Provérbios 14
14
1Chequé amanachuguedie que ore cho ñane ome dajmapiedie gotique. Áyipierenie ore pésu daguíjnane ga ueradipise ore isocade ome. Cho jetiga ore iguíjnai adode chécãre riji ore jmainie. Jé basa ga chequé táyipieguedie que ore pésu cucháriguiji daguíjnai ga ore adode iji daguíjnai doi jnumone ga ore adode bijnápisome ore.
2Picotaque Pangarádejnai ome ayoré ate arégode ore ate omone. Jé basa ga pingojñoque ome udore ore uje que ore chañuru dadode guio.
3Táyipiegode udore ore u uje ore icotaquéode garani tu ore pijnani ome raque. Jé basa ga áyipierane ore chusípise daruode guio ome raque, ga cho jetiga ore pijnani gãreque ore ome cuchade.
4Uje utácachoquí gosi ga gosi tagu dacade cucha gu uje chutãre, mu garósi acade cucha uje gusu ome gu. Jé basa ga gosi dorási buricárique ga buricai chĩrase gosi guejnai to ga quene gosi acade cucha jiépisi iji uté uje buricai cháta utácai aja uté gosi.
5Cuchárique ipañasórone que ore cáputapísiji daru quitique jnese gotique. Ujetiga ũrepise gosi ome daruode ga que chãra dojórique ayoré gotique. Jé basa ga ayoré aringácachoquí gosi enga que pusi dojña quitique gu uje que ũré ome dojña quitique.
6Dicotárechoquíode uje ore dojnóngaja dojode ayoré uruode quigode, a ore chucué jórogui pirajatigai ome raque mu que ore chise gotique. Jé basa ga irajatade ga obiréjna ome ore uje jĩraque ore chise darajatigai ¡bu!
7Angara bajesúringome ate gajnaréngone udore ore. Uje táyipieque ore ga que ore chiraja jeta ore cho baquigome pate arétique.
8Áyipierane ore chiraja dáyipie quigode iji ñane jetiga omío, jeoga gajnareque ore áyipie quigode. Jé basa ga táyipiegode jé ore arane upúsu raque ome darapatáringane.
9Táyipiegode que ore chajéngome dasocade ome dojórique ayoré ga ore irasique rome dadode uje ore chujñieta dojode ayoré ome date gajnaréngone ga ore cana ore gáyode. Mu jnani parágode ore chingongara date gajnaréngone aja dojode ayoréo ore ga ore ujode ayoré chicadígui ore adode enga ore ajéode chopo sere ome ñane rĩ.
10Que toc ujetiga ayoré quedéjnarique chiraja dojórique ayoré áyipie quitique iji ajei. Ayoré chojmara, chojmarane ore chiraja dáyipie quigode ome rac, jeoga ore áyuguhebátigarigo déji ore, jeoga ore ininaquéo.
11A pajnangaráña jnani sijnángone igochocoidie iji dire uñeque. Mu jnani ate arégode a ore iguíjnane jogadípiso, enga a ore iguíjnane chise dáringáringo ueradéjnapíso iji dire uñeque.
12Gosi a chosírase eti pucuecaringuei garãsóri u dajei uté mu pitoringai garãsóri tu. Ga gosi chajna mu chimo pitoringai iji dajei tuté eruei.
13Uje yinganángoja quedéjnane ga cho jetiga yoquirasique yoque mu áyuguhebaté yocáyipie. Uje yiyágo yinganángo ga jĩraque yocagoyedie chise yoque to.
14Ayoré áyipierãi, ayoré táyipiei ore isocade iborátajade cucha cuse jnese ga cãra rome ñane. Táyipiei uté a cho daba date noñángone udore. Jé basa ga áyipierãi uté a pisígai jne ome date arégode udore.
15Ayoré turuturéode ore changureta cuchade jnese, enga jĩraque ore doi dojode ayoré uruode quigode. Mu áyipierane quene ore pésu cuchárique uje e ore chajiripise aja quigode bajaque.
16Ujetiga áyipierãque gosi ga uté que cunguésõri ate gajnarétique go. Jé basa ga ayoré turuturérique a ujórigo turuturé dejéna uté aja date gajnaréngone enga jĩraque doi to.
17Ujetiga ayoréode ore jĩraque tagu dejode ome cuchade, enga ore isocai uté chiborátaja puturuturéringane. Jé basa ayoréode uñane ore chajiripise dáyipie quigode bajaque ome cuchade jnese.
18Táyipiegode, turuturéode ore gajneque datáyipietigade, daturuturéringane ore. Jé basa ga ayoré áyipierane ore tṍraji dajñarenie ome darajatigade iji cucha arégode.
19A chise dínique jne ujetiga ayoré ate gajnaréngone ore chichaga dagataidie aja jnumi tiji ayoré parágode ore iquei. Enga a chutápoi cucha pibotíguiji ayoré ate arégode ore iguíjnane piagode jne rĩ.
