Sálmos 38
38
David ipesudé Sálmo udaque, jeta pujnusinamane.
1Urénga, Pangarádejná, jé ca o júruru ome yu ome báringai ájningarã́que cuchape. Ga ca o bajuñame yu ome báringárique tagu dejo.
2Uje bojo bachagájadie e ichajuque yu, ga chise yãrágajnunie ajei, enga bajmanai imenuringuei chajo yu aja jnumi.
3Bájningai uté pésu ga que yibai ijóningárique cusapo rĩ. Jé chopome yajnoquéode rĩ, uje que putajnoquérique dépoji udore ore rĩ, ga gose yisijnaringuéone udore ore.
4Yisoca gajnaréngone e chãraja yójo, ga cho yugúcha iménurique jeta jé ca yimécãre.
5Urone piéjna yujose taratágode udore ore ga ore chopise jmare, ga gose yitáyipietigai.
6Yajna jnumi ome cutejmai yáyuguhebátigadaté, ga yusũrujnáji deréjnai údode.
7Yibai jũruachúringai idájai guesi ga gose dequejnareque gajnarenguipise uje chajnongose yu, ga que yibai omitigárique cusapo rĩ jeta jé ca doso.
8Yo sere ga érãtique yute ajnoquetique cusapo rĩ ome yúringai pijaroque iji jnumi; yijnare, ga gose yáyuguhebátigai uje na yáyipie uaté aja jnumi.
9¡Urénga, Pangarádejná! Yáyipie gaidode cucha udore quigode jnese déji guesáringai ome ua; ga que pipoguiete cutejmai yujnaca ome ua gotique to.
10Ga yaguté cho ¡túcutúque! ga yetotiguei noñome yu iji te jmete. Enga datéringa ome yu uje yajirigode cóbio.
11Ga yijõrapísode, yejominórone ore chicha yu aja usodé uje ore chujna yujosode iji yibai, ga yiguiosode ore chácariji ti yui ome yu.
12Ore uje ore pota yúringárique chuque ga ore chicha dajuyaquéode aja yiquéode. Udore ore uje ore ucuegode u pejóporinguérique ome yu ga ore catecã́ri ñane jeta ore chinguíra yu aja jnumi. Enga udore ore chejna guedé batigade uje ore chucué dáyipie quicho ome dáringaquéode.
13Mu yajnui tu ayoré angoronéparitíque, uje que yudute cuchárique. Ga chopo rĩ jeta pijnate parique yu ga ca toque darai tome yu.
14E yo jnanírique uje que chudute darárique, ga que pibotaquérique déji uté pijnani gotique to.
15¡Urénga, Pangarádejná! Yirodi tu bei ome yu, ga a ua u jne jeta achajnai yu, Pangarádejná, Yudupá.
16Uje yojninga:
–Jé ca ajuéga ome udore ore jeta ore chigójna yibai ome dáringáringo pujnuéngaisṍño, jeoga ore sosi riji gaté ome yu ujetiga yirídogoróraque cho caru.–
17Uje e dimane yu jeta yo sebeque, enga yáyuguhebátigade udore déji yiquei gatuaque.
18A yatata yipesudode cucha gajnarécho jne, chamáñaje yopise yáyugu ome yate gajnaréngone udore gu.
19Etoguipíso yumajosórone udore ore ome dáringane pórecajna, ga yetésõre bisidégode udore ore jé ore chajnera dádi ome yu, uje que quitique cusipise ome yu mu.
20Udore ore uje ore cho yate arégode oré iji cucha gajnaréngone, ga ore u uje ore cho detéguiji yu gu uje yajna pisoca uréone udore quigode iji jnumone.
21¡Urénga, Pangarádejná, jé ca ajíome yu iji te jmete! Ga jé ca apésu jeta idája ua iji yu, Yangureni Dupá.
22Pangarádejná, Yiquetasṍri á, be ga aquejname gadoi ome báringai yátajasṍre.
Currently Selected:
Sálmos 38: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
