Sálmos 37
37
David ipesudé Sálmo udaque.
1Jé ca ajuéga ujetiga jnani ate gajnaréngone udore ore chijnime bãrírique. Jeoga jé ca aratáyime udore ore ome ore ipesudode cucha gajnarécho.
2Chamáñaje udore ore gajnui tu jnacaraque paquesuque betágode, ga ore cho ugarabia uje chiririta ga jĩraque íjnoque.
3Be ga acha banguretigai aja Pangarádejnai uté, enga jecucha apésu cucha arégode. Ácariji bayaridi jnupe iji erámi udé ome báringai ũré ga a tijode cho jnángome ua jne.
4Ajmarápusu Pangarádejnai uté ome ua, ga a uté chisíome bapotigádode cucha ome ua jne, uje báyipie jnátupúsu udore gu.
5Ajíome bapesutique cucha quitígo iji Pangarádejnai uté jmainie. Angureta uté ome udore, ga a uté pésu ujetiga udore ore tocade jne ome ua.
6A Pangarádejnai pésu ujetiga pijoque báringai ujñapetaque, bátegoningáne ore, ga ore gajnui tu dírecaringué cuchábi ome ua ga nanganata ua iji uté. Uje a uté pésu jne ga basoca uréone udore ore gajnui tu guedé uje déji gatócoro ga cho nánga, nánga, nánga iji uté.
7O paráguiji Pangarádejnai uté iquei. Enga ca ajnátu cuchárique ome ua mu arodape uté yui. Jé ca jnani sijnai uté ipesudode cucha gotígo chijnime bãrírique ujetiga uté chise dáringárique ataque ome udore, ujetiga uté áyipie noñánguenie udire chise dáringanie tocachuguei.
8Be ga jé ca opo júruru iji dore rĩ, ga ajíome sumájningai iji te jmete. Jé ca apésu báyipie ejóporinguérique, uje gusu pate gajnaréngone u uje tṍraji uté.
9Uje jnani ate noñángone udore ore a chaquesu re jnaque jne. Mu udore ore uje ore changureta Pangarádejnai uté yui ome re, ga a ore cho dajnéngu erámi jne.
10Idógosi deréjnai jeta jé ca pimópo jnani sijnángone udore iji erámi to rĩ. A acué jórogui udore ore jne, mu erã́ta ore jogatique.
11Mu jnani pajnotágode udore ore a ore cho dajnéngu erámi gatuaque jne. Ga a ore chachietáji datijínaquéi uté, uje erámi a cho pujnúringome udore ore jne.
12Jnani sijnángone udore jecucha ore ucuegode u pejóporinguéone ome dojode ayoré ate arécho. Ga ore chigase dajúode ome udore ore.
13Mu Pangarádejnai cana ayoré sijnángone udore ore gai, uje chiraja gu uje idógosi ore gajnei dire jeta pujuya ore.
14Sijnángone udore ore chijnime doidode queségodochó ome ore, jé aja uje ore na dojodie aja doji carubi jeta ore chayo doji údi. Ore gaidi tu ujeta ore chusũrurase ayoré jmatágode, ducañerájmane udore ore aja jnumi, ga ore jnátu chui ome udore ore uje ore adode ujñapetácho.
15Mu a jé ore oidode daqueséo a jé ichaguei udore ore iyobiedie ome udore jne. Enga a ore ojigode pépita jne.
16Ujetiga gosi ugúchabóde garósosi, mu adode arécho, ga uté isocai sué ate gajnareque dipeséode udore ore gai uje ore ugúchade jiépisi mu.
17Uje a pimocherãque ate noñángone udore ore jmanecade jne, jé basa ga Pangarádejnai uté a chisa ate arégode ore iji gaté.
18Pangarádejnai uté chiraja ayoré ate arégode udore ore gajnéone dire jnese. Ga uté guẽracho dachagápiode cucha ome ore jeta ore chopise dajnéngu udore nanique, enga a jé ca udore chisápo deyutiguérique jne rĩ.
19Ujetiga pujuredie ujuya uréone udore ore iji dínique, mu que ore doi ga betája iji cucha dacadode udore jmainie. A chaguhédatérigo yore erámi gai iji díningo, mu uréone a ore ujuya gatuaque jne.
20Mu sijnángone a ore chise dagachodi ome dáringane pejnaque jne. Enga Pangarádejnai umajosórone a ore cho ugarape pojnángueraque uje ueratigai jĩraque bijname, enga a ore gajnunie upo pioque úyujnanie jne, uje jĩraque udire íjnocapo rĩ.
