Sálmos 79
79
Asaf ipesudé Sálmo udaque.
1Urénga, Dupade á, purása quedéjnane udore ore chacája bajnepídi jnupe uté. Ga udore ore pésu baguíjna puyai uté úringai noñaque. Ga ore chajnangarase Jerusalén uté ga urui jnumone.
2Ore noñome baroque togode ajnoquéode iji te ome chugúpẽre chagúode iji gaté jeta ore cho daboti cucha iji ore; ga udore ore guẽrate bangurenone udore arione ome cuchiso chagúode iji erámi jeta ore tagu ore arione.
3Ga ore chojne ome diquiyojnanie iji Jerusalén údode jnese, ga chorase jeta ore ojnei tu yodi uje chayo iji jnumone, enga que uñeque déji jeta chijóchame togode udore ore.
4Ga yocajnéone u yoquejominórone yocujo ayoré ore ichietabáitigade. Yocujode ayoréo iji yoquirosadode ore dojnóngaja yoque enga ore cana yoquibáyode.
5Urénga, Pangarádejná, ¿díningo cho rique iji yui ujetiga aya bájningai ome yoque? ¿Ga báringai ocáca uje cho pioque ditaguérique, jé ca chise deruénique jne a?
6Ojne bájningamíe pachaminone udore gai uje que ore chiraja ua, jé aja peduguéjnane gajnepídode puníño uje que ore chutṍri bei ueradi ome re.
7Chamáñaje ore u uje ore chejna Jacob urasade ore, enga ore chajnangarase uté gajnei jnupe aja dejode.
8Dupade á, jé ca o yoquiba iji yocai casodica ore isijnaringuéone udore. Berási ga bosongaquéode udore ore jĩraque chajningare yoquiquei, uje cucha dacadode nápusu yógaja jnumi.
9Urénga, yocúringai piquetaque gajnesṍri Dupá, átaja uyoque jeta bei ueradi uté úringai ingoningarãque pijoque; ga arame yoque ome yocumajosórone ore, ga ãro yoquisijnaringuéone udore ore gu bei ueradi uté.
10¿Gotique gu urásu? ujetiga punirone chojningárasa:
–¿Ore angureni Dupa gotique, déji rique a?–
Be ga o bajnutabádu baro casodica ore iyo docojnéone, ga apésu jeta pijóguiji purása quedéjnane udore ore ujade, jé iji yoquedominone.
11Ajuéga jeta pujurúgaibéode udore ore ujnacade udore chise baquei; ome bajmanecai uté cutejmai etotiguejna, ga ajusípise pujuyade ore guio uje ore qui tu pitoringai.
12Urénga, Pangarádejná, be ga o bajnutabádu ua ome purása quedéjnane udore iji yocuniri ejode ore idojnóngamátigade ome ua, ga atire ore gajnéone pidojnóngamátiga ore gai, mu õre ga gare iji ti ore gajnéone pidojnóngamátiga udore, uje ore dojnóngaja ua gu.
13Ga barasade uyoque, uje bo bachidedie áyasai iji yoque ga yugúcoi bajnei garai, ga a yacãco babai iji deréjna pitade gatuaque jne. A jecucha yatatago bajnéone yoquicotaquéo ome ua gatuaque jne ga a jé chuságaja pape disi ejórigo ore jnese.
Currently Selected:
Sálmos 79: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
