Ɖìvéɖékɔ̀ 20
20
Gǎ-dù kò-kò ɓě ké gmaún-jaɖa-nyɔ̀ kɔ̃ dyiɛ
1Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 2“Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ɔ jǔ ké wa ɖò mɔɔ ɖíà ɓě cĩ́à ɖé wa hwìɛ̀ kɛɛ ɖò dyi ɔ dyú ɖò Móɖɛ̀ mɔ̀à kũùn-kpò-gèɖèpɔ́ɔ̀ kɛɛ gbo sáa zàìn ní, nìí, nyɔ séín ɓěɔ̀ mɛ ɖáɓá nyɔɔ̀. Wa mɛ taɓaìn ɔ sɔ́ɔ́-kpò dyi, ɓɛ́ ɔ ké mɛ́. 3Kǎà ní mu nyɔɔ̀ dyoɖoún kpáìn, ɓɛ́ ḿ ké ɔ ɓó ɔ nyɔ ɓěɔ̀ hwìɛ̀ zà, sepóɛɖé ɔ ɖǎ ní jàɖàìn-gbò hwɛ̀ǐn-hwɛ̀ǐnɔ̀ zùǔn zàìn, ké ɔ ɖǎ ní nyɛ́nɛ́ hwɛ̀ǐn-hwɛ̀ǐnɔ̀ dyíin nyìnììn dyììn ɖé ɔ dyúɔ̀ Móɖɛ̀ nyí-nyí mú. 4Kɛɛ ɔ jǔ ké nyɔ ɓěɔ̀ dyi ɖɛ nyɔɔ̀ nyuà kɛɛ dyéɖé kɔ̃in wã̀ìn, ké wa se ɔ ɖáɓá ní, 5nìí, ní mu nyɔɔ̀ kè ɔ gbǒ-xwíníín-nyɔ̀ ɓěɔ̀ ɔ kè nyɔ séín ɓě ɓɛ́ wa síà ɔ kíɖíí, ké wa pòàìn ḿ kɔ̃ín dyììn ɖé Móɖɛ̀ ɓiè-ɓiè múɛɛ dyoɖoún kpáìn, ké ní mu wa ɓó waà nyɔ ɓěɔ̀ hwìɛ̀ zàùn.
6“Ɔ jǔ ké nyɔ ɖò dyi wɔún mu, mɔɔ ké ɔ dyi gĩɔ-nyɔ̀-gbo-wùɖù-nyɔ̀ ɖò kíɖíí sí ɓó ḿ bɛ̃̌ǐn ní, nìí, ní mu nyɔɔ̀ dyoɖoún kpáìn, ké ní mu ɔ ɓó ɔ nyɔ ɓěɔ̀ hwìɛ̀ zàùn. 7Ɔ jèɛɛ, ɓě po ɓě mìɔùn wáká, ɓɛ́ ɓě ké mú hwɛ̀, sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀. 8Ɓě mɛ kpɔ̃ ní gma ɓěɔ̀ dyi kóɖó-kóɖó, sepóɛɖé mɔ̄ mɔ̀à Bounɓo mɔ̀ nyɔ poà ɓě wáká kɛ̀.
9“Ɔ jǔ ké nyɔ ɖò dyi ɔ ɖe mɔɔ ɔ ɓǎ vàɖǎ ní, wa mɛ ɖáɓá nyɔɔ̀. Ɔ ɖǎ ɔ ɖe mɔɔ ɔ ɓǎ vàɖǎ jèɛɛ, ɔ mìɔùn nììn nyɔmɔɔ̀ zaa mu ɔ dúún wáɖáùn.
