Sálmos 106
106
1¡Picotaque Opejã Pangarádejnai uté!
¡Acãcho Pangarádejnai gai uje paraguipise uté; ga uté osongaquei érãtique chise deruénique to!
2¿Gosi dérasi a? jeta tujua Pangarádejnai átedatéode jnese uje uté pésu udore ome cutejmai detotiguejna. ¿Jeoga uñeque dérasi a, jeta chatata Pangarádejnai uté gajnéone udore picotaquédatéo jnese?
3Pininaquei gajnesórone udore ore chetingare cucha uréone quigode gatuaque. Ga jecucha ore pésu cuchade uje ũrepíso quigode.
4Pangarádejná, ca báyipie jnoji uyu jeta apésu barasade ore arétigai. Ga abágui yu to ome báringai piquetasõre ujeta aqueta udore ore.
5Apésu ga jé yo bajegaidode udore ore ome ore arétigai, jeta jé yopise barasade udore ore to ome ore ininaquei. Ga jé u jne jeta yáta yu aja barasade ore ome udore ore icotaquéode ome ua, uje barasade udore ore u uje bo bajnéngu ore.
6Yipéco pisijnaringuéone, ga jé yoco yoca cásodicáite ore to; jé aja uje yicagóji quedéjnane ome cucha uréone quigode, ga yocadode gajnarécho.
7Uje yocayode qué ore déji Egípto nanique, ga ore chicadígui bátedaté pitijabádode udore nanique, ga ore chicadígui cutejmai bosongaquédaté, ga ore chise Yote Quedéjna Caratai ome dachietabáitigade ome ua.
8Mu Pangarádejnai chiqueta udore ore gu uté i úringai pĩcaraque, jeta pijoque cutejma ujopié cuchabe ome erámi unirisórone ore.
9Uje uté dosója Yote Quedéjna Caratai uté jeta chajuque re iji ñane ga nóña ga cajnóninga uté jochai. Ga jé u uje pésu ga ore chajuque uté ajedaté casé qui uje cho erã́petarétique iji uté jmainie.
10Ga isocai u uté uje chiqueta ore ga ore chapídome damajosórone ore, uje pijnimique ore iji ore guetesórone udore ore jmainie.
11Yodi chajnésarapo dajogadi ga chaco udore ore umajosórone gai, ga que udore uñeque chapídiji gotic.
12Ga jé u uje ore changureta Dupade uru qui casodica ome raque uje chichaga ore yui nanique, ga jé u uje ore chijñiecãre ga ore chicota Pangarádejnai uté.
13Mu jĩraque ore chicadígui Dupade isocade udore quigode, ga que ore chucué uté áyipie quitique ome raque bajaque.
14Iji erãpetarei ga ore doi dapotigué ayoréode quigode ome raque. Ga jé u uje ore chetingare Dupade iji erãpe tagóidei uté.
15Ga jé u uje uté chisíome ore ucuegode cucha ome ore, mu chiroque dequejnareque chagúi aja ore jeta chejna ore.
16Iji ore irengúi ga ore charatáyime Moisés úringai eduguéjna ome; ga ore isocai upo rĩ ome Aarón, uje Pangarádejnai cãraque uté ome daroquéode.
17Jnumi chungare dabai ga chinire Datán; ga Abirán jorane ore chicha dódeminí aja uté.
18Pioque papósi tagu puague uaté gai ¡jaripe! Uje gajnarenguipise udore ore adode, ga que cho daquebégu uñeque uje pioque ocarate cuchábei udire gu.
19Iji cucarani uje i tu Horeb ore chibore óro péode ga ore pésu aquirájna ape choqui oré iji uté jeta ore cho dadupa iji, ga ore chichaga dagataidie aja jnumi iji dapesudé uaté iquei.
20Ore chécãre dangureni Dupapise ome damané aquirájna ape oré uje cachi jnacarai gutoi aquirájnanie mu.
21Ore chicadígui daquetasṍri Dupade uté, uje uté u uje pésu cuchadatéode iji Egípto ome ore.
22Uje uté pésu cucha pitijabádode iji puniri uté uje i tu Cam ome ore, jé aja cuchade uñane uje chajuque ore agutedie iji Yote Quedéjna Caratai uté.
23Uje Dupade chĩ́care pejnai ome israélgosode ore iji uté, mu que doi dáyipiedie udire quigode gu uje edójnari daroque Moisés uté chicha raja darasade ore yui ome Dupade uté, ga chajni Dupade uté ome úringai ájningarãc jeta jé ca chejna udore ore.
24Ore poja cutejmai uté jnupe ueratígajna; enga que ore changureta Dupade ichagájade cucha udore yúode ome raque.
25Uje udore ore cho chere, chere, chere iji daguíjnane cárpa údode, ga que ore doi Pangarádejnai áyipie quitique gotique.
