1 Kɔ̀ɖéíntĩ̀ɔ̀ 15
15
Kɛ́ɖɛ́ì gĩɔ-wóɖó-wóɖóɔ̀ jè
1Kàǔn wɛ̃ɛ, ḿ ɖíí ɓě, ní mɔ́ ɓɛ́ ḿ ké bɔ̃̌ nɔ̀mɔ̀ dyíin ɓɛ́ ḿ cɛ̃ ma kà ɓě gboɛɛ ɓě hwìɖǐi dyà. Ɓě kpɔ̃ɔ ma dyi, ké ɔ ɖǎa nyu ké ɓě ɖǎ dyi nyànà. 2Ɓě ɖǎ pó dyììn ɖé bɔ̃̌ nɔ̀mɔ̀ dyíinɔ̀ mú, ɔ jǔ ké ɓě dyiɛ dyi kpɔ̃ nɔ̀mɔ̀ dyíin ní, ɔ sèìn ké ɓě taɓaa dyɛ hwìɖǐǐ pídyi hwɛ̀.
3Ɖɛ ɓě ɓɛ́ mɔ́ún ɖǎ ma dyéɛɛ, ɖé ḿ nyí ma kà ɓěɛ̀. Ɔ mɔ̀ ɖɛ zi ɖɛ kpauń mìɔ kɛ. Ɔ mɔ̀, Kɛ́ɖɛ́ì mɛ́ ma ɓó ɓěà nàmàǔn ɓěɔ̀ jè kà Gèɖèpɔ́ɔ̀-cèè-ɖɛ̀ɔ̀ nyuà cɛ̃ɛ kɛ. 4Ké wa zà ma ɔ dyóɖóún, ké Gèɖèpɔ́ɔ̀ zà ma ɔ gĩɔ ɓó wéɔ̀ tã nììnɔ̀ xwíníín kà Gèɖèpɔ́ɔ̀-cèè-ɖɛ̀ɔ̀ nyuà cɛ̃ɛ kɛ. 5Ké ɔ wóɖóìn ma Sífà dyí, hwɛ̀ ké ɔ wóɖóìn ma ɖeín-nà-nyɔ̀ ɓaɖa-bùè sè sɔ̃́ ɓěɔ̀ dyí. 6Púɛɛ, ɔ wóɖóìn ma à ɖíí cɔ́cì-nyɔ̀ ɓěɔ̀ dyí ɓó ti dyúáɖò xwíníín. Nyɔ ɓěɔ̀ zi ma nyɔ-kpò hɔ̃dɛ̀ɖɛ̀ hm̀m̌ kɔ̃. Ɖíɛ́ ɓě ɖǎ mɛ́ dyɛo, kɛɛ wa ɓáún-ɓáún nì cĩ́ɛń ke ɓó kàǔn. 7Ké ɔ wóɖóìn ma Jĩ́ìn dyí. Púɛɛ, ɔ wóɖóìn ma àpɔ́sò séín ɓěɔ̀ dyí.
8Ḿ nì kà nyɔ se ku, ké ɔ wóɖóà kɛɛ dyɛo, kɛɛ ḿ mɔ̀ nyɔ hwɛ̀ìn-gbɔ ɓɛ́ ɔ wóɖóìn ma dyíɛ. 9Ḿ mɔ̀ àpɔ́sò ɓěɔ̀ dyúwè. Ḿ se ɖɛ kpa, ɓɛ́ wa ké ḿ àpɔ́sò ɖáìn, sepóɛɖé ḿ dyéìn ma Gèɖèpɔ́ɔ̀ cɔ́cì-nyɔ̀ ɓěɔ̀ gǎ. 10Kɛɛ Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ nyuɛ ké ḿ mɔ̀ nyɔ ḿ jǔà kàǔn wɛ̃. Ké nɔ̀mɔ̀ dyíin ɓě ɓɛ́ ɔ nyuà ḿ bììɛɛ se ma ɖɛ fóɖóún. Kɛɛ ḿ nyu ma kũ̀à, ké ḿ zi àpɔ́sò tɔ̀ɔ̀ ɓěɔ̀ dyí. Ɔ se ma mɔ̄ cá, kɛɛ Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ nì ma ḿ gbo. 11Kɛbì ɔ mɛ jǔ mɔ̄ mɔɔ wa kɛɛ, ɖɛ nìà kɛ kɔ̃̀ jè à séín poà zio wɛ̀, ké ɖɛ nìà kɛ ɖé ɓě taɓaà hwìɖǐǐɛ̀.
