Sálmos 107
107
1Acotáyo Pangarádejnai, uje paraque gu; ga uté ijnoraquei que chise deruénique gotique to.
2Uaque uje Pangarádejnai Dupade chijnime uáguiji uacasasórone ore ujade, ga atatayo Pangarádejnai átedatéode udore.
3Yojningane u udore ore uje ore tṍraji pachaminone jnese uje Pangarádejnai chamáta ore aja ñane; uje udore ore garanone u guedé garani, guedé cacadi, casaque garani, jé aja umusoi garani ore jnese.
4Udore uñane chisṍrina dajesúode iji erãpetarei údode, ga ore cho bijnángone iji uté. Ga que ore chise dajéreraque jeta ore chajnája pidánique jeta ore chácariji uté.
5Mu chaguhei chipatigase ore iji uté, ga ãre pose ore rĩ. ¡Ore chajni toc ejoi!
6Ga ore chinguíra dabijnanone aja Pangarádejnai Dupade ome dáringane áyuguhebátacho, ga jé u uje uté chajuque cuchade udore iji ore gai.
7Ga chorei ore iji dajeque caputai uje quítequiguíji pidai ujetiga ore cho dedai iji uté.
8Acãcho Pangarádejnai gai uje ijnoraquei cuchadaté, ga acotáyo uté to ome ipesútedaté pitijabádode uje ipesucho ome jnanione ore abode iji erámi.
9Uté u uje ajnique puyádode uje déji gosi, ga chisíome cucha pibose uási ome iyaguhé yugode ore.
10Ore ujurúgayode déji ijnangunu cuchábedie ajei, ga ore chejnáreque dáringane pigaricho uje ore chigaru ore ome ore erã́todie ojnaquéro, ga ore déji dáyuguhebátigade ajei iji uté.
11Ga ore cho daba Dupade uruode uje ore tagu udore quigode aja, uje ore dojnóngaja Dupa Pujnuéngaisṍri gatajnoquei achamisõre uté áyipie quigode ome re.
12Jecute Dupade pésu ga udore ore cho dasaguíji ore iroqué gajnéone pisáquedatéo uje sué jóroque ore gai, ga udore ore iroquéode chinguíra ore aja jnumone, ga que uñeque déji jeta chiqueta udore ore ome ore gajnéone piroquédatéo udore.
13Udore ore tibidi Pangarádejnai jeta chosõre ore, ga tangári ore ga jé u uje chátaja ore.
14Ga jé u uje uté ijnimique udore ore iji ore charipiedie ijnangunu cuchábei ajéode, jé aja uje chusũrurase ore igaritodie ojnaquéro udire iji ore údode.
15Acãcho Pangarádejnai gai ome cutejmai guerani dajnoraqué, uje pésu dapesudode cucha pitijabácho ome erámi unirisórone ore abode.
16Iji ore ujurúgayode jogadi ga uté chisite jorídedie udire aja jnumi uje pipesudei udire iji bronce. Ga chaquesu guebéode udore aja jnumi.
17Udore ore chimate raja dáringane táyipiecho gu uje ore tagu Dupade uruode aja gatuaque. Jecute udore ore cho daba date gajnaréngone udore.
18Udore ore chujnapise cucha pibosode jnese, ga ore déji eruguéjnai piagoi ome dáringane ujñapié ajámio.
19Ga udore ore poji dejode ga chinguíra dabijnanone aja Pangarádejnai jeta chiqueta ore ga jé u uje chijnime ore iji ore úringane pujuya jmainie.
20Ga chiroque daruode aja udore ore jeta chiqueta ore, jé aja uje chiqueta ore ome ore gajnenie ducódei udire yui.
21Acãcho Pangarádejnai gai ome úringai ijnorataque uje érãtique eruénique cuse, ga asíyo uté gai to ome ipesútedatéode udore ome erámi unirisórone ore abode.
22Ẽcho uaquẽrapáitigo cucha ome Pangarádejnai uté uje uacasíyo uté gai ome udore. Ajúyo uacaninaquei uté ome uté imaningone cucha.
