Ɖìvéɖékɔ̀ 15
15
Gma ɓě ɓá se-mú-hwɛ̀-ɖɛ̀ ɓě sɔ̀ nyɔǔn múɛɛ jè dyíɛ
1Hwɛ̀ ké Bounɓoɔ̀ wùɖù ma Mózè kè Eɖóún gbo ɖe, ké ɔ ɖá, 2“Ɓě cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ɔ jǔ ké wɛ́ ɖò dyi gàa ɖò kpɔ̃, ké wɛ́ɔ̀ dyiɛ nyu ké ní ɖò dyi ɔ nɛ́ɛ-pòìn-naínɔ̀ sɔ̀ ní, ní sɔ̀à ɔ múɛɛ se mú hwɛ̀. 3Kɛbì níɔ̀ mɛ sɔ̀ ɔ mú, ɓɛ́ ɔ ké dyi síɛ, mɔɔ kɛbì ɔ mɛ kã ɔ nɛ́ɛ-pòìn-naínɔ̀ kɛɛ, ɔ nyuɛ ké gàaɔ̀ se mú hwɛ̀. 4Ɔ dyi ná nìǐn, kɔ̃-pɛ̃́-ɖɛ̀ séín ɓɛ́ gàaɔ̀ mu kɔ̃ pɛ̃́ìn nyɛɛ mɔ̀ se-mú-hwɛ̀-ɖɛ̀, ké ɖɛ séín ɔ mu kɔ̃ kòùn wɛ̃ɛ mɔ̀ se-mú-hwɛ̀-ɖɛ̀ ɖekè. 5Ké nyɔ kã̀ìn séín mu kɔ̃-pɛ̃́-ɖɛ̀ ɔ pɛ̃́à kɔ̃ɛɛ dyi tìnììn nyɛɛ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ. 6Ké nyɔ kã̀ìn séín mu ɔ kò-naín ɖò dyi kòùn wɛ̃ɛ mɛ wɔɔ̀ ɔ ɖɔɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ. 7Ké nyɔ kã̀ìn séín mu gàa ɓɛ́ níɔ̀ sɔ̀à múɛɛ dyi tìnììn nyɛɛ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ. 8Ɔ jǔ ké gàa ɓɛ́ níɔ̀ sɔ̀à múɛɛ dyi nyɔ hwɛ̀ múɛɛ ɖò tɔ̃ɔ dya po ní, nyɔɔ̀ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀ ɖekè, ké kǎà ɔ mu ná gã̀ùn tee ɓɛ́ hwìo ké jǔ. 9Ké kɔ̃-kò-ɖɛ̀ séín ɓɛ́ gàa ɓɛ́ níɔ̀ sɔ̀à múɛɛ mu kɔ̃ kòùn ɓó ɔ kɔ̃ún-kpá-nìmììɔ̀ kɔ̃ún wɛ̃ɛ mɔ̀ se-mú-hwɛ̀-ɖɛ̀. 10Nyɔ kã̀ìn séín mu ɖɛ ɓě ɓɛ́ ɔ kòà kɔ̃ mɔɔ ɔ pɛ̃́à kɔ̃ɛɛ ɖò dyi tìnììn nyɛɛ mɔ̀ se-mú-hwɛ̀-nyɔ̀, ké kǎà ɔ mu ná gã̀ùn tee ɓɛ́ hwìo ké jǔ. Ké nyɔ kã̀ìn séín mu ɖɛ ɓěa ɖò dyí ɖúùn wɛ̃ɛ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ. 11Ɔ jǔ ké gàa ɓɛ́ níɔ̀ sɔ̀à múɛɛ se xwai dèɖè, ké ɔ dyi nyɔ ɖò dyi tìnììn ní, nyɔɔ̀ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ. 12Ɔ jǔ ké gàaɔ̀ dyi mɛ-dyàà ɖò dyi tìnììn ní, wa ɓéɖé ɓɛ́ wa kéɛ wa. Ɔ jǔ ké ɖɛ ɔ tìnìàìn dyiɛɛ dyi cu-ɖɛ̀-fùù ɖò jǔ ní, wa mɛ wɔɔ̀ìn ní.
