Sálmos 103
103
Peduguéjnai David iradedie uña u.
1A yicota Pangarádejnai uté gatuaque jne ome yáyipie. Yicota Pangarádejnai uté i pirosobádejnai ome yáyipie jnese ga yejna yuja uté úringai pisígai.
2A jecucha yacacãre Pangarádejnai jne ome yáyipie omenie gatuaque, enga a jé ca yicadígui uté gueranone yagutíyabácho uñeque ome yu jne.
3Uté u uje ĩroque yate gajnaréngone, ga ĩrocápo yute chagúode rĩ.
4Uté upo rĩ uje chãraque yu ome pitoringai ipesudedie ducódei. Ga uté osongaquei, ijnoraquei ome yu cho ducayo pibírique ome yu.
5Ga que yaroriguíji cucha ujñapetade gu uté osongaquéode ome yu; ga chisíome yetotiguei ome yu gaté, ga yajnui tu árorei chotique ome uté uje chécãre daramanie iji re gatuaque, ga ichápise gatuaque.
6Ũrepísi tu Pangarádejnai uté ome dajirigode pacho ga chirota udore ore jnese uje ore déji dajnenie pijosipiei jmainie.
7Pangarádejnai uté chimate dajmapiedie quigode aja Moisés, ga israélgosode udore ore pañaji Dupade uté ipesudode cucha to iji dajade.
8Pangarádejnai pañerasõre paráguejna uté. Osongáca uté ga que jĩraque cho júruru gotique uje pijnoraquei irágu gu.
9Pangarádejnai uté que chagotája yoquiba gajnetique cucha, jé aja jeta jé ca chagotája dáringai ájningarãque ome yoque.
10Jé yitiójorasa yocajnéone Dupade ujuyaquéo jeta cho dajuñame yoque ome yocate gajnaréngone oréraque, mu que yirajágo udore ore isatique ome yoc. Jé tiógara jeta cho dajuñame uyoque ome yoquipesudode cucha noñácho, mu que doi ga chimate yógome udore gotígo to.
11Urénga, uté ijnoraquei érãtique chise deruénique ome udore uje ore dosóñime Pangarádejnai uté. Ga cutejmai ijnoraqué uté adi jé u gatajnoquei uje idájapise iji jnumi marínga, jé ijnoraquei chise uté gosi.
12Uté chisa yocate gajnaréngone, ga tṍraja toniñeque iji yoque. Isocai jé u ome guedé garani, cacadi ore, uje idája ore iji ñane.
13Pangarádejnai osõrataque ome udore ore uje ore dosóñime uté, ga gajnui tu jnani abechutique ome dabode uje chijnóra ore.
14Uté chiraja yocúringane poracho nanique, ga jnusinapísa uje jnumi udé uru yoque.
15Jnanione ore ucuecaringuei iji erámi cho ugarabia; adi jé u cucha pojnángueraque uje suéji dabotipídi jnupe, ga pojna ñane gai iji uté.
16Ga emi doi cucha pojnánguenie udire ga chungurásiji gaté ga erã́ta udire jogadi. Iji jogadi uté ga que gosi déji jeta chirajápo dajmitique iji uté rĩ.
17Mu Pangarádejnai ijnoraquédatéi jé jogate aro nanique ome dáringai eyúgojma, ga jecucha déji udore ore gai uje ore dosóñime uté. Ga uté úringai ũré érãtique eruénique cuse ome darosójmasórone udore ore atígo jé aja ore ape gatérigo ore atígo jne.
18Isocai u ome udore ore uje ore dopísi Dupade uru iyiejnane udore quigode uje ichagápiode cucha udore u nanique, ga udore ore jnusinapísa uté iroquéode quigode jeta ore tangári.
19Pangarádejnai chicha dayarite ueradi aja gatajnoquei, ga uté chajire cuchade jnese ome dáringai peduguéjna.
20¡Acacã́cho Pangarádejnai ome uacaru ueradode, gaté unirísõre timíngone uaque á! Uaque u uje uacabeyopísi puruode udore quigode uje Dupade iroquei quicho ome uaque.
21Pangarádejnai iroque dipeséode uaque iji gatajnoquei, ¡acotáyo uté to jnese! Yojningane u uté irógode uaque uje uacamácho uté áyipie quigode aja jnumi.
22Pangarádejnai imaningone cucha uaque jnese á, ¡asíome uté gajnéone picotaquéo ome uté jnese, iji erãpe ponai údode uje uté déji dáringai Eduguéjna cuchape ome udore jnese!
¡A yicota Pangarádejnai uté jne ome yáyipie jnese!
Currently Selected:
Sálmos 103: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
