1 Coríntios 1

Apóstol Páblo uté chiroque darasitigade aja dojode Dupade anguresóño iji ore idai Corínto uté

Yijorane uaque á,

1Páblo u yu uje yurúsãre yicárta udé ome uaque. Ga yujnusiname uaque uje Dupade jé upúsu uje pésu dajéode ome yajnepídi apóstol udé nanique; enga jé u uje pijnangaite yu ome yúringai Crísto Jesús utocaite jeta yiji uté iroquéode.

Enga yocujoi Dupade anguresõre Sóstenes déji yari iji ne uje yurúsãre udojo.

2Ga yurusarane gajnengórone u uaque uje Dupade e cho da-iglésia iji uaque iji uaquedai Corínto uté. Yojningane u uaque uje Dupade nejéna uágaja uacáringane uté urása ga pésu uacáringane ichapíso uje cháta uágaja Crísto Jesús uté. ¡Enga e uacajnengore ugurui tu Dupade uté!

Mu que gusu coríntogosode uaque uje Dupade cãraque uágome uacáringane uté urása. E mu udore ore jnese iji erámi údode jnese uje ore chutṍri Yocangarádejnai Jesucrísto ome raque ujetiga chiqueta ore to, ore gajnengore ugurui jé u Dupade uté to. Uje que gusu yoque uje yoco yocangarádejnai iji Jesucrísto arĩa, mu ore cho dangarádejnai iji uté to.

3¡Ga yipésupú ga Yocai Dupade, Yocangarádejnai Jesucrísto ore juéga dacaniratiguéode ome uaque gatuaque jne, jõ! ¡Enga yipotigádi tupo rĩ ujetiga oyo uacajnéngu ore guerani pajesereringa ome uaque to!

Páblo chacãre Dupade gai, uje jnusina Dupade icaniratiguéode ome coríntogosode ore nanique

4Jé ũré uje jecucha yacãre Dupade gai ome uaque gatuaque. Chamáñaje e uacagúsoji uacáringane Crísto Jesús gajnecho enga jé u uje uacoyo uacajnéngu Dupade uté icaniratiguéode. 5Uje uté cháta uágaja Crísto enga tẽrája uágome deranone pirajatíga ponáyo jnese enga pésu jeta uté áyipiedie, isocade ore choqui guesi ome uaque. ¡Jecute Dupade uté gueranone cucha oreránguejna udore pijóguipísiji uacarajatigade, uacaruode ore jnese!

6Ome Dupade isocai uté ga obiréjna ome uaque uje jé ũrepise yocojñane ome Crísto ipesudode cucha. Chamáñaje tocade gu ome uaque ga uacamóñopise to. 7Jecute uacajnecho Dupade gueranone cucha jnese enga que Dupade guẽratique cucha chona uaque gotique iji ne jnumi, uje uacajnátuyo Yocangarádejnai Jesucrísto úringai ingoningarãque yui ujetiga di. 8Enga Jesucrísto jé u uje a chatapísaja uaque jne jeta apúyoja uacanguretigai, jé aja erámone unojo eruei. Ome isocai uté ga, a ca piyaque uacayoguérique jne iji diri tuté ujetiga Yocangarádejnai diapo rĩ. 9Uacarajáyo uje Dupade upúsu uje pijnangaite uaque ujetiga atojmárañoji Dabi uté, uje Yocangarádejnai Jesucrísto u. Jecute que toc ujetiga uruode uñeque toja, uje ũrepise Dupade uté gu.

Páblo chaquĩ́ra coríntogosode ome ore isocai uté uje ore chajuque ñane ajéode ome darotade pacadisóño ore

10Yujode Dupade anguresõre uaque á, ome yúringai Jesucrísto utocaite ga yijócha uacajéode údi ujetiga jé ca abotácho ñane. Mu apajnotáyoja ome ñane enga ca ajuécho jeta cuchárique chajuque uacajéode ome ñane. Apéso ga uacáyipie qui, uacajegaidi cucha chojmarápisiji jnumi gatuaque. 11Yósi tome yi-hermánone uaque gu uje Cloé jogasúode uñane e chingopísa yu uje pibotaquéode déji uágome ñane uje uacajucho ñane ajéode iji jnumi gu. 12Enga yuruode qui tu uje uacangaráño uacangaránone ome ñane. Uje uacuñane ore chojninga: "Yangaráni tu Páblo." Ga uñane ore chojninga: "Yangaráni tu Apólos." Ga uñane ore chojninga: "Yangaráni tu Pédro." Ga uñane ore chojninga: "Yangaráni tu Jesucrísto."

