Ɖìvéɖékɔ̀ 14
14
Gma ɓě ɓá nyɔ kɔ̃̀ caà-wɛ̀ ɖǎ ɓɔ́ɛɛ jè dyíɛ
1Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 2“Ti ɓɛ́ sáa-zà-nyɔ̀ɔ̀ mu nyɔ ɖò ɓɛ́ ɔ ɖǎ dyi káná sɔ̀ìn ɖé caà-wɛ̀ múɛɛ mú hwɔùn wɛ̃ɛ, gma ɓě ɓáa jè dyíɛɛ kɛà kɛ̀. Gma ɓěɔ̀ mɔ̀, wa mɛ cɛ̃ nyɔɔ̀ jè sáa-zà-nyɔ̀ɔ̀ gbo. 3Ɔ ɖǎ ná nìǐn, sáa-zà-nyɔ̀ɔ̀ mɛ mu ɖé jàɖàìn-hwɔ̀ɖɔ̀ɔ̀ ɖeín dɛ̀ nyɔɔ̀ nìà kɛ, ɓɛ́ ɔ ké nyɔɔ̀ bũ̌in gmɔìn. Ɔ jǔ ké ɔ dyiɛ dyé kà wɛ́ɔ̀ ɖǎ nyɔɔ̀ mú hwɛ̀ɛ ní, 4nìí, sáa-zà-nyɔ̀ɔ̀ mɛ nyuɛ ɓɛ́ wa ké naà ɓě ɓɛ́ ḿ ɖá wa hwɛ̀ múɛɛ sɔ̃́ kè síɖà-cùɛ̀ pĩ́á ɖò kè ɖúú zĩ-zã ɖò ɔ kè ɓáá-ɖɛ̀ kɔ̃̀ nyɛ́nɛ́ mɔ̀à hésɔ̀ kɛɛ ɖɔ́ ɖò dyà ɓó nyɔ kéà mú hwɛ̀ɛ bìì. 5Ɔ ɖǎa náa nyuín, sáa-zà-nyɔ̀ɔ̀ mɛ nyuɛ ɓɛ́ wa ké naàɔ̀ ɖò ɓó ní ɓɛ́ wa sɔ̀ wĩín ɖie, ké ɔ nì mɛ-dyàà ɖò múɛɛ kɔ̃in ɖáɓáìn. 6Sɔ̀ìn ɓóɛ gboɛɛ, sáa-zà-nyɔ̀ɔ̀ mɛ ɖú síɖà-cù-pĩ̀àɔ̀ kè ɖúú zĩ-zãɔ̀ kè hésɔ̀ ɖɔ́ɔ̀ ɔ kè naàɔ̀ nyɔ sèà ɓó, ɓɛ́ ɔ seà mɛ́ɛ dyí, ɓɛ́ ɔ ké wa naà ɓɛ́ wa ɖáɓáìn ɓó ní sɔ̀ wĩín ɖieɔ̀ kɔ̃in nyɛɛ nyɔmɔɔ ɓɛ́ ɔ caìn níɔ̀ kɛɛ gbo sṹ, 7ɓɛ́ ɔ kéɛ nyɔ ɓɛ́ wɛ́ɔ̀ sɔ̀à múɛɛ kɔ̃in mɛ́nɛ́ìn kpa mɛ̀nɛ̌ìn-sɔ̃́, hwɛ̀ ɓɛ́ ɔ ké nyɔɔ̀ mú-hwɛ̀-nyɔ̀ ɖáìn. Ɔ ɖǎa náa nyuín, ɔ mɛ síìn naàɔ̀ nyɔ seà mɛ́ɛ ɖé xwáɖá xwíɖíi dyi. 8-9Ɔ ɖǎ ná nìǐn, nìí, nyɔ kéà mú hwɛ̀ɛ mɛ wɔɔ̀ ɔ ɖɔɔ̀, ɓɛ́ ɔ ké ɔ mí séínɔ̀ kpana. Ɔ xwíníín mɔ̀, ɔ mɛ kpana ɔ dúɔ̀ kè ɔ vɛ̃̌ɔ̀ kè ɔ dɛ̃ɔ̀ ɔ kè mí tɔ̀ɔ̀ séín nì ɓó ɖeɛ, ɓɛ́ ɔ ké dèɖè. Sɔ̀ìn ɓóɛ gboɛɛ, nìí, ɔ mu mú-hwɛ̀-nyɔ̀ jǔùn. Ɔ ɖǎ ná nìǐn, ɔ mɛ dyi ɖé jàɖàìn-hwɔ̀ɖɔ̀ɔ̀ mú ɖe. Kɛɛ ɔ mɛ ɓɔ́ ɖé ɔ jàɖàìn-gbòɔ̀ mú dyáa, ɓɛ́ wé mɛ̀nɛ̌ìn-sɔ̃́ ké zi hwɛ̀. Ké ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖaa, ɔ mɛ kpana ɔ mí séín ɓěɔ̀ ɖe. Ɔ ɖǎa náa nyuín, ɔ mɛ wɔɔ̀ ɔ ɖɔɔ̀, ɓɛ́ ɔ ké dèɖè. Sɔ̀ìn ɓóɛ gboɛɛ, nìí, ɔ mu mú-hwɛ̀-nyɔ̀ jǔùn gàná cá.
10“Ɓó wéɔ̀ mɛ̀nɛ̌ìn-tã nììnɔ̀ ɓaɖaa, ɔ mɛ dyà ɓáɖáá ɓíɔ́ sɔ̃́ kè ɓáɖáá nyɔ́nɔ́ dyúáɖò ɓɛ́ ɔ nyuá zɔ̃ dyúáɖòɛɛ sáa-zà-nyɔ̀ ɓěɔ̀ gbo. Ɓáɖáá ɓěɛ̀ ɖò mɛ ɓɔ́ kɛɛ ɖò ɓéɖéɛ. Ɓó kɔ̃in ɖeɛɛ, ɔ mɛ dyà fáɖáɓà nìɛ̀-nìɛ̀ kópò-wè kpáɖá-nyɔ sè hĩinyɛ,#14:10 Gmɔ̀ ɖé Ɖìvéɖékɔ̀ 5:11 mú. ɓɛ́ ɔ kéɛ cáná caìn, ɓɛ́ ɔ ké ɖii-ɖɛ̀-sàǎ-zàìn-ɖɛ̀ jǔ. Ɔ mɛ dyàìn wa kè cáná-kòpò-wè dyúáɖò. 11Ɔ ɖǎ ná nìǐn, nìí, sáa-zà-nyɔ̀ ɓɛ́ ɔ zàà nyɔɔ̀ wuɖu kɔ̃ kà ɔ ɖǎ mú hwɛ̀ɛ mɛ zàìn nyɔɔ̀ kè ɔ sáa-zàìn-ɖɛ̀ ɓěɔ̀ ḿ xwáɖáún ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ wĩín. 12Sɔ̀ìn ɓóɛ gboɛɛ, nìí, sáa-zà-nyɔ̀ɔ̀ mɛ ɖú ɓáɖáá ɓíɔ́ ɓěɔ̀ ɖò kè cáná-kòpò-wè dyúáɖòɔ̀ dyí, ɓɛ́ ɔ ké wa kpa-pɛ́ɛ̀ìn-sàǎ-zàìn-ɖɛ̀ mú nyu. Ké ɔ mɛ vũà wa dyi, ɓɛ́ wa ké nyíí-ɖɛ̀ kpa