Ɛ́séɖɔ̀ 9

Nyúà-ɖɛ̀ ɓěɔ̀ mɛ́ jè

1Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Mu ɖé Féwòɖò gbo, ɓɛ́ m̀ kéɛ ɔ gbo cɛ̃, ɓɛ́ m̀ ké níiń, ‘Bounɓo mɔ̀à Híìbúɖúù-nyɔ̀ ɓěɔ̀ Gèɖèpɔ́ɔ̀ kɛɛ ɖá m̀ mɛ táà ɔ nyɔ ɓěɔ̀ dyi, ɓɛ́ wa ké mu, ɓɛ́ wa ké ɔ ɓiè. 2Kɛɛ ɔ jǔ ké m̀ dyi nɔ́ɔ̀, ké m̀ se wa dyi táà, ɓɛ́ wa ké mu ní, 3nìí, ɔ mu nyɔ-gǎ-dyéìn-ɖɛ̀ nyìnììn dyíin ɖò nì nyúà-ɖɛ̀ ɓěɔ̀ kɔ̃ tòùn. Ɔ muɛ nì sǒ ɓěɔ̀ kè nì jǎkasì ɓěɔ̀ kè nì sǒ-nì-gbu-kɔ̃ún ɓěɔ̀ kè nì ɓìɖǐ ɓěɔ̀ kè nì ɓáɖáá ɓěɔ̀ ɔ kè nì wiɖi ɓěɔ̀ kɔ̃ tòùn. 4Kɛɛ ɓó tia ɓaɖaa, Bounɓoɔ̀ muɛ nyuùn ɓɛ́ gbo-zaìn-zaìn ké ɓó Éézùɖùɛ̀-dyù ɓěɔ̀ kè Íjè-nyɔ̀ ɓěɔ̀ nyúà-ɖɛ̀ ɓěɔ̀ pṹa nì. Éézùɖùɛ̀-dyù ɓěɔ̀ ɖòɛ̀ nyúà-ɖɛ̀ ɖò se mɛ́ɛ mu. 5Bounɓoɔ̀ ɖǎa dyí sɔ́ ɓɛ́ ɔ ké ɖɛ nìà kɛ nɔ̄ ɓóɖóɛ̀ kɔ̃ nyu ɓó gàɖàà.’ ”

6Wéɔ̀ nyɔ kɔ ma ɓó dyíɛɛ, Bounɓoɔ̀ nyuɛ ma náa ní. Ɔ nyuɛ ké Íjè-nyɔ̀ ɓěɔ̀ nyúà-ɖɛ̀ séín ɓěɔ̀ mɛ́ ma. Kɛɛ Éézùɖùɛ̀-nyɔ̀ ɓěɔ̀ nììn nyúà-ɖɛ̀ ɖò se ma mɛ́ fɔɔ cá. 7Ké Féwòɖò ɖoɓo ma nyɔ, ké wa dyà ma ɔ bɔ̃̌ gbo ɖe kà Éézùɖùɛ̀-nyɔ̀ ɓěɔ̀ ɖòɛ̀ nyúà-ɖɛ̀ ɖò se ma mɛ́ kɛ. Kɛɛ ɔ hwòɖǒ-dyùàɔ̀ kùmù ma ke kánáá pū. Ɔ se ma nyɔ ɓěɔ̀ dyi táà, ɓɛ́ wa ké ma mu.

