Sálmos 80
80
Piradé udaque gajnesṍri u piradedie irajasṍripísi. Asaf uté ipesudé Sálmo udaque.
1Urénga, israélgosode ore Irodisõre á, ua u uje bajñaque José uté aja ajesúode ga bo áyasa posedie iji urasade, ga be ga acha bangoninguini aja gadoi. Ua u uje bo bayaridi iji gaté unirísõre orerane udore ore ujai, uje udore ore íode u querubíneone, iji baruode pi cajo joride gai, ga be ga aqueta ua aja yógome badírecaringuéi uté.
2Iji Efraín, jé aja Benjamín, jé aja Manasés ore uáguedie edominone, ga aringare betotiguejnai, enga abágui yógome báringai Piquetasõre.
3Urénga, atirépo yocúringa casodica areque yoquibai rĩ, Dupade á. Be ga ajñate yoquibai ome benochai úringai nanganataque, enga yocúringai piquetaque jogadi a jé u jne.
4Pangarádejna Dupa Pujnuéngaisṍri á, ¿cho rique díningo jne ujetiga aya bájningamíe uaté ome barasade udore ore icatecãraitigade ome ua?
5Uje bã́raja ore ga ore cho arureque pibotíji ore educadode; bapésu ga ore chóji deducadode ga ore ujuyápise.
6Bapésu ga pujuredie garani tu yoque ome yoquejominórone yocujo ayoré ore; enga yocumajosórone udore ore cana dabáyode ome yoque.
7Urénga, atirépo yocúringa casodica areque yoquibai rĩ, Dupa Pujnuéngaisṍri á. Be ga ajñate yoquibai ome benochai úringai nanganataque, enga yocúringai piquetaque jogadi a jé u jne.
8Bajnime erejna quedéjnarique iji Egípto uté ga bãri údi iji de. Bajócãre purása quedéjnane iji ore gajnei jnupe ga baca bajnimi uté erejna quedéjna iji ore jogadi.
9Ga bajo jnumi uté bajaque jeta aca erejna quedéjnai uté iji bajopídi. Ga sué ga erode jnome sona ga jmanecade quérã ga suru puniri uté.
10Ga erejna quedéjnai uté chaco cucaranone gai ome dáringai uburutaque, ga jmanecade choru pore yorícodie gai uje ore i tu cédro ga chaco ore gai.
11Erejna quedéjnai uté jmanecade chuságaja yote quedéjnadatéi uté, ga dugúgode chichagapo raja tiédaté rĩ uje i tu Éufrates.
12¿Cuchárique u gu a uje bajnangarase ujuyaquei uté iji erejna quedéjnai adie úva gai? ga udore jnese uje ore chiramísara jogadi uté ga ore doi ga ore na adie aja dajesúode.
13Yãcoré quedéjna choquíode udore uje tṍraji monte chicha daromínone aja bacadie udire gai ga chuchiéjna jnumone. Enga garai jogonórone cuchiso sijnácho ore tagu udire adie.
14Urénga, Dupa Pujnuéngaisṍri á, ¡yijóchago bajei údi jetiga ajniápo rĩ! Iji bayaridi iji gatajnoquei uté ga ajire yóguiji bádi, ga adójnanga unojo. Ga ajire erejna quedéjnai udé yui ome báringai iroditaque.
15Ãraque bacai uté erejna quedéjna uje baca uté ome bajmanai bãrachua, jé aja ujnié uaté uje bapésu úringa etogue aja gaté ome ua.
16Bacai uté erejna quedéjna ga paquesuque aja jnumi, ga e papose gai; a barasade udore ore toi jne ujetiga benochai patíja ome ore.
17Be ga bajmanai uté chácarásiji jnani uté gai uje déji bãrachua, iji jnani abi uté gai uje baringare uté aja gaté ome ua, ga bapésu uté jeta uajádiji dajogadi.
18Enga a jé u jne ujetiga jé ca yicagóji siñéngome ua. Be ga asi ome pucuecaringuei ome yoque gaté, enga a yutocoi bei ueradi ome yoque jne.
19Urénga, atirépo yocúringa casodica areque yoquibai rĩ, Pangarádejna Dupa Pujnuéngaisṍri á. Be ga ajñate yoquibai ome benochai úringai nanganataque, enga yocúringai piquetaque jogadi a jé u jne.
Currently Selected:
Sálmos 80: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
