1 Kɔ̀ɖéíntĩ̀ɔ̀ 14
14
Ɖɛ ɖíɛ́ ɓě ɓá ɖɛ Zùùɔ̀ nyí nyɔǔn ɓěɛɛ jè dyíɛ
1Ɓě mɛ vɔ̃ ɓɛ́ ɓě ké ɖɛ̀ɓɛ̀ǐn-ɖɛ̀ɓɛ̀ǐn ɓéɖé, ké nyíí-ɖɛ̀ ɓě ɓɛ́ Zùùɔ̀ nyí nyɔǔn wɛ̃ɛ, wa jè mɛ kpɔ̃ ɓě hwòɖǒ. Ɔ nyɔ jɛ́ɛ́ kɔ̃̀ jè mɛ kpɔ̃ ɓě hwòɖǒɛɛ mɔ̀ ɖɛ ɓɛ́ Gèɖèpɔ́ɔ̀ dèìn ɓě wĩín nyɛɛ cɛ̃-cɛ̃. 2Nyɔ mɔ̀ nyɔ ɓɛ́ ɔ wùɖùìn wuɖu kà kò ɖò múɛɛ, Zùùɔ̀ nyuɛ ké ɔ cɛ̃ ɖɛ vǐè ma nyɔǔn dyí kĩ́ín nyɛ. Kɛɛ ɔ wùɖù Gèɖèpɔ́ɔ̀ gbo, ké ɔ se nyɔǔn gbo wùɖù, sepóɛɖé wuɖu ɓě ɓɛ́ ɔ poà kɛɛ, nyɔǔn ní wɔ̃́ɔ múin. 3Kɛɛ nyɔ mɔ̀ nyɔ ɓɛ́ ɔ cɛ̃ ɖɛ ɓɛ́ Gèɖèpɔ́ɔ̀ dèìn ɔ wĩín nyɛɛ, ɔ wùɖù nyɔǔn gbo. Ké ɔ wuɖu ɓěɔ̀ kùìn wa dyi, ké ɔ po wa kpéí, ké ɔ dè wa hwòɖǒ dyi. 4Nyɔ mɔ̀ nyɔ ɓɛ́ ɔ wùɖùìn wuɖu kà kò ɖò múɛɛ, ɔ kùìn ɔ mìɔùn dyi, kɛɛ nyɔ mɔ̀ nyɔ ɓɛ́ ɔ cɛ̃ ɖɛ ɓɛ́ Gèɖèpɔ́ɔ̀ dèìn ɔ wĩín nyɛɛ, ɔ kùìn cɔ́cì-nyɔ̀ ɓěɔ̀ dyi.
5Ní mɔ́ ɓɛ́ ɓě séín kéɔ́ wuɖu kà kò ɖò mú wùɖùìn, kɛɛ ɖɛ ɓɛ́ ní mɔ́ ɓɛ́ ɓě ké nyu jɛ́ɛ́ kɛɛ, ɔ mɔ̀, ɓɛ́ ɓě ké wuɖu ɓě ɓɛ́ Gèɖèpɔ́ɔ̀ mu ɓě wĩín dèìn nyɛɛ cɛ̃. Nyɔ mɔ̀ nyɔ nyu ɖɛa kɛɛ, ɔ kpa ɖɛ mìɔ ké ɔ zi nyɔ mɔ̀ nyɔ ɓɛ́ ɔ wùɖùìn kà wuɖu kà kò ɖò múɛɛ dyí, nyɔ ɖò zà dyɛ ɔ wuɖuún hwɛ̀, ɓɛ́ cɔ́cì-nyɔ̀ ɓěɔ̀ ké dyi-kùìn-ɖɛ̀ ɓéɖé. 6Kàǔn wɛ̃ɛ, ḿ ɖíí ɓě, ɔ jǔ ké ḿ dyié ɓě gbo dyi, ké ḿ dyi wuɖu kà kò ɖò mú wùɖùìn, ké ḿ se ɓě dyí-tɛ̀mɛ̀ìn-ɖɛ̀ mɔɔ hwòɖǒ-fɔ̀nɔ̀-fɔ̀nɔ̀ mɔɔ cɛ̃́ɛ́-ɖɛ̀ mɔɔ ɖɛ ɓɛ́ Gèɖèpɔ́ɔ̀ dèìn ḿ wĩín nyɛɛ ɓě gbo dyà ní, xwɛ̌ ḿ ɓɛ́ìn ɓě gbo kpáa nyuɛ kɛ́?
