Romános 15

Jé ca yejnangopise yocáyipiedie aja yoque ome cuchade, mu yocajnei tu ujetiga yajicopise yocujode ayoré yui

1Jé ũrepise uje Jesús anguresõre uajádode uyoque iji yocanguretigai, yocajnepídi tu jeta yátagoja udore ore uje cáma uajadipise ore iji danguretigai. Enga a jé ca yipécorásu yocajegaitígo cucha jeta yoquirasique yógome cuchade udore. 2Mu ayoré chojmara, chojmarane iji yoque yicoi ga yipécorásu yocujórique Jesús anguresõre irasitigárique. Enga qui tu cuchade uje pésurásu uté omitigárique, jeta uté quérã iji Dupade adode gaté ome yoquisocade udore.

3Que gusu yógome pisocai uté jeta yipéco cuchade udojo. E mu jé chuságaja Crísto to nanique uje que ucueguipísi tu darasigode cucha jeta chirase re ome, mu áyipie chejna raja dagaidi Dupade iroquéo. Enga adi uté choqui guesi iji Dupade uruode uñane uje purusãracho icaite, uje chojninga:

"Yo yajnéngu bajnéone udore yujo ayoré ore idojnóngamátigade ome ua." #15:3 Eduguéjna Cuchábi David urusarane udojo déji Sálmo 69:9, ga ore chichaga raja Dupade Júdebei Piquetangore Crísto isocai uté.

4Adójnachopísa yurúiso udore, uje cuchade jnese uje purusãracho iji Dupade uruode icaite qui cuse ome uyoque, uje Dupade gaidi u ujetiga pacadique uyógome udore quigode. Enga jé u uje purusarane udore nejéru yocúdode uje yugúcoji cuchade jmainie, ga cho yoquiquique jetiga yidotágo yógome yocajnéone cucha dacate. Enga a chiborátarásaja ujetiga jé ca yiyágo yocangoroné ome Dupade ojningane cucha yúode, mu a yanguretágorase yui gaté.

5Uacamóño uje Dupade jé upúsu uje gueranome uyoque ujetiga yidotágo yógaja ome cuchade, enga uté jé upo rĩ uje nejé yocúdode gatuaque. ¡Jecute yipésupú ga Dupade uté juéga ga pajesereringai dépisiji uágome ñane iji uacacuecaringuei udé, enga oyopísirase Jesucrísto jmapié uaté, jõ! 6Enga uacagaidi tupúsurásu ujetiga uacáyipie, uacabusugúi ore chojmára iji jnumi ome uacacotaquéode ome Dupade, Yocangarádejnai Jesucrísto Dai uté.

7Jecute ujetiga uajate uaque gosi iji danguretigai, jeoga cáma uajate uaque gosi iji danguretigai, mu beyórasi ga amesecho ñane jnese. Adi jé u Crísto uje e cho dameseránguiji uaque nanique. Ujetiga uacasocai jé u uté, enga qui a jé upúsu jne ujetiga pisígai Dupade ome úringai ingoningarãque.

Purása quedéjnane, judíode ore gaidi turásu Dupade úringárique pisígai jnese

8Yipota jetiga yujnusiname uaque Crísto isocai uté uje cho judíode ore iróguiji re nanique, enga gaidi tu ujetiga ore pañapísiji Dupade úringai ũré uté. Uje Crísto di, enga Dupade ichagájade darúo ome judíode yocáqui ujnomerane e tocade ome dáringane ũréo.#15:8 Judíode ore dáqui ujnomerane u Abraham, Isaac, Jacob ore nanique. Enga Dupade chichaga daru ueradode aja ore yui ujetiga Júdebei Piquetangore chise erámi jne ome ore úringane piquetacho yui.

9Mu que gusu ome judíode nanique, mu Crísto di to ujetiga purása quedéjnane ore chisírase Dupade gai ome osongaquédatéi uje chingongarája ore. Enga jé cho purusarane udojo iji Dupade uru cásodicáite, uje chojninga:

"Jecute a yicota ua iji purása quedéjnane udore ore ujade jne. A yicha bei ueradi aja yiradedie achachagúgode ome yicotaquéode ome ua jne." #15:9 Eduguéjna Cuchábi David urusãracho udojo iji Sálmo 18:49 uje qui tu Pangarádejnai gajnéone picotaquéo iji purása quedéjnane ore ujade.

10Enga iji jogate uñai, ga chojninga:

"Purása quedéjnane uaque á, ¡Beyoi ga átayo uágaja Dupade urasade udore ome uacaninaquéode to!" #15:10 Versículo udé quigode tṍraji Deuteronómio 32:43.

