Ɖìvéɖékɔ̀ 18
18
Gma ɓě ɓá gàa ɖò kè màa ɖòɛ̀ da nì jè dyíɛ
1Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 2“Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀. 3Ɔ jèɛɛ, ɓě mɛ ɓɔ́ kpeɖe ɓě ɓɛ́ Íjè-nyɔ̀ ɓě kɔ̃̀ ɓíɖí-ɓòɖò ɓɛ́ ɓě cĩ́ ma kà kɔ̃ɛɛ nyuà kɛɛ ɖò nyuɛ, ké ɓě mɛ ɓɔ́ kpeɖe ɓě ɓɛ́ Kénà-nyɔ̀ ɓě kɔ̃̀ ɓíɖí-ɓòɖò ɓɛ́ ḿ nìà ɓě kɔ̃ kpauń wɛ̃ɛ nyuà kɛɛ ɖò nyuɛ. Ɓěǐn ɖá ɓɛ́ ɓě ké waà kpeɖe ɓěɔ̀ kíɖíí sí. 4Kɛɛ ɓě mɛ kpɔ̃ ní gma ɓěɔ̀ dyi kóɖó-kóɖó, ɓɛ́ ɓě ké wa kíɖíí sí. Sepóɛɖé mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀. 5Ɓě mɛ kpɔ̃ ní gma séín ɓěɔ̀ dyi kóɖó-kóɖó. Mɔ̄ mɔ̀ Bounɓoɔ̀ jèɛɛ, nyɔ mu ní gma ɓěɔ̀ dyi kpɔ̃ùn wɛ̃ɛ mu cĩ́ìn dyììn ɖéɛ mú.
6“Gma ɓěɔ̀ kɛà kɛ̀. Mɔ̄ mɔ̀ Bounɓoɔ̀ jèɛɛ, nyɔ ɖò ní ɖá ɓɛ́ ɔ kè nyɔ ɖò mɔ̀ ɔ gbǒ-xwíníín-nyɔ̀ɔ̀ ɖòɛɛ ké ɓó da nì. 7Nyɔ ɖò ní ɖá ɓɛ́ ɔ ké ɔ ɓǎ zùǔn zàìn dyììn ɖé nyɔɔ̀ kè ɔ ɖe da-nì-nì mú. Ɔ mɔ̀ nyɔɔ̀ ɖe jèɛɛ, nyɔɔ̀ kè ɔ ɖeɔ̀ mɛ ɓɔ́ ɓó da nìɛ̀. 8Nyɔ ɖò ní ɖá ɓɛ́ ɔ kè ɔ ɓǎà gmàà ké ɓó da nì, sepóɛɖé ɔ mɔ̀ ɔ ɓǎà gbɔ-fɔ̀nɔ̀-fɔ̀nɔ̀. 9Nyɔ ɖò ní ɖá ɓɛ́ ɔ kè ɔ ɖíí-màà ɖò ké ɓó da nì, kɛbì ɔ mɛ mɔ̀ ɔ ɓǎà dyú-màà kɛ, mɔɔ kɛbì ɔ mɛ mɔ̀ ɔ ɖeɛ̀ xwíníín-zà-dyù-màà ɓɛ́ ɔ gmɛ̀ìn ɖé wa ɓíɖí-taún mɔɔ dà kà kò ɖòɛ. 10Nyɔ ɖò ní ɖá ɓɛ́ ɔ kè ɔ dyú-gàà nììn dyú-màà ɖò mɔɔ ɔ dyú-màà nììn dyú-màà ɖò ké ɓó da nì, sepóɛɖé ɔ gbɔ-fɔ̀nɔ̀-fɔ̀nɔ̀ mɔ̀ nyɔɔ̀ nììn gbɔ-fɔ̀nɔ̀-fɔ̀nɔ̀. 