Sálmos 31
31
Piradé udaque gajnesṍri u piradedie irajasṍripísi. David ipesudé Sálmo udaque.
1Yicha yanguretigai aja ua ome yúringai pãreque, Pangarádejná. Jé ca ajuégapísa ujetiga pinguíraja dipoi aja yu gotique. Arame yu ome báringai ũré.
2Acha bangoninguini aja gadoi, ga aquejname ga aqueta yu ¡bu! Be ga bajnua tu cucarané timíngueraque ome báringai Pãrésõre ome yu. Be ga bajnua tu pinamáraque ome yu to uje chaparu yibai ome yúringai piquetaque.
3Jé ua upúsu Yãretóraque Cucarané, jé aja pinama uaté uje chaparu yibai, jecute o yiquique gatuaque ga ajñaque yu aja quedéjnane ome bei ueradi uje bajnóra bei uté gu.
4Ajnime yu iji ore ujuyágaidóde ducaricho jne, uje ore chacose udore ome gadoi; u gu uje Yãrésõri tu ua.
5Yisíome yáyipie ome ua, ga jé u uje yijogadi tu bajmainie. Yiquetasṍri tu ua, Pangarádejná, cucha uréone gãrapi Dupa.
6Yetaguipise udore ore uje ore isígayode u ayoré gajnúone oredie uje que cucha dacatique tṍraji udore. Ome yu, ga gusu yanguretigai jogadi tu Pangarádejnai uté.
7A yinína yu jne, ga yajéchietaringuéi uté garani u bajnoraquédatéi ome yu, u gu uje e bamo yujnusiétigai, ga baraja yáyipie ujuré gajnéone cucha udore.
8Que ẽra yu ome yumajosórone jeta yugúsi udore ore jmainie, mu bacha yirídade aja jogate ueradi uje querújna.
9Osṍrape yu, Pangarádejná, uje yugúsiji cucha dacadode udore ga ore jmongarája yu. Urénga, yagoyedie iji yejode chejna yajirigode, ga gose yúringai áyuguhebátaque. Ga que gusu udore, mu jé chuságaja yáyipie ajei, ¡jé aja yigosi jnese, uje eyuque udore to!
10Yúringai ueca guejnasṍri tu pujuredie uje ujuya yu, ga yipijoque ome yúringai ongáca iji yejnanie siquerei udire jnese. Yujnusiétigai pésu yibetaringuei jeta na yu aja jnumi ga gose yisijnaringuéone, ga que yute ajnoquetique cusapo rĩ.
11Uje yumajosórone ore jiépisi ga e yise yúringai pidojnóngamáite, mu cuchiyíode u yejominórone udore ore uje ore timíninga yu aja quedéjnane ome dajñiequéode. Iyieja gadode ome yijorane udore ore, jé aja guesíminórone udore ore uje ore tuangóa yu iji sodé iji dajéode ga ore chaca ¡bu! iji yiquéode.
12Enga que qué ore áyipieraque dépoji yu rĩ, ga cho jeta e toque yu ome udore ore. Enga yo cobeque chutíguiji jnumi ome udore ore.
13Yudute ore ichérecheréringane ome yu uje ore pésu yadode. Paguté joradie déji yirosadode jnese. Ga udore ore pésu dáguedie ome yu uje ore chĩ́care yu iji dayaridode, ga ore chucué dáyipie quicho jeta ore chijnime yucuecaringuei iji yu.
14Mu Pangarádejná, uyu u uje yangureta ua ome yu, ga yojningame ua: –Yangureni Dupa u ua.–
15Yajnéone guedé batiga jnese jogadi tu bajmainie. Be ga ajnime yu iji yumajosórone ore jmainie, jé aja udore ore uje ore chajna yu aja quedéjnane.
16Ajñate baroi uyu yibai ome benochai úringai nanganataque. Ga aqueta yu ome báringai osongáca uté.
17Pangarádejná, átaja yu jeta jé ca yajegátigai na yu aja jnumi iji ore iquei, uje yibidi ua ome yu gu. Mu be ga ate gajnaréngone udore ore chimo pajegátigai ome raque, ga ore cho paráguiji ducódedie udire jogadi uté.
18Apésu ga ore pijnana táquechoquíode chope paraque. Udore ore u uje dicotare ore ga ore posode u jnani uréone udore ore aja dajesúode, ga jecucha ore chijna dajoyaquéode, dadojnóngamátigade aja ore.
19¡Urénga! Cuchadatépise bosongaquédatéi, uje bosongaquei uté gajnúone u cucha orerane uje que pujuseque cucha orerane udore ome udore ore yui uje ore dosóñime ua, ga bajuguína cucha orerane udore aja banguretasórone ore jnese iji jnanione udore ore edominone. Basíomeone u udore ore uje ore cho dãrésõri iji ua.
20Ome bãrétigai ome banguretasórone jnanío ore, ga bacose ore iji bari. Uje dicotárechoquíode ore pésu jórogu dáyipie quitique ome ore, mu que ajuéga jeta ore áyipie quitique tocade gu. Ga ore acoyapídi tu baguíjnai uburúdi jeta jé ca ore umajosórone ore idojnóngamátigade chise ore iji uté.
21¡Urénga, jé tiógarapísa Pangarádejnai uté úringai picotaque! Uje chingongara dajnoraquédatéi aja yu uje yugúsi pidai uté uje ore achẽraque pidai uté, mu ujuyaquei etoque iji gai, ga pãreque yu iji uté.
22Uje pisadodéringadatéi chise yu, ga yojninga:
–Pucuayaque yu aja ti, ga que yugúsapoi benomitique rĩ.–
Mu bangári yibijnane uje yibidi ua, uje yutai Báringai Pátajasṍre ome yu.
23Pangarádejnai urása uréone uaque á, beyoi ga ajnóraño uté jnese. Uje uté que chuseque ayoré uréone udore ore gu, ga gãreque ore. Jé basa ga dicotárechoquíode ore ga Pangarádejnai uté a ujuyapise ore ujetiga cho ore isijnaringuéone oré jne.
24Beyoi ga ca achietáyiñome uaque ome cuchárique yui, mu ajnusoi uágome cuchade, uaque jnese uje uacarodique Pangarádejnai uté yui ome uaque.
Currently Selected:
Sálmos 31: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