26Jecute Pangarádejnai uté jĩraque chãrai dajmanecade iji gaté, ga chingo daru iyiejnane aja ore uje a ore toi jne iji erãpetarei uté.
27Ga uté pésu jeta ore ájnape disi ejórigo a ore chise dáringáringo ducañerájma iji pachaminone unirísoningo ore ujáningo jne uje Pangarádejnai uté a chisite ore aja quedéjnaringo jne iji erã́tigo.
28Ga udore a ore gajnúone u aquirájnane uje pigarique ore etabi erásorone aja ñane ome ore isatique cucha pisaque bisideque. Uje a ore doi dupa quedéjnarique iroquéode uje uté i tu Baal Peor. Jé aja uje ore tagu dupa quedéjnane udore gajnéone cucha piboso uje dupai uté íjnoque ucuecaringuei iji.
29Ga jé u uje ore pésu ga Pangarádejnai ájningai tocade ome udore ore uje ore ipesudode cucha noñácho chácariji uté údode; ga jé u uje dequejnareque dequejnangóri tocade ome udore ore.
30Mu quigade ga Finees uté chague ga jé u uje pésu cucha arégode udore aja quigode; ga jé u uje chaquĩ́ra dequejnareque dequejnangóri uté.
31Ga jé u uje uté ate arei uté jogate Dupade ajei, ga que pamurañaque uté ate arei uté ome disi ejórigo ore jnese iji deréjna pitárigo jne.
32Uje ore déji yodode uje i tu Meríba, ga ore jnari Pangarádejnai ájningai ome re, ga jé u uje pujuredie chise Moisés uté, ga gose ore,
33uje ore chucué Moisés uté ájningárique ome raque, ga jĩraque Moisés uté tṍra daru noñángone aja guesi ome ore, uje que chucué dáyipie quicho bajaque.
34Que ore pésu Dupade utoquei ome raque uje a ore chejnárase puniri uté unirisórone ore, uje Dupade jé urúo mu.
35Mu ore chimere riji purása quedéjnane udore ore ujade, ga ore doi udore ore isocade to.
36Ga ore catecã́ri udore ore angurenone ayoré gajnúo to, ga jé u uje ore isoca gajnaréngone udore igarique ore, ga jé ore chise dagachodi.
37Ga ore guẽrapáicho dabode, dabidie ore ome ore angurenone udore cucha bisidécho uje garani u pujopié noñánguenie.
38Ga ore chojne ome dabode, dabidie ore iyode uje que ore ba gajnetique cucha cuse mu. Uje ore tẽra ore ome cananéogosode ore angurenone dupa quedéjna. Ga ore iyode udore úringane pojnecho pésu jnumi uté úringai noñaque.
39Udore ore isocade u uje pésu ore úringane iguirípiecojna uje que ore chedu Dupápisi úringárique pangurete; ga udore ore gajnúone u jnanírique jeoga chequéraque uje ore chapuse dacotedie, dabayode ore aja ome dajmapié noñánguenie.
40Pangarádejnai ájningai tocade ome darasade udore ore, ga Pangarádejnai uté chetaque udore ore úringane pabío.
41Jecute tẽra darasade udore ore ome purása quedéjnane ore, ga jé u uje ore umajosórone udore purása quedéjna sué udore ore gai.
42Ga ore umajosórone udore cho dajosipié ome ore, ga udore ore umajosórone chosi ore iji jnumi jeta ore cho daróguiji ore.
43Gatuaque ga Dupade chijnime udore ore iji ore umajosórone ore jmainie, mu udore ore chajo raja cuchade ga jé ore chajnera dádi aja jnumi ome dapesute noñángone udore.
44Mu Dupade chajmita ore áyuguhebátiga gajnéone cucha quigode udore, uje chudute ore agoyedie iji dejode.
45Ga jnusina daru casodica ome ore, jecute chécãre dáyipie ome ore uje uté ijnoraquei jiépisi gu.
46Ga Dupade uté pésu ga udore ore isasórone jnese chiraja posongaquei ome ore to.
47Pangarádejná, aqueta yoque, uje Yocudupade tu ua. Be ga amáta uyoque aja ñane uje yugúcoi quedéjnane ome ñane iji pachamite quedéjnane; uje bagaidi u ujetiga yicotágo bei pirosobádejnai, ga yinínango yógome báringai picotaque.
48¡Picotaque Opejã israélgosode ore Angarádejnai Dupade uté gatuaque iji deréjna pitade jnese!
Erámi achamisórone, jé tiógara jeta ojnicho jnese:
–¡Jé qui u Amén!–
¡Picotaque Opejã Pangarádejnai Dupade!
Currently Selected:
Sálmos 106: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
