Sálmos 56
56
Piradé udaque gajnesṍri u piradedie irajasṍripísi. David ipesudé u uje filistéogosode ore chisa uté iji ore idai Gat uté.
1Urénga, osṍrape yu, Dupade á. U gu uje yujode ayoré uñane ore chajna yu aja quedéjnane. Ga que ore chimoque guedé batigárique uje ore cugujnai yu ome dajocaningane.
2Iji deréjnai údode yuquejnasórone udore ore chajna yu; jiei yumajosórone udore ore uje ore cugujnai yu ome dáringane ijoyatácho, Dupa Pujnuéngaisṍripísi á.
3Ujetiga yitodo jne, ga yi ga yangureta ua ome yu.
4Ome Dupade uté, ga a yi ga yicota uté uruode. Yangureta Dupade uté, ga a jé ca yitodo ore. ¿Ama udore ore isocáriguiráse ome yu a? uje gusu erámi achamisõre ore gu.
5Iji deréjnai údode ga ore chumuchásu yuruode quigode, ga jecucha ore pésu dáyipiedie iji ñane ome yúringárique pajnongoque yui.
6Ore chayo aja ñane ga ore chacose re ome gadoi, enga ore ajnapaite yu ga ore chidójnangapísa yarodie aja quedéjnane, uje ore jnátu ujetiga ore chijnime yucuecaringuei iji yu.
7¿Ga ore chayorásome dasijnaringuéone udore ore oré jne a? Urénga, Dupade á, be ga ajosi pachamini achamisórone udore iji jnumi, ome bájningamíe uaté.
8E barúsãre yigajñunie ome yumajosórone udore ore. Ga ajuse ore ijnimingone yeducacho guio iji bajnei cuchirise uté. ¿Ama ca purusãracho yeducadode udore batigai iji begode darujna ao to a?
9Ujetiga yibidi Báringai Pátajasṍre ome yu, enga jé u jne ujetiga yumajosórone chajnésaru daro ome dáringane bayácho iji diri tuté. Yirajai tu uje Dupade dépisiji yari.
10A yadi u ome Dupade jne ujetiga yicota uté uruode. A yisoca jne ome Pangarádejnai ujetiga yicota uté uruode.
11E yicha yanguretigai aja Dupade uté. Ga a jé ca pisadodéringárique déji yu jne. ¿Ama jnanírique dorási ga pésu cucháringome yu a?
12E yo yuru iyiejname ua diríca, Dupade á, ga a yimate yuru casodé ome ua jne. Uje a yẽra yẽrapáidode cucha ome ua ujetiga yacãre babai ome udore.
13U gu uje barame yu ome pitoringai uté. Jé aja jeta jé ca yirída ajã́ronie cho caru, ga gose ua. Uje bagaidi u gu ujetiga yiriguiji Dupade iquéode gatuaque jne iji pucuecaringuei uté idírecaringuéi.
Currently Selected:
Sálmos 56: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