ɖɛ jǔ ɓó ḿ bìì. 13Sɔ̀ìn ɓóɛ gboɛɛ, nyɔ dyàà sáa-zàìn-ɖɛ̀ ɓěɔ̀ kɛɛ mɛ ɖáɓáìn ɓáɖááɔ̀ ɖé pá hwɛ̀ǐn-hwɛ̀ǐn kɔ̃̀ mú ɓɛ́ wa ɖáɓáìn nàmàǔn-sàǎ-zàìn-ɖɛ̀ ɓěɔ̀ kè fɔ̃ɔ-sàǎ-zàìn-ɖɛ̀ ɓěɔ̀ kɛ. Ɔ mɛ ɖáɓáìn ɖéɛ pá hwɛ̀ǐn-hwɛ̀ǐnɔ̀ mú, sepóɛɖé sáa-zà-nyɔ̀ ɓěɔ̀ kɔ̃̀ kpa-pɛ́ɛ̀ìn-sàǎ-zàìn-ɖɛ̀ ɓěɔ̀ kà dyúáɖò kà wa kɔ̃̀à nàmàǔn-sàǎ-zàìn-ɖɛ̀ ɓěɔ̀ kɛ. Wa hwɛ̀ mú mìɔ. 14Ɔ ɖǎ ná nìǐn, sáa-zà-nyɔ̀ɔ̀ mɛ ɖú kpa-pɛ́ɛ̀ìn-sàǎ-zàìn-ɖɛ̀ɔ̀ nyɔmɔɔ̀ ɖò dyí, ɓɛ́ ɔ kéɛ ɓóɛ nyɔ kéà mú hwɛ̀ɛ ɖiaún-ɖùǔ-tééɔ̀ bũ̌ po. Ké ɔ mɛ po nyɔmɔɔ̀ ɖò ɓó nyɔɔ̀ ɖiaùn-sɔ̃̀ɔ̀ jìì-kpòɖòɔ̀ kè ɔ ɖiaùn-ɓòɔ̀ ɓìɛ̀-kpòɖòɔ̀ bũ̌. 15Sɔ̀ìn ɓóɛ gboɛɛ, nìí, sáa-zà-nyɔ̀ɔ̀ mɛ ɖú cáná-kòpò-wèɔ̀ ɖò dyí, ɓɛ́ ɔ kéɛ ɔ mìɔùn nììn kunuà-xwàɔ̀ mú púè. 16Ké ɔ mɛ kpa ɔ ɖiaùn-sɔ̃̀ɔ̀ tɔ̃́-ɓɛ̀ìn-jììɔ̀ ɖé cáná nìà ɔ xwaún wɛ̃ɛ gbo, ɓɛ́ ɔ kéɛ ɓóɛ ḿ dyúa dyi téìn kpa mɛ̀nɛ̌ìn-sɔ̃́. 17Ɔ ɖǎa náa nyuín, nìí, sáa-zà-nyɔ̀ɔ̀ mɛ po cánáɔ̀ nyɔ sèà ɔ xwaún wɛ̃ɛ ɖò ɓó nyɔ kéà mú hwɛ̀ɛ ɖiaún-ɖùǔ-tééɔ̀ kè ɔ ɖiaún-jìì-kpòɖòɔ̀ ɔ kè ɔ ɖiaún-ɓìɛ̀-kpòɖòɔ̀ bũ̌. Ɔ mɔ̀ dɛ̀ dyúáɖò ɓě ɓɛ́ ɔ poà kpa-pɛ́ɛ̀ìn-sàǎ-zàìn-ɖɛ̀ɔ̀ nyɔmɔɔ̀ kɛ. 18Ɔ ɖǎa náa nyuín, sáa-zà-nyɔ̀ɔ̀ mɛ po cánáɔ̀ nyɔ sèà ɔ xwaún wɛ̃ɛ nyɔ kéà mú hwɛ̀ɛ dú. Kǎà sáa-zà-nyɔ̀ɔ̀ mu nyɔɔ̀ se-mú-hwɛ̀-ɖɛ̀ɔ̀ kɔ̃in-ɓáìn-ɖɛ̀ nyuɛ nyuùn ɓó ḿ dyúa.