À gĩɔ wóɖó jè
12Kɛɛ ɖɛ kɔ̃̀ jè à poà zio kɛɛ, ɔ dyi kà ɓɛ́ Gèɖèpɔ́ɔ̀ ɖǎ Kɛ́ɖɛ́ì gĩɔ zàa jǔǐn, nìí, xwɛ̌ ɓě ɖíɛ́ ɓě ɓɛ́ìn cɛ̃ɛ kà nyɔ ɓě ɖǎà mɛ́ɛ se gĩɔ wóɖóɛ ɓɛ́ìn nyɛ́? 13Ɔ jǔ ké ɔ se ná nìɛ̀ ɓɛ́ìn ní, nìí, Kɛ́ɖɛ́ì se ma gĩɔ wóɖó. 14Ɔ jǔ ké Kɛ́ɖɛ́ì se ma gĩɔ wóɖóín, nìí, ɖɛ kɔ̃̀ jè à poà zio kɛɛ mɔ̀ ɖɛ fóɖóún. Ké ɓě nììn hwìɖǐǐ-taɓa-taɓaɔ̀ mɔ̀ ɖɛ fóɖóún ɖekè. 15Ɔ seɛ ɖòùn, kɛɛ nìí, wa kpɔ̃ à Gèɖèpɔ́ɔ̀ se wĩin tɔ́mɔ́ìn jè, sepóɛɖé ɖɛ à ɖá Gèɖèpɔ́ɔ̀ nyuà kɛɛ, ɔ mɔ̀ Kɛ́ɖɛ́ì gĩɔ-zà-zà. Kɛɛ ɔ se ma ɔ gĩɔ zà, ɔ jǔ ké nyɔ ɓě ɖǎà mɛ́ɛ se gĩɔ wóɖóɛ ɓɛ́ìn jǎà ní. 16Sepóɛɖé ɔ jǔ ké nyɔ ɓě ɖǎà mɛ́ɛ se gĩɔ wóɖóɛ ɓɛ́ìn ní, nìí, Kɛ́ɖɛ́ì se ma gĩɔ wóɖó jǎà. 17Ɔ jǔ ké Kɛ́ɖɛ́ì se ma gĩɔ wóɖóín, nìí, ɓěɛ̀ hwìɖǐǐ-taɓa-taɓaɔ̀ se ɖɛ ɖò mú nì. Ɓě nì ɓěɛ̀ nàmàǔn ɓěɔ̀ mú ke. 18Ké nìí, ɔ xwíníín mɔ̀, nyɔ ɓě taɓaà Kɛ́ɖɛ́ì hwìɖǐǐ, ké wa ɖǎà mɛ́ɛ ɖǎ mú gbɔɔ̀. 19Ɔ jǔ ké Kɛ́ɖɛ́ì dyi à ɖɛ-hwòɖǒ-kɔ̃-dè-dè nyí nɔ̄ ɓóɖó-kpàà kɔ̃ ɖòùn ní, nìí, à jè ɓéɖé ɓɛ́ ɔ ké nyɔǔn wìì nyùìn, ké ɔ zi nyɔ tɔ̀ɔ̀ séín jè dyí.
20Kɛɛ ɖɛ mɔ̀ jǎà kɛɛ, ɔ mɔ̀, Gèɖèpɔ́ɔ̀ ɖǎ ma Kɛ́ɖɛ́ì gĩɔ zà, ké ɔ mɔ̀ nyɔ ɓě muà gĩɔ wóɖóùn wɛ̃ɛ kĩ́ín-kĩ́ínɔ̀. 21Kà ɓɛ́ gàa ɖò mɔ̀ nyɔ dyà ma kà mɛ́-mɛ́ ɓóɖó-kpàà kɔ̃ɛɛ, kǎà gàa ɖò dyà gĩɔ-wóɖó-wóɖó. 22Kà ɓɛ́ nyɔǔn séín mɛ́à dyììn ɖé Áɖɔ̀ùn múɛɛ, kà dyúáɖòɔ̀ kǎà nyɔǔn séín mu gĩɔ wóɖóùn dyììn ɖé Kɛ́ɖɛ́ì mú. 23Kɛɛ nyɔ ɓěɔ̀ ɓéɖé wa wáká ɖò-ɖò. Kɛ́ɖɛ́ì mɔ̀ wa kĩ́ín-kĩ́ínɔ̀. Ké ti Kɛ́ɖɛ́ì mu dyiɛń nììn nyɛɛ, nìí, ɔ nyɔ ɓěɔ̀ mu ɓó ɔ ɖeín dyí kɔùn. 24Ké nìí, ɖɛ séín ɓě muá mánáín hwɛ̀ìn. Kɛ́ɖɛ́ì mu nyɔ ɓě kɔ̃̀à nyɔǔn wuɖuí, kè nyɔ ɓě nì nyɔǔn kɔ̃in, ɔ kè nyɔ ɓě ɓéɖé kpé kɛɛ toún ɖuùn. Ké ɔ mu kã́á-ɓòɖòɔ̀ Gèɖèpɔ́ɔ̀ mɔ̀à Ɓǎɔ̀ kɛɛ xwáɖáún zàìn. 25Sepóɛɖé Kɛ́ɖɛ́ì ɓéɖé ɓɛ́ ɔ ké nyɔǔn wuɖuí kɔ̃̀, ɓɛ́ Gèɖèpɔ́ɔ̀ ké ɔ mú-nyɛ́-nyɔ̀ séín ɓěɔ̀ ɖé ɔ ɓo xwíɖíi po hwɛ̀. 26Mú-nyɛ́-nyɔ̀ hwɛ̀ìn-gbɔ ɓɛ́ ɔ ké toún ɖuɛɛ mɔ̀ gĩɔ. 27Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, “Gèɖèpɔ́ɔ̀ nyuɛ ké ɔ kɔ̃̀ ɖɛ séín kpé kɔ̃ún.” Kɛɛ ɖɛ ɔ cɛ̃à, ɓɛ́ ɔ dyi níiń, “Ɖɛ séín” nyɛɛ, ɔ seɛ xwíníín mɔ̀ ɓɛ́ Gèɖèpɔ́ɔ̀ mìɔùn ké ɖé kpá ɖekèɛ. Ɔ mɔ̀ nyɔ nyuɛ ké ɖɛ séín nì Kɛ́ɖɛ́ì xwíɖíi. 28Kɛɛ ti Gèɖèpɔ́ɔ̀ muɛ nyuùn ɓɛ́ Kɛ́ɖɛ́ì ké ɖɛ séín kɔ̃in nìɛɛ, nìí, Kɛ́ɖɛ́ì mɔ̀à Dyú-gààɔ̀ kɛɛ mu Gèɖèpɔ́ɔ̀ mɔ̀ nyɔ nyuà ké ɖɛ séín nìà ɔ xwíɖíiɛɛ xwíɖíi nììn, ɓɛ́ Gèɖèpɔ́ɔ̀ ké nyɔǔn séín wuɖuí kɔ̃̀ gàná cá.
29Ké ɖeɛɛ, nyɔ ɓě ɖǎ níɔ kpá ɓó nyɔ ɓě ɖǎà mɛ́ɛ jèɛɛ, xwɛ̌ wa jè mu nììn nyɛ́? Ɔ jǔ ké nyɔ ɓě ɖǎà mɛ́ɛ se gĩɔ wóɖóín, nìí, ɖɛ́ kɔ̃̀ jè wa kpáà níɔ ɓó wa jèɛ́? 30Ké ɖɛ́ kɔ̃̀ jè ɔ mɔ̀à fã̀à-ɖɛ̀ ɓó à bìì wé séín ɓàɖà, ké dyóɖó kàmà ziɛń nyɛɛ zià kɛ́? 31Ḿ ɖíí ɓě, ɔ nì kà ɓɛ́ ḿ mɛ́à wé séín ɓàɖàa. Ḿ ɓɔ́ɖɔ́ ɓě jè dyììn ɖé Kɛ́ɖɛ́ì Jízɛ̀ à Wuɖuí-kɔ̃̀-nyɔ̀ɔ̀ mú, ké ɔ nyuɛ ké ḿ cɛ̃à ɖɛa kɛ̀. 32Ɔ nì kà ḿ vɔ̃ ma dyoɖo-nìmìì ɓě gbo nɔ̄ Ɛ́fɛ́sà-hwɔ̀ɖɔ̀ɛ̀ múɛ. Ɔ jǔ ké ḿ dyiɛ ma náa nyu ɖé nyɔǔn-dyù nììn wáká kɔ̃ ní, nìí, ɖɛ́ ḿ dyé ɔ kɔ̃ún wɛ̃́? Ɔ jǔ ké nyɔ ɓě ɖǎà mɛ́ɛ se gĩɔ wóɖóín, nìí, ɓěà mɛ nyuɛ kà wa nyuà cɛ̃ɛ, ɓɛ́ wa dyi níiń, “Ɓěà ɖi ɖɛ, ɓɛ́ ɓěà ké ná, sepóɛɖé gàɖàà à muɔ̀ mɛ́ìn nyɛ.”