13¡Chimo jóroque re! Que toc ujetiga yajujo Crísto iji jnumi enga yajuguínango yocujode ayoréo arĩa. ¿Ama Páblo uyu ica ya, jeta yitoji curesei gai ome uaque, uje uacoyo uacangaráni iji yu a? ¿Jeoga ore tagúome yi ica ya, uje ore chaca uaquedodie iji yodi a? ¡Úngare, uacarajáyo uje que quigode u udore gotique!

14-15Yacãre Dupade gai uje cáma yaca uacuñeque edodie iji yodi to ica. Mu gusu Críspo, Gáyo ore uje yaca ore edodie iji yodi ica. Jecute ome yisocai uté, ga que toque ujetiga uacuñeque chojningárasa: "Páblo tagúome dei uje chaca yedodie iji yodi nanique, enga jé u uje yo yangaráni iji uté."

16(Jec ũré, quene yujnusina uje yaca Estéfanas jogasui ore edodie iji yodi to ica, mu e que yujnusina go ujetiga yacápo uñeque edodie iji yotique rĩ.)

17Chamáñaje Crísto que chiroque yu aja bautísmo ujetiga yaca ayoréode edodie iji yodi ome uté. Mu iroquédatéi u ome yu ujetiga yacate ore ome Pujnomé Ueradi quigode uje garani tu Dupade. Jecute yujusípise yacajnaquéode udore guio uje yi yajnéone Crísto iroquéo udore, enga que yagúome erámi unirisórone ore ayuquetotiguei uté gotique. Yigaidi tu gu ujetiga ore tija Crísto uté isocai uje toji curesei gai ome ore, enga jé ca ore chorase irajatáguejna iji uyu ome yuruode.

Dupade ayuquetotiguei pi u Crísto, enga Dupade ujopié pi jé upo Crísto rĩ

18Ga a jé yo uacaquigome yuruode ucode jne iji de: Jé ũré uje Crísto ujnomei uje toji curesei gai ga cho pitáyipietigade ome ayoré bijnángone ore uje ore quique obiréjnai tu Dupade ujuyaquei uté. Jé basa ga ome ore uje ore changureta Pujnomé Ueradi quigode, ga ore qui u dáringane piquetaque yui, uje yojningane u uyoque. Ga yirajágo uje pacajnaquéode udore garani u Dupade úringai ujopíerãque. 19Ga cuchade udojo quigode jé cho Dupade uruode uje purusãracho nanique,#1:19 Dupade uruode udore purusãracho iji Isaías 29:14. uje chósi te:

–Ujetiga irajatáguejna gosi iji erámi tuné, mu a yinoningase uté irajatígadatéi jne. Jé basa ga a yicha áyipierane ore áyipiedie aja ti yui jne.–

20¿Jecute Dupade áyipie cho ringome ayoré irajatáguejnárique iji erámi tudé a, jeoga pacadisónique uje dopísi estúdio ome aode, jeoga gosi uje chirajapise dasocáringome pibotaquéode ome dojode ayoréo ome cucha jnutiminórone a? ¿Ama ore chise Dupade ome dasocade udore uñeque a? Úngare. Que cuchárique tṍraji ore isocade udore go. Chamáñaje Dupade e chinoningase erámi unirisórone irajatígadatéode enga nóña ga cucha bisidécho. 21Jé ũré gu uje payuquetotiguei chejna raja Dupade, ga gusu uté uje chiraja dasocade ome cuchade jnese. Jecute que juéga ujetiga erámone jogosórone ore chise Dupade ome dáringárique irajataque cuchape. Mu iquetade a u ore jne uje ore changureta pacajnaquéode ome Pujnomé Ueradi quigode, uje erámi unirisórone ore cho pitáyipietiga iji udore múñi.

