Ɛ́séɖɔ̀ 8

Kpɔ̀ɔ̀-tò

1Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo ɖe, ké ɔ ɖá, “Mu ɖé kã́áɔ̀ gbo, ɓɛ́ m̀ kéɛ ɔ gbo cɛ̃, ɓɛ́ m̀ ké níiń, ‘Bounɓoɔ̀ ɖá m̀ mɛ táà ɔ nyɔ ɓěɔ̀ dyi, ɓɛ́ wa ké mu, ɓɛ́ wa ké ɔ ɓiè. 2Ɔ jǔ ké m̀ se wa dyi táà, ɓɛ́ wa ké mu ní, Bounɓoɔ̀ ɖá ɔ muɛ nyuùn ɓɛ́ kpɔ̀ɔ̀ ké nì ɓóɖóɔ̀ kɔ̃ dà séín dyi dyíìn, ɓɛ́ wa ké m̀ gǎ dyéìn. 3Kpɔ̀ɔ̀ ɓěɔ̀ mu ɖé Náà-nìɔ̀ kɔ̃ dyi dyíìn. Ké wa mu ɖé nì gbǒɔ̀ mú dyáùn, ɓɛ́ wa ké nì ɓí-dyù mɔ̀à nì pɛ̃́-naínɔ̀ kɛɛ dyá, ɓɛ́ wa ké nì kɔ̃-pɛ̃́-ɖɛ̀ɔ̀ kɔ̃ dyá. Ké wa mu nì gɔ̌mànà-nyɔ̀ ɓěɔ̀ gbǒ ɓěɔ̀ mú dyáùn, ɓɛ́ wa ké nì nyɔ ɓěɔ̀ dya dyá. Wa mu nì bɛɖɛɛ̀-mú-nyùìn-gbò ɓěɔ̀ mú dyáùn, ké wa mu nì bɛɖɛɛ̀-mú-nyùìn-ɖɛ̀ ɓěɔ̀ mú dyáùn ɖekè. 4Kpɔ̀ɔ̀ ɓěɔ̀ mu m̀ kè nì gɔ̌mànà-nyɔ̀ ɓěɔ̀ ɔ kè nì nyɔ tɔ̀ɔ̀ ɓěɔ̀ dyi dyáìn.’ ”

5Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Cɛ̃ɛ Eɖóún gbo, ɓɛ́ ɔ ké ɔ sɔ̃ɔ̀ pɛ́ɛ̀, ɓɛ́ ɔ ké ɔ kùì-kpàɔ̀ zii-nì ɓě ɓɛ́ wa zàìn ní-kpóɖóɔ̀ wáún wɛ̃ kè zii-nì tɔ̀ɔ̀ ɓě ɔ kè ní dèìn-dèìn séín gbo tòìn. Ɔ mɛ nyuɛ náa, ɓɛ́ kpɔ̀ɔ̀ ké Íjè-ɓòɖòɔ̀ kɔ̃ dyi.” 6Ɔ jèɛɛ, Eɖóún pɛ́ɛ̀ ma ɔ sɔ̃ɔ̀, ké ɔ tòìn ma ɔ kùì-kpàɔ̀ ɖé ní séín nì ma Íjè-ɓòɖòɔ̀ kɔ̃ɛɛ gbo. Ké kpɔ̀ɔ̀ sɔ̀ ma ɖé ní séín ɓěɔ̀ gbo, ké wa ɓáìn ma ɓóɖó gànáɔ̀ kɔ̃in. 7Kɛɛ zɛ̃̀ìn-ɖɛ̀-nyu-nyɔ̀ ɓěɔ̀ mɔ̀ùn nyu ma ɖɛ dyúáɖòɔ̀ ɖekè dyììn ɖé waà zɛ̃̀ìn-ɖɛ̀-nyùìn-ɖɛ̀ ɓěɔ̀ mú. Wa mɔ̀ùn nyuɛ ké kpɔ̀ɔ̀ dyi ma Íjè-ɓòɖòɔ̀ kɔ̃ ɖekè.