19“Sɔ̀ìn ɓóɛ gboɛɛ, nìí, sáa-zà-nyɔ̀ɔ̀ mɛ nyu nàmàǔn-sàǎ-zàìn-ɖɛ̀ɔ̀, ɓɛ́ ɔ ké nyɔɔ̀ se-mú-hwɛ̀-ɖɛ̀ɔ̀ kɔ̃in-ɓáìn-ɖɛ̀ jǔ ɖekè. Ɔ ɖǎ ná nìǐn, nìí, nyɔ kéà mú hwɛ̀ɛ mɛ ɖáɓá fɔ̃ɔ-sàǎ-zàìn-ɖɛ̀ɔ̀. 20Sɔ̀ìn ɓóɛ gboɛɛ, sáa-zà-nyɔ̀ɔ̀ mɛ fɔ̃̀ìn ɔ kè ɖii-ɖɛ̀-sàǎ-zàìn-ɖɛ̀ɔ̀ ɓó sáa-kɔ̃-zàìn-gbààɔ̀ kɔ̃, ɓɛ́ wa ké nyɔɔ̀ se-mú-hwɛ̀-ɖɛ̀ɔ̀ kɔ̃in-ɓáìn-ɖɛ̀ jǔ ɖekè. Ɔ ɖǎ ná nìǐn, nìí, nyɔɔ̀ ɖǎ mú hwɛ̀ gàná cá.
21“Kɛɛ ɔ jǔ ké nyɔɔ̀ dyi gǎ-dyé-nyɔ̀ jǔ, ké ɔ se ɖɛ ɓěɛ̀ dyéɛ ɓɛ́ìn ní, ɔ mɛ ɖú ɓáɖáá ɓíɔ́ dyúáɖò dyí, ɓɛ́ ɔ ké kpa-pɛ́ɛ̀ìn-sàǎ-zàìn-ɖɛ̀ jǔ. Sáa-zà-nyɔ̀ɔ̀ mɛ vũàà dyi, ɓɛ́ ɔ ké nyɔɔ̀ se-mú-hwɛ̀-ɖɛ̀ɔ̀ kɔ̃in-ɓáìn-ɖɛ̀ jǔ. Nyɔɔ̀ mɛ ɖúɛ kè fáɖáɓà nìɛ̀-nìɛ̀ kópò-wè mɛ̀nɛ̌ìn-tã#14:21 Gmɔ̀ ɖé Ɖìvéɖékɔ̀ 5:11 mú. dyí, ɓɛ́ ɔ kéɛ cáná caìn, ɓɛ́ ɔ ké ɖii-ɖɛ̀-sàǎ-zàìn-ɖɛ̀ jǔ. Ɔ mɛ dyàìn cáná-kòpò-wè dyúáɖò 22kè gbúɛ́-kpò sɔ̃́ mɔɔ póo-póo-kpò sɔ̃́ ɓɛ́ ɔ ɓɛ́ìn dyéɛ kɛ. Naà ɓěɔ̀ dyúáɖò mɛ nì ɓó nàmàǔn-sàǎ-zàìn-ɖɛ̀ jè, ké naà tɔ̀ɔ̀ mɛ nì ɓó fɔ̃ɔ-sàǎ-zàìn-ɖɛ̀ jè. 23Ɔ mɛ dyà ɖɛ ɓě ɓáà ɔ mú hwɔ jè dyíɛɛ ɓó wéɔ̀ mɛ̀nɛ̌ìn-tã nììnɔ̀ ɓaɖa sɔ̀ìn ɓó ti ɔ ɖǎ ma ɔ mí séínɔ̀ kpana kĩ́ín nyɛɛ gboɛ. Ɔ mɛ dyà wa sáa-zà-nyɔ̀ɔ̀ gbo ɓó jàɖàìn-gbòɔ̀ wĩín ɓó ḿ dyúa. 24Ɔ ɖǎ ná nìǐn, nìí, sáa-zà-nyɔ̀ɔ̀ mɛ ɖú ɓáɖáá mɔ̀à kpa-pɛ́ɛ̀ìn-sàǎ-zàìn-ɖɛ̀ɔ̀ kɛ kè cáná-kòpò-wè dyúáɖòɔ̀ dyí, ɓɛ́ ɔ ké wa dyi