Kpo wáɖá nyɔ séín mú

8Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè kè Eɖóún gbo, ké ɔ ɖá, “Ɓě mɛ zà tĩ́ɔ-pɛ̀ɛ̀ xwa-wè ɖé gèɖèě-wɔ̃̀ ɖò mú, ɓɛ́ Mózè kéɛ vũ ɓó Féwòɖò dyéɖé waí. 9Ké tĩ́ɔɔ̀ mu púu-púu jǔùn, ɓɛ́ ɔ ké Íjè-ɓòɖò gànáɔ̀ kɔ̃in ɓáìn. Ké ɔ muɛ nyuùn ɓɛ́ kpo ké Íjè-nyɔ̀ séín kè waà nyúà-ɖɛ̀ ɓě mú wáɖá. Kpoɔ̀ mu gèìn, ɓɛ́ ɔ ké jě jǔ.” 10Ɔ jèɛɛ, wa zà ma tĩ́ɔ ɖé gèɖèě-wɔ̃̀ ɖò mú, ké wa nyànà ma ɓó Féwòɖò dyéɖé waí dyi, ké Mózè vũɛ ma, ké kpo wáɖá ma Íjè-nyɔ̀ séín kè waà nyúà-ɖɛ̀ ɓěɔ̀ mú. 11Kɛɛ zɛ̃̀ìn-ɖɛ̀-nyu-nyɔ̀ ɓěɔ̀ se ma ɓó Mózè dyúa dyiɛ ɓɛ́ìn ɓó kpo wáɖá ma kà wa múɛɛ jè. Kpoɔ̀ wáɖá ma Íjè-nyɔ̀ séín ɓěɔ̀ mú. 12Kɛɛ Bounɓoɔ̀ kùmùìn ma Féwòɖòɛ̀ hwòɖǒ-dyùàɔ̀, ké ɔ se ma Mózè kè Eɖóún wuɖuɔ̀ ɖùǔ gbo tòɛ̀ mɔ́ kà Bounɓoɔ̀ nyuɛ ma kà Mózè gbo cɛ̃ɛ kɛ.

Sɔ̃̀ɔ̀-kpò wáɖá Íjè-ɓòɖòɔ̀ kɔ̃

13Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Sɔ̀ dyí ɓó gànà-kṹún mɛ̀nɛ̀ɛ̀, ɓɛ́ m̀ ké ɓó Féwòɖò dyúa dyi nyànà, ɓɛ́ m̀ kéɛ ɔ gbo cɛ̃, ɓɛ́ m̀ ké níiń, ‘Bounɓo mɔ̀à Híìbúɖúù-nyɔ̀ ɓěɔ̀ Gèɖèpɔ́ɔ̀ kɛɛ ɖá m̀ mɛ táà ɔ nyɔ ɓěɔ̀ dyi, ɓɛ́ wa ké mu, ɓɛ́ wa ké ɔ ɓiè. 14M̀ seɛ náa nyuín, ɔ mu nyɔ-gǎ-dyéìn-ɖɛ̀ ɓɛ́ ɔ ku wɔ̃ mìɔ, ké ɔ zi nyɔ-gǎ-dyéìn-ɖɛ̀ ɓě ɓɛ́ ɔ ɖǎà m̀ kè nì gɔ̌mànà-nyɔ̀ ɓěɔ̀ ɔ kè nì nyɔ tɔ̀ɔ̀ ɓěɔ̀ kɔ̃ dyà kɛ dyíɛɛ m̀ kɔ̃ dyàùn, nìí, ɓɛ́ m̀ kéɛ dyuò kà nyɔ ɖò se nì kà Bounɓoɔ̀ nìà kɛ ɖé ɓóɖó-kpà gànáà dà séín nyɛ. 15Sepóɛɖé dyɛ̀ìn ɓó tiɛ̀ múɛɛ, ɔ ɓɛ́ìnɔ̌ má ɔ sɔ̃ɔ̀ kũ̀à mú nyùɛ̀n, ɓɛ́ ɔ kéɔ́ má m̀ kè nì nyɔ ɓěɔ̀ nyɔ-gǎ-dyéìn-ɖɛ̀ ɓɛ́ ɔ ɓɛ́ìnɔ̌ má ɓě jè ɓóɖó-kpàà kɔ̃ dyi sámáa kɛɛ kɔ̃ dyà. 16Kɛɛ ɖɛ kɔ̃̀ jè ɔ táà m̀ dyi, ɓɛ́ m̀ dyià cĩ́ɛń nì keɛɛ mɔ̀ ɓɛ́ ɔ ké ɔ kpéɔ̀ m̀ dyí tɛ̀mɛ̀ìn, ɓɛ́ ɔ nyɛ́nɛ́ɔ̀ ké mu ɖé ɓóɖó-kpàà dà séín. 17Kɛɛ dyéɛ, m̀ ɓúáìn m̀ mìɔùn dyí, ké m̀ se wɔ̃́ ɓɛ́ m̀ ké ɔ nyɔ ɓěɔ̀ dyi táà, ɓɛ́ wa ké mu. 18Ɔ jèɛɛ, ɓó gàɖàà ti nìɔ̀ kà ní, ɔ mu dìì vɛ̀nɛ̀ ɖò tòùn, ɓɛ́ sɔ̃̀ɔ̀-kpò vɛ̀nɛ̀-vɛ̀nɛ̀ ɓɛ́ ɔ séè ná Íjè-ɓòɖòɛ̀ kɔ̃ wáɖá ɖòɛɛ ké Íjè-ɓòɖòɛ̀ kɔ̃ wáɖá. 19Ɓó kàǔn wɛ̃ɛ, m̀ mɛ ɓeìn wuɖui, ɓɛ́ nì nyɔ séín ɓěɔ̀ ké waà nyúà-ɖɛ̀ séín kè waà kɔ̃̀ɔ̀-ɖɛ̀ tɔ̀ɔ̀ ɓě ɖé píé zà, ɓɛ́ wa ké wa ɖé pá ɓě kɔ̃̀ mú wa ɓɛ́ìn póɛ kɛɛ dyáìn. Sepóɛɖé sɔ̃̀ɔ̀-kpòɔ̀ mu nyɔǔn-dyù kè nyúà-ɖɛ̀ ɓě ɓɛ́ wa mu ɖé píé nììn, ɓɛ́ wa se gbǒǔn dyáa kɔ̃ kpáùn, ké wa mu mɛ́ìn.’ ” 20Ti ɓɛ́ Mózè ɖǎ ma kã́áɔ̀ gbo wuɖuɔ̀ wáɖáa, Féwòɖòɛ̀ gɔ̌mànà-nyɔ̀ ɓě ɓɛ́ wa fɛ̃̀ìn ma Bounɓoɔ̀ wuɖuɔ̀ dyiɛɛ fṹà, ké wa dyáìn ma waà gǐì kè waà nyúà-ɖɛ̀ ɓěɔ̀ gbǒǔn. 21Kɛɛ gɔ̌mànà-nyɔ̀ ɓě ɓɛ́ wa po ma Bounɓoɔ̀ wuɖuɔ̀ dyií dyiɛɛ sè ma waà gǐì kè waà nyúà-ɖɛ̀ ɓěɔ̀ ɖé píé.