11Jé iji jogate uñai, ga Dupade uruode quisórone jé upo purása quedéjnane rĩ, uje chósi te:

"¡Acotáyo Pangarádejnai, purása quedéjnane uaque jnese á! ¡Punirone unirisórone uaque, uacasocai urásu jetiga ajñecachója uté jnese ome uacacotaquéode!" #15:11 Páblo jnusina Sálmo 117:1 quigode ome ore iji versículo udé.

12Ga proféta Isaías casicaite urusarane dépoji rĩ, uje chojninga:

"Adi u uje tapósi apadi sué, ga isocai jé u jne ujetiga Isaí uté ape disi ejórique di. Enga a uté upúsu jne ujetiga chácariji dáringai purása quedéjnane ore eduguéjna. Enga erámi unirisórone a ore chicha danguretigai aja uté ome re jne.#15:12 Isaías urusarane Dupade urúo udojo jogadi tu Isaías 11:10. (Isaí upúsu Eduguéjna Cuchábi David dai uté.) Iji versículo udé ga Isaías ojningai tupúsu Dupade Júdebei Piquetangore Crísto uté, uje David ájnape disi ejoi tu.

13Uacamóño uje panguretigai guẽrasṍri Dupade uté u uje pésu ga uacanguretáyo ojningane cucha yúode. ¡Ga yipésupú ga uté pésu ga irágupúsu uacajéode ome pininaquei, pajesereringai ore jnese uje uacanguretáyo uté! Enga qui jé u ujetiga uacaríjogonóri Espíritu Sánto chisíome detotiguei ome uaque ujetiga uacanguretigade udore quérã gaté ome Dupade ojningane cucha udore yúode gatuaque.

Páblo chatata dagaidi uté ome rómagosode uje churúsãre darusarane ome ore

14Yujode Jesús anguresõre uaque á, ome yu ga e pijoguipise uje ueradipise uacasocade ome ñane. Pijoque to uje que pirajatigárique chona uaque, ga e dimane uágome pacaditigade yui ujetiga oyo ñane quique.

15E mu uacamóño uje que yagutu yu ome yuruode uñane iji yurusarane udojo gu uje yáyipie déji cuchade uñane uje yipota jeta yujnusiname uaque. Yajnepídi jé u gu ome Dupade uje e juegabate yisai udé ome yu ome dacaniratiguei uté. 16Enga chutṍri yu ome yúringai Jesucrísto iroque jeta yatata pujnomé ueradi uje garani jé u uté ome purása quedéjnane ore. Ga yajnui tu sacerdote uje tẽra darasade ore guẽrapáidode cucha ome Dupade uté; e mu cho jetiga yẽrapáidi cucha u purása quedéjnane ore jnese uje e ore changureta pujnomé ueradi uté ome yacajnaquéode udore. Uje yẽra ore aja Dupade enga yigaidi tu jeta uté chimesẽripise udore, ome Dupade Ujopié Espíritu Sánto isocai uté uje e chopise Dupade gajnenguíji ore ome ore úringane pinoningañaque.

17-18Jecute yirasiguipise yu, ga jé tiógara ujetiga quĩrique yisi yibai ome yajnéone Dupade iroquéo udojo. Mu jé ũré uje Yajnesṍri Jesucrísto u uje chatapísaja yu ome yisai udé, enga que garani tu uyu gotique. Jecute a yedu yatata Crísto uté jmapiedie jne uje tagúome yu ome purása quedéjnane udore ore úringane angoninguite guesácho. Enga que gusu uje ore tangári yuruode ome pujnomé ueradi uté quigode, mu ore chajire yadode uje yugúsi ore ujade to. Enga yisocade udore iborátajai tu uje ore changureta Dupade ome re. 19Mu que gusu yisocade udore, mu ore pañaji to yipesudode cucha pitijabátedatéo, cucha pibojmadatéo udore uje yipésu ome Dupade Ujopié Espíritu Sánto etotiguejnai uté. Jé yisoca uté iji yiriguítigade jnese uje yṍraji Jerusalén aja punirone uñane jnese, enga jé yuságaja pachamini uté uje i tu Ilírico iji eruei. Enga jé u uje e yimate yajnéone Dupade iroquéo iji punirone udojo aja guesi ome pujnomé ueradi uté uje júdi tu Crísto.

20Jé iji taningai uje yatata pujnomé ueradi ome ore, mu jecucha yajéode u jeta yicáji punire agúpurayóde ore. Yigaidi tu gu jeta yingara yiquigode ome pidáyode udore uje e pacadique aro ore; jé basa ga yedu udore uje cáma ore chududipise Crísto ujnomérique. Que yipota gu ujetiga yo guiguíjnai ipesusónique uje doi uñeque iguíjnai písoi udiminore gatei jogadi ga pésu daguíjnai aja gaté iji uté.

