Ɖìvéɖékɔ̀ 16
16
Nàmàǔn-Ɖɛ-Kɔ̃in-Ɓáìn-wèɔ̀
1Ti ɓɛ́ Eɖóún dyú-gàà sɔ̃́ ɓěɔ̀ ɖǎ ma mɛ́, sepóɛɖé wa po ma nyɛ kɔ̃̀ jè ɓɛ́ Bounɓoɔ̀ se ma wuɖu kɔ̃ zà kɛɛ dyí jèɛɛ, Bounɓoɔ̀ wùɖù ma Mózè gbo, 2ké ɔ ɖá, “Cɛ̃ɛ m̀ ɖíí-gàà Eɖóún gbo kà ḿ ɖá ɔ mɛ ɓɔ́ ɖé pá hwɛ̀ mú mìɔɔ̀ mú dyiɛ ɓó ti séín pū, ɔ ní kɔ̃̀ ɖà mɛ́. Pá Hwɛ̀ Mú Mìɔɔ̀ nì ɖé faà-ɖɔ̀ ɓáà ɖé jàɖàìn-gbòɔ̀ mú dyiíɛɛ ɖeín. Sepóɛɖé ɖéɛ̀ ḿ dyììn ní-kpò ɖò mú ɓó ní nyɔ-wìì-kɔ̃-ɓéɖéìn-naín nìà ɓó dèè-wùɖù-gbɔ̀ɖɔ̀ɔ̀ kɔ̃ɛɛ kɔ̃in. 3Kɛɛ kà ɔ ké ɖé Pá Hwɛ̀ Mú Mìɔɔ̀ mú dyáa nyuɛɛ, ɔ kɛà kɛ̀. Ɔ mɛ dyà ɓìɖǐ ɓíɔ́ ɖò, ɓɛ́ ɔ ké nàmàǔn-sàǎ-zàìn-ɖɛ̀ jǔ. Ké ɔ mɛ dyà ɓáɖáá ɓíɔ́ ɖò, ɓɛ́ ɔ ké fɔ̃ɔ-sàǎ-zàìn-ɖɛ̀ jǔ. 4Ɔ ɖǎa náa nyuín, nìí, ɔ mɛ dèɖè, ɓɛ́ ɔ ké ɖénì-ɓɔ̀ùn-ɓɔ́ún ɖò mú po kĩ́ín. Sɔ̀ìn ɓóɛ gboɛɛ, ɔ mɛ po ɖénì-gã̀ùn ɖò mú, ɓɛ́ ɔ kéɛ ɖénì-gbò-jìnììn-ɖɛ̀ ɖò kɔ̃in jìnììn, ɓɛ́ ɔ ké ɖénì dúi-bĩìn-ɖɔ̀ ɓɛ́ wa ɖǎ páɖá kĩ́ín nyɛɛ dú dèìn. Ɖɔ ɓěɛ̀ mɔ̀ ɖɔ hwɛ̀ mú mìɔ. 5Ɔ ɖǎ ná nìǐn, Éézùɖùɛ̀-dyù ɓěɔ̀ mɛ nyí ɔ vã́á sɔ̃́ ɓó nàmàǔn-sàǎ-zàìn-ɖɛ̀ jè ɔ kè ɓáɖáá ɓíɔ́ ɖò ɓó fɔ̃ɔ-sàǎ-zàìn-ɖɛ̀ jè.
