Ɖìvéɖékɔ̀ 19
19
Gma ɓě ɓá mú-hwɛ̀-hwɛ̀ kè dyí-sɛ́ɖɛ́ìn-ɖɛ̀ jè dyíɛ
1Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 2“Cɛ̃ɛ Éézùɖùɛ̀-dyù séín ɓěɔ̀ gbo kà ḿ ɖá m̀ kè Éézùɖùɛ̀-dyù ɓěɔ̀ mɛ hwɛ̀ múɛ, sepóɛɖé mɔ̄ Bounɓo mɔ̀à ɓěɛ̀ Gèɖèpɔ́ɔ̀ kɛɛ, ḿ hwɛ̀ mú.
3“Ɓěɛ̀ nyɔ ɖò-ɖò séín mɛ dyé ɔ ɖe kè ɔ ɓǎ kpéín, ké ɔ mɛ kpɔ̃ ní fɔ̀-wèɔ̀ jè dyi, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.
4“Nyɔ ɖò ní ɖá ɓɛ́ ɔ hwòɖǒ-dyùà ké kũùn-kpò ɓě gbo gmɔ̀ìn, ké ɔ ní ɖá ɓɛ́ ɔ ké ɖɛ ɖò ɖèìn, ɓɛ́ ɔ kéɛ wáɖá, ɓɛ́ ɔ kéɛ gèɖèpɔ́ɔ̀ ɖò mú nyu ɓó ɔ mìɔùn bìì, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.
5“Ɔ jǔ ké nyɔ ɖò dyi gbo-kpɔ̃ìn-sàǎ-zàìn-ɖɛ̀ ɖò ḿ gbo sáa zàìn ní, ɔ mɛ nyuɛ dyììn ɖé gma ɓě ɓɛ́ ḿ tòà ɓáa jè dyíɛɛ mú, hwɛ̀ ké ḿ kpɔ̃ɔ dyi ɓó nyɔɔ̀ bìì. 6Gma ɓěɔ̀ mɔ̀, nyɔɔ̀ mɛ tà sáa-zàìn-ɖɛ̀ɔ̀ ɓó wé kɔ̃̀ ɓaɖa ɔ ɖáɓáà kɛ mɔɔ wéɔ̀ nyɔ kɔ ɓó dyíɛ. Kɛɛ ɔ jǔ ké ɖò dyi ɓó sè, ké ɔ dyi wéɔ̀ tã nììnɔ̀ dyɛ̀ìn ní, wa mɛ fɔ̃ɔ séín. 7Ɔ jǔ ké nyɔ ɖò dyi gbo-kpɔ̃ìn-sàǎ-zàìn-ɖɛ̀ɔ̀ ɖò tà ɓó wéɔ̀ tã nììnɔ̀ ɓaɖa ní, nìí, ɖɛ nìà kɛ muɛ nyuùn ɓɛ́ sáa-zàìn-ɖɛ̀ɔ̀ ké se mú hwɛ̀. Ɔ dyi ná nìǐn, ḿ seɛ dyi kpɔ̃ɔ́ mu ɓó nyɔ dyàà sáa-zàìn-ɖɛ̀ɔ̀ kɛɛ bìì. 8Ké nyɔ muɛ ɖiìn nyɛɛ ɓéɖé ɓɛ́ ɔ ké ɔ ɖɛ gbàɔ̀ kpa dyí ɖú, sepóɛɖé ɔ ɖǎ ɖɛ wa ɖǎ wáká po ɓó ḿ bììɛɛ zùǔn zàìn. Ɔ dyi ná nìǐn, wa mɛ cɛ̃ nyɔ nì náa woɖo gbo sɔ̀ìn ɖé ɔ nyɔ ɓěɔ̀ hwìɛ̀.