vũà, ɓɛ́ wa ké nyíí-ɖɛ̀ kpa ɖɛ jǔ ɓó ḿ bìì. 25Sɔ̀ìn ɓóɛ gboɛɛ, nìí, nyɔ kéà mú hwɛ̀ɛ mɛ ɖáɓá ɓáɖááɔ̀. Ké sáa-zà-nyɔ̀ɔ̀ mɛ ɖúɛ nyɔmɔɔ̀ ɖò dyí, ɓɛ́ ɔ kéɛ ɓóɛ nyɔɔ̀ ɖiaún-ɖùǔ-tééɔ̀ kè ɔ ɖiaún-jìì-kpòɖòɔ̀ ɔ kè ɔ ɖiaún-ɓìɛ̀-kpòɖòɔ̀ bũ̌ po. 26Ɔ ɖǎa náa nyuín, sáa-zà-nyɔ̀ɔ̀ mɛ púè cánáɔ̀ ɖò ɔ mìɔùn nììn kunuà-xwàɔ̀ mú, 27ɓɛ́ ɔ ké ɔ ɖiaùn-sɔ̃̀ɔ̀ tɔ̃́-ɓɛ̀ìn-jììɔ̀ ɖé cáná nìà ɔ xwaɔ̀ múɛɛ gbo kpa, ɓɛ́ ɔ kéɛ ɓóɛ ḿ dyúa dyi téìn kpa mɛ̀nɛ̌ìn-sɔ̃́. 28Ɔ ɖǎa náa nyuín, sáa-zà-nyɔ̀ɔ̀ mɛ po cánáɔ̀ nyɔ sèà ɔ xwaún wɛ̃ɛ ɖò ɓó nyɔ kéà mú hwɛ̀ɛ ɖiaún-ɖùǔ-tééɔ̀ kè ɔ ɖiaún-jìì-kpòɖòɔ̀ ɔ kè ɔ ɖiaún-ɓìɛ̀-kpòɖòɔ̀ bũ̌. Ɔ mɔ̀ dɛ̀ dyúáɖò ɓě ɓɛ́ ɔ poà kpa-pɛ́ɛ̀ìn-sàǎ-zàìn-ɖɛ̀ɔ̀ nyɔmɔɔ̀ kɛ. 29Ɔ ɖǎa náa nyuín, sáa-zà-nyɔ̀ɔ̀ mɛ po cánáɔ̀ nyɔ sèà ɔ xwaún wɛ̃ɛ nyɔɔ̀ dú. Kǎà sáa-zà-nyɔ̀ɔ̀ mu nyɔɔ̀ se-mú-hwɛ̀-ɖɛ̀ɔ̀ kɔ̃in-ɓáìn-ɖɛ̀ nyuɛ nyuùn ɓó ḿ dyúa. 30Sɔ̀ìn ɓóɛ gboɛɛ, nìí, sáa-zà-nyɔ̀ɔ̀ mɛ zàìn gbúɛ́ ɓě mɔɔ póo-póo ɓě ɓɛ́ nyɔɔ̀ ɓɛ́ìn dyéɛ kɛɛ sáa. 31Naà ɓěɔ̀ dyúáɖò mɛ mɔ̀ nàmàǔn-sàǎ-zàìn-ɖɛ̀, ɓɛ́ naà tɔ̀ɔ̀ ké fɔ̃ɔ-sàǎ-zàìn-ɖɛ̀ jǔ. Ɔ mɛ poìn wa kè ɖii-ɖɛ̀-sàǎ-zàìn-ɖɛ̀ɔ̀ dyí, ɓɛ́ ɔ ké wa sáa zàìn, ɓɛ́ wa ké nyɔɔ̀ se-mú-hwɛ̀-ɖɛ̀ɔ̀ kɔ̃in-ɓáìn-ɖɛ̀ jǔ ɖekè ɓó ḿ dyúa.” 32Kǎà gma ɓě ɓá nyɔ ɓɛ́ caà-wɛ̀ sɔ̀ mú, ɓɛ́ ɔ se sáa-zàìn-ɖɛ̀ tɔ̀ɔ̀ ɓěɔ̀ dyéɛ ɓɛ́ìn ɓá ɔ mú hwɔ jè dyíɛɛ nyu nìɛ̀.
