Ɛ́séɖɔ̀ 7
7
1Hwɛ̀ ké Bounɓoɔ̀ cɛ̃ɛ ma Mózè gbo, ké ɔ ɖá, “Dyéɛ, ní muɛ nyuùn ɓɛ́ m̀ ké Féwòɖò gbo wùɖù kà ní wùɖùà nyɔ gboɛ, ké m̀ ɖíí-gàà Eɖóún mu nì kpáá-ɖɛ̀-cɛ̃-nyɔ̀ jǔùn, ɓɛ́ ɔ ké Féwòɖò gbo wùɖù. 2M̀ mɛ cɛ̃ ɖɛ séín ɓɛ́ ḿ ɖǎà m̀ gbo cɛ̃ kɛɛ Eɖóún gbo. Ké m̀ ɖíí-gàà Eɖóún mɛ cɛ̃ɛ Féwòɖò gbo, ɓɛ́ ɔ ké Éézùɖùɛ̀-dyù ɓěɔ̀ dyi táà, ɓɛ́ wa ké ɔ ɓóɖóɔ̀ kɔ̃ sɔ̀. 3Kɛɛ ní mu Féwòɖòɛ̀ hwòɖǒ-dyùàɔ̀ kùmùìn. Kɛbì ḿ mɛ nyu zɛ̃̀ìn-ɖɛ̀ kè ɖɛ dĩ́ín-dĩ̀ìn kúɖúú nɔ̄ Íjè-ɓòɖòɛ̀ kɔ̃ɛɛ, 4ɔ se nì wuɖuɔ̀ ɖùǔ gbo tòɛ̌ mu. Ɔ ɖǎ ná nìǐn, ní mu ní sɔ̃ɔ̀ kũ̀à mú nyùìn, ɓɛ́ ḿ ké Íjè-nyɔ̀ ɓěɔ̀ gǎ ku wɔ̃ kɔ̃ tò, ɓɛ́ ḿ ké Éézùɖùɛ̀ɛ̀ xwéɖé-dù ɓě mɔ̀à ní nyɔ ɓěɔ̀ kɛɛ nɔ̄ Íjè-ɓòɖòɛ̀ kɔ̃ zà. 5Ti ní mu ní sɔ̃ɔ̀ Íjè-ɓòɖòɔ̀ kɔ̃ pɛ̃́ìn, ɓɛ́ ḿ ké Éézùɖùɛ̀-dyù ɓěɔ̀ ɖé zàa, nìí, Íjè-nyɔ̀ ɓěɔ̀ muɛ dyí dyuòùn kà mɔ̄ mɔ̀ Bounɓoɔ̀ kɛ.” 6Ké Mózè kè Eɖóún nyu ɖɛ Bounɓoɔ̀ cɛ̃ ma kà wa gboɛ. 7Mózè nyuá ma zɔ̃ kpáɖá-nyɔ hĩinyɛ, ké Eɖóún nyuá ma zɔ̃ kpáɖá-nyɔ hĩinyɛ sè tã ti ɓɛ́ wa wùɖù ma kà Féwòɖò gboɛ.