9“Ti ɓɛ́ ɓěɛ̀ geɖe ɓěɔ̀ mu kɔ́ùn, ké ɓě mu wa cɛ̃ìn nyɛɛ, nyɔ ɖò ní ɖá ɓɛ́ ɔ kéɛ cɛ̃-cɛ̃ɔ̀ xwáɖá gbìǐ dyi kpɔ̃̀ìn, mɔɔ ké ɔ ní ɖá ɓɛ́ ɔ ké mɔɔ́-bɛ̃̌ɔ̀ po. 10Ké nyɔ ɖò ní ɖá ɓɛ́ ɔ ké géɖéè-gbǎɔ̀ féɖé ɓaɖa, mɔɔ ké ɔ ní ɖá ɓɛ́ ɔ ké géɖéè-ɓò ɓěɔ̀ nyɔ ɓě wáɖá kɛɛ dyi cɛ̃́ ɖe. Kɛɛ ɔ mɛ sè ɓó wa ɓó gǎ-dyé-nyɔ̀ ɓě kè ɖíà ɓě bìì. Ɓě mɛ nyuɛ náa, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.
11“Nyɔ ɖò ní ɖá ɓɛ́ ɔ ké dyíɖí, ké ɔ ní ɖá ɓɛ́ ɔ ké se tɔ́mɔ́, ké ɔ ní ɖá ɓɛ́ ɔ ké ɔ mǔè ɖò cá. 12Nyɔ ɖò ní ɖá ɓɛ́ ɔ ké ḿ dyí gboò ɓá ɖɛ se jǎà kɛɛ jè dyí, sepóɛɖé nyɔɔ̀ dyiɛ náa nyuín, ɔ nyìnììn ní nyɛ́nɛ́ɔ̀ dyíin. Ɓě mɛ ɓɔ́ ɖɛ ɓěɛ̀ nyuɛ, sepóɛɖé mɔ̄ mɔ̀ Bounɓoɔ̀.
13“Nyɔ ɖò ní ɖá ɓɛ́ ɔ ké ɔ mǔè ɖò gbá-gbá mú nyu, mɔɔ ɓɛ́ ɔ ké ɔ mǔèɔ̀ bũ̌ dyíɖí. Ké ɔ ní ɖá ɓɛ́ ɔ ké nyɔ ɖò ɓɛ́ ɔ kpɔ̃ dyi, ké nyɔɔ̀ nyu ɔ kũ̀à kɛɛ pɛ́ɛ̀-ɖɛ̀ kɔ̃in kpɔ̃, ɓɛ́ ɔ ké ɔ xwa goò. 14Nyɔ ɖò ní ɖá ɓɛ́ ɔ ké sṹú-nyɔ̀ ɖò vàɖǎ, mɔɔ ké ɔ ní ɖá ɓɛ́ ɔ ké dyí-gbǒ-ɖɛ̀ ɖò ɓó dyéɖéín-dyi-kpè-nyɔ̀ ɖòɛ̀ hwìèɔ̀ dyí po. Kɛɛ ɓě mɛ fɛ̃̀ìn ḿ dyi, sepóɛɖé mɔ̄ mɔ̀ Bounɓoɔ̀.
15“Nyɔ ɖò ní ɖá ɓɛ́ ɔ ké dyí-sɛ́ɖɛ́ìn-ɖɛ̀ hwìǐ zàìn ɖé ɓěɛ̀ zɔ̃́ín-cɛ̃̀ìn-naín ɓěɔ̀. Ké ɔ ní ɖá ɓɛ́ ɔ ké gǎ-dyé-nyɔ̀ ɓěɔ̀ mɔɔ nyɔ kpa ɖɛ ɓěɔ̀ hwòɖǒǔn gbo zĩ̀ìn. Kɛɛ ɔ mɛ po ɔ mǔè ɖòɛ̀ zaa wɔ̃ dyí-sɛ́ɖɛ́ìn-kà. 16Nyɔ ɖò ní ɖá ɓɛ́ ɔ ké ɔ mǔè ɖòɛ̀ nyɛ́nɛ́ gbà dyi ɓeìn dyììn ɖé nyɔɔ̀ ɖɛ se jǎà-ɖɛ̀ kɛɛ ɔ kɔ̃ún-cɛ̃-cɛ̃ mú. Ké ɔ ní ɖá ɓɛ́ ɔ ké ɖɛ muɛ nyuùn ɓɛ́ ɔ mǔè ɖòɛ̀ fɛ̀ɛ̀ ké nàdǐ mú nìɛɛ ɖò nyu. Ɓě mɛ ɓɔ́ ɖɛ ɓěɛ̀ nyuɛ, sepóɛɖé mɔ̄ mɔ̀ Bounɓoɔ̀.
