Sálmos 30
30
Sálmo uña u udaque, jé aja ore iradé uje ore chichaga Peduguéjnai David uté igóchocoijná aja Dupade.
1Urénga, Pangarádejná, a yisi babai jne uje basa yu aja gaté, enga que ajuéga ujetiga yumajosórone udore ore chigójna yibai.
2Pangarádejná, Yudupá, uje yibidi ua jeta átaja yu, ga baqueta yu ome yejnaréngone udore.
3Urénga, Pangarádejná, bajnime yáyipie iji jnaropié uaté, ga basíome yucuecaringuei ome yu ujetiga jé ca yibasája togode ore gajnei eruque ajei.
4Aracho uacacotaqué gajnéringui uacaradei ome Pangarádejnai uté, uaque uje uacanguretáyo uté, ga acãcho gai ome uacajnusinamáni uté i pirosobádejna.
5Uje uté cho dájninga to mu cachi púsuguru utataringuepe; jé basa ga icaniratiguei chise gosi ucuecaringuei eruénique. A gosi úringai ugo chuságaja dejai údode, marínga, e chise dire uñai ga pininaquei jogadi u.
6Uje tijode cho pujnúringome yu ga yojninga: –Jé uerate yu, a jé ca cucha dacatique chósi tiji yu jne.–
7Urénga, Pangarádejná, ome báringai osõrataque, ga bapésu yajnei cucarãte úringai uajate iji gaté ome yúringai pãreque. Mu bapógu benochai ome yu, ga jé u uje cuchade chácariji yúdode.
8Ga jé u uje yibidi ua, Pangarádejná; yijócha Pangarádejnai uté ajei údi ome yu, ga yósi te:
9"¿Ama cucha pagutíyabátique tṍrarásiji yúringai toque, jeta yibasája togode ore gajnei eruque ajei a? ¿Jnumi urui chicotárase ua ya? ¿Jeoga tujua báringai ũrepise jne?
10Pangarádejná, angári yu ga asíome báringai osõratágome uyu. Be ga Yátajasṍri tu ua, Pangarádejná."
11Mu ua ga jé bécãre yúringai uñácaraméque, ga yachietáji udore ore ome ua, ga yo jobeyei gaisónique. Bejñu yiguidé iji yu, yibai ichajuto uaté uje imoi tu yúringai jnusiétaque, ga badíja pininaquei uté aja yu.
12U gu jeta yarei jecucha chicota ua ome daradérigui enga ca cho paraque.
¡Urénga, Pangarádejná, Yudupá, a jecucha yacãre babai jne iji deréjna pitade gatuaque!
Currently Selected:
Sálmos 30: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