21Jnani sijnángone, jecucha ore chutai dajnose carubode iji dojode ayoré, mu que ore chatirépo dajnose carutique gajnesórone dojo ayoré ore gánique rĩ. Jé basa ga jnani uréone udore ore caniraque ore, ga ore chosõre dojórique ayoré.
22Udore ore uje Pangarádejnai chacacãre ome daru omone ga a ore cho dajnéngu erámi omitigai jne, mu udore ore uje uté ujuyagaite udore ore ome daru noñángone, ga a pejnaque ore jnese jne.
23Pangarádejnai u uje chijñaque jnani ate arétique guípiedie aja ajesúode erámio gatuaque, enga chachietáji uté gosi jmapié uaté.
24Ujetiga uté cṍrarase, mu a jé ca catápisaja jnumi. Chamáñaje Pangarádejnai chisa gosi aja gaté gu, enga jmanai que chirame uté go.
25Jnacare yu nanique, mu e choquíjnape yu. Mu cáma yimo jnani urénique jetiga Pangarádejnai noñome jnani ũrei uté iji te jmete. Que yimo jnani ũrei uté atique rĩ ujetiga doi ga chutai pámatique iji dojórique ayoré.
26Jecucha posongaquei déji jnani ujñapetade udore ore ajei iji guedé batigade jnese, ga jĩraque ore chosõre dojórique ayoré ujetiga pota chijna dajnose carutígo iji ore. Ga osõratade udore abode a ore cho dajnéngu pacacáninga omone jne.
27Angara bajogatique ome pijmapié noñánguenie ga edu pijmapié omenie quigode. Ga a jé ca o sebeque jne iji deréjna pitade jnese.
28Uje Pangarádejnai uté chijnorapise cucha uréone quigode, enga que noñome danguresõripísode iji te jmete.
Ga a Pangarádejnai garéngone u udore ore iji deréjna pitade, jé basa ga sijnángone ore ape disi ejode udore ore a jé ca ore chapite jne iji erámi.
29Jnani ujñapetade a ore cho dajnenguíji erámi jne, enga a ore eca iji uté jne iji deréjnane jnese gatuaque.
30Payuquetotiguei quigode u uje tṍraji jnani ujñapetai uté pijnani, jé aja uje uté arei chedu chatata cucha uréone quigode.
31Ga uté ujúseguíode u Dadupade uru pirosobádode iji dáyipie. Jecute a jé ca uté guída ajã́ronie carujnája ome udore jne.
32Dimane sijnángone ore iji danunguenie ome ate arégode udore ore yui. U gu uje ore ucuei u chui ome ore.
33Mu que toc ujetiga Pangarádejnai noñome udore ore iji sijnángone udore josipiedie jmainie. Jé aja uje que juéga ore ome dáringárique pujuyagaite ujetiga poite ore aja padode ajirisónique iquei.
34Arodape Pangarádejnai yui ome ua, enga ajuse uté adode guio. A uté u jne jeta chosi ua iji gaté ga a o bajnéngu erámi jne. Ujetiga jnani noñángone udore chise dáringane pejnacho, ga a apáñaji ome bedopísedie jne.
35E yimo jnani josipíerãi uté iji dáringai etotinguerãque uje chicota re ga chiese ayoredaté ome dacotaquéode, ga cho poredaté chaguesíraque uje ijoréjna iji dabotipídi jnupe uté.
36Mu nóña ga jĩraque pijnanguiete jnani uté ga erã́ta jogadi. Uje yucué jórogui uté, mu que piyacápo uté rĩ.
37Cadójnanga jne jnani uté uje que iyoguérique cuse, ga ajiripise ate ujñapetai uté. Uje uté ucueque pajesereringai adode ome re ga a jé uerate cucha tocachugode ome uté jne iji dire piqueminóningo.
38Mu jé basa ga jnani angoninguite parigode udore ore quique obiréjnai tu jeta pinoningañaque ore jnese; a jé ca dire piqueminónique cuse jne ome sijnángone udore ore, uje a ore chaquesu re jnaque jne.
39Mu ate arégode ore úringane piquetacho garani tu Pangarádejnai uté. Ga udore ore gãrésõri tu uté iji cucha dacate gajnaréngone jmainie, uje uté cho pinama ome ore uje chaparu ore gai.
40Pangarádejnai a chátaja jnani uréone udore ore, ga chirame ore jne. Ga uté a chijnime udore ore iji jnani sijnángone udore ore jmainie jne, u gu uje ore chicha danguretigai aja uté.
Currently Selected:
Sálmos 37: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
