1 Kɔ̀ɖéíntĩ̀ɔ̀ 13
13
Ɖɛ̀ɓɛ̀ǐn-ɖɛ̀ɓɛ̀ǐn
1Ḿ ɓɛ́ìn wuɖu ɓě ɓɛ́ nyɔǔn-dyù poɛ ɔ kè wuɖu ɓɛ́ ínjà ɓěɔ̀ poɛɛ poɛ, kɛɛ ḿ se ɖɛ̀ɓɛ̀ǐn-ɖɛ̀ɓɛ̀ǐn ɓéɖéín, nìí, ḿ nì kuɖu-kuɖu nyuɛń pū kà kpee wúɖúà gein-gein nyɛɛ nìà kɛ, ɔ kè kà wa ɓaɖaìn páni-pĩ̀à sɔ̃́ dyí, ké ɔ nyuà jɛ̃in-jɛ̃in nyɛɛ nìà kɛ. 2Gèɖèpɔ́ɔ̀ ɓɛ́ìn ḿ wuɖu wĩín dèɛ̀n, ɓɛ́ ḿ kéɛ cɛ̃, ké ḿ ɓɛ́ìn ɖɛ séín vǐè ma nyɔǔn dyí kĩ́ín nyɛ ɔ kè hwòɖǒ-fɔ̀nɔ̀-fɔ̀nɔ̀ séín dyí dyuòɛ̀. Ké ḿ ɓɛ́ìn hwìɖǐǐ-taɓa-taɓa séín ɓéɖéɛ, ɓɛ́ ḿ ké toɖo daí zàìn, kɛɛ ḿ se ɖɛ̀ɓɛ̀ǐn-ɖɛ̀ɓɛ̀ǐn ɓéɖéín, nìí, ḿ se ɖɛ kpa fɔɔ. 3Ḿ ɓɛ́ìn ní kɔ̃̀ɔ̀-ɖɛ̀ séín gǎ-dyé-nyɔ̀ ɓěɔ̀ múin geɛ̀n, ké ḿ ɓɛ́ìn ḿ mìɔùn nììn kpóɖó-dyùàɔ̀ nyɔǔn nyíɛɛ, ɓɛ́ wa kéɛ fɔ̃, kɛɛ ḿ se ɖɛ̀ɓɛ̀ǐn-ɖɛ̀ɓɛ̀ǐn ɓéɖéín, nìí, ḿ seɛ ɖɛ ɖò kɔ̃ún dyé.
4Nyɔ ɖò dyi ɖɛ̀ɓɛ̀ǐn-ɖɛ̀ɓɛ̀ǐn ɓéɖéín, nìí, ɔ ku hwòɖǒ, ké ɔ kpeɖe nɔ̀mɔ̀ dyíin. Ɔ se hwɛ̀nɛ̌ ɓéɖé, ké ɔ ní ɓɔ́ɖɔ́. 5Ɔ ní ɓúáìn ɔ mìɔùn dyí, ké ɔ gmɔ̀ ɔ mìɔùn dyí nɔ̀mɔ̀ dyíin. Nyɔ ɖò dyi ɖɛ̀ɓɛ̀ǐn-ɖɛ̀ɓɛ̀ǐn ɓéɖéín, nìí, ɔ ní vɔ̃ ɔ mìɔùn nììn nɔ̀mɔ̀ dyíin dyé jè. Ɔ ní zàìn nyɔ ɖò, ké ɔ ní dèìn ɖɛ gbà ɖò xwíníín dyi. 6Nyɔ ɖò dyi ɖɛ̀ɓɛ̀ǐn-ɖɛ̀ɓɛ̀ǐn ɓéɖéín, nìí, nyɔ ɖò dyi ɖɛ gbà nyu ní, nyɔɔ̀ jè ní po ɔ múàǔn, kɛɛ ɔ hwòɖǒ dèìn ɖɛ mɔ̀ jǎà-ɖɛ̀ kɛɛ múin. 7Nyɔ ɖò dyi ɖɛ̀ɓɛ̀ǐn-ɖɛ̀ɓɛ̀ǐn ɓéɖéín, nìí, ɔ màìn ɖɛ séín mú, ké ɔ taɓa ɖɛ séín hwìɖǐǐ. Ɔ dè ɖɛ séín dyé jè hwòɖǒ kɔ̃, ké ɔ kùìn ɖɛ séín hwòɖǒ.