8Púɛɛ, Féwòɖò ɖá ma Mózè kè Eɖóún, ké ɔ ɖá, “Ɓě ɓaà Bounɓoɔ̀ ɓó ḿ bìì, ɓɛ́ ɔ ké kpɔ̀ɔ̀ ɓěɔ̀ ḿ kè ní nyɔ ɓěɔ̀ bũ̌ zà. Ɔ dyi ná nìǐn, ní mu ɓěɛ̀ nyɔ ɓěɔ̀ dyi táàùn, ɓɛ́ ɓě ké mu, ɓɛ́ ɓě ké Bounɓoɔ̀ gbo sáa zà.”

9Ké Mózè cɛ̃ɛ ma Féwòɖò gbo, ké ɔ ɖá, “M̀ mɛ tò ti nì mɔ́ ɓɛ́ ḿ ké m̀ kè nì gɔ̌mànà-nyɔ̀ ɓěɔ̀ kè nì nyɔ tɔ̀ɔ̀ ɓěɔ̀ bìì ɓaà kɛ, ɓɛ́ kpɔ̀ɔ̀ ɓěɔ̀ ké ɓě bũ̌ sɔ̀, ɓɛ́ ɔ ké kpɔ̀ɔ̀ ɓě nì ɖé Náà-nìɔ̀ kɔ̃ɛɛ ɖòùn sèìn nyɛ.”

10Ké Féwòɖò ɖá, “Ɔ mɛ mɔ̀ gàɖàà.”

Ké Mózè ɖá, “Ɔ mɔ̀ ɖɛ sɛ́ɖɛ́ìn dyí. Kà m̀ nyuà cɛ̃ɛ kɛɛ, kǎà ɔ mɛ nyu nìɛ̀, ɓɛ́ m̀ kéɛ dyuò kà nyɔ ɖò se nì kà Bounɓo mɔ̀à à Gèɖèpɔ́ɔ̀ kɛɛ nìà kɛ. 11Kpɔ̀ɔ̀ ɓěɔ̀ mu m̀ kè nì gɔ̌mànà-nyɔ̀ ɓěɔ̀ ɔ kè nì nyɔ tɔ̀ɔ̀ ɓěɔ̀ bũ̌ sɔ̀ùn, kɛɛ wa mu ɖé Náà-nìɔ̀ ɖòùn kɔ̃ sèìn.” 12Ti ɓɛ́ Mózè kè Eɖóún sɔ̀ ma ɓó Féwòɖò gboɛɛ, Mózè ɓaà ma Bounɓoɔ̀, ɓɛ́ ɔ ké kpɔ̀ɔ̀ ɓě ɓɛ́ ɔ dyà ma kà Féwòɖò kɔ̃ɛɛ ɓó zà. 13Ké Bounɓoɔ̀ jǔ ma Mózèɛ̀ ɓaà-wùɖùɔ̀ gɔ̃̌, ké kpɔ̀ɔ̀ ɓěɔ̀ mɛ́ ma ɖé gbǒ ɓěɔ̀ múin kè ɖé gbǒ ɓěɔ̀ ɖei ɔ kè ɖé geɖe ɓěɔ̀ gboi. 14Ké wa kpa ma kpɔ̀ɔ̀-xwɛ̀ ɓěɔ̀ dyí gbǒɛ̀n, ké ɓóɖó gànáɔ̀ nyìnììn ma nyɔ́ún ɓóɛ jè. 15Kɛɛ ti ɓɛ́ Féwòɖò dyéɛ ma kà kpɔ̀ɔ̀ ɓěɔ̀ jè ɖǎ ma dyi ziɛɛ, púɛɛ, ɔ kùmùìn ma ɔ hwòɖǒ-dyùàɔ̀ ɖe, ké ɔ se ma Mózè kè Eɖóún wuɖuɔ̀ ɖùǔ gbo tòɛ̀ mɔ́ kà Bounɓoɔ̀ nyuɛ ma kà cɛ̃ɛ kɛ.

