Sálmos 104
104
1¡A yicota Pangarádejnai jne ome yáyipie jnese! ¡Urénga, Yangarádejná, Yudupade á, cuchadaté ua! Ga bo bora piguidéji cutejmai bangoningájna uje chise beruéode jnese, ga bajninguese bayaridi ome benocha goningane.
2Ga baco babai ome báringai nanganataque ga cho pepeque piguitíguiji babai. Ga cho ujetiga ayo gatajnoquei údi ga cho carpa pungaratique iji bajmainie.
3Bachajapite baguíjna cutádode udore aja yodode gai, ga érãtique udore cho jmuñúnguiji dajogadi uté iji gatajnoquei. Ga gue abujadie u uje boru aja quedéjnane ga cho guebéquedaté pibírique ome ua. ¡Emi gajnui u chugúpẽre chotique ujetiga agúsiji uté ujnóngone gai aja ajesúode!
4Bo barógode gaté jogosórone ore gajnu iji úyujnanie, acherangórone ore. Enga ore gajnunie jé upo pioque ocarádejnanie rĩ.
5Bachajapite erámi tudé aja charidi ga bapésu uté iríbidi iji údi jeta jé ca cho jmuñúnguiji dayaridi iji deréjna pitade údode jnese.
6Baco jnumi gai ome yote quedéjna ajé cuchábode udore, ga jnumi uté cho daguite cucha piguidíji yodi uté; ga yodi uté chaco cucarãte yoricode gáyode to.
7Mu badosója yodi uté ga jĩraque chayome ua. Uje yodi uté chudute barecujaidie uje cho gue darade ga jĩraque ore jno ¡bu! aja dajesúode.
8Ga yodi uté tṍraji cucaranone ójodie ga chayója yopídode iji tuijnane udore jé aja dajogadode, uje bẽrate yodode udore jogadi ome ore gu.
9Bapésapo yodode udore eruéode rĩ ga que choja bapesudi eruei gotique rĩ, ujetiga ca doi ga chacópo erámi gai te rĩ.
10Ua u uje bapésu ga simíjnane chécãre raja tuijnane jeta chayóji tié jochade iji cucarãte orónenie ujade aja dajesúode.
11Yodi uté ga cuchiso sijnángone ore chóji uté aja dajesúode iji dajogadode erámio; ga burica quedéjna aségode udore ore uyádode íjnongome uté uje ore chójiji.
12Chugúperone iji gatajnoquei ore chicha daguíjnane aja tié jochade udore edúdode; ga ore chicha dáringane ijñiecáca aja poridie udire caningóronie ujade.
13Ua u uje bata cucarãte orónenie iji jnumi ome gueyequejnanie uje tṍraji baguíjnai iji gatajnoquei uté, ga bapésu jnumi usubudéringai gu bẽrapáidode cucha udore adie.
14Bapésu jnacarai ome gunorone cuchiso jeta ore tagu, ga ua upo rĩ uje bapésu cucha pacade iquéraningai ome jnanione udore ore uje ore chĩrase dacade cucha udore údode jeta chaquesu re ga ore potígo cucha tṍraji.
15Ga ore acaque uña uje i tu úva, adie otadi u uje pésu ore itijínaquéode iji ore ucuecaringuei; jé basa ga aceite u uje pésu udore ore enochai ga cho nánga, nánga; jé basa ga arureque pibosode udore u uje chisíome petotiguei ome dagunorone udore.
16Pore ponai que ore uyátique cuse to ome Pangarádejnai uté gueranone guéo ome udire. Uje Pangarádejnai jé acai udire uñanie uje ore chojningame udire cedro uje tṍraji jogadi uje i tu Líbano.
17Uje chugúpẽre ajámaminie ore chicha daguíjnane aja udire; jé basa ga ayúcunori gajnúone chicha daguíjnane aja poridie uña uje i tu píno.
18Cucarãte yoricode ga áyasa quedéjna aséguedie ore gajnepite. Jé basa ga odóco quedéjnanie ore pógu re iji cucarãte ujade.
19Bapésu guedoside gu jeta pijoque siqueré, esoi ore eruéode. Guedé chiraja dasocai ome re to jeta chaca aja dabié.
20Ua u uje bãri ijnangunua údi ga e dejai u ome ua. Ga jé u uje cuchisode ore iji erámi ore jnome dáringane urugu iji uté.
21Caratedie ore chijna dajéode aja dajesúode ome dáringáringo chigóca unératácho. Ga ore chirote Dupade yui jeta chisíome ore potígo ome ore.
22Mu uje guedé tocade ga udore ore jno ga ore moji daguíjnane ajéode.
23Jnanione uje ore chisa dasagode cucha pisacho iji deréjnai údode ga ore cha uje e cho sere erámi.
24Pangarádejná, ¿bamaningone cucha udore uatigájnai ĩ́rique? Bapésu cuchade udore jnese gu cutejmai báyuquetotiguejná. Bamaningone cucha udore chĩreta jnumi udé ome dáringane bamanicho.
25Yote quedéjna cuchábi déji te, ga queru uté ga chicáji toniñeque ome dajochai ga uásejna ujõsórone iji uté uje que pisecarãte udore ore batigárique, uje ujṍsore querúode, ajámamone ore déji uté jnese.
26Cucode ore ajnai jé u yote quedéjnai uté, ga yodi ujṍsore guichaya cuchátique déji uté. Yodi ujṍsore guichaya cuchábi uté u uje bamanique uté nanique jeta chicha dáringai dago aja dayaridi uté yodi uté.
27Cuchade udojo ore jnese ore chirote bei jeta asíome ore potígo ome ore iji ore gajnepítigo deréjna.
28Uje basíome ore ga udore ore chimáta ome re. Uje bangare bajmanai ga udore ore nunaji dáringane chagúo ome ua, ome beranone cucha omío ome ore.
29Uje bapógu bedodie, ga udore ore todo ga ore tãrara ome dasadodéringai. Ujeta ajnime udore ore ujñari iji ore ga ore toi ga ore chajnésaru dáringane jnupuñúringa.
30Mu ujetiga aroque Bajopié aja udore ga jé u uje pimanicho. Ga bapésu erámi enochai ga cho cucha ichárique iji bajmainie.
31A jecucha ga Pangarádejnai ingoningájnai jogate jne, uje togójma gu. A Pangarádejnai uté nína re jne ome damaningone cucha.
32Uje Pangarádejnai toji erámi gai, ga jnumi tãrara iji uté edominone iquei. Uje uté chisa cucarãte yoricode udore ga popíjna iji jnumi.
33Uje qué yapídiji erámi tudé ga yirate yiradedie ome Pangarádejnai uté. Yirate yiradedie ome uté ome yachachagúgode uje yedo Yangureni Dupa uté jé aja yucuecaringuei eruénique.
34Uje yáyipie jogate Pangarádejnai uté ga yajéode u jeta uté chimesẽre yáyipie quigode udore, uje yinína yu ome uté gu.
35¡Ueradi u jeta pejnaque cucha gajnaréngone ipesusórone ore iji erámi údode jnese, jé aja sijnángone ore jeta íjnoque ore iji erámi to!
¡Mu ome yu ga a jé yicota Pangarádejnai ome yáyipie jnese jne!
¡Picotaque Opejã Pangarádejnai uté!
Currently Selected:
Sálmos 104: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
