Sálmos 92
92
Sálmo u, piradé ome dire puyai Sábado.
1Cucha ueradi tupúsu ujetiga yacãco Pangarádejnai uté gai jé aja ujetiga yiraco yoquicotaqué gajnéringui yoquiradei ome bei ueradi uté, Pangarádejná, Gatajnoquei Achamisõre á.
2Uerate jeta yocujúdi u bajnoraquédatéi iji durasedie, jé aja basoca uréone udore iji dejade.
3Uerate to uje yujégo yoquigode jocarãtácho udore uje carubode 10 déji, jé aja uñai uje i tu saltério, jé aja árpa, uje jocarãi uerate uje yijocáco udore.
4Chamáñaje bapésu yirasitigade ome bapesudode cucha udore, Pangarádejná. A yijñiecare ome yajéchietaquéode jne, ga gose bamaningone cucha udore uje bapésu ome bajmainie.
5¡Urénga, cuchadaté bamaningone udore cucha, Pangarádejná, ga báyipiedie idájapísiji guesi ome dáringanie cuchadaté!
6Mu gatodepéode que ore irajatigárique cuse; ga táyipiegode que ore chiraja cuchade quigode.
7Uje pisijnaringuéone ipesusórone udore ore cho ugarabia uje sué, enga pate gajnaréngone ipesusórone udore ore jnese ujnienie cuse, cuse gatuaque ome dáringanie dipesei, mu ore quique obiréjnai tu dáringáringo pejnaque iji deréjnane jnese gatuaque.
8Mu ome ua, Pangarádejná, bagúsi báringai pijosique iji gaté iji deréjna pitade jnese gatuaque.
9Uje cajirape to betesórone, Pangarádejná; cajirape to bamajosórone ore, uje a ore chise dáringáringo pejnacho jne. Uje pisijnaringuéone ipesusórone udore ore jnese a chisite rágaja quedéjnane jne.
10Mu e bajosi yetotiguei iji gaté, ga jé chopise tóro aseque ubuñurãi uté etotiguejnai. Ga aseque ichai uté ga e pojnéngaja yibai.
11Ga yedodie nínapúsu re uje pañaji yetesórone udore úringane pejnacho. Ga yangoninguinone chududipise yumajósõre sijnángone ujnomei uje udore ore chisingare re ome yu ica.
12Ate arégode a ore cho ijnane ome dáringane pojnácho, enga a ore quérã jne, ga ore cho pore yoríco cédro uaté iji uguíjnamui uje i tu Líbano uté.
13Uje pacaque ore iji Pangarádejnai uté iguíjna cuchábi uté, ga a ore ujnienie cuse, cuse gatuaque iji Yocudupade iguíjna cuchábi dosadode.
14A ore chise dáringáringo choquíjna marínga, a jecucha ore adie cuse gatuaque jne, ga a ore cho pore ijõre jne uje eteque surujnai.
15Ga ore júdi tu uje ũrei tupúsu Pangarádejnai, uje Yãreto cucarané tu, enga que pisijnaringué unátaque cunguésõri uté.
Currently Selected:
Sálmos 92: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
