa-bùè sè hĩinyɛ kè hɔ̃dɛ̀ɖɛ̀ mɛ̀nɛ̌ìn-ɖò. 5Ɛ́sàkà nììn xwéɖé-dùɔ̀ mɛ nì Júɖà-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká ɖò kɔ̃. Nɛ̀fánìò mɔ̀à Zúàà dyú-gààɔ̀ kɛɛ mɔ̀ Ɛ́sàkà nììn xwéɖé-dùɔ̀ nyɔ vɛ̀nɛ̀. 6Ɛ́sàkà-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ ɓaɖa-bùè sè hĩinyɛ kè hɔ̃dɛ̀ɖɛ̀ hĩinyɛ. 7Zɛ́ɓíúɖɔ̀ùn nììn xwéɖé-dùɔ̀ mɛ nì Júɖà-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká tɔ̀ɔ̀ kɔ̃. Ɛ̀ɖíà mɔ̀à Héɖɔ̀ùnɛ̀ dyú-gààɔ̀ kɛɛ mɔ̀ Zɛ́ɓíúɖɔ̀ùn nììn xwéɖé-dùɔ̀ nyɔ vɛ̀nɛ̀. 8Zɛ́ɓíúɖɔ̀ùn-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ ɓaɖa-bùè sè mɛ̀nɛ̌ìn-sɔ̃́ kè hɔ̃dɛ̀ɖɛ̀ hĩinyɛ. 9Júɖà nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ kpoo séín ɓěɔ̀ poìn dyí mɔ̀ nyɔ-kpò táázĩ̀ìn hɔ̃dɛ̀ɖɛ̀ ɖò kpáɖá-nyɔ hĩinyɛ sè mɛ̀nɛ̌ìn-ɖò kè hɔ̃dɛ̀ɖɛ̀ hĩinyɛ. Ti ɓɛ́ wa mu hwìè xwíníín kpáùn wɛ̃ɛ, wa mɔ̀ nyɔ mɛ nì hwìèɔ̀ nya.
10“Wuɖuɓíín nììn xwéɖé-dùɔ̀ kè xwéɖé-dù ɓě nì ɔ xwíɖíiɛɛ kpoo kò-kò ɓěɔ̀ mɛ nyànàìn wa nììn jàɖàìn-gbò ɓěɔ̀ dyi hwɔ ɖé ní jàɖàìn-gbòɔ̀ zɔ̃̌in-wàkáɔ̀ kɔ̃ dyí, ɖé wa nììn kɔ́ɖɔ̀ɔ̀ xwíɖíi. Ɛ̀ɖízù mɔ̀à Sɛ̀ɖédyùɛ̀ dyú-gààɔ̀ kɛɛ mɔ̀ Wuɖuɓíín nììn xwéɖé-dùɔ̀ nyɔ vɛ̀nɛ̀. 11Wuɖuɓíín-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ sè mɛ̀nɛ̌ìn-ɖò kè hɔ̃dɛ̀ɖɛ̀ hm̀m̌. 12Símìɔ̀ nììn xwéɖé-dùɔ̀ mɛ nì Wuɖuɓíín-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká ɖò kɔ̃. Sɛ̀ɖúmìè mɔ̀à Zúwìɖìsáɖàìɛ̀ dyú-gààɔ̀ kɛɛ mɔ̀ Símìɔ̀ nììn xwéɖé-dùɔ̀ nyɔ vɛ̀nɛ̀. 13Símìɔ̀-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ ɓaɖa-bùè sè mɛ̀nɛ̌ìn-hĩinyɛ kè hɔ̃dɛ̀ɖɛ̀ tã. 14Gáà nììn xwéɖé-dùɔ̀ mɛ nì Wuɖuɓíín-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká tɔ̀ɔ̀ kɔ̃. Ɛ̀ɖìásà mɔ̀à Ɖɛ̀dyúòɛ̀ dyú-gààɔ̀ kɛɛ mɔ̀ Gáà nììn xwéɖé-dùɔ̀ nyɔ vɛ̀nɛ̀. 15Gáà-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ sè hm̀m̌ kè hɔ̃dɛ̀ɖɛ̀ mɛ̀nɛ̌ìn-ɖò kè kpáɖá-nyɔ sɔ̃́ ɓaɖa-bùè. 16Wuɖuɓíín nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ kpoo séín ɓěɔ̀ poìn dyí mɔ̀ nyɔ-kpò táázĩ̀ìn hɔ̃dɛ̀ɖɛ̀ ɖò kpáɖá-nyɔ sɔ̃́ ɓaɖa-bùè sè ɖò kè hɔ̃dɛ̀ɖɛ̀ hĩinyɛ kè kpáɖá-nyɔ sɔ̃́ ɓaɖa-bùè. Ti ɓɛ́ wa mu hwìè xwíníín kpáùn wɛ̃ɛ, wa mɛ kɔ ɓó Júɖà nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ ɖeín dyí.