22Wéɔ̀ nyɔ kɔ ma ɓó dyíɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Pɛ́ɛ̀ nì sɔ̃ɔ̀, ɓɛ́ m̀ ké nì kùì-kpàɔ̀ ɖé dyɔɔ̀ dyí tò, ɓɛ́ sɔ̃̀ɔ̀-kpò ké Íjè-ɓòɖòɔ̀ kɔ̃ wáɖá ɖé dà séín, ɓɛ́ ɔ ké nyɔǔn kè nyúà-ɖɛ̀ nì ɖé píéɛ ɔ kè ɓáá-ɖɛ̀ séín kɔ̃ wáɖá.” 23Ti ɓɛ́ Mózè pɛ́ɛ̀ ma ɔ sɔ̃ɔ̀, ké ɔ tò ma ɔ kùì-kpàɔ̀ ɖé dyɔɔ̀ dyíɛɛ, Bounɓoɔ̀ nyuɛ ké wɛ́ɖɛ́-wɛ́ɖɛ́ po, ké zɛ páná ma, ké sɔ̃̀ɔ̀-kpò wáɖá ma ɖé Íjè-ɓòɖòɔ̀ kɔ̃. 24Sɔ̃̀ɔ̀-kpò nì ma wáɖáuń, ké wɛ́ɖɛ́-wɛ́ɖɛ́ nì ma poɛń. Íjè-ɓòɖòɔ̀ ɖǎǒ nìɛɛ, dìì ɓɛ́ náa ɖò séè ɓóɖóɔ̀ dà ɖò dyi ɖò. 25Sɔ̃̀ɔ̀-kpòɔ̀ wáɖá ma ɖɛ séín nì ma píé ɖé Íjè-ɓòɖòɔ̀ dà séín nyɛɛ kɔ̃. Ɔ wáɖá ma nyɔǔn kè nyúà-ɖɛ̀ kɔ̃. Ɔ wàìn ma ɓáá-ɖɛ̀ séín dyi, ké ɔ jaɖa ma cu séín ɖɔ́ dyai. 26Dà ɖòùn ɓɛ́ sɔ̃̀ɔ̀ se ma wáɖá ɖé Íjè-ɓòɖòɔ̀ kɔ̃ɛɛ mɔ̀ ɖé Gósɛ̃̀ìn-pàɔ̀ mú dɛ̀ ɓɛ́ Éézùɖùɛ̀-nyɔ̀ ɓěɔ̀ cĩ́ ma kà kɛ.