13“Ɔ jǔ ké gàaɔ̀ ɖǎ dyi káná ní, ɔ mɛ fòìn, ɓɛ́ wé mɛ̀nɛ̌ìn-sɔ̃́ ké zi, hwɛ̀ ɓɛ́ ɔ ké ɖɛ ɓě ɓá ɔ mú hwɛ̀ jè dyíɛɛ gbɔ dè. Sɔ̀ìn ɓóɛ gboɛɛ, nìí, ɔ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké ní ɓɛ́ wa sɔ̀ wĩín ɖieɛɛ dèɖèìn. Ɔ ɖǎa náa nyuín, nìí, ɔ mu mú-hwɛ̀-nyɔ̀ jǔùn. 14Ɓó wéɔ̀ mɛ̀nɛ̌ìn-tã nììnɔ̀ ɓaɖaa, ɔ mɛ ɖú gbúɛ́-kpò sɔ̃́ mɔɔ póo-póo-kpò sɔ̃́ dyí, ɓɛ́ ɔ ké wa ɓó ḿ dyúa dyà ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ wĩín, ɓɛ́ ɔ ké wa sáa-zà-nyɔ̀ ɓěɔ̀ ɖò xwa nyí. 15Ɔ ɖǎ ná nìǐn, sáa-zà-nyɔ̀ɔ̀ mɛ zàìn wa sáa. Dyúáɖò mɛ nì ɓó nàmàǔn-sàǎ-zàìn-ɖɛ̀ jè, ɓɛ́ ɔ tɔɔ̀ ké nì ɓó fɔ̃ɔ-sàǎ-zàìn-ɖɛ̀ jè. Kǎà sáa-zà-nyɔ̀ɔ̀ mu gàaɔ̀ se-mú-hwɛ̀-ɖɛ̀ɔ̀ kɔ̃in-ɓáìn-ɖɛ̀ nyuɛ nyuùn ɓó ḿ dyúa.
16“Ɔ jǔ ké gàa ɖò dyi nyíɔún-pòǐn dya ní, ɔ mɛ dèɖè, sepóɛɖé ɔ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ. 17Ké mú-po-ɖɔ̀ ɖò mɔɔ kúɖúù-kpã̀ ɖò ɓɛ́ níɔ̀ mu kpɔ̃ùn wɛ̃ɛ, wa ɓéɖé ɓɛ́ wa kéɛ wɔɔ̀, sepóɛɖé ɔ mɔ̀ se-mú-hwɛ̀-ɖɛ̀, ké kǎà ɔ mu ná gã̀ùn tee ɓɛ́ hwìo ké jǔ. 18Ɔ jǔ ké gàa ɖò kè màa ɖò dyi ɓó da nì ní, wa sɔ̃́ɔ̀ mɛ dèɖè, sepóɛɖé wa se mú hwɛ̀, ké kǎà wa mu ná gã̀ùn tee ɓɛ́ hwìo ké jǔ.
19“Ɔ jǔ ké màa-ɓíɖí-wɛ̀ dyi màa ɖò gbo nì ní, nìí, ɔ mɔ̀ se-mú-hwɛ̀-nyɔ̀ ɓó wé mɛ̀nɛ̌ìn-sɔ̃́ xwíníín. Ké nyɔ kã̀ìn séín mu ɔ dyi tìnììn nyɛɛ mɔ̀ se-mú-hwɛ̀-nyɔ̀ ɖekè, ké kǎà nyɔɔ̀ mu ná gã̀ùn tee ɓɛ́ hwìo ké jǔ. 20Ké ɖɛ kã̀ìn séín màaɔ̀ mu kɔ̃ pɛ̃́ìn ɓó tia ɓaɖaa mɔ̀ se-mú-hwɛ̀-ɖɛ̀, ké ɖɛ séín ɔ mu kɔ̃ kòùn wɛ̃ɛ mɔ̀ se-mú-hwɛ̀-ɖɛ̀ ɖekè. 21Ké nyɔ kã̀ìn séín mu kɔ̃-pɛ̃́-ɖɛ̀ ɔ pɛ̃́à kɔ̃ɛɛ dyi tìnììn nyɛɛ mɛ wɔɔ̀ ɔ mú-po-ɖɔ̀ɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ. 22Ké nyɔ kã̀ìn séín mu màaɔ̀ kò-naín ɖò dyi tìnììn nyɛɛ mɛ wɔɔ̀ ɔ ɖɔɔ̀, ɓɛ́ ɔ ké dèɖè, sepóɛɖé nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ. 23Ɔ jǔ ké nyɔ ɖò dyi ɖɛ kã̀ìn séín ɔ pɛ̃́ kɔ̃ mɔɔ ɔ kò kɔ̃ɛɛ ɖò dyi tìnììn ní, nìí, nyɔɔ̀ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ. 24Ɔ jǔ ké gàa ɖò dyi màaɔ̀ gbo pɛ̃́ ɓó ti kɔ̃̀ ɓaɖa ɓɛ́ màaɔ̀ nìà ɔ tiɔ̀ dyéɛń keɛɛ ní, ɔ mɔ̀ se-mú-hwɛ̀-nyɔ̀ ɖekè ɓó wé mɛ̀nɛ̌ìn-sɔ̃́ xwíníín, sepóɛɖé nyɔmɔɔ sɔ̀à màaɔ̀ múɛɛ ɖò ɖǎ ɔ dyi tìnììn. Ké kɔ̃-pɛ̃́-ɖɛ̀ séín ɓɛ́ gàaɔ̀ pɛ̃́ kɔ̃ɛɛ mɔ̀ se-mú-hwɛ̀-ɖɛ̀ ɖekè.