Gma ɓě ɓá kɛɓɛɛ nì ɖé gbǒ ɓě múɛɛ jè dyíɛ
33Hwɛ̀ ké Bounɓoɔ̀ wùɖù ma Mózè kè Eɖóún gbo, ké ɔ ɖá, 34“Ti ɓɛ́ ɓě kè Éézùɖùɛ̀-dyù ɓěɔ̀ mu ɖé Kénà-ɓòɖò ɓɛ́ ḿ nìà ɓě nyíɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃ nyiniìn nyɛɛ, ɔ jǔ ké ḿ dyi kɛɓɛɛ#14:34 Kɛɓɛɛ mɔ̀ ɖɛ ɓɛ́ ɔ ɖi sɔ́ɔ́ ɖé Éézùɖùɛ̀-ɓòɖòɔ̀ kɔ̃ɛ. ɖò ɓɛ́ ɔ gbɛ̀ìn dyiɛɛ ɖé gbǒ ɖò mú po ɖé ɓóɖóɔ̀ kɔ̃ ní, 35nìí, gbǒɔ̀ kɔ̃̀-nyɔ̀ɔ̀ mɛ mu ɖé sáa-zà-nyɔ̀ ɓěɔ̀ gbo, ɓɛ́ ɔ ké níiń, ‘Ḿ dyé ɖɛ ɖò ɖé ní gbǒɔ̀ mú kà kɛɓɛɛ nìà kɛ.’ 36Ɔ dyi ná nìǐn, nìí, sáa-zà-nyɔ̀ ɓěɔ̀ ɖò mɛ tò wuɖu, ɓɛ́ wa ké ɖɛ séín nì gbǒɔ̀ múɛɛ ɖé dyi zà, hwɛ̀ ɓɛ́ ɔ ké kɛɓɛɛ nìà gbǒɔ̀ múɛɛ bũ̌in gmɔìn dyi, ɔ ní kɔ̃̀ ɖà ɖɛ ɓě nì gbǒɔ̀ múɛɛ ɖò se-mú-hwɛ̀-ɖɛ̀ ɖáìn. Ti wa ɖǎ ɖɛ séín ɓěɔ̀ síɛ̀n hwɔɛ, nìí, sáa-zà-nyɔ̀ɔ̀ mɛ dyá ɖé gbǒɔ̀ mú, ɓɛ́ ɔ ké gbǒɔ̀ múin gmɔìn. 37Ɔ mɛ gmɔìn kɛɓɛɛɔ̀ bũ̌in. Ɔ jǔ ké ɔ dyiɛ dyé kà kɛɓɛɛɔ̀ ɓéɖé hwúe-dyèɖè mɔɔ dyéɖé zĩ-zã, ké ɔ mu hwuɖu ɓó gbǒɔ̀ dyéɖéín nyɛɛ ní, 38nìí, ɔ mɛ sɔ̀ ɖé gbǒɔ̀ mú, ɓɛ́ ɔ ké gbǒɔ̀ kã ɓó wé mɛ̀nɛ̌ìn-sɔ̃́ xwíníín. 39Ké sáa-zà-nyɔ̀ɔ̀ mɛ dyi ɖe ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖa, ɓɛ́ ɔ ké kɛɓɛɛ nìà ɖé gbǒɔ̀ múɛɛ dyé ɖe. Ɔ jǔ ké kɛɓɛɛɔ̀ dyi gbǒɔ̀ dyéɖéín dyi gbɛ̀ìn ní, 40nìí, ɔ mɛ zà sɔ́ɔ́-kpò ɓě ɓɛ́ kɛɓɛɛɔ̀ nìà bũ̌in nyɛɛ wuɖu kɔ̃, ɓɛ́ wa ké sɔ́ɔ́-kpò ɓěɔ̀ gbǒɔ̀ bũ̌ zà, ɓɛ́ wa kéɛ xwáɖáún po ɖé hwɔɖɔɔ̀ ɖeín, ɖé pá ɓɛ́ ḿ ɖá ɔ se mú hwɛ̀ kɛɛ mú. 41Sɔ̀ìn ɓóɛ gboɛɛ, ɔ mɛ nyuɛ ɓɛ́ wa ké gbǒɔ̀ xwíníínɔ̀ dyéɖéín dyi kpana dà séín. Ké wa mɛ wáɖá púu-púu ɓɛ́ wa kpanaà gbǒɔ̀ dyéɖéín dyiɛɛ xwáɖáún ɖé hwɔɖɔɔ̀ ɖeín, ɖé pá dyúáɖòɔ̀ mú. 42Wa ɖǎa náa nyuín, nìí, wa mɛ ɖú sɔ́ɔ́-kpò kà kò ɖò ɓě dyí, ɓɛ́ wa kéɛ sɔ́ɔ́-kpò ɓěɔ̀ dyɛ mɔ̀ɔ̀ bɛ̃̌ǐn po, ɓɛ́ wa ké mɛ ɖìè ɖò dyí ɖú, ɓɛ́ wa kéɛ gbǒɔ̀ xwíníín dyi sàmàìn ɖe.