33Ɓěǐn ɖá ɓɛ́ nyɔ ɖò ké ɓě cá. M̀ kè ɖɛ-gbà-nyu-nyɔ̀ ɓě dyi péé nyuín, nìí, nì kpeɖe nyìnììn dyíin. 34Ɓě mɛ poìn hwìɖǐi dyí-sɛ́ɖɛ́ìn-kà ɖe, ɓɛ́ ɓě ké nàmàǔn nyuɛ ɓɔ́. Ɓě ɖíɛ́ ɓě se Gèɖèpɔ́ɔ̀ dyí dyuò. Ɔ jèɛɛ, ḿ cɛ̃ ɖɛa, ɓɛ́ ɔ ké ɓě dɛ̃ nyùìn.
À dyi gĩɔ wóɖóín kpóɖó-dyùà ɓɛ́ à mu ɓéɖéìn nyɛ
35Kɛɛ nyɔ ɖò mu ɖɛi dièìn, ɓɛ́ ɔ ké níiń, “Xwɛ̌ nyɔ ɓě ɖǎà mɛ́ɛ mu gĩɔ wóɖóɛ nyuùn wɛ̃́? Kpóɖó-dyùàɔ̀ nyɛ́ wa mu ɓéɖéìn nyɛ́?” 36M̀ zuɖuín. Ɖɛ m̀ ɓáà kɛɛ se mɛ́ín, ɔ se ɖé wóɖóɛ ɓɛ́ìn. 37Ké ɖɛ m̀ poà kɛɛ mɔ̀ mɔɔ́-xwɛ̃̀ pū. Ɔ ɓɛ́ìn gbúu mɔɔ mɔɔ́-xwɛ̃̀ kà kò ɖò ɓě jǔɛ. Kɛɛ m̀ seɛ gɔ̃ muà mɛìn nyɛɛ poɛ ɓɛ́ìn. 38Gèɖèpɔ́ɔ̀ nyí mɔɔ́-xwɛ̃̀ɔ̀ gɔ̃ɔ̀ nyɔ ɔ mɔ́ ɔ nyíɛ dyiɛ. Ké ɔ nyí ɓáá-ɖɛ̀ séín gɔ̃ɔ̀ nyɔ ɓɛ́ wa ɓéɖé ɓɛ́ wa ké ɓéɖéɛ.
39Ké ɖɛ séínɛ̀ fɔ́ se hwɔìn. Nyɔǔn-dyù nììn fɔ́ kò, ké nimii ɓě nììn fɔ́ kò. Naà ɓě nììn fɔ́ kò, ké zimii ɓě nììn fɔ́ kò.
40Ké ɖɛ ɖíɛ́ ɓě nì ɖé dyɔɔ̀ dyí, ké ɖíɛ́ ɓě nì ɓóɖó-kpàà kɔ̃. Ɖɛ ɓě nìà ɖé dyɔɔ̀ dyíɛɛ dĩ́ín-dĩ̀ìn kò, ké ɖɛ ɓě nìà nɔ̄ ɓóɖó-kpàà kɔ̃ɛɛ nììn dĩ́ín-dĩ̀ìn kò. 41Dyóɖóɔ̀ ɓéɖé ɔ mìɔùn nììn dĩ́ín-dĩ̀ìn, ké dɛ̀nɛ̀ɔ̀ ɓéɖé ɔ nììn. Ké dɛ̀nɛ̀-dyù ɓěɔ̀ ɓéɖé wa nììn. Ké dɛ̀nɛ̀-dyù mɛ́nɛ́ɛ́ ɓěɔ̀ dĩ́ín-dĩ̀ìnɔ̀ kpa kòɛ̀ ɖò-ɖò.