7Kà dyúáɖòɔ̀ kǎà ɖɛ ɓě se fɛ̀ɛ̀ ɓéɖé, kɛɛ wa ɓéɖé wuɖuɛɛ nì. Ɔ jǔ ké péé-poo kè gbǎɖí se wuɖu kò-kò ɓě ɓéɖéɛ kpaín, nìí, xwɛ̌ nyɔ ɖò ɓɛ́ìn wɛ́ɖɛ́ wa ɓeɖeà kɛɛ dyí dyuòɛ̀ nyuɛ kɛ́? 8Ké ɖeɛɛ, ɔ jǔ ké wa se ɖɔ-kpaɔ̀ ɓaɖa nɔ̀mɔ̀ dyíin ní, nìí, nyɛ́ mu ti dyéìn ɓó to vɔ̃ jèɛ́? 9Kà ɔ nyu nìɛ̀ ɖé ɓě mìɔùn gbo. Ɔ jǔ ké wuɖu ɓě poà kɛɛ se xwíníín ɖò kɔ̃̀ ní, nìí, xwɛ̌ wa mu ɖɛ ɓě nìà cɛ̃iń nyɛɛ dyí dyuòɛ̀ nyuùn wɛ̃́? Nìí, ɓě mu wùɖùùn pídyi. 10Wuɖu kò-kò ɓáún-ɓáún ɓɛ́ìn ɓóɖó-kpàà kɔ̃ nìɛ̀, ké wa séín ɓéɖé xwíníín kìɖì. 11Kɛɛ ɔ jǔ ké ḿ se wuɖuɔ̀ múin wɔ̃́ ní, nìí, ḿ mɔ̀ ɓóɖó-dù kà kò ɖòɛ̀ nyɔ ɓó nyɔ poà wuɖuɔ̀ kɛɛ gbo, ké ɔ mɔ̀ùn mɔ̀ ɓóɖó-dù kà ɖòɛ̀ nyɔ ɓó mɔ́ún gbo ɖekè. 12Kǎà ɔ nì ɖé ɓě mìɔùn gbo. Ɓě nyu cɛ-cɛ ɓó nyíí-ɖɛ̀ ɓě ɓɛ́ Zùùɔ̀ tòà kɛɛ dyé jè. Ɔ jèɛɛ, ɓě mɛ vɔ̃ ɓɛ́ ɓě ké cɔ́cì-nyɔ̀ ɓěɔ̀ dyi kùɛ̌n zi.
13Ɔ jèɛɛ, nyɔ mɔ̀ nyɔ ɓɛ́ ɔ wùɖùìn wuɖu kà kò ɖò múɛɛ, ɔ mɛ ɓaà, ɓɛ́ ɔ ké kpé ɓéɖé, ɓɛ́ ɔ kéɛ mú zà. 14Ḿ dyi wuɖu kà kò ɖò mú ɓaàìn ní, nìí, ní zùùɔ̀ nì ɓaàǔn, kɛɛ ní fɔ̀nɔ̀-hwòɖǒɔ̀ seɛ ɖɛ ɖò kɔ̃ún dyé. 15Ɖɛ́ kɔó dyíɛ́? Ní zùùɔ̀ mu ɓaàùn. Ní mu ɓaàùn ɖé ɖɛ-múin-wɔ̃́-wɔ̃́ mú ɖekè. Ní zùùɔ̀ mu ɓeɖeìn. Ní mu Gèɖèpɔ́ɔ̀ gbo ɓèɖèìn ɖé ɖɛ-múin-wɔ̃́-wɔ̃́ mú ɖekè. 16Kɛɛ ɔ jǔ ké m̀ dyi Gèɖèpɔ́ɔ̀ zùo po ɖé nì zùùɔ̀ múín, nìí, xwɛ̌ nyɔ nìà ɓó, ké ɔ seà nyíí-ɖɛ̀ɔ̀ ɓéɖéɛɛ ɓɛ́ìn “Kǎà ɔ mɛ nì” poɛ kɛ́? Ɔ seɛ nyuɛ ɓɛ́ìn, sepóɛɖé ɔ se ɖɛ m̀ nìà cɛ̃iń nyɛɛ múin wɔ̃́. 17M̀ ɓɛ́ìn zùo poɛ nɔ̀mɔ̀ dyíin pū, kɛɛ ɔ se nyɔ tɔ̀ɔ̀ ɓě gbo kpá.