11Nyɔ ɖò ní ɖá ɓɛ́ ɔ kè ɔ ɓǎà dyú-màà ɓɛ́ ɔ ɓǎɔ̀ kè ɔ gmàà kà kò ɖò ɓɛ́ ɔ ɓǎɔ̀ kpɔ̃ dyiɛɛ wóɖóìn nyɛɛ ké ɓó da nì, sepóɛɖé ɔ mɔ̀ nyɔɔ̀ ɖíí-màà. 12Nyɔ ɖò ní ɖá ɓɛ́ ɔ kè ɔ ɓǎà ɖíí-màà ɖò ké ɓó da nì, sepóɛɖé ɔ mɔ̀ ɔ ɓǎà gbǒ-xwíníín-nyɔ̀ ɖò. 13Nyɔ ɖò ní ɖá ɓɛ́ ɔ kè ɔ ɖeɛ̀ ɖíí-màà ɖò ké ɓó da nì, sepóɛɖé ɔ mɔ̀ ɔ ɖeɛ̀ gbǒ-xwíníín-nyɔ̀ ɖò. 14Nyɔ ɖò ní ɖá ɓɛ́ ɔ kè ɔ ɓǎ ɖíí-gàà nììn gmàà ké ɓó da nì, sepóɛɖé ɔ mɔ̀ ɔ ɓǎ ɖíí-gàà gmàà. 15Nyɔ ɖò ní ɖá ɓɛ́ ɔ kè ɔ dyúɛ̀ gmàà ké ɓó da nì, sepóɛɖé ɔ mɔ̀ ɔ dyúɛ̀ gmàà. 16Nyɔ ɖò ní ɖá ɓɛ́ ɔ kè ɔ ɖíí-gàà gmàà ké ɓó da nì, sepóɛɖé ɔ mɔ̀ nyɔɔ̀ ɖíí-gààɔ̀ gbɔ-fɔ̀nɔ̀-fɔ̀nɔ̀. 17Ɔ jǔ ké nyɔ ɖò kè màa ɖò dyi ɓó da nì ní, nìí, nyɔɔ̀ ní ɖá ɓɛ́ ɔ kè màaɔ̀ dyú-màà mɔɔ màaɔ̀ dyúɛ̀ dyú-màà ké ɓó da nì ɖekè, sepóɛɖé wa mɔ̀ǎ ɔ gbǒ-xwíníín-nyɔ̀ ɓě. Ɔ jǔ ké nyɔ ɖò dyi ɖɛ nì kàà kɛɛ nyuín, nìí, ɔ mɔ̀ hwòɖǒ-kɔ̃in-nyìnììn-ɖɛ̀ cá. 18Nyɔ ɖò ní ɖá ɓɛ́ ɔ ké ɔ gmàà ɖíí-màà ɖò dyi kpɔ̃, ɓɛ́ wa sɔ̃́ɔ̀ ké ɔ xwa peɖeìn.
19“Nyɔ ɖò ní ɖá ɓɛ́ ɔ kè màa ɖò ɓɛ́ ɔ nì ɔ tiɔ̀ dyéɛń nyɛɛ ké ɓó da nì, sepóɛɖé màaɔ̀ se mú hwɛ̀ ɓó tia ɓaɖa. 20Nyɔ ɖò ní ɖá ɓɛ́ ɔ kè ɔ mǔè ɖòɛ̀ gmàà ké ɓó da nì, sepóɛɖé ɖɛ nìà kɛ muɛ nyuùn ké nyɔɔ̀ se mú hwɛ̀. 21Nyɔ ɖò ní ɖá ɓɛ́ ɔ ké ɔ dyú ɖò Móɖɛ̀ mɔ̀à kũùn-kpò-gèɖèpɔ́ɔ̀ kɛɛ gbo sáa zàìn,#18:21 Wa dyi waà dyú ɓěɔ̀ Móɖɛ̀ gbo sáa zàìn ní, wa nyuɛ ké dyú ɓěɔ̀ zĩ̀ìn nyɛ-ɓɔ́ɔ́ mú. sepóɛɖé nyɔɔ̀ dyiɛ náa nyuín, nìí, ɔ nyìnììn ní nyɛ́nɛ́ɔ̀ dyíin. Ɓě nyɔ ɖò ní nyuɛ náa, sepóɛɖé mɔ̄ mɔ̀ Bounɓoɔ̀. 22Gàa ɖò ní ɖá ɓɛ́ ɔ kè ɔ mǔè-gàà ɖò ké ɓó da nì kà gàa kè màa nìà ɓó da kɛ, sepóɛɖé ɖɛ nì náa mɔ̀ dyi-nyàìn-ɖɛ̀. 23Nyɔ ɖò ní ɖá ɓɛ́ ɔ kè nimii ɖò ké ɓó da nì, sepóɛɖé ɖɛ nìà kɛ muɛ nyuùn ɓɛ́ nyɔɔ̀ ké se mú hwɛ̀. Ké màa ɖò ní ɖá ɓɛ́ ɔ ké ɔ mìɔùn nimii ɖò xwáɖáún zàìn, ɓɛ́ ɔ kè nimiiɔ̀ ké ɓó da nì, sepóɛɖé ɖɛ nìà kɛ mɔ̀ ɖɛ nyìnììn dyíin mìɔ cá.