10“Ɔ jǔ ké gàa ɖò kè ɔ mǔè-gàà ɖò nììn gmàà dyi gmaɖe po ní, wa mɛ ɖáɓá gàa kè màa ɓɛ́ wa poà gmaɖeɛ. 11Ɔ jǔ ké gàa ɖò kè ɔ ɓǎà gmàà dyi ɓó da nì ní, gàaɔ̀ zàìn ɔ ɓǎɔ̀ zùǔn. Ɔ jèɛɛ, wa mɛ ɖáɓá gàaɔ̀ kè màaɔ̀. Ɔ dyi ná nìǐn, wa mìɔùn nììn nyɔmɔɔ̀ zaa mu wa dúún wáɖáùn. 12Ɔ jǔ ké gàa ɖò kè ɔ dyúɛ̀ gmàà dyi ɓó da nì ní, wa mɛ ɖáɓá wa sɔ̃́ɔ̀. Ɖɛ wa nyuà kɛɛ mɔ̀ ɖɛ nyìnììn dyíin mìɔ cá jèɛɛ, wa mìɔùn nììn nyɔmɔɔ̀ zaa mu wa dúún wáɖáùn. 13Ɔ jǔ ké gàa ɖò kè ɔ mǔè-gàà ɖò dyi ɓó da nì kà gàa kè màa nìà ɓó daa ní, ɖɛ wa nyuà náa mɔ̀ dyi-nyàìn-ɖɛ̀. Ɔ jèɛɛ, wa mɛ ɖáɓá wa sɔ̃́ɔ̀. Ɔ dyi ná nìǐn, wa mìɔùn nììn nyɔmɔɔ̀ zaa mu wa dúún wáɖáùn. 14Ɔ jǔ ké gàa ɖò dyi màa ɖò kè ɔ ɖe dyi kpɔ̃, ké wa sɔ̃́ɔ̀ dyi ɔ xwa peɖeìn ní, ɖɛ ɔ nyuà náa mɔ̀ hwòɖǒ-kɔ̃in-nyìnììn-ɖɛ̀. Ɔ jèɛɛ, wa mɛ fɔ̃ wa tãɔ̀, ɓɛ́ wa ké sĩɛ hwɛ̀, ɓɛ́ hwòɖǒ-kɔ̃in-nyìnììn-ɖɛ̀ ɖò ní kɔ̃̀ ɖà ɖé wa hwìɛ̀ nì ɖe. 15Ɔ jǔ ké gàa ɖò kè nimii ɖò dyi ɓó da nì ní, wa mɛ ɖáɓá gàaɔ̀ kè nimiiɔ̀. 16Ɔ jǔ ké màa ɖò dyi ɔ mìɔùn nimii ɖò xwáɖáún zàìn, ɓɛ́ wa ké ɓó da nì ní, wa mɛ ɖáɓá màaɔ̀ kè nimiiɔ̀. Ɔ dyi ná nìǐn, wa mìɔùn nììn nyɔmɔɔ̀ zaa mu wa dúún wáɖáùn.
17“Ɔ jǔ ké gàa ɖò dyi ɔ ɖíí-màà dyi kpɔ̃, ɓɛ́ ɔ ké ɔ gmàà jǔ, kɛbì ɔ mɛ mɔ̀ ɔ ɓǎà dyú-màà mɔɔ ɔ ɖeɛ̀ dyú-màà kɛɛ ní, ɖɛ nìà kɛ mɔ̀ dɛ̃-ɖɛ̀. Ɔ jèɛɛ, wa mɛ cɛ̃ wa woɖo gbo sɔ̀ìn ɓó waà nyɔ ɓěɔ̀ dyéɖé waí. Gàaɔ̀ kè ɔ ɖíí-mààɔ̀ ɖǎ ɓó da nì jèɛɛ, wa mɛ ɖú ɖɛ wa nyuà kɛɛ kpa dyí. 18Ɔ jǔ ké gàa ɖò kè màa ɓɛ́ ɔ nì ɔ tiɔ̀ dyéɛń nyɛɛ dyi ɓó da nì ní, nìí, wa ɖǎ màaɔ̀ tiɔ̀ ɖɔ kɔ̃in zà. Ɔ jèɛɛ, wa mɛ cɛ̃ wa sɔ̃́ɔ̀ woɖo gbo sɔ̀ìn ɖé waà nyɔ ɓěɔ̀ hwìɛ̀.
19“Nyɔ ɖò ní ɖá ɓɛ́ ɔ kè ɔ ɖe ɖíí-màà ɖò mɔɔ ɔ ɓǎ ɖíí-màà ɖò ké ɓó da nì, sepóɛɖé ɔ mɔ̀ nyɔɔ̀ gbǒ-xwíníín-nyɔ̀. Wa dyiɛ náa nyuín, nìí, wa sɔ̃́ɔ̀ mɛ ɖú waà ɖɛ gbàɔ̀ kpa dyí. 20Ɔ jǔ ké gàa ɖò kè ɔ ɓǎ ɖíí-gàà nììn gmàà dyi ɓó da nì ní, nìí, ɔ zàìn ɔ ɓǎ ɖíí-gààɔ̀ zùǔn. Ɔ jèɛɛ, gàaɔ̀ kè màaɔ̀ muɛ kpa dyí ɖúùn. Wa sɔ̃́ɔ̀ se dyú ɖò ɓéɖéɛ mu fɔɔ, ké wa mɛ́. 21Ɔ jǔ ké gàa ɖò dyi ɔ ɖíí-gàà gmàà dyí ɖú ní, ɖɛ ɔ nyuà náa mɔ̀ se-mú-hwɛ̀-ɖɛ̀. Ɔ zàìn ɔ ɖíí-gààɔ̀ zùǔn jèɛɛ, wa sɔ̃́ɔ̀ se dyú ɖò ɓéɖéɛ mu fɔɔ cá.