17“Ɔ ɖǎ ná nìǐn, Ɖíìváà-nyɔ̀ ɓěɔ̀ mɛ kpá hwìèɔ̀ kɔ̃ sɔ̀ìn ɖé jàɖàìn-hwɔ̀ɖɔ̀ɔ̀ hwòɖǒǔn, ɓɛ́ wa ké ní jàɖàìn-gbòɔ̀ ɓéɖé, ɓɛ́ wa ké ɓó Wuɖuɓíín nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ ɖeín dyí kɔ. Kà Éézùɖùɛ̀-dyù ɓěɔ̀ jàɖàìn-gbò ɓěɔ̀ nyuà ɖeín dyi deɛ̀n nyɛɛ, kǎà wa mɛ nyu dɔ̃̀ǐn mú kpáa ɓó hwìèɔ̀ kɔ̃. Wa ɖò-ɖò mɛ nì dɔ̃̀ǐn mú ɖé waà kɔ́ɖɔ̀ɔ̀ xwíɖíi.
18“Ífèɖèìn nììn xwéɖé-dùɔ̀ kè xwéɖé-dù ɓě nì ɔ xwíɖíiɛɛ kpoo kò-kò ɓěɔ̀ mɛ nyànàìn wa nììn jàɖàìn-gbò ɓěɔ̀ dyi hwɔ ɖé ní jàɖàìn-gbòɔ̀ dyóɖó-dyi-kpáìn-naínɔ̀ dyí, ɖé wa nììn kɔ́ɖɔ̀ɔ̀ xwíɖíi. Ɛ̀ɖìsámà mɔ̀à Àmíhùɛ̀ dyú-gààɔ̀ kɛɛ mɔ̀ Ífèɖèìn nììn xwéɖé-dùɔ̀ nyɔ vɛ̀nɛ̀. 19Ífèɖèìn-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ kè hɔ̃dɛ̀ɖɛ̀ hm̀m̌. 20Mànásì nììn xwéɖé-dùɔ̀ mɛ nì Ífèɖèìn-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká ɖò kɔ̃. Gàmɛ́ɖìè mɔ̀à Pɛ̀ɖázùɛ̀ dyú-gààɔ̀ kɛɛ mɔ̀ Mànásì nììn xwéɖé-dùɔ̀ nyɔ vɛ̀nɛ̀. 21Mànásì-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ ɓaɖa-bùè sè sɔ̃́ kè hɔ̃dɛ̀ɖɛ̀ sɔ̃́. 22Bɛ̃́címà nììn xwéɖé-dùɔ̀ mɛ nì Ífèɖèìn-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká tɔ̀ɔ̀ kɔ̃. Àbíɖàùn mɔ̀à Gíɖìónìɛ̀ dyú-gààɔ̀ kɛɛ mɔ̀ Bɛ̃́címà nììn xwéɖé-dùɔ̀ nyɔ vɛ̀nɛ̀. 23Bɛ̃́címà-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ ɓaɖa-bùè sè hm̀m̌ kè hɔ̃dɛ̀ɖɛ̀ hĩinyɛ. 24Ífèɖèìn nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ kpoo séín ɓěɔ̀ poìn dyí mɔ̀ nyɔ-kpò táázĩ̀ìn hɔ̃dɛ̀ɖɛ̀ sè mɛ̀nɛ̌ìn-tã kè hɔ̃dɛ̀ɖɛ̀ dyúáɖò. Ti ɓɛ́ wa mu hwìè xwíníín kpáùn wɛ̃ɛ, wa mɛ kɔ ɓó Ɖíìváà-nyɔ̀ ɓěɔ̀ ɖeín dyí.