Nɛ́-tò

16Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Cɛ̃ɛ Eɖóún gbo, ɓɛ́ ɔ ké sɔ̃ pɛ́ɛ̀, ɓɛ́ ɔ ké ɔ kùì-kpàɔ̀ ɓíɖíí nàmàìn, nìí púu-púu séín nì Íjè-ɓòɖòɔ̀ dà séín nyɛɛ mu nɛ́ mú zɛ̃̀ìn.” 17Ɔ jèɛɛ, Eɖóún pɛ́ɛ̀ ma sɔ̃, ké ɔ nàmàìn ma ɔ kùì-kpàɔ̀ ɓíɖíí, ké púu-púu nì ma Íjè-ɓòɖòɔ̀ dà séín nyɛɛ zɛ̃̀ìn ma nɛ́ mú. Ké nɛ́ɔ̀ nì ma nyɔ séín kè nyúà-ɖɛ̀ séín bũ̌in. 18Nɛ́ɔ̀ nì ma dà séín. Kɛɛ ti ɓɛ́ zɛ̃̀ìn-ɖɛ̀-nyu-nyɔ̀ ɓěɔ̀ vɔ̃ ɓɛ́ wa ké ma nɛ́ zɛ̃̀ìn nyɛɛ, wa seɛ ma nyuɛ ɓɛ́ìn. 19Ké zɛ̃̀ìn-ɖɛ̀-nyu-nyɔ̀ ɓěɔ̀ cɛ̃ɛ ma Féwòɖò gbo, ké wa ɖá, “Gèɖèpɔ́ɔ̀ sɔ̃ nì ɖɛ nìà kɛ hwìɛ̀.” Kɛɛ Féwòɖòɛ̀ hwòɖǒ-dyùàɔ̀ kùmù ma ke kánáá pū, ké ɔ se ma Mózè kè Eɖóún wuɖuɔ̀ ɖùǔ gbo tòɛ̀ mɔ́ kà Bounɓoɔ̀ nyuɛ ma kà cɛ̃ɛ kɛ.

Dɛ̃̌-tò

20Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Sɔ̀ dyí ɓó gànà-kṹún mɛ̀nɛ̀ɛ̀, ɓɛ́ m̀ kè Féwòɖò ké gmɔ̌ìn, ti ɔ mu ɖé níɔ̀ wĩín muɛń nììn nyɛ. Ké m̀ mɛ cɛ̃ɛ ɔ gbo, ɓɛ́ m̀ ké níiń, ‘Bounɓoɔ̀ ɖá m̀ mɛ táà ɔ nyɔ ɓěɔ̀ dyi, ɓɛ́ wa ké mu, nìí ɓɛ́ wa ké ɔ ɓiè. 21Kɛɛ ɔ jǔ ké m̀ se wa dyi táà ní, ɔ mu dɛ̃̌-tò m̀ kè nì gɔ̌mànà-nyɔ̀ ɓěɔ̀ ɔ kè nì nyɔ tɔ̀ɔ̀ ɓěɔ̀ kɔ̃ tòùn. Dɛ̃̌ɔ̀ mu ɖé ɓěɛ̀ gbǒ séín múin dyíìn, ɔ kè ɓóɖó-kpà ɓɛ́ ɓě nyànàà kɔ̃ dyiɛɛ kɔ̃ ɖekè. 22Kɛɛ ɔ mu Gósɛ̃̀ìn-pà kɔ̃̀ mú ɓɛ́ ɔ nyɔ ɓěɔ̀ cĩ́à kɛɛ wáká poùn. Ɓó tia múɛɛ, dɛ̃̌-tòɔ̀ se ɖé nyiniɛ́ mu fɔɔ cá, ɓɛ́ m̀ kéɛ dyuò kà Bounɓoɔ̀ mɔ̀ nyɔ nìà ɓóɖóɛ̀ gǎ kɔ̃ tòɛ̌n nyɛ̀. 23Ɔ mu gbo-zaìn-zaìn ɖò ɓó nììn nyɔ ɓěɔ̀ kè ɔ nììn nyɔ ɓěɔ̀ pṹa poùn. Zɛ̃̀ìn-ɖɛ̀ nìà kɛ mu kpáùn ɓó gàɖàà.’ ” 24Ké Bounɓoɔ̀ nyu ɖɛ ɔ cɛ̃ ma kà kɛ. Ɔ nyuɛ ké dɛ̃̌ kúɖúú púè ma ɖé Féwòɖòɛ̀ gbǒɔ̀ kè ɔ gɔ̌mànà-nyɔ̀ ɓěɔ̀ gbǒ séín ɓěɔ̀ múin. Ké dɛ̃̌-tòɔ̀ nyuɛ ké Íjè-ɓòɖò gànáɔ̀ nyìnììn ma dyíin.