18Mɔ́ún po Gèɖèpɔ́ɔ̀ zùo, sepóɛɖé ḿ wùɖùìn wuɖu kà kò ɖò mú mìɔ ké ḿ zi ɓě séín dyí. 19Kɛɛ wɛ̃́ɛ́ kɛɛ, ɖé mɔ́ún gboɛɛ, ɔ muɔ́ dyíin nɔ̀mɔ̀ùn ɓɛ́ ḿ kéɔ́ wuɖu-kpò hm̀m̌ ɓɛ́ nyɔǔn ɓɛ́ìn múin wɔ̃́ɔ, ké ɔ ɓɛ́ìn wa ɖɛ tɛ̀mɛ̀ìn nyɛɛ cɔ́cì-nyɔ̀ ɓěɔ̀ hwìɛ̀ cɛ̃, ké ɔ zi ɓɛ́ ḿ ké wuɖu-kpò táázĩ̀ìn ɓaɖa-bùè ɖé wuɖu kà kò ɖò mú wùɖùìn nyɛɛ dyí.
20Ní ɖíí ɓě, ɓěǐn ɖá ɓɛ́ ɓě ké ɖɛ hwìɖǐi poìn dyú-gbɔ́ɔ́-kà. Ɓě mɛ jǔ dyú-pɛ̀ɖɛ̀ ɖé ɖɛ-gbà-nyu-nyu mú, kɛɛ ɖé ɓěɛ̀ hwìɖǐi-poìn-poìn múɛɛ, ɓě mɛ hwɛ̀ ɖɛ. 21Ɖɛ céè ɖé gma-cèè-ɖɛ̀ɔ̀ múɛɛ ɖá,
“Bounɓoɔ̀ ɖá, ‘Ní mu ɓóɖó-dù kà kò ɖòɛ̀ nyɔ ɓě ɓɛ́ wa po wuɖu kà kò ɖò ɓěɛɛ kũ̀à mú nyùìn,
ɓɛ́ ḿ ké nyɔ ɓěɛ̀ ɖɛ tɛ̀mɛ̀ìn.
Kɛɛ wɛ̃́ɛ́ kɛɛ, wa se ní wuɖuɔ̀ ɖùǔ gbo tòɛ̀ mɔ́.’ ”
22Ɔ jèɛɛ, wuɖu kà kò ɖò mú-wùɖùìn-wùɖùìn mɔ̀ ɖàɓàìn-ɖɛ̀ ɖé nyɔ ɓě seà Gèɖèpɔ́ɔ̀ hwìɖǐǐ taɓaa gbo. Kɛɛ ɔ se ɓó nyɔ ɓě taɓaà Gèɖèpɔ́ɔ̀ hwìɖǐǐɛɛ bìì. Kɛɛ ɖɛ ɓɛ́ Gèɖèpɔ́ɔ̀ dèìn nyɔǔn wĩín nyɛɛ cɛ̃-cɛ̃ se nyɔ ɓě seà Gèɖèpɔ́ɔ̀ hwìɖǐǐ taɓaa bìì. Ɔ mɔ̀ nyɔ ɓě taɓaà Gèɖèpɔ́ɔ̀ hwìɖǐǐɛɛ bìì.
