Sálmos 108
108
Eduguéjna cuchábi David iradedie uña u.
1Dupade á, yidota yu iji báringai pangurete ome yáyipie jnese. A yirate piradedie uje déji Sálmos, uje yicotaquéode gajnesṍri tu ua, ga yejna yuja ua.
2¡Árpa, jé aja ore yugode cucha uñane, ãrijíño to! Ga yiringare dire icha di uté.
3Pangarádejná, a yicotai u ua jne ome pidáyode jnese. Ga a yirate ore iradedie uje déji Sálmos ome punirone jnese.
4Bajnoraquei sué gatajnoquei uté gai ome úringai cuchadaté. ¡Báringai ũré chise gatajnoquei uté to!
5Urénga, Dupade á, yajéode u ujetiga pijosique ua iji gaté ome cuchade jnese iji gatajnoquei. Ajuéga ga bangoningájnai déji jnumi udé gai jnese.
6Ujetiga barása bedójnarione udore chise dáringáringo piraméo, ga be ga aqueta ore ome bãrachu piquetato, ga achajnai yu.
7Dupade déji dayarite pirosobádejnai uté uje chojninga:
–A yajuguína pijogadi Siquem uté ome uaque jne, ga a jé u jeta yinína yu. Jé aja jeta yajuguína tuijnai ome uaque to jne uje uté i tu Sucot.
8Yajneque Galaad uté, jé aja Manasés uté; jé basa ga Efraín uté isoldate dipeséode u uje gãreque puniri yui; ga Judá uté gajnua tu yoguéraque uje déji yijmanai ome yúringárique pangarate, uje Peduguéjna Cuchábi a tṍraji Judá uté jne gu.
9Yacãra puniri Moab uté aja yesãrapié, uje imoi tu uje cucha bisideque gu. Jé basa ga yṍra yuchiédode aja puniri Edom uté gai, ga imoi tu ujeta yujnué ore gai jne. Jé basa ga a yibite filistéogosode ore gai ome yúringai Pujnuéngaisṍre jne.–
10–¿Ama gosi urásu jeta chijnoque yuja ore inama uaté uéchaminóri pidai? ¿Ga gosi chorase Edom gabi dajeque quigome yu?
11¿Ama Dupade, jé ca ua u a uje chucuase yógaja ti yui? Ga Dupade á, que ajínapo yógaja yoquijocaningárique rĩ.
12Be ga átaja yógome yocumajosórone ore, uje que cuchárique tṍraji jnanione yocátajaquéode ome ñane gu.
13Mu pujnuéngaisṍre yoque jne, ga gose Dupade uté. A uté chuchiéjna yocumajosórone ore aja jnumi ga chĩro ore aja ti.–
Currently Selected:
Sálmos 108: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