23Uñane chajna yote quedéjna ajedaté cuchábode ome dabíode cuco uje ore tẽra dẽrapáidode dagúcha; mu jé ore chajuque gu dáringane oredie gaisóño.
24Iji yote quedéjna ajedaté cuchábode udore ga ore pañaji Pangarádejnai imanique cuchadatéode.
25Dupade narare ga jé u uje guetṍrai tṍraji úringai dara. Ga jé u uje que iyieque yote quedéjnai uté josé.
26Ga yote quedéjnai josé uaté chorei ore pi cuco aja gatajnoquei; ga quítequiguíji yote quedéjna jochai urui uté. Uje ore chimo cucha dacate pirosobádi, ga jé u uje uté chejna ore casitigai.
27Ga udore ore cho ore jodé yugode uje ore chinguíra raja quedéjnane, uje ore chejna darajade cucha quigode jnese.
28Ga udore ore poji dejode ga chinguíra dabijnanone aja Pangarádejnai jeta chiqueta ore, ga jé u uje chijnime ore iji ore úringane pujuya jmainie.
29Ga acherangóri chécãre re ga emi cho me, me, me, me. ¡Ga yodi josé cho paráguiji jnumi!
30Iji uté uje ore chimo uje yote quedéjnai cho páguiji jnumi, ga jé u uje ore nína re. Ga Dupade chorei ore iji ore ipotigádi cuchade batigábeque.
31Acãcho Pangarádejnai gai uje ijnoraquei cuchadaté, ga acotáyo uté to ome ipesútedaté pitijabádode uje ipesucho ome jnanione ore abode iji erámi.
32Ga acotáyo uté iji uacáguedie jogadébei iji uaquedai, jé aja jeta acotáyo uté iji pangaránone ore enominone.
33Dupade chécãre yote quedéjnane udore ga nóña ga erã́petaréque; jé basa ga sibíjnane nóña ga erãpe cajnóninga.
34Jé basa ga uje cucha pacade potipite mu nóña ga cho echo jogatique, jeta chinoningase erámi ga gose pidai idaisórone udore ore ate noñángone udore.
35Pangarádejnai pésu ga erãpetarei uté nóña ga simíjna quique; jé basa ga erãpe cajnóninga mu nóña ga tié jochacho.
36Ga uté pésu chaguhei posode ore jogadi iji uté, ga udore ore pésu dedai iji uté uje érãtique ore chimópo chaguhénique iji uté rĩ.
37Ga ore chaca cuchade iji garai, jé aja ore acadie úva, ga ore ujuya dacade cucha udore úringane pĩrácho.
38Dupade chuse udore ore guio ga ore quérã ga jiépisi ore. Ga que juéga jeta ore gachidode udore batigai doi jnumi gotique.
39Ga jé u uje udore ore batigai doi jnumi ga udore ore chise dáringane dipónguerã ga gose pijosipié noñánguenie uje tṍraji guesi ome ore, jé aja ore ujuré gajnéone cucha, jé aja cucha dacadode uje na ore aja jnumone.
40Dupade chinguíra dipoi aja pasuté pejóporingué ipesutodie udire ga juéga jeta ore bijnáji erãpetarei, uje íjnoque ore ajnatique dajeque iji uté gu.
41Jé basa ga chijnime ayoré jmatágode udore ore iji ore gajnéone páyuguhebátiga jmainie; pésu ga jiépisi ore jogasúode ore abode iji uté ga ore cho cucha pachitique ome úringai dipesé.
42A jnani jmapié arégode ore chimo udore jne ga jé u uje ore nína re ome udore quigode. Jé basa ga ayoré ate gajnaréngone udore a ore cho paraque jne uje pujuruque ore pijnani gu uje que ore chirajápo daru quitígome ore rĩ.
43Udore ore uje áyipierãque ore ga ore chidójnangapísa cuchade udojo ga a ore chiraja Pangarádejnai ijnoraquédatéi quigode jne.
Currently Selected:
Sálmos 107: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
