Sálmos 54
54
Piradé udaque gajnesṍri u piradedie irajasṍripísi. Ga ore chujé degode cucha jocarãtácho. David ipesudé u jeta po quique ore ome, ga pésu uje zífgosode udore ore tibágui Peduguéjnai Saúl uté, enga ore chojninga: –¿Jé ca David uté pógu re iji yocujade a?–
1Be ga aqueta yu, Dupade á, ome bei ueradi uté. Be ga ajire yadode ga ãrarare yúringai ũré gai ome bajopié iyiejna.
2Urénga, Dupade á, angári yicatecãraitigade ome ua. Acha bangoninguini aja yuruode udojo yui uje tṍraji yibijnani.
3Uje purása unejángone udore ore chéngame re jeta ore chachẽre yu. Jnani josipíerane udore ore chucué yúringai chuque, ga jnanione udore u uje que ore áyipieraque dépisiji Dupade gotique.
4Mu jé ũrepise uje Dupade u Yátajasṍri. Ga Pangarádejnai uté u uje chajire yucuecaringuei udé yui.
5Uje a uté pésu ga yumajosórone udore ore ipotigádode cucha ome yu a chajni ore gai jne. Be ga ejna udore ore ome báringai Ũré uté.
6Ga a yiji jne enga yẽra yẽrapaite bisidétique ome ua. Enga a yicota bei pirosobádejnai jne, Pangarádejná, uje uerate bei gu.
7U gu uje bajnime yu iji yáyuguhebátiga gajnéone cucha jmainie jnese. Ga yedodie upúsu uje nína re ome yumajosórone udore úringane pejnacho.
Currently Selected:
Sálmos 54: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
