Sálmos 78
78
Piradé udaque ipesusṍri i tu Asaf, jeta pujnusinamane.
1Urénga, yurasade uaque á, angáchopísabi yacajnaquéode udojo ome uaque. Achayo uacangoninguinone aja yuruode udojo yui uje tṍraji yibijnani.
2A yuchẽre yibijnani gai jeta yatata yacãrájaringo cucha provérbios ome uaque, ga a yedogode u cucha pimojmane jne uje ibiracho quigode udore, uje jé jogate aro erámi nanique.
3Ga u cuchade uje yudúco enga yirajágo udore to, uje yocai casodica ore chatata udore ome yoque.
4A jé ca yoquipoguiécho udore ome ore abode jne; a yatatago Pangarádejnai uté icotaqué gajnéone cucha ome pape gatérigo, jé aja uté ujopié iyiejna, jé aja uté ipesudode cucha pitijabácho udore ore.
5Uje uté chingongara dapijogúsorone darúo aja Jacob nanique. Chisíome dáyipie pirosobádedie acajnaquéode udore ore ome Israel uté. Ga chiroque yocáquiode ore aja nanique jeta ore chacate dabode ome uté uruode quigode udore to.
6Gaidi u gu jeta ore ape gatérigo chiraja udore to, ga pajnerámeo udore ome pape disi ejórigo uje cáma ore base, enga jé chuságaja israélgosode ore ujnié disi ejórigo jnese jetiga ore chacate dabode iji dajnepídode dire udore.
7Ga jé urásu jeta israélgosode ore ape disi ejórigo changureta Dupade uté ome raque to, ga jé ca ore chicadígui Dupade uté átedatéode udore, mu ore dorási uté uru pirosobádode udore quigode.
8Enga a jé ca ore chiradírase dayode, irabade ore aja ore úringane ducusuréo, jé aja udore ore angoninguite paritigade. Uje que ore dayode, irabade ore áyipiedie chidota re iji Dupade uté, ga que ore áyipiedie udire jogadípise Dupade uté ome dáringáringui ũrei.
9Jnanione ore iji ore uague Efraín uaté dimanepise ore ome doidode docojicho ome dáringane jõcaratácho yui, mu uje ore ipotigádi pocaninga yore ore gai ga jĩraque ore chorei dedoboi tiji.
10Que udore ore suse Dupade uru iyiejájnane guio, ga ore etéquetí ore chajna Pangarádejnai uru pirosobádode udore quigode iji jnumone.
11Ore chicadígui uté ipesudode cucha udore, jé aja uté ipesudode cucha pitijabátedatéo uje chingongarája udore.
12Uje uté pésu cucha pitijabádode iji ore dayode enominone uje udore ore déji egíptogosode ore uniri, iji pachamini uté nanique uje i tu Zoán.
13Uté chajuque yote quedéjnai uté ome ore nanique jetiga ore chajna ajugupídi uté aja uéchai. Ga Dupade chaquĩ́ra yodi iji ore dosadode jeta chidota re iji dayaridi uté, ga cho pujuyaquéode iji ore dosadode.
14Iji dirode ga uté chijñaque ore ome gue abuja cuchabé uaté uje chicháji ore iquéode, jé basa ga uté pésu ujetiga pioque ocarate cuchábedie chijñate ore guípiedie gáyode iji dejai údode jnese.
15Uté chajuque cucaranenie iji erãpetarei uté, ga chisíome yote podi ome ore jeta ore ujuyapise ga cho yote quedéjnane ajédatéode ome ore.
16Dupade pésu ga yodi pojnámiji cucarané uaté ga chayo aja jnumi yui ga cho tié jochatique aja dajesui.
17Mu ore chõre dasijnaringuéone uje ore pésu ome uté, enga ore tagu uté uruode aja iji erãpetarei uté, uje Gosójningai Dupa Pujnuéngaisṍre upúsu uté mu.
18Iji dáyipie uajádedie udire ore chetingare Dupade ga ore pota chijna damenuringuei aja uté ome cucha pibosode uje cachi ore jnari ome re.
19Urénga, ore uruode gajnarécho ome Dupade ga ore chojninga:
–¿Ga Dupade chorási ringome jeta chicha cucha pibotígaja yoquimésadie gáyode iji erãpetarei udé?
20Jé ũré uje uté chujé cucarané jeta pojna ga yodi tṍraji uaté ga cho yote bayade aja dajesúrique diríca, mu ¿jé chisírasome cucha pibotique ome yoque to a? ¿Ga jé chátarása cucha ãríringo aja to a, jeta urasade uyoque yajo udore?–
21Jecute Pangarádejnai uté cho júruru uje chudute ore uruode udore. Enga uté ájningai cho piotique uje tocade ome Jacob uté ape disi ejode, ga uté ájningamíe chõre re ome israélgosode udore ore.
22Uje que ore changureta Dupade uté gu, enga ore chotigase uté úringai Piquetasõre.
