Romános 16

Iji Páblo urusarane eruei yui ga chingo ore ujo Crísto angureto Febe aja rómagosode ore bajaque, enga chijócha ore ajei údi ujeta jé ca ore chuseque uaté jne iji dajade

1Yijorane uaque á, yipota ujetiga yingo yocujo Jesucrísto angureto Febe aja uaque, uje yoquijõra uaté ueradipise isocade. Jecucha ga uaté chisapise dejode iji dojode Jesús anguresõre ore uáguedie jogadi uté iji dedai Cencréa, ome dáringa Dupade irogue. 2Ga a Febe diji uaque jne, enga yajéode upúsu ujetiga amesecho uaté, uje Yocangarádejnai jé chojmára iji jnumi gu. Enga yocadi jé urásu uté ome yocujode Dupade anguresóño ore jnese jeta jé ca yujuséjo ore. Jecute átayoja uaté, ga asíñome cucha chonatígo ome uaté jnese. Jé tiógarapísa jetiga apéso cuchade udojo ome uaté gu uje e jiépisi uaté átapiode iji Dupade anguresórone ore ujade, ga átapiode uñai jé upúsu uyu to.

Páblo chiroque darasitigade aja dojode Jesucrísto anguresóño ore iji ore idai Róma uté ome darusarane udore

3Asíñome yirasitigade ome Priscíla, Aquíla ore, yijorane ore uje yijínango ñane ome yoquigaidode Jesucrísto iroquéo ica. 4Yacãre ore gai uje ore chãraque yucuecaringuei ome yumajosórone ore, enga jé chuságaja uje ore chajni dáringárique chuque ejode ome ore isocai uté ome uyu. Mu que gusu yu uje yacãre ore gai, mu purása quedéjnane iji ore uáguedie jnese uje Jesús cho da-iglésia iji ore, ga ore chacãre Priscíla, Aquíla ore gai to.

5Yirócapo yirasitigade aja Jesús anguresórone ore rĩ uje jecucha ore chamáta ñane ome dáringane Jesús iglésia iji Priscíla, Aquíla ore iguíjnai gatuaque ome dáguedie.

Ga yirasitigai gajnesṍri tupo yijnoránguipísi Epéneto rĩ, jeta angoño jne. Bajáguipísi tu uté uje chicha danguretigai aja Jesucrísto iji ore achamini Ásia uté.

6Asíñome yirasitigade ome María uaté to. Uacamóño uje uaté chejna daguesi ome dasagode uje pésu ome uaque.

7Asiñopome yirasitigade ome Andrónico, Junías ore rĩ. Que gusu uje yurasade u ore, mu ore cho dabaya yu to iji pujurúgayode ore jogadi ica. Ore pijóguipísiji Jesús irógode apóstol ore ujade, enga bajaque ore ome uyu uje ore chicha danguretigai aja Crísto uté nanique.

8Enga jé yiroque yisalúdode aja Ámplias uté to rĩ, yijõra yedójnari uté, uje Yocangarádejnai jé chojmára iji jnumi gu.

9Asíñome yirasitigade ome Urbáno, yocátajasṍri iji yocajnéone Crísto iroquéo to, jé upo yijnoránguipísi Estáquis uté rĩ.

10Angoño yisalúdode ome Apéles uté to. Crísto imeserãi u uté uje chise dajnéone petingaquéo udore uéchai.

Asíñome yirasitigade ome udore uje ore chácariji Aristóbulo uté iguíjnai rĩ.

11Asíñome yirasitigade ome yurásai Herodión to.

Ga asiñopome yisalúdode ome udore uje ore chácariji Narcíso iguíjnai rĩ, udore ore uje e ore chicha danguretigai aja Pangarádejnai uté.

12Yirócapo yisalúdode aja Triféna jé aja Trifósa rĩ, uje udire ore chisapise dejode ome dagaidode Yocangarádejnai Jesucrísto iroquéo.

Ga a jé chopome yijorámia, yujo Jesús angureto Pérsida uaté, jeta asíñome yirasitigade ome uaté to rĩ. Uje uaté chejnapise daguesi ome dagaidode Yocangarádejnai Jesucrísto iroquéo.

13Yiroque yisalúdode aja Rúfo to, jeta angoño jne. Uacamóño uje Yocangarádejnai Jesucrísto anguresõre ibijoi tu uté iji dojode Jesucrísto anguresóño ujade. Ga asiñopome yirasitigade ome uté datábia to rĩ, uje uaté chajire gadoi, ga jé chopísirase jetiga ité jé upúsu to.

14Asíñome yirasitigade ome udojo ore rĩ: Asíncrito u uñai, jé aja Flegonte, jé aja Hérmes, jé aja Patróbas, jé aja Hérmas, jé aja Jesús anguresórone jnese uje déji ore gari.

15Ga yirasitigade gajnesórone jé upo udojo ore rĩ, jeta angoño ore jne: Filólogo u uñai, jé aja Júlia, jé aja Neréo, jé aja uté nero uaté, jé aja Olímpas, jé aja Jesús anguresórone udore jnese uje déji ore gari to.

16Omitigai turásu ome Dupade anguresórone uaque jnese ujetiga asíñome uacarasitigade ome uñane, jeta pijoque uacajnoraquei ome ñane.

