Sálmos 105
105
1Acãcho Pangarádejnai Dupade gai, ga ajúyo uté i. Atatayo ome pidáyode iji erámone uté ipesudode cucha.
2Aracho uacaradedie ome uté jé aja sálmos jeta edoyo ome uacachachagúgode. ¡Ga atatayo uté ipesútedatéode!
3Achietáyoji uté i pirosobádejnai. Ore uje ore chucué Pangarádejnai ome raque ga ore áyipie nínapúsu re.
4Acueyoi Pangarádejnai ome uaque, ga acueyoi uté úringai ujopíerãque cuchape ome uaque. Jecucha acueyoi Pangarádejnai uté enochai ome uaque gatuaque.
5Ajnusináño uté ipesútedatéode uje ueracho ga pitijabácho, jé aja arecujaidie uje e patatádei ome uaque.
6Yojningane u uaque, uje uacãrapi u uté iro cásodicáite jnani bajaque uñai uje i tu Abraham; ga uaque u to uje uacãrapi u Jacob uté, uje Pangarádejnai ajegaite uaque gu.
7Uté u Pangarádejnai, Yocai Dupade. ¡U uje ajiritíga uréone déji erámi údode jnese!
8Pujnié disi ejórigui chise mil iji Dupade áyipiedie udire yui marínga, que doi ga chicadígui dachagájarigo cucha uje chichaga ore yui nanique.
9Ga ichagápiode udore cucha u uje chingo Abraham nanique, ga chajo raja dachagájade cucha udore ome Isaac uté uje chichaga uté yui to.
10Ga Dupade pésapo ingoméone cucha ucode úringai pirosobate ome Jacob uté nanique rĩ, ga que pecãracápo ichagájarigo cucha udore quigode ome Israel uté iji deréjna pitade jnese rĩ.
11Uje chojninga:
–A yisíome Canaán ome ua jne jeta ópise bajnéngu uté, uje bajnei jé u ome yu gu.–
12Uje garósi israélgosode udore ore batigai, u uje garósipise ore, ga purása quedéjna ore iji puniri uté údode.
13Ga ore chapa aja dajesúode, uje ore diguiji purása quedéjnane ore ejode iji erámi uté.
14Dupade que juéga jetiga uñeque cho dajosipié ome israélgosode udore ore, mu uté cho júruru pasuté cuchábedie iji erámi gu udore ore.
15Uje chósi te:
–Ca ajocáso yajegaidode udore ore, enga ca oyópo uacamitiguéome yirógode udore uñeque rĩ uje udore i tu proféta.–
16Pangarádejnai uté chiroque chaguhei aja erámi uté, ga chinoningase cucha pibosode jnese.
17Mu chiroque jnani aja udore ore iquei. Mu i tu José ga pẽrapaite uté ome gaisórone ore jeta ore cho daróguiji José uté bisideque.
18Ga ore chigaru uté otadode ome ojnaquérodie, ga ore suru gai jé aja uje ore chadia guebei aja etabi ome úringai pujurúgai.
19Ga udore jé chuságaja uté uru tocachugode eruei iji quigade, uje Pangarádejnai uruode chetingare José uté, mu jé ũré.
20Peduguéjna cuchábi doi ga chirame José uté iji úringai pujurúgai; pidáyode eduguéjnai juéga ome dajurúgai uté jeta doi guesi to.
21Enga pichajapite uté aja úringai eduguéjna to iji eduguéjnai uté iguíjnai jnese. Ga uté úringai eduguéjna qui u uje chajire uté gajnéone cucha yui jnese.
22Enga uté isai cucha pisaque u uje chacate dojode eduguéjna ore ome dajegaidode cucha quigode, uje sué ore gai gu; ga cho payuquetotiguei quique ome jnani ibijógode uñane to.
23Enga jé u uje Israel uté diji Egípto to, ga Jacob uté cho purása quedéjnarique iji ore uniri Cam uté, uje Cam uté u egíptogosode ore gãrapi.