20Ujetiga jmataque gosi ga que piyaque unétique ome jõrárique ore. Jé basa ga ataque gosi enga jorane jiépisi ore.
21Ujetiga gosi dojnóngaja dajõrárique ga e gosi pésu date gajnarei ome Dupade. Mu ujetiga gosi chosõripise ayoré jmatágode ore ga pininaquei jogadi tu ome uté gosi, uje Dupade que chise unerotiguérique gu.
22Ujetiga bajéode u jetiga apésu cucha gajnarétique ga e bajnai dajeque caputai bijna ome ua. Mu ujetiga bajéode u jeta apésu bate arégode enga a bojode ayoré ore irasique ua ome badode udore jne enga a bajneque ore osongaquéode ome ua jne.
23Ujetiga ayorérique chejna daguesi ome dasatígo dejo, ga a irasique re gu dasagode dejo udore oréraque jne. Jé basa ga ujetiga gosi chojninga: "Yipésu yatígo to dirome," mu gosi jé jno daruode údi ga que pésu cuchárique ga uruode jé jogate bisideque.
24A pipesute ducayórigo jne ujetiga gare. Ga ayoré irajatade, jé aja ayoré turuturéode a pirajaque ore ome ducayode udore jne. A obiréjna irajatai jne gu uje chacája ducayo uje irajatigai gueranome uté. Jé basa a obiréjna ayoré turuturei to uje chacája ayoré turuturéode ore turuturéringai garãsore ducayo.
25Ujetiga ũrepise gosode ome damone cucha gatuaque, ga que ore chaguhéta ayoré uñeque gánique gotique, uje ore chiraja gu uje que u gotique uje pésu dojoi ayoré ujuredie, enga jé u uje ore chiqueta uté iji gajnei ore etétiga. Mu ayoré urupatáquechoquírique chimópise uté to mu jé chaguhéta gai bisideque, ga gaidi tu gu jeta urupatáringane chimate gosi aja jnumi bisideque.
26Ujetiga ayorérique tangaripísi Pangarádejnai Dupade ga que cha dangoroné ome Dupade ojningane cucha yui. Enga a uté gosi abode ore irasique re iji dirode jnese jne uje ore dai angureni tu Dupade gu.
27Ujetiga gosi tangaripísi Pangarádejnai ga cho ujetiga uté gosi chóji yotique uje tṍraji sibíjnarique ga ucuecaringuei tṍraji uté ome. Chopome gosi te rĩ eti gosi anguretigai chijna uté gosi iji pitoringai jmainie.
28Picotaque opejã eduguéjnarique ujetiga jiépisi urasade. Jé basa ga a ca eduguéjnarique bisitique pijoque gotique ujetiga urásarigo chisidírase rágaja quedéjnane enga garósipise ore iji ore uniri uté.
29Áyipierane chiraja jetiga ore cho paráguiji daroditique cucha ejode, ga que ore narañime dojórique ayoré atique ome re. Jé basa ga táyipiegode ore u uje ore jnátu cuchárique ga ore cho chi-chi-chi aja dejode gatuaque.
30Ujetiga ayorérique chiraja jeta chuse dáyipiedie guio ome cuchade enga pajesereringai jogadípise uté gosi, enga cho ujetiga pajesereringai uté pésu údode ga ijõre gatuac. Jé basa ayorérique ujeta áyipie jogadípise cuchade ome re enga charatáyime cuchade ome dojode ayoré ore gatuac, enga cho jetiga gosi áyipie noñánguenie udire pésu ga jecucha údode tagu gatuaque, enga chise ajnoquéode garane to uje tagu.
31Ujetiga gosi cho dajosipié ome ayoré jmatátique ga cho jetiga Yoquimanisṍri Dupade gajneque uté gosi josipiedie ome uté gosi. Jé basa jetiga gosi ca chuseque ayoré jmatátique ga chosõre gatuaque ga cho jetiga uté gosi osõrai jé u Dupade to.
32Ayoré ate gajnaréngone ore adode u uje gajnarécho ga jé inguíraja ore aja jnumi te rĩ. Jé basa ga ayoré ate arégode ore ipararinguei tu uje chãraque ore ome cuchade jnese.
33Payuquetotiguei cho dajogadi iji áyipierane ore áyipie gatuaque. Jé basa ga payuquetotiguei que cunguésõri ayoré táyipiegode áyipiedie ejórique to go.
34Ore irasique re iji daniri tuté ome dajnoméone uje picotaque ore ome date ueradode gatuaque. Jé basa ga pajegátigárique a chisírase punínique gu uje que ore chacho dapesutique cucha gajnareque iji.
35Ujetiga eduguéjnarique irótique chirajapise dasocáringome dapesutique deduguéjnai iroquei quitique ga gajnei tu deduguéjnai icotaquei. Jé basa ga ujetiga gosi que chiraja deduguéjnai iroquéode quigode ga uté gajnei tu deduguéjnai etétigai ome re.
Currently Selected:
Provérbios 14: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
