Sálmos 36
36
Piradé udaque gajnesṍri u piradedie irajasṍripísi. Pangarádejnai iroi David ipesudé Sálmo udaque.
1Ate noñai uté gosi ipesute gajnaréngone chingongarája yáyipie uje que uté gosi chiraja pisadodéringárique ome Dupade gotique iji dedominone.
2Uje uté cutejmai inejequéode ome re suru dedodie gai, ga que toc eti chiraja ipesudode cucha gajnareque udore úringane noñánguipíso.
3Ga uruode uje tṍraji uté pijnani ga gajnarénguipíso enga tácho udore to. Enga e cha pésu payuquetotiguei, cucha arégode udore ore quigode to.
4Uje uté gosi terẽtáji damochápi gai mu jĩraque áyipie déji pujuré pipesudéraque. Ga uté e chajo dáyipie aja dajei uté uje chorei uté iji ipesudode pisijnaringué udore, ga que chujna cucha gajnaréngone udore úringáringo pipesute ome re gotique.
5¡Urénga, Pangarádejná! Bajnoraquei cuchadaté enga chise gatajnoquei. Ga basoca uréone chuságaja gatajnoquei uté iji te uje atéta uaté iji gaté.
6Báringai ũré jé cho cucarãte yoricode udore ore ome ore úringane cuchadatéo. Barecujate iyiejnanie udire gajnúone u yote quedéjna cuchábode ajedatéode to.
¡Urénga, Pangarádejná! Ua u uje bajuse jnanione ore guio, jé aja cuchiso ponáyone udore ore guio jnese.
7¡Orerã́quedatéi tu bajnoraquédatéi, Dupade á! Ayoré ponáyone ore abode iji erámi ore chise ua ome báringai Pãrésõre, ga bacha ore aja bajnóngone údi ome báringai Pañerasõre.
8Ga ore úringane subudé jogadi u uje ore déji bari uje que cuchárique chona ua iji baguíjnai uté. Uje bapésu ga ore chóji iji batié ueradé uaté uje cucha pajmaránone déji.
9Ua u gu uje pucuecaringuei uté garani simíjna déji ua. Ga dírecaringuéi pijógome yoque gu badírecaringuéi uté.
10Ajnera bajnoraquédatéi údi ome barajasórone udore ore, ga basoca uréone ore nóna áyipie arégode udore ore aja quedéjnane.
11Jé ca ajuéga jeta dicotárechoquírique doi ga chuchiéjna yu iji jnumi ome darídai uté. Ga ca ajuéga jeta jnani sijnai gotique chucuase yu aja quedéjnane ome dajmanai uté.
12Cajicho cucha gajnaréngone ipesusórone udore ore to uje e ore cṍra ¡pac! ¡pac! Pucuayaque udore ore aja jnumi, ga que toc ujetiga ore nijiápo rĩ.
Currently Selected:
Sálmos 36: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