6“Sɔ̀ìn ɓóɛ gboɛɛ, nìí, Eɖóún mɛ zàìn ɔ nììn ɓìɖǐ ɓíɔ́ɔ̀ sáa, ɓɛ́ ɔ ké ɔ mìɔùn kè ɔ gbǒ-xwíníín gànáɔ̀ nììn nàmàǔn-kɔ̃in-ɓáìn-ɖɛ̀ jǔ. 7Ɔ ɖǎa náa nyuín, ɔ mɛ ɖú vã́á sɔ̃́ɔ̀ dyí, ɓɛ́ ɔ ké wa ɓó ḿ dyúa dyà ɓó jàɖàìn-gbòɔ̀ wĩín. 8Ké ɔ mɛ nyu gbo-ɖàɓàìn-ɖɛ̀ ɓá wiɖi sɔ̃́ɔ̀ jè dyí. Dyúáɖò mɛ nì ɓó ḿ bìì, ké ɔ tɔɔ̀ mɛ mɔ̀ wiɖi ɓɛ́ wa kéà xwáɖá xwíɖíi dyi síìn nyɛ. 9Ké Eɖóún mɛ ɖú wiɖiɔ̀ nyɔ ɓɛ́ gbo-ɖàɓàìn-ɖɛ̀ɔ̀ kpɔ̃à ɓó níǐn sáa-zàìn-ɖɛ̀ jèɛɛ dyí, ɓɛ́ ɔ kéɛ sáa zàìn, ɓɛ́ ɔ ké nàmàǔn-sàǎ-zàìn-ɖɛ̀ jǔ. 10Kɛɛ wiɖi tɔ̀ɔ̀ ɓɛ́ gbo-ɖàɓàìn-ɖɛ̀ɔ̀ kpɔ̃à ɓó xwáɖá xwíɖíi dyi síìn jèɛɛ mɛ nì cĩ́ɛń, ɓɛ́ Eɖóún kéɛ ɓó ḿ dyúa dyà, ɓɛ́ ɔ ké nyɔ ɓěɔ̀ nàmàǔn ɓěɔ̀ ɓóɛ kɔ̃ po, ɓɛ́ wa kéɛ ɖé gbǎùn-fúɖúáɔ̀ kɔ̃ dyi síìn, ɓɛ́ wiɖiɔ̀ ké nyɔ ɓěɔ̀ nàmàǔn ɓěɔ̀ kɔ̃in-ɓáìn-ɖɛ̀ jǔ.
11“Ti ɓɛ́ Eɖóún mu ɓìɖǐ ɓíɔ́ mɔ̀à ɔ mìɔùn kè ɔ gbǒ-xwíníínɔ̀ nììn nàmàǔn-sàǎ-zàìn-ɖɛ̀ɔ̀ kɛɛ sáa zàìn nyɛɛ, 12nìí, ɔ mɛ ɖú nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ ɖò dyí, ɓɛ́ ɔ kéɛ nyɛ-kɛ̀nɛ̀ sɔ̀ìn ɓó gbàà nìà ɓó ḿ dyúa kɛ kɔ̃ɛɛ mú dyíìn. Ké ɔ mɛ ɖú nyɔ́ún-nɔ̀mɔ̀-ɖɛ̀ ɓóɖó nìɛ̀-nìɛ̀ xwa-wè sɔ̃́ dyí, ɓɛ́ ɔ ké wa ɖé faà-ɖɔ̀ɔ̀ ɖeín kpa. 13Ké ɔ mɛ po nyɔ́ún-nɔ̀mɔ̀-ɖɛ̀ɔ̀ dyéɖé ɓó ḿ dyúa, nìí ɓɛ́ nyɔ́ún-nɔ̀mɔ̀-ɖɛ̀ɔ̀ nyànà-sòɔ̀ ké ní nyɔ-wìì-kɔ̃-ɓéɖéìn-naín nìà ɓó dèè-wùɖù-gbɔ̀ɖɔ̀ɔ̀ kɔ̃ɛɛ kɔ̃in ɓáìn. Eɖóún mɛ nyuɛ náa, ɔ ní kɔ̃̀ ɖà mɛ́. 14Sɔ̀ìn ɓóɛ gboɛɛ, nìí, ɔ mɛ ɓéɖéìn ɓìɖǐ ɓíɔ́ɔ̀ nyɔmɔɔ̀ ɖò jìì mánáín, ɓɛ́ ɔ kéɛ ɓóɛ ní nyɔ-wìì-kɔ̃-ɓéɖéìn-naínɔ̀ wáká hwɔà ɖé dyúa dyíɛɛ kɔ̃ dyi téìn. Ɔ ɖǎa náa nyuín, nìí, ɔ mɛ ɓéɖéìn nyɔmɔɔ̀ ɖò jìì mánáín, ɓɛ́ ɔ kéɛ ɓóɛ ní nyɔ-wìì-kɔ̃-ɓéɖéìn-naínɔ̀ dyúa dyi téìn kpa mɛ̀nɛ̌ìn-sɔ̃́.
