Sálmos 55
55
Piradé udaque gajnesṍri u piradedie irajasṍripísi. Ga ore chujé degode cucha jocarãtácho. David ipesudé u jeta po quique ore ome.
1Urénga, angári yicatecãraitigade ome ua, Dupade á. Ga ca apógu ua ome yutaqué gajnéone cucha iji ua.
2Be ga angári yu, ga achajnai yu. Yáyipie chejnáreque cutejmai dáyuguhebátigadaté, ga yijnaríji jnumone;
3Ga gose yumajosórone udore ore uje sijnángone udore ore chinguíra dabijnanone aja yu ome dajmongaquéode, jé aja uje ore cho dajosipié ome yu. Ga ore atuátigade udore na yu aja jnumi, ga ore dojnóngaja yu iji dájningamíe jmainie.
4Ga yaguté cho tucutúgome udore ore, enga yijose ati yigachodi u ome udore ore.
5Enga pisadodéringai chise yu ga yo ta-ta-ta iji uté jmainie, ga yaguté sutabáide cucha uté chaco yibai.
6Enga yojninga ome yu:
–¡A yujnóngone cusirase ga yopié cucujnadatei chóguiji yu ga yiyó ga yope yujñare iji sañeque jõ!
7Ga a yiyórase ga yicáji toniñeque enga yácarásiji erãpetarei uté jne.
8A yiquejnárasome yãrésõre jogadi uté yui jeta yapídome guetórangone, úyujna cuchábedie ore, ga jé ca ore chise yu iji yiyarite idájai uté.–
9Urénga, Pangarádejná, ejna ore ¡jaripe! jne, enga apésu jeta jé ca udore ore chiraja uñane uru quitígo. Uje yimo ore uje ore jmongarája dojode ayoréo, jé aja pibotaquéode uje chubu pidai uté údode.
10Iji dirode, dejade ore jnese ga sijnángone udore ore chaparu pidai uté gai, uje ore diguiji ujuyaquéode gáyode. Enga pate gajnaréngone, pujuredie ore jnese charite pidai uté ajei.
11Pate noñánguipísode déji pidai uté údode, ga pijmongaquéode, paringaquéode que ore jnoji dajeredie gotique.
12A yumajósõre gosi uje uruode dosója yu ga a yidotárase yu ome uté gosi uru dosógode udore. Jeoga yetésõri u ujeta chosi riji gaté ome yu, ga yajéraso ga yacose yu ome uté.
13Mu ua u uje bapésu cuchade unojo, yujo jnani, uje yijínango ñane gatuaque, ga que uñeque cho ua ome báringai yijõra.
14Ga jecucha yajmárango ñane uruode ica uje yijínango ñane, ga yirijoi jnumi iji ayorébuode ore ujade aja Dupade iguíjnai uté ajei.
15¡Yipésupú ga yumajosórone udore tṍra rome dáringáringo tocho jne jõ! Enga udore ore basája dajnetígo erucho ome dáringáringo ayoré pórecajna uje ore ipesudode cucha noñaque chĩreta ore áyipiedie gu.
16Mu jé basa uyu ga a yibidi Dupade ga uté a chiqueta yu jne, Pangarádejnai uté.
17A yicatecã́ri Dupade ga yibo iji dejai, diri, jé aja guedé gatócoro ore údode jne, ga Dupade a tangári yúringai dara.
18Uje yugúsiji pocaningárique ajénique marínga, uté jé chãraque yucuecaringuei iji uté. Uté chiqueta yu ome uté, uje jiei jõcaratátigo udore ore uje ore cho dajocaningame yu mu.
19Dupade a tangári yutoquéode ome yumajosórone ore ga chosi udore iji jnumi jne. Uje uté u uje chácariji dáringai Peduguéjna Eyúgojma uté. Uje udore que ore chécãre dasocárique ga que pisadodéringarique déji ore ajénique ome Dupade.
20Yijõrai uté chisa dõrachade ome dajmanecade ga jmongarája dajõra casodica dojo ayoré, enga que do gojni dojninga casica pajesereringa quigode to ome dajorane ore.
21Uté pijnani chopise mantéca ome úringai serẽrachuque, mu áyipie jogadípise pocaningárique. Ga uté uruode cho aceite ome úringai chietaque uje quĩrique narare, mu uruode udore chopise queségodogóde uje dimane ore ome pocaningai yui.
22Ajíome báyuguhebátigade udore iji Pangarádejnai jmainie, ga a uté chidota ua iji gaté jne. Uje a jé ca uté juéga jeta pijocayaque ate arégode udore ore.
23Urénga, Dupade á, ua u jne jeta apésu ga ate gajnaréngone udore ore basája dajnei eruque chaquipie ¡tínip! Uje ayoré yusṍreméone, urupatáquechoquíode udore ore a ore toi ¡paque! jne iji dacuecaringuei uté gatócoro yui. Mu uyu ga yangureta ua ome yu gatuaque.
Currently Selected:
Sálmos 55: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