17“Nyɔ ɖò ní ɖá ɓɛ́ ɔ ké ɔ mǔè ɖò xwíníín dyi dèìn. Ɔ jǔ ké ɔ mǔèɔ̀ dyi ɔ ɖɛ gbà ɖò bũ̌ nyu ní, nìí, ɔ mɛ cɛ̃ɛ ɔ gbo wáɖáá cá, ɔ kè ɔ ní kɔ̃̀ ɖà ɔ ɖɛ gbàɔ̀ kpa dyí ɖú. 18Ɔ ní ɖá ɓɛ́ ɔ ké ɔ mǔèɔ̀ xwíníín dyi dèìn, mɔɔ ɔ ké ɖɛ gbà ɖòɛ̀ kpa zà. Kɛɛ ɔ mɛ ɖɛ̀ɓɛ̀ ɔ mǔèɔ̀ mú kà ɔ ɖɛ̀ɓɛ̀à ɔ mìɔùn múɛ. Ɓě mɛ ɓɔ́ ɖɛ ɓěɛ̀ nyuɛ, sepóɛɖé mɔ̄ mɔ̀ Bounɓoɔ̀.
19“Ɓě mɛ kpɔ̃ ní gma ɓěɛ̀ dyi. Gma ɓěɔ̀ mɔ̀, nyɔ ɖò ní ɖá ɓɛ́ ɔ ké nyúà-ɖɛ̀ ɓě se dyí hwɔìn nyɛɛ nyu ɓɛ́ wa ké kɔ̃ún kpáìn. Ké ɔ ní ɖá ɓɛ́ ɔ ké ɓáá-ɖɛ̀-dù kò-kò sɔ̃́ ɖé geɖe dyúáɖòɔ̀ gbo ɓá. Ké ɔ ní ɖá ɓɛ́ ɔ ké ɖɔ-cù dyúáɖò ɓɛ́ wa ɖàɓàìn dyèě-dù kò-kò sɔ̃́ kɛɛ mú po.
20“Ɔ jǔ ké gǐì-màà ɖò ɓɛ́ gàa ɖò kpɔ̃ ɓéeín, kɛɛ wa séè ɔ gbǎà ke, ké ɔ séè buɛ̀ keɛ kè gàa kà kò ɖò dyi ɓó da nì ní, wa mɛ po wa gǎ kè zaaɔ̀ ɓɛ́ìn dyíɛɛ kɔ̃. Kɛɛ wa mɛ ɓɔ́ wa ɖáɓáa, sepóɛɖé màaɔ̀ mɔ̀ gǐì ke. 21Sɔ̀ìn ɓóɛ gboɛɛ, gàaɔ̀ mɛ dyà ɓáɖáá ɓíɔ́ ɖò ɓó jàɖàìn-gbòɔ̀ wĩín, ɓó ḿ gbo, ɓɛ́ ɔ ké kpa-pɛ́ɛ̀ìn-sàǎ-zàìn-ɖɛ̀ jǔ. 22Ɔ ɖǎ ná nìǐn, sáa-zà-nyɔ̀ ɓěɔ̀ ɖò mɛ ɖú ɓáɖáá ɓíɔ́ mɔ̀à kpa-pɛ́ɛ̀ìn-sàǎ-zàìn-ɖɛ̀ɔ̀ kɛɛ dyí, ɓɛ́ ɔ kéɛ nàmàǔn ɓɛ́ gàaɔ̀ nyuà kɛɛ kɔ̃in-ɓáìn-ɖɛ̀ mú nyu ɓó ḿ dyúa. Ɔ dyi ná nìǐn, ní mu ɔ nàmàǔnɔ̀ kɔ̃in zĩ̀ìn.