15“Sɔ̀ìn ɓóɛ gboɛɛ, nìí, Eɖóún mɛ ɖáɓá wiɖi ɓɛ́ ɔ mɔ̀à nyɔ ɓěɔ̀ nàmàǔn-sàǎ-zàìn-ɖɛ̀ɔ̀ kɛ, ɓɛ́ ɔ kéɛ nyɔmɔɔ̀ ɖé faà-ɖɔ̀ ɓáà ɖé jàɖàìn-gbòɔ̀ mú dyiíɛɛ ɖeín kpa, ɓɛ́ ɔ kéɛ ɖɛ dyúáɖò ɔ nyùìn ma kà ɓìɖǐ ɓíɔ́ɔ̀ nyɔmɔɔ̀ múɛɛ mú nyùìn. Ɔ xwíníín mɔ̀, ɔ mɛ téɛ̀n ɓóɛ ní nyɔ-wìì-kɔ̃-ɓéɖéìn-naínɔ̀ kɔ̃in kè ɓóɛ dyúa dyi. 16Kǎà ɔ mu Pá Hwɛ̀ Mú Mìɔɔ̀ mú hwɔɔ nyuùn ɓá Éézùɖùɛ̀-dyù ɓěɔ̀ se-mú-hwɛ̀-ɖɛ̀ ɓě kè gmaún-jaɖa-jaɖa ɓě kè nàmàǔn tɔ̀ɔ̀ ɓě wa ɖǎ nyuɛɛ jè dyí. Ké ɔ mɛ nyu hwɔìn-ɖɛ̀ dyúáɖòɔ̀ ɓó jàɖàìn-gbòɔ̀ wáká tɔ̀ɔ̀ ɓěɔ̀ bìì ɖekè, sepóɛɖé jàɖàìn-gbòɔ̀ nì ɖé nyɔ ɓěɔ̀ se-mú-hwɛ̀-ɖɛ̀ ɓěɔ̀ hwìɛ̀. 17Sɔ̀ìn ɓó ti Eɖóún mu ɖé Pá Hwɛ̀ Mú Mìɔɔ̀ mú dyáùn, ɓɛ́ ɔ ké nyɔ ɓěɔ̀ nàmàǔn ɓěɔ̀ kɔ̃in-ɓáìn-ɖɛ̀ nyuɛɛ gbo, ké ɔ píé-sí-tìɔ̀ dyɛ̀ìn nyɛɛ, nyɔ ɖò mɛ ɓɔ́ ɖé jàɖàìn-gbòɔ̀ mú dyáa fɔɔ cá. Ti ɓɛ́ ɔ ɖǎ ɔ mìɔùn kè ɔ gbǒ-xwíníín-nyɔ̀ ɓěɔ̀ ɔ kè Éézùɖùɛ̀-dyù séín ɓěɔ̀ nàmàǔn ɓěɔ̀ kɔ̃in-ɓáìn-ɖɛ̀ nyuɛ hwɔɛɛ ní, 18nìí, ɔ mɛ sí píé ɓó sáa-kɔ̃-zàìn-gbààɔ̀ gbo, ɓó ḿ dyúa, ɓɛ́ ɔ ké gbààɔ̀ mú hwɔ. Ɔ mɛ ɖú ɓìɖǐ ɓíɔ́ɔ̀ nyɔmɔɔ̀ ɖò kè wiɖiɔ̀ nyɔmɔɔ̀ ɖò dyí, ɓɛ́ ɔ kéɛ ɖɛ hwɔìn nimii-gmɛ̌ ɓě nìà ɓó gbààɔ̀ gã séín ɓěɔ̀ kɔ̃ɛɛ bũ̌ po. 19Ɔ mɛ ɓéɖéìn nyɔmɔɔ̀ ɖò jìì mánáín, ɓɛ́ ɔ kéɛ ɓóɛ gbààɔ̀ kɔ̃ dyi téìn kpa mɛ̀nɛ̌ìn-sɔ̃́, ɓɛ́ ɔ kéɛ wáká po sɔ̀ìn ɖé Éézùɖùɛ̀-dyù ɓěɔ̀ se-mú-hwɛ̀-ɖɛ̀ ɓěɔ̀ mú.