43“Kɛɛ ɔ jǔ ké kɛɓɛɛɔ̀ ɖò dyi ɖé gbǒɔ̀ mú dyi ɖe sɔ̀ìn ɓó ti ɓɛ́ wa ɖǎà sɔ́ɔ́-kpò ɓě ɓɛ́ kɛɓɛɛɔ̀ kpɔ̃ ma kà kɛɛ gbǒɔ̀ bũ̌ zà, ké wa ɖǎ gbǒɔ̀ dyéɖéín dyi kpana, ké wa ɖǎa sama ɖe ɖieɛ gboɛɛ ní, 44nìí, sáa-zà-nyɔ̀ɔ̀ mɛ mu, ɓɛ́ ɔ kéɛ bũ̌in gmɔìn ɖe. Ɔ jǔ ké kɛɓɛɛɔ̀ dyi gbǒɔ̀ múin gbɛ̀ìn ní, nìí, ɔ mɔ̀ ɖɛ-mú-gbɔɔ̀-kɛ̀ɓɛ̀ɛ̀. Ké ɔ dyi ná nìǐn, gbǒɔ̀ se mú hwɛ̀. 45Ɔ dyi ná nìǐn, nìí, sáa-zà-nyɔ̀ɔ̀ mɛ tò wuɖu, ɓɛ́ wa ké gbǒɔ̀ wáɖá, ɓɛ́ wa kéɛ sɔ́ɔ́-kpò ɓěɔ̀ kèɛ̀ cu-pĩ̀à ɓěɔ̀ ɔ kè gbǒɔ̀ sàmàìn-ɖɛ̀ séín ɓěɔ̀ dyí ɖú, ɓɛ́ wa ké wa ɖé hwɔɖɔɔ̀ ɖeín kpa, ɓɛ́ wa ké wa xwáɖáún wáɖá ɖé pá ḿ ɖá ɔ se mú hwɛ̀ kɛɛ mú.
46“Ti ɓɛ́ sáa-zà-nyɔ̀ɔ̀ ɖǎ gbǒɔ̀ kã kɛɛ, ɔ jǔ ké nyɔ ɖò dyi ɖéɛ mú dyá ɖe ní, nìí, nyɔɔ̀ mɔ̀ se-mú-hwɛ̀-nyɔ̀, ké kǎà ɔ mu ná gã̀ùn tee ɓɛ́ hwìo ké jǔ. 47Ɔ jǔ ké nyɔɔ̀ dyi ɖé gbǒɔ̀ mú pɛ̃́, mɔɔ ké ɔ dyi ɖé ɖɛ ɖììn ní, nìí, ɔ mɛ wɔɔ̀ ɔ ɖɔɔ̀.