22“Ɓě mɛ kpɔ̃ ní gma séín ɓěɔ̀ dyi kóɖó-kóɖó, ɓɛ́ ɓóɖó kɔ̃̀ kɔ̃ ḿ nìà ɓě kpauń, ɓɛ́ ɓě kéà ɖé cĩ́ɛɛ ní kɔ̃̀ ɖà ɓě ɓɔ́. 23Ké ɓě ní ɖá ɓɛ́ ɓě ké ɓóɖóɔ̀ nyɔ ɓě ḿ nìà kúmúɛń, ɓɛ́ wa kéà ɓó ɓě dyúa sɔ̀ɛɛ kpeɖe gbà ɓěɔ̀ kíɖíí sí. Nyɔ ɓěɔ̀ nyàìn ḿ dyi ɓó kpeɖe gbà ɓě ɓɛ́ wa nyuà kɛɛ jè. 24Ɔ jèɛɛ, ḿ ɖá ɓě mu waà ɓóɖóɔ̀ kɔ̃̀ùn. Ní muɛ ɓě nyíìn, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ. Ɔ mɔ̀ ɓóɖó bã-bã kɔ̃̀ kɔ̃ ɓɛ́ ɖii-ɖɛ̀ dyíìn dyiɛ. Mɔ̄ mɔ̀à Bounɓo mɔ̀à ɓěɛ̀ Gèɖèpɔ́ɔ̀ kɛɛ mɔ̀ nyɔ poà ɓě wáká sɔ̀ìn ɓó ɓóɖó-dù ɓěɔ̀ gboɛ jèɛɛ, 25ɓě mɛ po gbo-zaìn-zaìn ɓó nimii ḿ ɖá ɔ hwɛ̀ múɛ kè nimii ḿ ɖá ɔ se mú hwɛ̀ɛ pṹa, ké ɓě mɛ po gbo-zaìn-zaìn ɓó naà ḿ ɖá ɔ se mú hwɛ̀ɛ kè naà hwɛ̀ múɛɛ pṹa. Ɓěǐn ɖá ɓɛ́ ɓě ké ɓě mìɔùn se-mú-hwɛ̀-nyɔ̀ mú nyu dyììn ɖé nimii ɖò mɔɔ naà ɖò mɔɔ ɓíɖíi-dyi-nà-ɖɛ̀ ɖò ɓɛ́ ḿ ɖá wa se mú hwɛ̀ ɓó ɓě bììɛɛ mú. 26Ɓě ɓéɖé ɓɛ́ ɓě ké mú hwɛ̀, sepóɛɖé mɔ̄ mɔ̀à Bounɓoɔ̀ kɛɛ hwɛ̀ mú, ké ḿ ɖǎ ɓě wáká po sɔ̀ìn ɖé ɓóɖó-dù ɓěɔ̀ hwìɛ̀, ɓɛ́ ɓě ké ní nyɔ ɓě jǔ.
27“Ɓěɛ̀ gàa ɖò mɔɔ màa ɖò ɓɛ́ ɔ mɔ̀ wɔ-pa-nyɔ̀ mɔɔ gĩɔ-nyɔ̀-gbo-wùɖù-nyɔ̀ kɛɛ, wa mɛ ɖáɓá nyɔɔ̀. Wa mɛ taɓaìn ɔ sɔ́ɔ́-kpò dyi, ɓɛ́ ɔ ké mɛ́. Ɔ dyi ná nìǐn, nyɔɔ̀ mìɔùn nììn nyɔmɔɔ̀ zaa mu ɔ dúún wáɖáùn.”
Currently Selected:
Ɖìvéɖékɔ̀ 20: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