Udore ore uáguedie jnese iji de uje Crísto cho da-iglésia iji ore ga ore chiroque dasalúdode aja uaque.

Páblo chiroque daquĩraquéode aja dojode Jesús anguresõre ore nanique iji ore idai Róma uté ujetiga jé ca ore tangári pacadisõre tágode acajnaquéode, jé aja udore ore uje ore pota chãra ore ome danejequéode

17Yijóchapise uacajéode údi, yujode Jesús anguresóño uaque á, ujetiga ajusópise uaqueo ome udore ore uje ore pota chajuque uáguiji ñane ome dajnimingone pibotaquéo. Jé upo rĩ uje ore gaidi u ujetiga ore chijnime uáguiji cucha omone ome dacajnaqué tágode uje cãrápisa rome pacajnaquéode udore uje pacadique uágome ica. ¡Jé ca ajuécho uaquejode ome udore ore gotique! 18Adójnacho gu uje que ore doi Yocangarádejnai Crísto iroquéode udore, mu ore jnátupúsu dapotigué ayoréode adode ome raque. Jecute ore tagúome danejequéode jeta ore pésu dacajnaquéode unéningai ome dangarásorone ore. Enga ore gaidi tu jeta ore chãra udore ore áyipiedie uje ca urénga ore nunaji pacajnaqué uréone quigode.

19Jé ũré uje ujnomerãque uágome uacáringane angoninguite guesácho ome Crísto uté, jecute yinína yu ome uaque. Mu yajéode upúsu ujetiga áyuquetotinguerã́que uágome pate arégode úringane pipesucho; jé basa ga jé ca oyórase agúpuraipísode udore uje ore chajo raja pate gajnaréngone úringáringo pipesucho jnese.

20E idógosi, jõ, ujetiga pajesereringai gajnesṍri Dupade chuchiéjna Satanás uté gatoi ¡quéquese! jne iji uacajaidie údi.

Yicatecãraitigade qui jé u udé ome uaque ujetiga Yocangarádejnai Jesucrísto chatapísaja uaque jnese ome dacaniratiguédatéi uté. Amén.

Páblo chatata uje daríjogosórone chiroque darasitigade aja rómagosode udore to

21Timotéo, yijõrai uté uje jecucha yátago yógaja ñane ome yoquigaidode Jesucrísto iroquéo, pota jetiga yisíome uté irasitigade ome uaque. Que gusu uté, mu yurasade uñane chutṍri yu to jetiga yisíome ore irasitigade ome uaque, ga Lúcio, Jasón, Sosípater ore u.

22Tércio uyu uje jé yurúsãre Páblo uté áyipiedie quigode ome uaque iji de. Ga jé yiroque yisalúdode aja uaque to, uje Yocangarádejnai jé chojmára iji jnumi gu.

23Jé yupúsi Gáyo uté iguíjnai iji de, ga yupusiédi Gáyo uté pota ome Páblo uyu jeta yiroque uté isalúdode aja uaque. Uté jé ca chuseque yu, mu que gusu yu, mu uté átajaquéode jé chuságaja Jesús iglésia uyoque jnese iji de, uje juégame uyoque jetiga yamátago uyógaja ñane iji iguíjnai ome yocuáguedie gatuaque.

Jé upo Erásto uté to rĩ, ore iplátadie irodisṍri iji guidai tudé, uje uté pota ujetiga yatata uté irasitigade ome uaque. Ga jé chopome yocujoi Jesús anguresõre Cuárto rĩ, uje uté chiroque dasalúdode aja uaque to.

24Yocajéode u ujetiga Yocangarádejnai Jesucrísto chatapísaja uaque jnese ome dacaniratiguédatéi uté. Amén.

Dupade jé tiógarapísa dáringai pisígai iji deréjna pitade gatuaque

25¡Beyoi ga yisigopise Dupade gai ome uté úringai ingoningarãque! Jé uté tiógarapísa dajnéone yoquicotaquéo udojo ome re gu.

Adójnacho uje Dupade uté etotiguei cuse jeta pésu ga uajate uáguiji uacanguretigai gatuaque. Enga uacasocai uté jé chajnapise pujnomé ueradi quigode ome Crísto uje yatatame uaque. Jé Dupade áyipie iyajmenie u dáyipiedie udire ome Crísto uté, mu cho cucha pipoguiédedie, uje que chingongarája erámi míraque. 26Mu e Dupade pésu ga cuchade udore choqui guesi. Enga yatatagode jé u pujnomé ueradi uté quigode uje déji Dupade uruode júsorone proféta uñane urusãra cásodicáite udore. Dupa Eyúgojmai uté iroquédatéi tu gu ujetiga pacadique erámi unirisórone jnese ome Crísto ujnomei uté iji punirone jnese. Enga Dupade gaidi tu gu ujetiga ore changureta Jesucrísto uté ome raque jnese ome dáringáringo angoninguite guesácho.

27¡Yajéode upúsu ujetiga pisígai Dupa Ugurui uté ome ingoningájnai iji deréjna pitade jnese, enga gose Yocangarádejnai Jesucrísto adode ome uyoque! ¡Dupade uté jé upúsu uje payuquetotiguei chejna raja uté, jõ!

Yicatecãraitigade qui jé u uté. Amén.

Currently Selected:

Romános 16: Ayore

Highlight

Copy

Compare