25“Dɛ̃́ìn nììn xwéɖé-dùɔ̀ kè xwéɖé-dù ɓě nì ɔ xwíɖíiɛɛ kpoo kò-kò ɓěɔ̀ mɛ nyànàìn wa nììn jàɖàìn-gbò ɓěɔ̀ dyi hwɔ ɖé ní jàɖàìn-gbòɔ̀ xwía-wàkáɔ̀ kɔ̃ dyí, ɖé wa nììn kɔ́ɖɔ̀ɔ̀ xwíɖíi. Áhìɛ́zɛ̀ mɔ̀à Ámìsáɖàìɛ̀ dyú-gààɔ̀ kɛɛ mɔ̀ Dɛ̃́ìn nììn xwéɖé-dùɔ̀ nyɔ vɛ̀nɛ̀. 26Dɛ̃́ìn-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ tã sè sɔ̃́ kè hɔ̃dɛ̀ɖɛ̀ mɛ̀nɛ̌ìn-sɔ̃́. 27Ásè nììn xwéɖé-dùɔ̀ mɛ nì Dɛ̃́ìn-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká ɖò kɔ̃. Págìè mɔ̀à Ókànàà dyú-gààɔ̀ kɛɛ mɔ̀ Ásè nììn xwéɖé-dùɔ̀ nyɔ vɛ̀nɛ̀. 28Ásè-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ sè dyúáɖò kè hɔ̃dɛ̀ɖɛ̀ hm̀m̌. 29Náfátàɖì nììn xwéɖé-dùɔ̀ mɛ nì ɓó Dɛ̃́ìn-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wáká tɔ̀ɔ̀ kɔ̃. Àhíwàɖà mɔ̀à Énàà dyú-gààɔ̀ kɛɛ mɔ̀ Náfátàɖì nììn xwéɖé-dùɔ̀ nyɔ vɛ̀nɛ̀. 30Náfátàɖì-nyɔ̀ ɓěɔ̀ mɔ̀ nyɔ-kpò táázĩ̀ìn kpáɖá-nyɔ sɔ̃́ ɓaɖa-bùè sè tã kè hɔ̃dɛ̀ɖɛ̀ hĩinyɛ. 31Dɛ̃́ìn nììn xwéɖé-dùɔ̀ kè xwéɖé-dù ɓě nìà ɔ xwíɖíiɛɛ kpoo séín ɓěɔ̀ poìn dyí mɔ̀ nyɔ-kpò táázĩ̀ìn hɔ̃dɛ̀ɖɛ̀ kpáɖá-nyɔ sɔ̃́ ɓaɖa-bùè sè mɛ̀nɛ̌ìn-sɔ̃́ kè hɔ̃dɛ̀ɖɛ̀ mɛ̀nɛ̌ìn-ɖò. Wa mɛ mɔ̀ xwéɖé-dù ɓěɔ̀ ɓɔ́ìn ɖe, ɓɛ́ wa ké hwìèɔ̀ xwíníín kpáa. Wa mɛ nì wa nììn kɔ́ɖɔ̀ ɓěɔ̀ xwíɖíi.”
32Kǎà Éézùɖùɛ̀-nyɔ̀ ɓě ɓɛ́ wa zɛɖɛ ma dyììn ɖé wa ɓǎà gbǒ-xwíníín ɓěɔ̀ múɛɛ jè nyu nìɛ̀. Waà kpoo ɖò-ɖò ɓě nì ma kà ɖé waà jàɖàìn-hwɔ̀ɖɔ̀ɔ̀ múɛɛ poìn dyí mɔ̀ nyɔ-kpò táázĩ̀ìn hɔ̃dɛ̀ɖɛ̀ mɛ̀nɛ̌ìn-ɖò sè tã kè hɔ̃dɛ̀ɖɛ̀ hm̀m̌ kè kpáɖá-nyɔ sɔ̃́ ɓaɖa-bùè. 33Kɛɛ wa se ma Ɖíìváà-nyɔ̀ ɓěɔ̀ zɛɖɛ ɖé Éézùɖùɛ̀-nyɔ̀ ɓěɔ̀ hwìɛ̀ kà Bounɓoɔ̀ nyuɛ ma kà Mózè gbo cɛ̃ɛ kɛ. 34Éézùɖùɛ̀-nyɔ̀ ɓěɔ̀ nyu ɖɛ séín ɓě ɓɛ́ Bounɓoɔ̀ cɛ̃ ma kà Mózè gboɛɛ ní. Wa nyànàìn ma waà jàɖàìn-gbò ɓěɔ̀ dyi ɖé wa ɖò-ɖòɛ̀ kɔ́ɖɔ̀ɔ̀ xwíɖíi, ké wa deìn ma ɖeín dyi ti wa mu hwìè xwíníín kpáùn wɛ̃. Nyɔ ɖò-ɖò séín nì ma ɖé wa ɓǎà gbǒ-xwíníínɔ̀ nììn kpooɔ̀ mú.
Currently Selected:
Nɔ̀ɓà 2: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.