25“Ɔ jǔ ké nyɔmɔɔ dyi màa ɖò mú sɔ̀ ɓó wé ɓáún-ɓáún xwíníín, ké ɔ se ti ɔ dyéà ɓó dɛ̀nɛ̀ séín xwíníín nyɛɛ nììn tiɔ̀ ní, mɔɔ ké ɔ dyi màaɔ̀ tiɔ̀ jǔ, kɛɛ wéɔ̀ dyi kɔ̃ zi ní, nìí, ti ɓɛ́ nyɔmɔɔ̀ nìà ɔ mú sɔ̀ǔn keɛɛ, ɔ mɔ̀ se-mú-hwɛ̀-nyɔ̀ kà dyúáɖò kà ɔ nyuà nìɛ̀ ɓá ɔ ti jɛ́ɛ́ɔ̀ jè dyíɛ. 26Ké kɔ̃-pɛ̃́-ɖɛ̀ séín màaɔ̀ mu kɔ̃ pɛ̃́ìn ɓó tia ɓaɖaa mɔ̀ se-mú-hwɛ̀-ɖɛ̀ kà dyúáɖò kà ɔ nyuà nìɛ̀ ɓó ɔ ti jɛ́ɛ́ɔ̀ ɓaɖaa. Ké ɖɛ kã̀ìn séín ɔ mu kɔ̃ kòùn wɛ̃ɛ mɔ̀ se-mú-hwɛ̀-ɖɛ̀ ɖekè kà dyúáɖò kà ɔ nyuà nìɛ̀ ɓó ɔ ti jɛ́ɛ́ɔ̀ ɓaɖaa. 27Ké nyɔ kã̀ìn séín mu ɖɛ ɓěɛ̀ ɖò dyi tìnììn nyɛɛ mɔ̀ se-mú-hwɛ̀-nyɔ̀. Nyɔɔ̀ mɛ wɔɔ̀ ɔ ɖɔɔ̀, ɓɛ́ ɔ ké dèɖè, sepóɛɖé ɔ se mú hwɛ̀, ké kǎà ɔ mu ná gã̀ùn tee ɓɛ́ hwìo ké jǔ.
28“Ɔ jǔ ké màaɔ̀ ɖǎ dyi káná ní, nìí, ɔ mɛ fòìn, ɓɛ́ wé mɛ̀nɛ̌ìn-sɔ̃́ ké zi, hwɛ̀ ké ɔ mɔ̀ mú-hwɛ̀-nyɔ̀ ɖe. 29Ɓó wéɔ̀ mɛ̀nɛ̌ìn-tã nììnɔ̀ ɓaɖaa, ɔ mɛ ɖú gbúɛ́-kpò sɔ̃́ mɔɔ póo-póo-kpò sɔ̃́ dyí, ɓɛ́ ɔ ké wa sáa-zà-nyɔ̀ ɓěɔ̀ ɖò gbo dyà ɓó jàɖàìn-gbòɔ̀ wĩín. 30Ɔ ɖǎ ná nìǐn, sáa-zà-nyɔ̀ɔ̀ mɛ zàìn wa sáa. Dyúáɖò mɛ nì ɓó nàmàǔn-sàǎ-zàìn-ɖɛ̀ jè, ɓɛ́ ɔ tɔɔ̀ ké nì ɓó fɔ̃ɔ-sàǎ-zàìn-ɖɛ̀ jè. Kǎà sáa-zà-nyɔ̀ɔ̀ mu màaɔ̀ se-mú-hwɛ̀-ɖɛ̀ɔ̀ kɔ̃in-ɓáìn-ɖɛ̀ɔ̀ nyuɛ nyuùn ɓó ḿ dyúa.
31“Ɔ jèɛɛ, Mózè kè Eɖóún, ɓě mɛ nyuɛ ɓɛ́ Éézùɖùɛ̀-dyù ɓěɔ̀ ké wáká kpá sɔ̀ìn ɓó ɖɛ ɓě ɓɛ́ìn wa se-mú-hwɛ̀-nyɔ̀ mú nyuɛ kɛɛ bũ̌, wa ní kɔ̃̀ ɖà ní cĩ́-naín nìà ɖé wa hwìɛ̀ kɛɛ zɛ̀nɛ̌ po, nìí, wa ní kɔ̃̀ ɖà mɛ́ ɓóɛ jè.”
32Kǎà gma ɓě ɓá gàa ɓɛ́ wɛ́ ɖò nyuɛ ké ní sɔ̀ ɔ nɛ́ɛ-pòìn-naínɔ̀ kɛɛ jè dyíɛ kè ɓá gàa ɓɛ́ ɔ dya nyíɔún-pòǐn nyɛɛ jè dyíɛ 33kè ɓá màa ɓɛ́ ɔ nì ɔ ti dyéɛń nyɛɛ jè dyíɛ kè ɓá màa ɓɛ́ nyɔmɔɔ sɔ̀ mú, ké ɔ se ɔ tiɔ̀ kɛɛ jè dyíɛ kè ɓá gàa ɖò ɓɛ́ ɔ pɛ̃́ màa ɖò se mú hwɛ̀ kɛ gboɛɛ jè dyíɛɛ nyu nìɛ̀.
Currently Selected:
Ɖìvéɖékɔ̀ 15: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