23“Ti ɓě mu ɖé Kénà-ɓòɖòɔ̀ kɔ̃ nyiniìn nyɛɛ, nyɔ ɖò dyi ɖii-cù ɖò ɓá ní, nìí, sɔ̀ìn ɓó ti ɔ ɓáà cuɔ̀ kɛ gboɛɛ, zɔ̃ tã kĩ́ín-kĩ́ínɔ̀ xwíníín nyɛɛ, ḿ se mɔ́ ɓɛ́ ɔ kéɛ ɓo ɖi. 24Ké ɖé zɔ̃ɔ̀ hĩinyɛ nììnɔ̀ múɛɛ, ɔ mɛ po ɓo séín ɓɛ́ cuɔ̀ mu tòɖòùn wɛ̃ɛ wáká, ɓɛ́ ɔ ké ḿ zùo-po-nyìǐ-ɖɛ̀ jǔ. 25Sɔ̀ìn ɓóɛ gboɛɛ, nìí, ɔ ɓɛ́ìn cuɔ̀ ɓo ɖiɛ ɖé zɔ̃ɔ̀ hm̀m̌ nììnɔ̀ xwíníín. Ɔ dyiɛ náa nyuín, ɔ cu ɓěɔ̀ mu ɓo ɓáún-ɓáún tòɖòùn. Ɓě mɛ nyu ɖɛ ɓěɛ̀, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.
26“Nyɔ ɖò ní ɖá ɓɛ́ ɔ ké suaɖɛ̀ ɖò nyɔmɔɔ mú sè, ɓɛ́ ɔ kéɛ ɖi. Nyɔ ɖò ní ɖá ɓɛ́ ɔ ké sɛ̀ɛ̀-po-po mɔɔ hwĩɔ̀-ɖɛ̀ ɖò xwai nyu. 27-28Ti ɓɛ́ ɓě ɖò mu vĩ̌ɛń nììn ɓó xwɛ́ kpá ɔ gboɛ jèɛɛ, nyɔɔ̀ ní ɖá ɓɛ́ ɔ ké ɔ míɔ̀ wĩin cɛ̃, mɔɔ ɓɛ́ ɔ ké ɔ vɛ̃̌ɔ̀ kɔ̃in cɛ̃, mɔɔ ɓɛ́ ɔ ké ɔ mìɔùn ɖɛ ɖò dyi ɖaɓaìn, mɔɔ ɓɛ́ ɔ ké ɔ kpóɖó-dyùàɔ̀ dà ɖò dyíɖíí po. Ɓě mɛ ɓɔ́ ɖɛ ɓěɛ̀ nyuɛ, sepóɛɖé mɔ̄ mɔ̀ Bounɓoɔ̀.
29“Nyɔ ɖò ní ɖá ɓɛ́ ɔ ké ɔ dyú-màà ɖò gbàɖàùn-màà mú nyu ɓó kũùn-kpò-gèɖèpɔ́ɔ̀ ɓiè jè, sepóɛɖé ɔ dyiɛ náa nyuín, ɔ zàìn ɔ dyú-mààɔ̀ zùǔn. Ké ɓóɖó gànáɔ̀ mu kũùn-kpò-gèɖèpɔ́ɔ̀ kíɖíí síìn ɓó ḿ bɛ̃̌ǐn, ɓɛ́ hwòɖǒ-kɔ̃in-nyìnììn-nyìnììn ké ɖéɛ mú dyí. 30Ɓěɛ̀ nyɔ ɖò-ɖò séín mɛ kpɔ̃ ní fɔ̀-wèɔ̀ jè dyi, ké ɔ mɛ dyé ní jàɖàìn-gbò hwɛ̀ǐn-hwɛ̀ǐnɔ̀ kpéín. Ɓě mɛ nyu ɖɛ ɓěɛ̀, sepóɛɖé mɔ̄ mɔ̀ Bounɓoɔ̀.