25Púɛɛ, Féwòɖò ɖá ma Mózè kè Eɖóún, ké ɔ ɖá, “Ɓě mu, ɓɛ́ ɓě ké ɓěɛ̀ Gèɖèpɔ́ɔ̀ gbo sáa zà nɔ̄ Íjè-ɓòɖòɛ̀ kɔ̃.”

26Kɛɛ Mózè ɖá, “Ɔ dyi ná nìǐn, ɔ se dyí sɛ́ɖɛ́ìn. Sáa ɓě ɓɛ́ à zà ɖé Bounɓo mɔ̀à à Gèɖèpɔ́ɔ̀ kɛ gboɛɛ mɔ̀ Íjè-nyɔ̀ ɓěɔ̀ dyi-nyàìn-ɖɛ̀. Ɔ jǔ ké à dyi sáa-zà-zà ɓɛ́ ɔ nyàìn wa dyiɛɛ nyu ɓó wa dyéɖé waí ní, wa se à sɔ́ɔ́-kpò dyi taɓaǐn mue? 27À ɓéɖé à ké wé tã hwìè-kpà kpa ɖé gbǎùn-fúɖúáɔ̀ mú, hwɛ̀ ɓɛ́ à ké sáa zà ɖé Bounɓo mɔ̀à à Gèɖèpɔ́ɔ̀ kɛɛ gbo, sepóɛɖé kǎà ɔ nyuɛ à gbo cɛ̃ɛ.”

28Ké Féwòɖò ɖá, “Ní mu ɓě dyi táàùn, ɓɛ́ ɓě ké Bounɓo mɔ̀à ɓěɛ̀ Gèɖèpɔ́ɔ̀ kɛɛ gbo sáa zàǎ mu ɖé gbǎùn-fúɖúáɔ̀ kɔ̃, kɛɛ ɓěǐn ɖá ɓɛ́ ɓě ké dà vɛ̃in ɖò mu. Ɓě mɛ ɓaà ḿ bìì.”

29Ké Mózè ɖá, “Ḿ dyi dà sɔ̀ nyɛ̀nɛ̀ɛ̀ ní, ní mu Bounɓoɔ̀ ɓaàùn, ɓɛ́ gàɖàà ní, dɛ̃̌ɔ̀ ké m̀ kè nì gɔ̌mànà-nyɔ̀ ɓěɔ̀ ɔ kè nì nyɔ tɔ̀ɔ̀ ɓěɔ̀ bũ̌ sɔ̀. Kɛɛ m̀ mɛ ɓɔ́ à cáa, ɓɛ́ m̀ ké wuɖu dyí zàìn ɖe. M̀ mɛ táà à dyi, ɓɛ́ à ké mu, ɓɛ́ à ké sáa zà ɖé Bounɓoɔ̀ gbo.”

30Ti ɓɛ́ Mózè sɔ̀ ma ɓó Féwòɖò dyúa kɛɛ, ɔ ɓaà ma Bounɓoɔ̀. 31Ké Bounɓoɔ̀ nyu ɖɛ ɓɛ́ Mózè zɔ̀ ma kà ɔ kɛ. Dɛ̃̌ séín ɓěɔ̀ sɔ̀ ma Féwòɖò kè ɔ gɔ̌mànà-nyɔ̀ ɓěɔ̀ kè Íjè-nyɔ̀ tɔ̀ɔ̀ ɓěɔ̀ bũ̌. Ké dɛ̃̌ dyúáɖò se ma wa ɖò bũ̌ sè dyɛ mɔ̀ùn. 32Kɛɛ Féwòɖò kùmùìn ma ɔ hwòɖǒ-dyùàɔ̀ ɓó tia ɓaɖa ɖekè. Ɔ se ma wɔ̃́ ɓɛ́ nyɔ ɓěɔ̀ ké mu.

Currently Selected:

Ɛ́séɖɔ̀ 8: ƁB02

Highlight

Copy