23Mu iji gaté Dupade chiroque daruode aja gue abujadie jeta ore chuchẽre dabai ga guesája gatajnoquei piagoi uté aja jnumi yui.
24Ga pésu gueyequejna ome ore ga maná u udire uje cho guéode aja jnumi ome ore, uje udire i tu trígo gaté jogotodie, ga urasade ore tagu udire nanique.
25¡Chimo jóroque re uje jnani jnutiminórone ore tagu gaté unirisórone ore potedie arurécho! Dupade uté chiroque cucha pibosode aja ore ga pésu ore usubudéringai.
26Uté pésu ga emi tṍraji guedé garani yui jeta chubúchu iji gaté, ga uté chijñaque emi uje tṍraji umusoi garani ome detotiguejnai uté.
27Ga emi di guecoré gajnui údi iji ore ga cucha aríone udore cho gue ayéraque aja jnumi ome dasérere. Ga chugúpẽre chocho udore ga cho ungaréjnai unépitabidie ome dáringanie dipesei.
28Dupade pésu jeta chugúperone udore basája ore irengúi uté gatócoro iji ore iguíjnane cárpa udore ujade.
29Jecute ore tagu udore ga ore ujuya úringane piboso. Ga Dupade isocai u uté jeta chajni israélgosode udore ome cutejmai ore ipotigué.
30Ga cáma ore chejna dapotiguei uté aja guesi, uje ore posode cucha qué déji ore pijnani;
31Mu Dupade ájningamíe basája udore ore gai. Ga uté chejna jnani dicaséode iji udore ore ujade. Enga chisíome pitoringai ome jnacare ibijógode ore iji israélgosode ore ujade.
32Uje cucha dacadode udore tocade jnese marínga, ore chajo raja dasijnaringuéone úringane pipesucho. Enga que ore changureta Dupade gotique, uje uté pésu cucha pitijabádode ome ore mu.
33Jecute Dupade pésu udore ore gajnéone dire eruei ga cachi cuchape, ga chejna udore ore gajnenie siqueré udire ome pagutéjoragosi uje chise ore.
34Ujetiga uté chejna ore, ga quene ore chucuepoi uté ome re. Ore jĩraque jnátu uté yui jeta ore chajniapója uté gai te rĩ.
35Enga ore jnusina uje Dupade u ore Gãretóraque Cucarané, ga Dupade Gatajnoquei Achamisṍri uté u ore Iquetasṍri.
36Mu ore nejéru uté údode ome danejequé tágode uje tṍraji ore pijnanone, ga ore urupatáringane garanone u daréode ome uté.
37Uje que ore áyipiedie aregue ome uté gotique, jé aja uje que ũré ore ome uté uru iyiejájnane udore gotique jeta ore doi quigode uje Dupade ichagápiode cucha u udore nanique.
38Mu osõrataque cuchape uté, ga uté chĩro ore isijnaringuéone iji ore, jé aja uje que chejna ore. Ga ga jiei uje ore chijnime uté ájningai, mu uté chicha dájningai aja ti yui, ga que chejna re aja guesi ome dáringai tagu dejo.
39Uté jnusina ore úringane jnutiminore bisidécho, ga chacãra ore aja emi uje jno ga que diapo rĩ.
40¡Gatuaque ga israélgosode udore ore isoca nanique iji erãpetarei uje ore tagu Dupade uruode quigode aja, enga ore pésupúsu uté áyuguhebátigai iji erãpe eyutiguei uté!
41Ga ore chigota chetingare Dupade uté gatuaque nanique, ga ore pésupúsu Israel Jogosṍri Dupa Puyaguipise ujuredie ome dabotaquéode.
42Que ore jnusina uté etotiguejnai uté, jé aja diri uté uje chijnime udore ore iji ore umajosórone josipiedie jmainie.
43Uje uté chicha dapijogúsorone dapesute cucha pitijabácho aja Egípto uté, ga pésu átedatéode iji garáijnai uté uje i tu Zoán.
44Uje uté pésu tiedie jochade nanique ga nóña ga diquiyojnai, ga que toc ujetiga ore chójiapo ore uniri jogosórone yocho uñane jnese rĩ.
45Uté chamurase jutíca dipeséode ore gai uje chinoningase ore, jé aja chiranie uje chejna ore.
46Enga uté chisíome ore guejnane ome amuranie udire jeta ore tagu ore acade udore. Uje ore chejna daguesi ome dacade udore ica mu Dupade guẽracho ome chuguyúgudie jeta ore chejnapise.
47Uté chejna ore acade erejna quedéjna ome ebe cuchábedie, ga ébedíe upo rĩ uje chejna poridie uje ore i tu higuéra.
48Ga uté timiningara ore gachidedie aquirájnai ome ebe cuchábedie udire jeta chequésãre ore, ga tẽra ore gachidedie ome ajnorane udore to.
49Dupade cho dájninga ome dáringai júruru ga garanája guesi ome ore, jé aja uté úringai tagu dejo, ájningamíe, jé aja ujuyaqué gajnéone cucha ore, uje uté chiroque darógode gaté unirísõre pejnangóño aja ore.