Xwáɖá-xwíɖíi-dyi-síìn-wìɖìɔ̀
20“Ti ɓɛ́ Eɖóún ɖǎ Pá Hwɛ̀ Mú Mìɔɔ̀ kè jàɖàìn-gbòɔ̀ wáká tɔ̀ɔ̀ ɓěɔ̀ ɔ kè gbààɔ̀ mú hwɔɛɛ ní, nìí, ɔ mɛ dyà xwáɖá-xwíɖíi-dyi-síìn-wìɖìɔ̀ ɓó ḿ dyúa. 21Ɔ ɖǎa náa nyuín, nìí, ɔ mɛ dè ɔ sɔ̃ sɔ̃́ɔ̀ wiɖiɔ̀ dú, ɓɛ́ ɔ ké Éézùɖùɛ̀-dyù ɓěɔ̀ hwe séín kè waà gmaún-jaɖa-jaɖa séín ɓěɔ̀ mú wɔ̃́ìn ɓóɛ kɔ̃in. Ɔ xwíníín mɔ̀, ɔ mɛ po waà nàmàǔn séín ɓěɔ̀ ɓó wiɖiɔ̀ dú. Sɔ̀ìn ɓóɛ gboɛɛ, nìí, ɔ mɛ dèìn wiɖiɔ̀ gàa ɖò ɓɛ́ wa mu gãùn ɓó ɖɛ nìà kɛ nyu jèɛɛ xwa, ɓɛ́ ɔ kéɛ ɖéɛ gbǎùn-fúɖúáɔ̀ kɔ̃ kpa. 22Waà nàmàǔn séín ɓěɔ̀ mu wiɖiɔ̀ kɔ̃ nììn, ɓɛ́ gàaɔ̀ kéɛ ɖéɛ dà kpái-kpái ɖò kpa ɖé gbǎùn-fúɖúáɔ̀ kɔ̃, ɓɛ́ ɔ kéɛ ɖéɛ dyi síìn.
23“Ɔ ɖǎ ná nìǐn, nìí, Eɖóún mɛ mu ɖé jàɖàìn-gbòɔ̀ mú ɖe, ɓɛ́ ɔ ké ɖénì-ɖɔ̀ ɓě ɓɛ́ ɔ poà mú, hwɛ̀ ɓɛ́ ɔ dyià ɖé Pá Hwɛ̀ Mú Mìɔɔ̀ mú dyáa mú zà, ɓɛ́ ɔ ké ɖé wa sè. 24Ké ɔ mɛ dèɖèìn ɖé pá hwɛ̀ǐn-hwɛ̀ǐn ɖò mú, ɓɛ́ ɔ ké ɔ mìɔùn nììn ɖɔɔ̀ mú po, hwɛ̀ ɓɛ́ ɔ ké píé sí, ɓɛ́ ɔ ké fɔ̃ɔ-sàǎ-zàìn-ɖɛ̀ɔ̀ nyu ɓó ɔ mìɔùn bìì, ɔ kè ɓɛ́ ɔ ké fɔ̃ɔ-sàǎ-zàìn-ɖɛ̀ nyu ɓó nyɔ ɓěɔ̀ bìì, ɓɛ́ wa ké ɔ mìɔùn nììn nàmàǔn ɓěɔ̀ kè nyɔ ɓěɔ̀ nàmàǔn ɓěɔ̀ kɔ̃in-ɓáìn-ɖɛ̀ jǔ. 25Ké ɔ mɛ fɔ̃̀ìn nàmàǔn-sàǎ-zàìn-ɖɛ̀ ɓěɔ̀ cánáɔ̀ ɓó gbààɔ̀ kɔ̃ ɖekè. 26Ti ɓɛ́ gàa ɓɛ́ ɔ kpaà xwáɖá-xwíɖíi-dyi-síìn-wìɖìɔ̀ kɛɛ ɖǎ ɖe kɔ́ìn nyɛɛ ní, nìí, ɔ mɛ wɔɔ̀ ɔ ɖɔɔ̀, ɓɛ́ ɔ ké dèɖè, hwɛ̀ ɓɛ́ ɔ ké ɖé jàɖàìn-hwɔ̀ɖɔ̀ɔ̀ mú ɖe dyi. 27Ké gàa ɖò mɛ kpa ɓìɖǐ ɓíɔ́ kè wiɖi mɔ̀à nàmàǔn-sàǎ-zàìn-ɖɛ̀ ɓě kɔ̃̀ nyɔmɔɔ ɓɛ́ Eɖóún ɖǎ nɔ̄ Pá Hwɛ̀ Mú Mìɔɔ̀ mú dyà, ɓɛ́ ɔ kéà nyɔ ɓěɔ̀ nàmàǔn ɓěɔ̀ kɔ̃in-ɓáìn-ɖɛ̀ jǔɛɛ fɔ́ kè waà kúɖúù kè waà mɛ́ɔ̀ ɖé jàɖàìn-hwɔ̀ɖɔ̀ɔ̀ ɖeín, ɓɛ́ ɔ ké ɖé wa fɔ̃̀ìn. 28Ké gàa ɓɛ́ ɔ muà wa fɔ̃ùn wɛ̃ɛ mɛ wɔɔ̀ ɔ ɖɔɔ̀, ɓɛ́ ɔ ké dèɖè, hwɛ̀ ɓɛ́ ɔ ké ɖé jàɖàìn-hwɔ̀ɖɔ̀ɔ̀ mú ɖe dyi.