27Púɛɛ, Féwòɖò ɖá ma Mózè kè Eɖóún, ké ɔ cɛ̃ɛ ma wa gbo, ké ɔ ɖá, “Zɔ̃ǔn wɛ̃ɛ, ḿ nyu nàmàǔn. Bounɓoɔ̀ ɓíɖí ɓɛ̀ɖɛ̀ìn dyí, ké ḿ kè ní nyɔ ɓěɔ̀ ɖǎ ɖɛ xwa bĩ. 28Ɓě ɓaà Bounɓoɔ̀ ɓó à bìì, sepóɛɖé zɛ kè sɔ̃̀ɔ̀-kpò ɓɛ́ ɔ ɖǎà à kɔ̃ tòɛɛ ɖǎ dyí vòɛ̌n zi mìɔ. Ní mu ɓě dyi táàùn, ɓɛ́ ɓě ké mu. Ḿ se ɓě dyi kpɔ̃ɔ́ mu ɖe.”

29Hwɛ̀ ké Mózè cɛ̃ɛ ma ɔ gbo, ké ɔ ɖá, “Ḿ dyi hwɔɖɔɛ̀ mú sɔ̀ nyɛ̀nɛ̀ɛ̀ ní, ní mu ní sɔ̃ɔ̀ dyií tòùn, ɓɛ́ ḿ ké Bounɓoɔ̀ ɓaà. Ké zɛɔ̀ mu ɓɔ́í kpáùn, ké sɔ̃̀ɔ̀-kpò ɖò se wáɖáa mu ɖe, ɓɛ́ m̀ kéɛ dyuò kà Bounɓoɔ̀ mɔ̀ nyɔ kɔ̃̀ ɓóɖó-kpà gànáà kɛ. 30Kɛɛ ḿ dyuòɛ̀ dyí kà m̀ kè nì gɔ̌mànà-nyɔ̀ ɓěɔ̀ séè Bounɓo Gèɖèpɔ́ɔ̀ dyi fɛ̃̀ìn keɛ.”

31Sɔ̃̀ɔ̀-kpò wáɖá ma kà kɛɛ gbɔɔ̀ ma ɓáá-ɖɛ̀-dù kò-kò ɓě kɔ̃̀ nyɛ́nɛ́ mɔ̀ fáɖáà kè báɖè kɛɛ séín mú, sepóɛɖé báɖèɔ̀ ɖǎ ma dyɔ́ún nì, ké fáɖáàɔ̀ nì ma bùèɛ̌n. 32Kɛɛ hwítì-dù kò-kò ɓěɔ̀ mɔ̀ùn se ma mú gbɔɔ̀, sepóɛɖé wa mɔ̀ ma kɔ̃́ɔ́ ke.

33Ti ɓɛ́ Mózè sɔ̀ ma ɓó Féwòɖò gbo, ké ɔ sɔ̀ ma hwɔɖɔɔ̀ múɛɛ, ɔ tò ma ɔ sɔ̃ɔ̀ dyií ɖé Bounɓoɔ̀ gbo, ké ɔ ɓaà ma. Púɛɛ, zɛɔ̀ kè níɔ̀ ɔ kè sɔ̃̀ɔ̀-kpò wáɖá-wáɖáɔ̀ kpá ma ɓɔ́í ɖé Íjè-ɓòɖòɔ̀ kɔ̃. 34Kɛɛ ti ɓɛ́ Féwòɖò dyéɛ ma kà níɔ̀ kè zɛɔ̀ ɔ kè sɔ̃̀ɔ̀-kpòɔ̀ wáɖá-wáɖáɔ̀ ɖǎ ma ɓɔ́í kpáa, púɛɛ, ɔ nyu nàmàǔn ɖe. Ɔ kè ɔ gɔ̌mànà-nyɔ̀ ɓěɔ̀ kùmùìn ma waà hwòɖǒ-dyùàɔ̀ ɖe. 35Féwòɖòɛ̀ hwòɖǒ-dyùàɔ̀ kùmù ma, ké ɔ se ma Éézùɖùɛ̀-nyɔ̀ ɓěɔ̀ dyi táà, ɓɛ́ wa ké mu kà Bounɓoɔ̀ nyuɛ ma kà cɛ̃ɛ dyììn ɖé Mózè múɛ.

Currently Selected:

Ɛ́séɖɔ̀ 9: ƁB02

Highlight

Copy