31“Nyɔ ɖò ní ɖá ɓɛ́ ɔ ké wɔún mu, mɔɔ ɔ ké gĩɔ-nyɔ̀ ɓě gbo wùɖù, sepóɛɖé ɖɛ ɓěɛ̀ muɛ nyuùn ɓɛ́ nyɔɔ̀ ké se mú hwɛ̀. Ɓě mɛ ɓɔ́ɔ náa nyuɛ, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.
32“Ɔ jǔ ké nyɔ vɛ̀nɛ̀ ɖò dyi ɓó ɓě ɖò bũ̌ dyììn ní, nyɔ ɓɛ́ nyɔ vɛ̀nɛ̀ɔ̀ dyìàìn bũ̌ɛɛ mɛ sɔ̀ dyí. Nyɔ ɖò-ɖò séín mɛ dyé ɔ nyɔ vɛ̀nɛ̀ ɓěɔ̀ kpéín. Ké ɓě mɛ fɛ̃̀ìn ḿ dyi, sepóɛɖé mɔ̄ mɔ̀ Bounɓoɔ̀.
33“Ɔ jǔ ké ɖíà ɖò dyi ɖé ɓě hwìɛ̀ cĩ́ ɖé ɓěɛ̀ ɓóɖóɔ̀ kɔ̃ ní, nìí, nyɔ ɖò ní ɖá ɓɛ́ ɔ ké ɔ bũ̌in nyìnììn. 34Kɛɛ ɔ mɛ kpɔ̃ ɔ kà ɔ nyuà ɔ mìɔùn nììn ɖíí ɓě kpɔ̃ɔ kɛ. Ɔ mɛ ɖɛ̀ɓɛ̀ ɔ mú kà ɔ nyuà ɔ mìɔùn mú ɖɛ̀ɓɛ̀ɛ̀ kɛ. Sepóɛɖé ɓě mɛ po ɖé hwòɖǒ kà ɓě mɔ̀ùn mɔ̀ ma ɖíà ɓě ɖé Íjè-ɓòɖòɔ̀ kɔ̃ɛ. Ɓě mɛ nyuɛ náa, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀.
35“Nyɔ ɖò ní ɖá ɓɛ́ ɔ ké ɖɛ-gbo-ɖàɓàìn-ɖɛ̀ ɓě mɔɔ ɖɛ-xwa-dɔ̃̌ìn-ɖɛ̀ ɓě mɔɔ ɖɛ-mú-ɖàɓàìn-ɖɛ̀ ɓě ɓɛ́ wa seɛ jɛ́ɛ́ɔ̀ kɛɛ kũ̀à mú nyùìn. 36Kɛɛ ɔ mɛ nyùìn ɖɛ-gbo-ɖàɓàìn-ɖɛ̀ ɓě kè ɖɛ-xwa-dɔ̃̌ìn-ɖɛ̀ ɓě kè ɖɛ-mú-ɖàɓàìn-ɖɛ̀ ɓě ɓɛ́ wa mɔ̀ ɔ jɛ́ɛ́ nììnɔ̀ kɛɛ kũ̀à mú. Ɔ hwɔìn kà ɖɛ-mú-ɖàɓàìn-ɖɛ̀ɔ̀ jɛ́ɛ́ nììn ɓě mɔ̀à ífà kè híìn#19:36 Ífà kè híìn mɔ̀ ɖɛ ɓě ɓɛ́ nyɔ ɓɛ́ìn púèɛ̀ kɛɛ mú-ɖàɓàìn-ɖɛ̀. kɛ. Ɓě mɛ nyuɛ náa, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ mɔ̀ nyɔ zà ma kà ɓě ɖé Íjè-ɓòɖòɔ̀ kɔ̃ɛ̀.
37“Mɔ̄ mɔ̀ Bounɓoɔ̀ jèɛɛ, ɓě mɛ kpɔ̃ ní gma séín ɓěɔ̀ dyi kóɖó-kóɖó.”
Currently Selected:
Ɖìvéɖékɔ̀ 19: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