Gma ɓě ɓá Nàmàǔn-Ɖɛ-Kɔ̃in-Ɓáìn-wèɔ̀ dyi kpɔ̃ jè dyíɛ
29“Ɖɛ ɓě nìà kɛ mɛ mɔ̀ gma kánáá pū ɓó ɓě bìì. Gma ɓěɔ̀ mɔ̀, ɓě ɖò-ɖò séín mɛ hwèɖè wɔ̃ kɔ̃ ɓó dɛ̀nɛ̀ɔ̀ mɛ̀nɛ̌ìn-sɔ̃́ nììnɔ̀ wé ɓaɖa-bùè nììnɔ̀ ɓaɖa. Ké ɓěɛ̀ nyɔ ɖò mɛ ɓɔ́ kũ̀à ɖò nyuɛ, kɛbì ɔ mɛ mɔ̀ ɓě mìɔùn nììn nyɔ ɓěɔ̀ ɖò mɔɔ ɖíà ɓě cĩ́à ɖé ɓě hwìɛ̀ kɛɛ ɖòɛ. 30Sepóɛɖé wé nìà kɛ mɔ̀ wé kɔ̃̀ ɓaɖa sáa-zà-nyɔ̀ vɛ̀nɛ̀ɔ̀ muà ɓěɛ̀ nàmàǔn ɓěɔ̀ kɔ̃in-ɓáìn-ɖɛ̀ nyuùn, ɓɛ́ ɓě kéà mú hwɛ̀ kɛ̀. Ɔ dyi ná nìǐn, nìí, ɓě mu mú hwɛ̀ìn sɔ̀ìn ɖé ɓěɛ̀ nàmàǔn séín ɓěɔ̀ mú, ɓó ḿ dyúa. 31Wé nìà kɛ mɛ mɔ̀ fɔ̀-wè ɓó ɓě bìì, ké ɓě mɛ hwèɖè wɔ̃ kɔ̃. Ɖɛ ɓě nìà kɛ mɛ mɔ̀ gma kánáá pū ɓó ɓě bìì. 32Sáa-zà-nyɔ̀ ɓɛ́ ḿ po cáná dúún, ké ḿ po kũ̀à kɔ̃ún, ɓɛ́ ɔ ké ɔ ɓǎ bɛ̃̌ǐn sè, ɓɛ́ ɔ ké sáa-zà-nyɔ̀ vɛ̀nɛ̀ jǔɛɛ mɔ̀ nyɔ mɛ nyu ɓěɛ̀ nàmàǔn ɓěɔ̀ kɔ̃in-ɓáìn-ɖɛ̀ɔ̀. Ɔ mɔ̀ nyɔ mɛ po ɖénì-ɖɔ̀ hwɛ̀ǐn-hwɛ̀ǐn ɓěɔ̀ mú, 33ɓɛ́ ɔ ké Pá Hwɛ̀ Mú Mìɔɔ̀ kè jàɖàìn-gbòɔ̀ wáká tɔ̀ɔ̀ ɓěɔ̀ ɔ kè sáa-kɔ̃-zàìn-gbààɔ̀ mú hwɔ, ɓɛ́ ɖɛɔ̀ ké sáa-zà-nyɔ̀ tɔ̀ɔ̀ ɓěɔ̀ kè ɓě mɔ̀ Éézùɖùɛ̀-dyù séín ɓěɔ̀ nàmàǔn ɓěɔ̀ kɔ̃in-ɓáìn-ɖɛ̀ jǔ. 34Ɖɛ nìà kɛ mɛ mɔ̀ gma kánáá pū ɓó ɓě bìì. Gmaɔ̀ mɔ̀, sáa-zà-nyɔ̀ vɛ̀nɛ̀ɔ̀ ɓéɖé ɓɛ́ ɔ ké ɓěɛ̀ nàmàǔn ɓěɔ̀ kɔ̃in-ɓáìn-ɖɛ̀ nyùìn kpa dyúáɖò ɓó zɔ̃ séín xwíníín.” Ké Eɖóún nyu ma ɖɛ séín ɓěɔ̀ kà Bounɓoɔ̀ nyuɛ ma kà Mózè gbo cɛ̃ɛ kɛ.
Currently Selected:
Ɖìvéɖékɔ̀ 16: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