22Adójnacho uje jiei judíode uje ore chajo raja ujetiga yetingaco yógome yoquipesutique cucha ujopíerãque jeta tṍraji gaté, uje ore chotigase yocacajnaquéode úringane ũréo gu. Jé basa ga gréciagosode chedu payuquetotigué jnutiminórone quigode ga ore ucuei tupúsu ujetiga yacaco ore ome udore. 23Mu yedugo uje yatatago Crísto ujnomei ome ore uje pajópi uté aja curesei gai nanique. Jé ũré uje judíode chejnáreque yocacajnaquéode quigode uje que ore chisípise Crísto itoringai unétique uje chuque iji curesei gu. Ga jé cho purása quedéjnane to uje ore chetaque yocacajnaquéode udore ome Crísto itoringai, jecute ore cho pitáyipietiga iji uté. 24Mu ome Dupade ibididigode jnese, ujetiga judíode u, jeoga purása quedéjnane u, que ore cho cucha bisidéguiji pacajnaquéode udore ome Crísto gotique. Chamáñaje choqui guesi ome udore ore uje Dupade ujopié pi u Crísto, enga Dupade ayuquetotiguei pi jé upo Crísto rĩ. 25Uje erámi unirisórone ore cho pitáyipietiga iji Dupade isocade udore marínga, Dupade cutejmai irajatígajna suépise ore irajatigade gáyode. Enga chiese serẽrachuque Dupade ome ore ajéode, mu Dupade etotiguejnai suépise erámi unirisórone ore etotiguéode gáyode jnese.

26Yijorane uaque á, ajnusináñopísa uacasocade uje Dupade tibidi uáguiji taningai: Garósi uaque uje erámi unirisórone ore cho ayoré irajatáguiji uaque iji denominone, ¿jec ũré? Ga garósiapo uaque to rĩ uje erámi unirisórone ore cho ayoré ibijóguiji uaque. Enga que jiei uaque gotique to uje uacoyo uacãrapi iji peduguéjna cuchábode uñeque. 27Chamáñaje Dupade ajéode u gu nanique ujetiga cho dajegaidíji ore uje que urénga ore irajatigárique cuse; enga gaidi u ujetiga chinguíra pajegátigai aja udore ore uje ore cho irajatáguejna iji raque. Jé chopo rĩ uje Dupade ajegaite ayoré gajnaréngone ore iji dojode erámi unirísoño ore ujade. Enga gaidi upo rĩ ujetiga chinguíra pajegátigai aja ore to uje ore cho ayoredatéo iji raque iji erámi tudé.

28-29Jé ũrepise uje Dupade ajegaidode u udore uje que ore dépisiji cuchárique, enga ore ujode ayoréo dojnóngaja ore. Uje erámi unirisórone cho cucha bisidéguiji ore marínga, Dupade ajegaite ore; jecute Dupade chicha ayoré ijoyatade udore aja ti yui, ga pésu jetiga ca cuchárique tõrapísiji ore áyuquetoringane go. ¡Enga gaidi tu ujetiga jé ca ayorérique dorási ga chisi dabánique iji Dupade iquei, uje que yocuñeque tiógara gu!

30E obiréjna uje gusúpusu Dupade uje pésu ga Crísto Jesús, uacatojmáraño iji jnumi. Ome isocai uté uje cháta yógaja Crísto, enga qui jé u to uje yoco yocajnéngu uté ayuquetotiguei to uje uté gueranome Crísto uté. Enga quigode jé u uje e yico yocúringane ayoré ujñapetácho iji Dupade iquei, enga gose Jesucrísto uté adode ome yoque; jé u to uje Dupade e cãraque yógome yocúringane uté urása; jé upo rĩ uje e piraméo uyógome yocúringane máracho jnese. 31Jecute que toc ujetiga yisígo yoquibánique ome cuchade udore. Enga yoquijmapié a jé chorase Dupade uruode atatasórone uñai urusãra cásodicáite quigode, uje chósi te:

"Ujetiga gosi pota chicota re ome cuchárique, mu gajnei tu ujetiga chedu Yocangarádejnai ome úringai picotaque." #1:31 Versículo udé garani tu Jeremías 9:24.

Currently Selected:

1 Coríntios 1: Ayore

Highlight

Copy

Compare