8Ɖɛ̀ɓɛ̀ǐn-ɖɛ̀ɓɛ̀ǐn se mánáín-hwɛ̀ìn-naín ɖò kɔ̃̀. Kɛɛ ɖɛ ɓě ɓɛ́ Gèɖèpɔ́ɔ̀ dèìn nyɔǔn wĩín nyɛɛ, ɔ cɛ̃-cɛ̃ jè mu dyi ziìn. Ké wuɖu kà kò ɖò mú-wùɖùìn-wùɖùìn mu ɓɔ́í kpáùn. Ké hwòɖǒ-fɔ̀nɔ̀-fɔ̀nɔ̀ jè mu dyi ziìn. 9Sepóɛɖé à hwòɖǒ-fɔ̀nɔ̀-fɔ̀nɔ̀ɔ̀ se gbɔ hwɛ̀, ké ɖɛ ɓě ɓɛ́ Gèɖèpɔ́ɔ̀ dèìn nyɔ wĩín nyɛɛ cɛ̃-cɛ̃ɔ̀ se gbɔ hwɛ̀. 10Kɛɛ ti ɓɛ́ ɖɛ mɔ̀ ɖɛ hwɛ̀à gbɔɛɛ mu dyiìn nyɛɛ, ɖɛ mɔ̀ ɖɛ seà gbɔ hwɛ̀ kɛɛ jè mu dyi ziìn. 11Ti ḿ mɔ̀ ma dyú-gbɔ́ɔ́ keɛɛ, ḿ wùɖù ma dyú-gbɔ́ɔ́-kà. Ḿ wɔ̃́ ma ɖɛ múin dyú-gbɔ́ɔ́-kà. Ḿ poìn ma ɖɛ hwìɖǐi dyú-gbɔ́ɔ́-kà. Kɛɛ ti ḿ ɖǎ ma ɖɛ hwɛ̀ kɛɛ, ḿ táà ma ní dyú-gbɔ́ɔ́-kpèɖè ɓěɔ̀ dyi. 12Kàǔn wɛ̃ɛ, ɔ nì kà à nìà sɛ́ɓɛ́ɛ̀ mú gmɔ̀ǐn, ké à dyéà nyɔ-hwìɖǐi-kpèìn-ɖɛ̀ ɓěɛ. Kɛɛ ɖé dyúa kɛɛ, à mu wa dyéìn jɛ́ɛ́ cá. Kàǔn wɛ̃ɛ, ní hwòɖǒ-fɔ̀nɔ̀-fɔ̀nɔ̀ɔ̀ se gbɔ hwɛ̀. Kɛɛ ɖé dyúa kɛɛ, ɔ mu gbɔ hwɛ̀ìn, kà ɓɛ́ fɔ̀nɔ̀-hwòɖǒ ɓɛ́ Gèɖèpɔ́ɔ̀ ɓéɖéà ɓá ḿ dyíɛɛ hwɛ̀à gbɔɛ.
13Ɔ jèɛɛ, ɖɛ tã ɓěa kɛɛ, wa mu nììn kánáá pū. Wa mɔ̀ hwìɖǐǐ-taɓa-taɓa kè ɖɛ-hwòɖǒ-kɔ̃-dè-dè ɔ kè ɖɛ̀ɓɛ̀ǐn-ɖɛ̀ɓɛ̀ǐn. Kɛɛ ɔ nyɔ mɔ̀ ɖɛ kpa ɖɛ mìɔ ɖé wa hwìɛ̀ kɛɛ mɔ̀ ɖɛ̀ɓɛ̀ǐn-ɖɛ̀ɓɛ̀ǐn.
Currently Selected:
1 Kɔ̀ɖéíntĩ̀ɔ̀ 13: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