23Ɔ jèɛɛ, ɔ jǔ ké cɔ́cì-nyɔ̀ séín ɓěɔ̀ dyi dyí poìn, ké wa séín dyi wuɖu kà kò ɖò mú wùɖùìn, ké nyɔ ɓě seà ɖɛ ɓěa jè múin wɔ̃́ɛ ɔ kè nyɔ ɓě seà Gèɖèpɔ́ɔ̀ hwìɖǐǐ taɓaa dyi gbǒɔ̀ mú dyáín, wa seɛ cɛ̃ɛ́ mu kà sã̀à nyu ɓěɛe? 24Kɛɛ ɔ jǔ ké nyɔ séín dyi ɖɛ ɓě ɓɛ́ Gèɖèpɔ́ɔ̀ dèìn wa wĩín nyɛɛ cɛ̃iń nìǐn, nìí, ɖɛ ɓě ɓɛ́ wa séín muà cɛ̃ìn nyɛɛ muɛ nyuùn ɓɛ́ píé-nyɔ̀ dyáà ɖéɛɛ ké ɔ ɖɛ gbà ɓěɔ̀ dyí dyuò, ɓɛ́ ɔ ké ɔ mìɔùn múin gmɔìn. 25Ké ɔ muɛ nyuùn ké vǐè-ɖɛ̀ ɓě nìà ɖé ɔ hwòɖǒ-dyùà múɛɛ mu píé wóɖóùn. Ɔ jèɛɛ, ɔ mu dyi jìɖǐìn, ké ɔ mu Gèɖèpɔ́ɔ̀ ɓièìn, ké ɔ muɛ cɛ̃ìn, ɓɛ́ ɔ ké níiń, “Gèɖèpɔ́ɔ̀ nì ɓě hwìɛ̀ jǎà.”
Kà ɖɛ ɓě ké ɖeín dyi deɛ̀n nyu ɖé cɔ́cìɔ̀ múɛ
26Ɖɛ́ kɔó dyíɛ́, ɖíí ɓě? Ɓě dyi dyí poìn ní, nìí, ɓě ɖò-ɖò ɓéɖé wɛ́ɖɛ́ kè cɛ̃́ɛ́-ɖɛ̀, ké ɖò mɔ̀ùn ɓéɖé dyí-tɛ̀mɛ̀ìn-ɖɛ̀ kè wuɖu kà kò ɖò ɔ kè wuɖu ɓěɔ̀ mú-zà-zà. Ɓě ɓéɖé ɓɛ́ ɓě kéɔ́ ɖɛ ɓě nìà kɛ nyu ɓɛ́ cɔ́cì-nyɔ̀ ɓěɔ̀ kéɔ́ dyi ku jè. 27Nyɔ ɖò dyi wuɖu kà kò ɖò mú wùɖùìn ní, nìí, ɔ mɛ mɔ̀ nyɔ sɔ̃́ mɔɔ nyɔ tã nyɛ̀nɛ̀ɛ̀, ké nyɔ ɓěɔ̀ mɛ kpa waà wuɖu ɖò-ɖò, ké nyɔ-kpò dyúáɖò mɛ zà wa wuɖuɔ̀ mú. 28Kɛɛ ɔ jǔ ké wa se wuɖuún-zà-nyɔ̀ ɖò ɓéɖéín, nìí, wa mɛ ɓɔ́ wùɖùɛ̀ ɖé cɔ́cì-nyɔ̀ ɓěɔ̀ hwìɛ̀. Wa mɛ wùɖù Gèɖèpɔ́ɔ̀ gbo ɖé wa ɖòùn gbo. 29Kpáá-ɖɛ̀-cɛ̃-nyɔ̀ ɓěɔ̀ sɔ̃́ kè tã mɛ wùɖù, ɓɛ́ nyɔ tɔ̀ɔ̀ ɓěɔ̀ mɔ̀ùn ké ɖɛ wa muà cɛ̃ìn nyɛɛ múin gmɔìn. 30Ɔ jǔ ké Gèɖèpɔ́ɔ̀ dyi ɔ mǔè ɓě dèɖěà dyaa ɖò ɖɛ ɖò dyí tɛ̀mɛ̀ìn ní, nìí, nyɔ mɔ̀ùn muà wùɖùɛ̌n nììn nyɛɛ mɛ ɓɔ́ ɓɛ́ nyɔɔ̀ mɔ̀ùn ké wùɖù. 31Ɓě séín ɓɛ́ìn ɖɛ Gèɖèpɔ́ɔ̀ mu ɓě wĩín dèìn nyɛɛ cɛ̃ɛ ɖò-ɖò, ɓɛ́ ɓě séín ké ɖɛ ɖò cɛ̃́, ɓɛ́ ɓě ké kpéí kpá. 32Kpáá-ɖɛ̀-cɛ̃-nyɔ̀ ɓěɔ̀ kɔ̃̀ wa zùù ɓěɔ̀ wuɖuí, 33sepóɛɖé Gèɖèpɔ́ɔ̀ se wĩín-dyi-wùɖù Gèɖèpɔ́ɔ̀, kɛɛ ɔ mɔ̀ gìɖìǐ Gèɖèpɔ́ɔ̀.