Jecute yisocai jé u to iji yigaidode Dupade iroquéo, uje que yipota jeta yipésu uñeque gajnéone Dupade iroquéo aja gaté. 21Enga yáyipie quigode udojo jé cunguésõri purusarane udore iji Dupade uruode uje chojninga:

"Udore ore uje cáma uñeque chatata uté ujnomei ome ore nanique, mu a ore chimo jne.

Udore uje que ore chududipise uté ujnomérique nanique marínga, a ore chudute uté ujnomei jne, ga a ore chiraja quigode." #15:21 Páblo chatata versículo udé uje garani u Isaías urusarane iji Isaías 52:15, enga ojningai tu uje a ore chudute Dupade Júdebei Piquetangore Crísto ujnomei jne.

Páblo chatata ome rómagosode uje e pésu dáyipie jetiga doi paséo iji ore idai Róma jeta taquiri dojode Dupade anguresõre ore iji uté

22Yajéode u jórogu jeta yise uaque gatuaque, mu yisagode cucha pisaque iji punire agúpurayóde udore jecucha chigaru yu, jecute que toque ujetiga yimate yáyipiedie udire aja guesi. 23-24Mu iji de, ga quene piotiguei cuse ome yu jetiga yibágabi uaque, uje e que pidai amínique déji ome yu jeta yiji pujnomé ueradi údi aja ore, uje e yimate yisagode udore gu iji punirone udojo.

Jé yajegaite aro nanique, jé iji siqueredie uñanie, jeta yibágabi uaque. Adójnacho uje yiqui tu ore uniri Espáña jne iji siñeque, mu yangureta yui to ujetiga yibasabíji uáguiji uaquedai uté iji dajeque pajei ujetiga yi-viaje uté tocade. ¡Yijnátupúsu uaquei ujetiga yaquiri uaque ga yisipísome yirasitigade ome uaque, ga yachietágoji ñane! Iji udojo quigade ga, yangureta uágome to ujetiga átayoja yu aja yiriguítigai eruei iji Espáña.

25Mu uje cáma yicáji Espáña, mu yiquítequiguíji Jerusalén bajaque jeta yiji pajóningane údi aja Dupade anguresórone judío ore iji Jerusalén uté. 26Uje ueradéjnapise gu ome Dupade anguresórone ore áyipiedie iji pachaminone Macedónia, Acáya ore ujetiga ore chamáta deranenie daplátai aja ñane, ga ore chirógaja dojode Dupade anguresóño iji Jerusalén uje ore jmatapísome cuchade. 27Jé ũrepise uje purása quedéjnane udore iji Macedónia, Acáya ore ajéode upúsu ujetiga ore chosõre udore ore. Mu ore gajnepídi jé upo to rĩ ujetiga ore chisi ore arĩa. Cho jetiga ore ijnose carutique déji Dupade anguresórone ore gari iji Jerusalén, uje ore chagutíyame ore bajaque gu dadudigode Crísto ujnomei uté. Jecute jé tiógarapísa ujetiga ore chajuguína dagúchade cucha pagutíyabácho aja Dupade anguresórone iji judíode ore gari to, erámi jogonóño.

28Jecute ujetiga e yejna yisai udé cucha pisaque aja guesi ujeta yimanipise yutocaisórone ore imátajadie daplátai aja ore iji Jerusalén, enga a quene yibasíji uacajogadi aja yajesui ome yiqui Espáña yui jne. 29Enga yirajapise iji yáyipie ujetiga yaquiri uaque, ga Crísto a pésu cutejmai yocajéchietaringuéo ome dasoca ueradode ome yoque jne.

30Yijócha uacajéode údi, yujode Jesús anguresõre uaque á, jeta átayo picatecãraitigade aja yu. Yujnusinai tu gu uje Yocangarádejnai u Jesucrísto jnese, ga pijnoraquei uje garani u Dupade Ujopié Espíritu Sánto déji uyoque jnese, jecute yanguretágo uágome to jetiga ajóchayo Dupade ajei údi ome yu. 31Atáyoi uté ome yu ujetiga uté chãraque yu ome danguresórojmane ore josipiedie ome yu iji ore uniri Judéa uté. Uacacatecãraitigade qui jé urásu to ujetiga guesája yui ome yu jeta yisípise yocujode Dupade anguresóño iji Jerusalén ome pajóningane udore, ga ore chimesẽripise yujnunguenie purása quedéjnane oriplátai udire. 32Ujetiga cucha dacadode udore tocade ga, ujetiga Dupade ajéo, enga a yibágui uaque jne. Ga a jogadi u jne ujetiga yinínapúsu yu, ga a yujnucoi yógome ñane iji Dupade adode uje yo yujñare iji uacari jne.

33¡Yipésupú ga Pajesereringai Guẽrasṍri Dupade dépisiji uacari, jõ á! Amén.

Currently Selected:

Romános 15: Ayore

Highlight

Copy

Compare