Sálmos 91
91
1Gosi uje cho dayaridíji Pangarádejna Gatajnoquei Achamisõre gãrésõre jogadi uté a jé pusi Dupa Ujopíerã́quedatéi uté uburúdi jne.
2A yósi tome Pangarádejnai jne:
–"Uté u Yãrésõri, jé aja pinama uaté uje chaparu yibai; ga Yangureni Dupa upo uté rĩ, uje yicha yanguretigai aja uté.–
3Jé ũrepise uje a uté chiqueta ua ome bajnenie pujuya pipoguiédei udire uje bajnapáisõri chicháji baquei, jé aja dequejnaréquedaté pequesarãsórone.
4Chamáñaje uté a chaco babai ome daramanie jne, ga a ese báringárique pãreque iji uté ujnóngone uburúdi. A uté úringai ũré tu jne ujetiga cho paróbedie gajnei guebeque ome ua jeta chaparu babai.
5A jé ca atodo cucha dacate noñatígo iji dejai jne, jé aja bamajosórone ore ichogaranenie docojoi iji diri;
6Jeoga dequejnareque chagúode u uje diguiji ijnangunu uéguei ajéode, jeoga cucha chungóri uje chejna ore iji guedé gatócoro uté, mu a jé ca atodo jne.
7Uje a pejnaque ayoréode iji barosadi jne uje ore batigai chise mil, jé aja iji bãrachua qui ga a pejnaque ayoréode uñane iji uté jne ga ore batigai chise 10 mil marínga, a jé ca ujápisaja ua go.
8Mu ome ua ga gusu a ajire udore ore aja quigode bisideque jne ome bedodie, enga apáñaji jne jeta ate gajnaréngone udore ore chise dasijnaringuéone udore oré ome raque.
9Uje e bo bajogadíji Dupade Gatajnoquei Achamisõre uté gãrétigai; uje Pangarádejna Eyúgojmai u, ga Yãrésõri tupo rĩ.–
10Jecute a jé ca cuchárique chósi tiji ua jne. Ga a jé ca cucha chungónique cunguésõri baguíjna cárpai uté to.
11Chamáñaje a uté chiroque darótigo gaté unirísoño ore aja ua jne gu jetiga ore chirote bejode aja bajesúrigo jnese.
12A udore ore chãrai ua iji gaté ome dajmanáyone jne, jeta jé ca anguíra barídai uté aja cucarané uñáraque jne.
13A achíe caraté uaté iji jnumi jne, jé aja uga chagúi uté. Caraté ucatogue uaté jé aja arócojna quedéjnai uté, ga a achiéjna udore iji jnumone jne.
14Pangarádejnai chojninga:
–Uje uté chicha dajnoraquei aja yu ga, a yirame uté jne. A yicha uté aja jogadi uje idájai jnumi ome dáringárique pãreque. U gu uje uté chiraja yi ueradi ome re gu.
15A uté tibidi yu, ga a yichajnai uté jne; yugúsi uté gari iji gajnenie pujurei jmainie. A yijnime uté iji udore, ga a yijosi uté iji gaté jne.
16A yipésu ujetiga uté ucuecaringuei umare jne, ga nunaji gajnenie siquerei udire. Enga a yingongara yúringai Piquetasõre aja uté jne.–
Currently Selected:
Sálmos 91: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