48“Sɔ̀ìn ɓó ti ɓɛ́ wa ɖǎ gbǒɔ̀ sama ɖe ɖieɛɛ, nìí, sáa-zà-nyɔ̀ɔ̀ mɛ gmɔìn ɖé gbǒɔ̀ múin ɖe. Ɔ jǔ ké ɔ se kɛɓɛɛɔ̀ ɖò ɖé gbǒɔ̀ mú dyé ɖe ní, ɔ mɛ cɛ̃ɛ kà gbǒɔ̀ ɖǎ mú hwɛ̀ kɛ, sepóɛɖé kɛɓɛɛ ɖò se ɖé nì ɖe. 49Ɔ ɖǎ ná nìǐn, nìí, ɖɛ ɓě sáa-zà-nyɔ̀ɔ̀ mɛ nyu ɓá gbǒɔ̀ mú hwɔ jè dyíɛɛ, wa kɛà kɛ̀. Ɔ mɛ ɖú naà sɔ̃́ kè síɖà-cùɛ̀ pĩ́á ɖò kè ɖúú zĩ-zã ɖò ɔ kè hésɔ̀ ɖɔ́ ɖò dyí. 50Ɔ ɖǎa náa nyuín, nìí, ɔ mɛ ɖáɓáìn naàɔ̀ ɖò ɓó ní ɓɛ́ wa sɔ̀ wĩín ɖie, ké ɔ nì mɛ-dyàà ɖò múɛɛ kɔ̃in. 51Sɔ̀ìn ɓóɛ gboɛɛ, ɔ mɛ ɖú síɖà-cù-pĩ̀àɔ̀ kè hésɔ̀ ɖɔ́ɔ̀ kè ɖúú zĩ-zãɔ̀ ɔ kè naàɔ̀ nyɔ sèà ɓó, ɓɛ́ ɔ seà mɛ́ɛ dyí, ɓɛ́ ɔ ké wa naà ɓɛ́ ɔ ɖáɓáà kɛɛ nyɔmɔɔ nìà níɔ̀ gboɛɛ gbo sṹ, ɓɛ́ ɔ kéɛ gbǒɔ̀ dya dyi mɛ́nɛ́ìn kpa mɛ̀nɛ̌ìn-sɔ̃́. 52Kǎà ɔ mu gbǒɔ̀ mú hwɔɔ nyuùn dyììn ɖé naàɔ̀ nyɔmɔɔ̀ kè ní wa sɔ̀ wĩín ɖieɛ kè naàɔ̀ nyɔ seà mɛ́ɛ kè síɖà-cù-pĩ̀àɔ̀ kè hésɔ̀ ɖɔ́ɔ̀ ɔ ké ɖúú zĩ-zãɔ̀ mú. 53Ɔ ɖǎa náa nyuín, nìí, ɔ mɛ síìn naàɔ̀ nyɔ seà mɛ́ɛ ɖé hwɔɖɔɔ̀ ɖeín dyi ɖé xwáɖá xwíɖíi. Kǎà sáa-zà-nyɔ̀ɔ̀ mu gbǒ se-mú-hwɛ̀ɔ̀ kɔ̃in-ɓáìn-ɖɛ̀ nyuɛ nyuùn. Ɔ ɖǎ ná nìǐn, nìí, gbǒɔ̀ ɖǎ mú hwɛ̀.”
54-57Kǎà gma ɓě ɓá caà-wɛ̀ ɓɛ́ìn nyɔ ɖò kpɔ̃ɔ kɛ kè hwúe ɔ kè kɛɓɛɛ jè dyíɛɛ nyu nìɛ̀. Wɛ́ ɓě ɓɛ́ wa ɓɛ́ìn caà-wɛ̀ jǔɛ ɖé dyúa kɛɛ, wa kɛà kɛ̀. Wa mɔ̀ pèɖè kè jě kè kùɖùɔ̀-kùɖùɔ̀ ɔ kè bɛ̃̌ bũ̌-bũ̌. Hwúe ɓɛ́ìn ɖɔ kpɔ̃ɔ, ké kɛɓɛɛ ɓɛ́ìn gbǒ kpɔ̃ɔ. Gma ɓěɛ̀ kéɛ nyu ɓɛ́ Éézùɖùɛ̀-nyɔ̀ ɓěɔ̀ ké gbo-zaìn-zaìn ɓó ɖɛ hwɛ̀ múɛ kè ɖɛ se mú hwɛ̀ɛ pṹa po.
Currently Selected:
Ɖìvéɖékɔ̀ 14: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