24Pangarádejnai pésu ga urasade israélgose udore ore quérã, quérã iji uté gatuaque. Ga udore ore etotiguei sué detesórone udore ore gai.
25Mu Pangarádejnai uté pésu ga egíptogosode cho dangojñóngu uté urasade ore, ga ore pésu dáyipie gajnarénguenie quigode ome uté irógode ore.
26Pangarádejnai chiroque daroi Moisés, jé aja dajegaidi Aarón uté.
27Ga udore ore pésu Dupade ipesútedaté pitijabádode iji udore ore ujade. Ga Dupade uté itijabádode cucha pijoque ome ore iji ore uniri Cam uté údode.
28Ga uté chiroque ijnangununie aja puniri uté ga juduque jnumi iji jnumi. Uje iroque gárode udore ore que ore tagu Dupade uruode aja gotic.
29Pésu ga yodode jnese iji ore uniri nóña ga diquiyojnai, ga udire chequésãre oyídode.
30Quigade enga chiranie yore Egípto uté gai jnese, ga jé chuságaja eduguéjna cuchábi mochápiode to.
31Dupade narare ga jutíca dipeséode jé aja jnapié uaté tocade ome uté uru quigode, ga chĩreta puniri uté údode jnese.
32Ga chiroque guei aja puniri uté uje nóña ga ebe uásei, ga chirócapo ajnorane aja ore uniri údode rĩ.
33Ga Dupade chejna ore acade erejna quedéjna jé aja poridie uje i tu higuéra; ga chajnangarase pore dipesedie aja dejode, mu ajnangónguei iji puniri Egípto uté údode jnese.
34Dupade narare ga chirócapo chuguyúgu dipesedie, amuranie ore aja Egípto rĩ, jeta udire ore diji Egípto uté to, ga que pisecaranei udire uje jiei, ga ¡que toc jeta gosi chiraja eruénique!
35Ga chuguyúgudie udire tagu ugarabia, pore gatoi ore, ga ore chejnápise udore uje suéji jnumi.
36Quigade enga Pangarádejnai Dupade chiroque pitoringai aja Egípto údode jeta chequésãre ore ape basuque bajade, uje ore utíode u udore.
37Pangarádejnai chijnime israélgosode udore ore iji Egípto ga ore ujuya pláta, óro ore aja ore úringane do. Israélgosode uáguedie udire uñáraque que cho sebec, sebeque aja jnumi ome dáringane do aja dajesui uté.
38Egíptogosode ore nína re uje israélgosode e ore jno, chamáñaje egíptogosode udore ore dosoñipísome israélgosode udore ore gu.
39Pangarádejnai chaco israélgosode ore gai aja ore ajesui, ga ore chácariji gue abuja uaté uburúdi aja dajesui; jé basa ga pioque ocaraidie chijñate ore guípiedie gai aja ore ajesui iji dejade.
40Israélgosode udore ore chutai dabotique cucha pibose ga Dupade chiroque jiriridíe aja udore ore jeta ore tagu; ga arureque uje tṍraji gaté ome udore ore pésu ore usubudéringai.
41Jé basa ga chajuque cucarané uaté ga yodi pojnámiji uaté ga chayóji erã́petarétique údode ga cho tié bayéraque aja dajesui.
42Dupade jnusina darecujate pirosobádedie quigode ome ore uje chichaga ore yui ica; uje jé uruode u udore ome daroi Abraham nanique.
43Chijnime dedójnarione darása ore iji uté, ga ore chachietáji raque aja dajesui ome dachorájnane.
44Ga chisíome punirone ome israélgosode udore ore uje chijnáji unirísõre bajade ore gari ga israélgosode udore ore cho dajnéngu jnumi uté idáisõre bajade ore agutíyabádode cucha jnese iji uté.
45Pangarádejnai pésu udore gu ujetiga ore suse uru pirosobádode udore guio, jé aja ujetiga ore doi uté áyipie parénguenie quigode jnese.
¡Jé tiógarapísa Pangarádejnai uté úringai picotaque!
Currently Selected:
Sálmos 105: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