42Nyɔ ɓě ɖǎà mɛ́ɛ dyi gĩɔ wóɖóín, kǎà ɔ mu nììn. Kpóɖó-dyùàɔ̀ nyɔ ɓɛ́ wa poà ɓóɖóún wɛ̃ɛ ɓɛ́ìn mú gbɔɔ̀. Kɛɛ ɔ jǔ ké ɔ ɖǎ gĩɔ wóɖóín, ɔ se mú gbɔɔ̀ ɓɛ́ìn ɖe. 43Nyɔ wa poà ɓóɖóún wɛ̃ɛ ɖǎ dyíin nyìnììn. Kɛɛ ɔ ɖǎ gĩɔ wóɖóín, nìí, ɔ ɖǎ dyíin nɔ̀mɔ̀. Nyɔ wa poà ɓóɖóún wɛ̃ɛ, ɔ se kpéí nì. Kɛɛ ɔ ɖǎ gĩɔ wóɖóín, nìí, ɔ ɖǎ kpé ɓéɖé. 44Nyɔ wa poà ɓóɖóún wɛ̃ɛ, ɔ mɔ̀ kpóɖó-dyùà jɛ́ɛ́ɔ̀. Kɛɛ ɔ ɖǎ gĩɔ wóɖóín, nìí, ɔ mɔ̀ǎ zùǔn-kpòɖò-dyùà. Kà kpóɖó-dyùà jɛ́ɛ́ɔ̀ jè nìà kɛɛ, kǎà zùǔn-kpòɖò-dyùàɔ̀ jè nì. 45Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, “Gàa kĩ́ín-kĩ́ín mɔ̀à Áɖɔ̀ùn kɛɛ dè ma cĩ́ɛ gbɔ.” Kɛɛ Áɖɔ̀ùn hwɛ̀ìn-gbɔɔ̀ mɔ̀à Zùù ɓɛ́ ɔ nyíà nyɔǔn fɛ̀ɛ̀ kɛ̀. 46Zùǔn-ɖɛ̀ ɓěɔ̀ ní dyi kĩ́ín. Kpóɖó-dyùà jɛ́ɛ́ɔ̀ mɔ̀ nyɔ dyi kĩ́ín, hwɛ̀ ké zùǔn-kpòɖò-dyùàɔ̀ dyi. 47Áɖɔ̀ùn kĩ́ín-kĩ́ínɔ̀ Gèɖèpɔ́ɔ̀ nyu ma ɔ sɔ̀ìn ɖé ɓóɖó púu-púu mú. Kɛɛ Áɖɔ̀ùn sɔ̃́ nììnɔ̀ sɔ̀ ma ɖé dyɔún. 48Nyɔ ɓě mɔ̀à ɓóɖó-kpàà nyɔ ɓěɛɛ, wa nì kà nyɔ ɓɛ́ Gèɖèpɔ́ɔ̀ nyu ma kà sɔ̀ìn ɓóɖóɛ̀ púu-púu múɛɛ nìà kɛ. Dyɔún-nyɔ̀ ɓěɔ̀ nì kà nyɔ sɔ̀ ma kà ɖé dyɔún wɛ̃ɛ nìà kɛ. 49Kà ɓɛ́ à kè gàa ɓɛ́ Gèɖèpɔ́ɔ̀ nyu ma sɔ̀ìn ɓóɖó púu-púu múɛɛ hwɔìn kà kɛɛ, kǎà à kè gàa sɔ̀à ɖé dyɔún wɛ̃ɛ mu hwɔìn.