Kà ɓɛ́ ɔ nyuà nìɛ̀ ɖé Gèɖèpɔ́ɔ̀-nyɔ̀ ɓěɔ̀ dyí-poìn-poìn séín ɓěɔ̀ hwìɛ̀ kɛɛ, kǎà ɔ mɛ nyu ɓě hwìɛ̀ nìɛ̀. 34Màa ɓěɔ̀ mɛ nì gìɖìǐ ɖé cɔ́cì-nyɔ̀ ɓěɔ̀ dyí-poìn-poìn ɓěɔ̀ hwìɛ̀. Wa se kpé ɓéɖé ɓɛ́ wa ké ɖɛ ɖò cɛ̃. Wa mɛ dyà wa mìɔùn ɓíɖíi, kǎà Gèɖèpɔ́ɔ̀ gmaɔ̀ ɖá. 35Ɔ jǔ ké wa dyi mɔ́ ɓɛ́ wa ké ɖɛ ɖò múin wɔ̃́ ní, wa mɛ diè waà dyú-ɓǎ ɓěɔ̀ dyi ɖé wa ɓíɖí-taún. Sepóɛɖé ɔ nì dɛ̃ ɓɛ́ màa ɓěɔ̀ ké ɖɛ ɖò cɛ̃ ɖé cɔ́cì-nyɔ̀ ɓěɔ̀ hwìɛ̀.
36Kē! Gèɖèpɔ́ɔ̀-wùɖùɔ̀ sɔ̀ ma ɖé ɓě hwìɛ̀ kĩ́íne? Ɓě ɖòùn kɔ̃̀ gbo Gèɖèpɔ́ɔ̀-wùɖùɔ̀ dyi ma kà kɛɛ̀? 37Ɔ jǔ ké nyɔ ɖò dyiɛ hwìɖǐi poìn kà ɔ mɔ̀ kpáá-ɖɛ̀-cɛ̃-nyɔ̀, mɔɔ ɔ mɔ̀ nyɔ ɓɛ́ ɔ ɓéɖé nyíí-ɖɛ̀ ɓɛ́ Zùùɔ̀ nyí ɔ kɛɛ ní, nìí, ɔ mɛ dyuòɛ̀ dyí kà ɖɛ ɓɛ́ ḿ nìà ɓě gbo cɛ̃iń nyɛɛ, ɔ mɔ̀ ɖɛ ɓɛ́ Bounɓoɔ̀ cɛ̃ɛ. 38Ɔ jǔ ké nyɔ ɖò seɛ náa dyí dyuò jɛ́ɛ́ ní, nìí, wa mɛ ɓɔ́ ɔ mɔ̀ùn dyí dyuòɛ̀.
39Ɔ jèɛɛ, ḿ ɖíí ɓě, ɖɛ ɓě ɓɛ́ Gèɖèpɔ́ɔ̀ dèìn ɓě wĩín nyɛɛ cɛ̃-cɛ̃ mɛ kpɔ̃ ɓě hwòɖǒ. Ké ɓě ní po nyɔ ɓě mɔ́ ɓɛ́ wa ké wuɖu kà kò ɖò mú wùɖùìn nyɛɛ ɓɔ́í. 40Kɛɛ ɓě mɛ nyu ɖɛ séín nɔ̀mɔ̀ dyíin, ɔ kè kà ɓɛ́ ɓě ɓéɖé ɓɛ́ ɓě ké wa nyuɛ.
Currently Selected:
1 Kɔ̀ɖéíntĩ̀ɔ̀ 14: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