50Ga uté pésu ajesui ome dájningai jeta guesája ajesui uté aja ore yui, ga que chãraque ore ome ore gajnei pitoringa gotique. Mu uté tẽra udore ore ucuecaringuei ome cucha dequejnasṍri uté.
51Uté chequésãre ore ape basuque bajade jnese iji Egípto údode: ga ore utíode u udore uje tṍraji ore úringai jnacare etoque iji ore iguíjnane cárpa udore iji ore uniri Cam uté.
52Mu uté pésu ujetiga darasade ore jno ga ore gajnunie u áyasadie, ga uté cho áyasadie ijñasónique uje chijñaque dachidedie ore aja ore qui iji erãpetarei uté.
53Enga uté jno ore údi ome dáringai iroditaque, jeta jé ca ore chimo pisadodéringárique ome re. Mu udore ore umajosórone ga yote quedéjnai chijnami ore gai.
54Enga Dupade chijna darasade udore ore aja uté ajegaidi jnupe puyaque udé eruei, aja cucarani Sión udé, uje uté cho cucarani udé oré ome dajmana dãrachu ujopíerẽ́ uaté.
55Dupade chijócãre purása quedéjnane udore ore ome israélgosode ore iquei nanique. Enga Dupade chajuque jnumi ome israélgosode ore uague chojmara, chojmaranie udire jnese nanique jeta ore cho dajnenguíji uté. Enga uté pésu ujetiga israélgosode ore chicha daguíjnane cárpa aja dáguedie ore gajnepídode jnupe udore uje chajuguína ore.
56Mu israélgosode udore ore qué ore chetingare Gosójningai Dupa Pujnuéngaisṍre uté gaté rĩ, enga ore tagu uté uruode aja. Ga que ore suse uté pijogúsorone daru quigode guio gotique.
57Mu ore chajnésaru daquigade, ga udore ore chopise dai cásodicáite ore uje que ũré ore, enga que ore chedu changureta Dupade uté gotique. Uje ore cho jñuque ga ore gajnui tu docojique ditajírique ome dáringai taque.
58Enga udore ore chijnime Dupade uté ájningai ome re gu ore ipesudode jogate umáño udore uje ore pésu daseradéjnane iji udore ome dupa quedéjnane; enga ore chiroque Dupade uté aja dáringai ocáca ome ore to, uje ore catecã́ri ayoré gajnúone oredie.
59Uje Dupade chudute udore ga cho júruru ga cho detéquedatéji Israel uté ome dáringai tagu dejo.
60Jecute uté noñome daguíjnai cucha ao iji te to uje déji ore idai Sílo uté, uje uté ichajapite daguíjnai cárpa uté aja jnanione ore ujade jeta cho dayaridíji uté.
61Enga uté chiroque detotiguei pijogúsõri, daruode pi cajo uté, aja úringárique pisaque; uje uté juéga jeta ingoningájnai imósõri uté basája guetesórone udore ore jmainie.
62Dupade uté tẽra darasade udore ore ome queségodói uté; uje ájningaránguipíse uté ome darása dacajnéone udore ore.
63Pioi chejna jnacarode udore ore, ga gapu paredie que ore chudute pijñiecárique to ujetiga pisi ore gai ome dáringanie amanachugué.
64Dupade irógode sacerdóteo udore ore ga ore chise dagachodi ome queségodói uté, enga que toc ujetiga ore urátadie abai togué ore yuare iji ore ejode.
65Enga jé u uje Pangarádejnai uté niji, enga chorase gosi uje quene niji iji dáringai moque; gajnui tu jnani etotinguerãi uté uje pijnanéjna gu víno úringárique pijote.
66Ga Dupade chose detesórone udore ore, ga guẽrate pajegátigadatéi ome ore ga que íjnoque iji deréjna pitade gatuaque.
67Dupade chetaque José uté jogasúode ore. Enga que ajegaite efraíngosode udore ore uague gotique to, uje José ujnacari u Efraín uté.
68Mu uté chimesẽre judágosode ore ga cho dajnéngu udore ore uniri jogonóri cucarãte uté uje i tu Sión, uje chijnorapise uté gu.
69Enga pésu dayarite puyai jogadi ujetiga idája iji gaté yui. Ga adi jé u uje pésu erámi nanique ga erámi jé jogate dajogadi ome uté iji deréjna pitade.
70Enga uté ajegaidípisi tu daroi David uté nanique, ga chijnime uté iji darodedie áyasai ore piedie.
71Uje David uté josedie u áyasadie nanique ga jõra udire aja quedéjnane ome dáringai iroditaque, mu Dupade chécãre uté isai uté ga David josigode e u Jacob urasade ore, ga irodigode u israélgosode ore, uje Dupade cho dajnenguíji udore ore.
72Enga David cho darodedie iji ore ome dáyipie ũré uaté, ga uté josigode u ore gatuaque ome darajatigai.
Currently Selected:
Sálmos 78: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