50Ḿ ɖíí ɓě, ḿ mɛ cɛ̃ ɓě ɖɛa gbo. Ɖɛ kè ɖɛ ɓɛ́ wa mɔ̀ fɔ́ kè nyɔmɔɔ kɛɛ, wa se ɖé Gèɖèpɔ́ɔ̀ kã́á-ɓòɖòɔ̀ mú pá ɖò ɓéɖéɛ mu fɔɔ. Ɖɛ ɓɛ́àìn mú gbɔɔ̀ kɛɛ, ɔ se ɖɛ ɓɛ́ ɔ seà mú gbɔɔ̀ ɓɛ́ìn nyɛɛ kɔ̃̀ɔ̀ ɓɛ́ìn.
51Ɓě tò ḿ gbo ɖùǔ, ɓɛ́ ḿ ké ɓě ɖɛ vǐè ma kĩ́ín nyɛɛ ɖò gbo cɛ̃. À séín se mɛ́ɛ hwɛ̀ɛ̌ mu, kɛɛ à séín mu gbo zĩàìn wàɖà 52kà dyéɖé-kpɔ̀ɔ̌ kpáà kɛ, ti ɓɛ́ wa mu gã̀à hwɛ̀ìn-gbɔɔ̀ ɓaɖaùn wɛ̃. Wa dyi gã̀àɔ̀ ɓaɖaín, nyɔ ɓě ɖǎ ma mɛ́ɛ mu gĩɔ wóɖóùn, ké wa se mú gbɔɔ̀ ɓɛ́ìn ɖe, ké à mu gbo zĩàìn. 53Sepóɛɖé ɖɛ ɓɛ́àìn mú gbɔɔ̀ kɛɛ ɓéɖé ɓɛ́ ɔ ké ɖɛ se mú gbɔɔ̀ ɓɛ́ìn nyɛɛ mú zɛ̃̀ìn. Ké ɖɛ muà mɛ́ìn nyɛɛ ɓéɖé ɓɛ́ ɔ ké ɖɛ seà mɛ́ɛ ɓɛ́ìn nyɛɛ mú zɛ̃̀ìn. 54Ti ɓɛ́ ɖɛ ɓɛ́àìn mú gbɔɔ̀ kɛɛ ɖǎ ɖɛ seà mú gbɔɔ̀ ɓɛ́ìn nyɛɛ mú zɛ̃̀ìn, ké ti ɓɛ́ ɖɛ ɓɛ́àìn mɛ́ɛ kɛɛ ɖǎ ɖɛ seà mɛ́ɛ ɓɛ́ìn nyɛɛ mú zɛ̃̀ìn nyɛɛ ní, nìí, ɖɛ céèà ɖé Gèɖèpɔ́ɔ̀-cèè-ɖɛ̀ɔ̀ múɛɛ mu jǎà kpáùn. Ɖɛ ɔ cɛ̃à kɛɛ, ɔ kɛà kɛ̀. Ɔ ɖá,
“Gĩɔ toún-ɖu-ɖu ɖǎ mɛ́-mɛ́ dyi zĩ̀ìn.
55Óó gĩɔ, dɛ̌ nì nyɔ-toún-ɖu-ɖuɔ̀ nìɛ́?
Óó xwɛ́-gmàà, dɛ̌ nì nyɔ-puà-puàɔ̀ nìɛ́?”
56Gĩɔ zà ɔ nyɔ-puà-kpèɔ̀ nàmàǔn gbo. Ké nàmàǔn zà ɔ nììn kpéɔ̀ ɖé Gèɖèpɔ́ɔ̀ gmaɔ̀ mú. 57Kɛɛ à po Gèɖèpɔ́ɔ̀ zùo, sepóɛɖé ɔ nyí à to-ɖu-ɖu dyììn ɖé à Bounɓo Jízɛ̀ Kɛ́ɖɛ́ì mú.
58Ɔ jèɛɛ, ní ɖɛ̀ɓɛ̀-ɖìǐ ɓě, ɓě mɛ nyànà dyi kóɖó-kóɖó. Ɓěǐn ɖá ɓɛ́ ɓě ké daí sɔ̀ìn. Ɓě mɛ nyu Bounɓoɔ̀ bìì kũ̀à pàɖǎ kánáá pū. Sepóɛɖé ɓě mɛ dyuòɛ̀ kà ɓɛ́ ɖɛ ɓě ɓɛ́ ɓě nyu Bounɓoɔ̀ bììɛɛ, ɓě se wa nyu pídyiɛ.
Currently Selected:
1 Kɔ̀ɖéíntĩ̀ɔ̀ 15: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