Eɖóún kùì-kpàɔ̀ zɛ̃̀ìn sɛ mú
8Hwɛ̀ ɓɛ́ Mózè kè Eɖóún ké ma ɖé Féwòɖò gbo muɛɛ, Bounɓoɔ̀ cɛ̃ɛ ma wa gbo, ké ɔ ɖá, 9“Féwòɖò dyiɛ ɓě gbo cɛ̃, ké ɔ dyi níiń, ‘Ɓě nyu zɛ̃̀ìn-ɖɛ̀ ɖò, ɓɛ́ ḿ kéɛ dyé’ ní, nìí, m̀ mɛ cɛ̃ɛ Eɖóún gbo, ɓɛ́ m̀ ké níiń, ‘Po nì kùì-kpàɔ̀ ɓíɖíi dyi ɓó Féwòɖò dyúa.’ Ɔ dyiɛ náa nyuín, kùì-kpàɔ̀ mu sɛ mú zɛ̃̀ìn.” 10Hwɛ̀ ké Mózè kè Eɖóún mu ma ɖé Féwòɖò gbo, ké wa nyu ɖɛ Bounɓoɔ̀ cɛ̃ ma kà wa gboɛ. Eɖóún po ma ɔ kùì-kpàɔ̀ ɓíɖíi dyi ɓó Féwòɖò kè ɔ gɔ̌mànà-nyɔ̀ ɓěɔ̀ dyúa, ké kùì-kpàɔ̀ zɛ̃̀ìn ma sɛ mú. 11Púɛɛ, Féwòɖò ɖá ma ɔ nììn zɛ̃̀ìn-ɖɛ̀-nyu-nyɔ̀ ɓě mɔ̀ ɖɛ-múin-ɖe-nyɔ̀ kè hwĩɔ̀ ɓě kɛ. Ké wa mɔ̀ùn nyu ma hwɔìn-ɖɛ̀ dyúáɖòɔ̀ ɖekè dyììn ɖé waà zɛ̃̀ìn-ɖɛ̀-nyùìn-ɖɛ̀ ɓěɔ̀ mú. 12Wa ɖò-ɖò po ma ɔ nììn kùì-kpàɔ̀ dyi, ké ɔ zɛ̃̀ìn ma sɛ mú ɖekè. Kɛɛ Eɖóún nììn kùì-kpàɔ̀ mana ma wa nììn kùì-kpà ɓěɔ̀ ní. 13Ɖɛ nìà kɛ se ma Féwòɖòɛ̀ hwòɖǒ-dyùàɔ̀ gbo zĩàìn. Ɔ hwòɖǒ-dyùàɔ̀ kùmù ma kánáá pū, ké ɔ se ma Mózè kè Eɖóún wuɖuɔ̀ ɖùǔ gbo tòɛ̀ mɔ́ kà Bounɓoɔ̀ nyuɛ ma kà cɛ̃ɛ kɛ.
Nyɔǔn-gǎ-dyéìn-ɖɛ̀ ɓě dyi Íjè-ɓòɖòɔ̀ kɔ̃ɛ
Ní zɛ̃̀ìn nyɔmɔɔ mú
14Ti ɓɛ́ Mózè kè Eɖóún sɔ̀ ma ɓó Féwòɖò dyúa kɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Féwòɖòɛ̀ hwòɖǒ-dyùàɔ̀ kùmù ní mìɔ, ké ɔ se wɔ̃́ ɓɛ́ nyɔ ɓěɔ̀ ké mu. 15Ɔ jèɛɛ, mu ɖé ɔ gbo ɓó gànà-kṹún, ɓɛ́ m̀ kè ɔ ké gmɔ̌ìn, ti ɓɛ́ ɔ mu ɖé Náà-nìɔ̀ wĩín muɛń nììn nyɛ. M̀ mɛ nyànà ɓó níɔ̀ kpóóɔ̀ kɔ̃ dyi, ɓɛ́ m̀ ké ɓó ɔ fòìn. Nì kùì-kpà zɛ̃̀ìn ma kà sɛ múɛɛ mɛ nì m̀ xwa. 16Ké m̀ mɛ cɛ̃ɛ Féwòɖò gbo, ɓɛ́ m̀ ké níiń, ‘Bounɓo mɔ̀à Híìbúɖúù-nyɔ̀ ɓěɔ̀ Gèɖèpɔ́ɔ̀ kɛɛ mɔ̀ nyɔ ɖoɓo ḿ ɖé m̀ gbo, ɓɛ́ ḿ kéɛ m̀ gbo cɛ̃, ɓɛ́ m̀ ké ɔ nyɔ ɓěɔ̀ dyi táà, ɓɛ́ wa ké mu, ɓɛ́ wa ké ɔ ɓiè ɖé gbǎùn-fúɖúáɔ̀ kɔ̃. Kɛɛ dyéɛ, dyɛ̀ìn tiɛ̀ kɛɛ, m̀ séè ɔ wuɖuɔ̀ nyu ke. 17Ɔ ná nì jèɛɛ, Bounɓoɔ̀ ɖá, nì muɛ dyuòùn dyììn ɖé ɖɛ nìà kɛ mú kà ɔ mɔ̀ Bounɓoɔ̀ kɛ. Ní mu kùì-kpà nìà ḿ xwaa níɔ̀ kɔ̃ nàmàìn, ké níɔ̀ mu nyɔmɔɔ mú zɛ̃̀ìn. 18Ké zimii séín nì ɖé níɔ̀ kɔ̃ɛɛ mu mɛ́ìn, ké ɔ muɛ nyuùn ɓɛ́ níɔ̀ ké nyɔ́ún nyìnììn, ɓɛ́ Íjè-nyɔ̀ ɓěɔ̀ ké seɛ náa ɓɛ́ìn.’ ”
19Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Cɛ̃ɛ Eɖóún gbo, ɓɛ́ ɔ ké ɔ kùì-kpàɔ̀ dyí ɖú, ɓɛ́ ɔ kéɛ ní séín nì Íjè-ɓòɖòɛ̀ kɔ̃ɛɛ gbo tòìn, nìí, ní séínɔ̀ mu nyɔmɔɔ mú zɛ̃̀ìn. Ɔ hwɔìn kà zii-nì ɓě ɓɛ́ wa zàìn ní-kpóɖóɔ̀ wáún wɛ̃ kè zii-nì tɔ̀ɔ̀ ɓě kè ní dèìn-dèìn ɔ kè ní ɓɛ́ ɔ nì ɖé ní-dyi-dèìn-naín séín nyɛ. Nyɔmɔɔ̀ mu Íjè-ɓòɖòɛ̀ dà séín nììn, kɛbì ɔ mɛ mɔ̀ ɖé hwùɖùǔ mɔɔ sɔ́ɔ́ ɓɛ́ wa nyu ní-mú-po-ɖɛ̀ múɛ.”
20Ké Mózè kè Eɖóún nyu ɖɛ Bounɓoɔ̀ cɛ̃ ma kà wa gboɛ. Eɖóún ɖú ma ɔ kùì-kpàɔ̀ dyií ɓó Féwòɖò kè ɔ gɔ̌mànà-nyɔ̀ ɓěɔ̀ dyéɖé waí, ké ɔ nàmàìn ma Náà-nìɔ̀ kɔ̃, ké ní séínɔ̀ zɛ̃̀ìn ma nyɔmɔɔ mú nyɛ̀nɛ̀ɛ̀. 21Ké zimii ɓě nì ma ɖé níɔ̀ kɔ̃ɛɛ mɛ́ ma. Ké níɔ̀ nyìnììn ma nyɔ́ún mìɔ jèɛɛ, Íjè-nyɔ̀ ɓěɔ̀ seɛ ma náa ɓɛ́ìn. Nyɔmɔɔ̀ nì ma Íjè-ɓòɖòɔ̀ dà séín. 22Kɛɛ Íjè-ɓòɖòɔ̀ zɛ̃̀ìn-ɖɛ̀-nyu-nyɔ̀ ɓěɔ̀ mɔ̀ùn nyu ma hwɔìn-ɖɛ̀ dyúáɖòɔ̀ ɖekè dyììn ɖé waà zɛ̃̀ìn-ɖɛ̀-nyùìn-ɖɛ̀ ɓěɔ̀ mú. Ké Féwòɖòɛ̀ hwòɖǒ-dyùàɔ̀ kùmù ma ke kánáá pū, ké ɔ se ma Mózè kè Eɖóún wuɖuɔ̀ gbo ɖùǔ tòɛ̀ mɔ́ kà Bounɓoɔ̀ nyuɛ ma kà cɛ̃ɛ kɛ. 23Féwòɖò kɔ́ìn ma ɖe, ké ɔ mu ma ɖé ɔ gbǒɔ̀ mú ɖe, ké ɔ se ma ɖɛ nìà kɛ jè hwìɖǐi poìn dyɛ mɔ̀ùn. 24Ké Íjè-nyɔ̀ séín ɓěɔ̀ ɖú ma Náà-nìɔ̀ wĩin ɓúɖú kpàǐ, ɓɛ́ wa ké ma náá-nì dyé, sepóɛɖé wa se ma níɔ̀ náa ɓɛ́ìn.
25Kǎà ní séínɔ̀ nì ma ɓó wé mɛ̀nɛ̌ìn-sɔ̃́ xwíníín sɔ̀ìn ɓó ti ɓɛ́ Bounɓoɔ̀ ɖǎ ma Náà-nìɔ̀ sɔ̃ kɔ̃ poɛ.
Currently Selected:
Ɛ́séɖɔ̀ 7: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