24“Ɓě ní ɖá ɓɛ́ ɓě ké ɓě mìɔùn se-mú-hwɛ̀-nyɔ̀ mú nyu dyììn ɖé ɖɛ ɓěɛ̀ ɖò nyu-nyu mú. Sepóɛɖé ɓóɖó-dù kà kò ɖò ɓěɛ̀ nyɔ ɓě ɓɛ́ ḿ nìà ɓó ɓě dyúa dyi kúmúɛń nyɛɛ nyu wa mìɔùn se-mú-hwɛ̀-nyɔ̀ mú dyììn ɖé ɖɛ ɓěɛ̀ nyu-nyu mú. 25Ké wa nyuɛ ké ɓóɖóɔ̀ se mú hwɛ̀ ɖekè. Ɔ jèɛɛ, ní muɛ gǎ kɔ̃ tòùn ɓó waà nàmàǔn ɓěɔ̀ jè, ké wa mu gǎ dyéìn mìɔ jèɛɛ, wa mu ɓóɖóɔ̀ mú sɔ̀ùn. 26Ɔ jèɛɛ, ɓě mɔ̀ùn mɛ kpɔ̃ ní gma séín ɓěɔ̀ dyi. Ɓě mɔ̀ Éézùɖùɛ̀-dyù ɓěɛ kè ɖíà ɓě cĩ́à ɖé ɓě hwìɛ̀ kɛɛ mɛ ɓɔ́ dyi-nyàìn-ɖɛ̀ ɓěɛ̀ ɖò nyuɛ. 27Sepóɛɖé ɖɛ ɓěɛ̀ mɔ̀ ɖɛ ɓě ɓɛ́ nyɔ ɓě cĩ́à ɖé ɓóɖóɔ̀ múɛɛ nyuà ké ɓóɖóɔ̀ seà mú hwɛ̀ kɛ̀. 28Ɔ jǔ ké ɓě mɔ̀ùn dyiɛ nyu ké ɓóɖóɔ̀ se mú hwɛ̀ ní, nìí, ɓóɖóɔ̀ mu ɓě mɔ̀ùn ɓɔ́ùn ɖekè kà dyúáɖò kà ɔ muà nyɔ-dù kò-kò ɓě ɓɛ́ wa cĩ́à ɖéɛɛ mɔ̀ùn ɓɔ́ùn wɛ̃. 29Ké nyɔ kã̀ìn séín ɓɛ́ ɔ mu dyi-nyàìn-ɖɛ̀ ɓěɛ̀ ɖò nyuùn wɛ̃ɛ, ɓě mɛ cɛ̃ nyɔ nì náa woɖo gbo sɔ̀ìn ɓó ɓě hwìɛ̀. 30Mɔ̄ mɔ̀ Bounɓoɔ̀ jèɛɛ, ɓě mɛ kpɔ̃ ní gma ɓěɔ̀ dyi, ké ɓěǐn ɖá ɓɛ́ ɓě ké dyi-nyàìn-kpèɖè ɓě ɓɛ́ nyɔ ɓěɔ̀ nyuà ɖé ɓóɖóɔ̀ mú, hwɛ̀ ɓɛ́ ɓě kéà ɖé muɛɛ ɖò nyu, ɓěǐn kɔ̃̀ ɖà se-mú-hwɛ̀-nyɔ̀ jǔ.”
Currently Selected:
Ɖìvéɖékɔ̀ 18: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
