Provérbios 13
13
1Disi áyipierane u uje ore tangaripísi dayode ore uru quigode ome raque. Disi surungúmeone u uje que ore doi danique uru quitique. Surungúmeque ore gu, ga que ore tangári cuchárique.
2Ayoré parágode ujetiga uerate ore uruode ga jé ore gajnecho daru omone quigode. Enga ore gajnui u ayorérique uje tagu dabosode enga irasique re uje subudé gu. Jé basa ga chaguhei chejna aringácachoquíode gatuaque. Uje que ore cha dájningai ga cho jetiga chaguhei chejna ore ome ore uru noñángone.
3Ujetiga ajusípise baruode guio aja guesode ga cho jetiga bañerai jé u ua ome cuchade jnese to. Mu jetiga gosi tagu dejode ome cuchade gatuaque enga cho ujetiga jé uté gosi ipesute dáringárique pujuya ome re ome dáringai tuté chérecheré bisidei.
4Ducutáquechoquíode ujetiga ore pota jóroga cuchade to mu que togome ore, uje ducutáquechoquí ore gu. Jé basa ga ayoré chaguesíode ore pota cuchade ga jĩraque ore doi uje chaguesi ore gu.
5Ayoré ate ujñapetade udore que ore chise paringaquérique unétique gotique. Jé basa ga que piyaque ayoré aringácachoquírique unétique ome ujórique ayoré. Gosi jé inguíraja dipoi aja re ome dadode udore.
6Ujetiga gosi ajnai tu dajeque ujñapetai tiji jnumone gatuaque, ga gosi adode arécho gatuaque, enga cho jetiga gosi adode udore chisa cucha dacate gajnaréngone iji yúode. Jé basa jnani sijnángone ore ate gajnaréngone chajni ore gáyode enga chinguíra ore aja jnumone.
7Ayoréode uñeque chojningárasome re: "Atai tu yu ome uaque," mu cachi dicotare ome re, uje que iplátaraque cus. Jé basa ga ayorérique ujetiga chojningárasa: "Que yimo cucháringome yu," mu taque uje iplátadie cuse, mu pógu gu ujetiga ujode ayoré chosõre uje cho jmatáguiji re.
8Jnani atade ore chiqueta re gu daplátadie. Uje ore ujode jnani jmongarája ore marínga, ore chojninga: "Ca ajé yu jne, enga a yisi ua jne iji yiplátadie uécharique." Jé basa ga que pijmongarãte ayoré jmatátique ome ujórique ayoré uje jmataque gu.
9Ayoré ate arégode ore gajnúone u pibioque papótique uje chajni dejode iji dayaridi ga cho nánga, nánga, nánga iji uté. Jé basa jnani sijnángone ore chopise pibiotique uje toi ¡sere, sere!
10Uje ayoréode ore cho ayorédatéi iji raque enga que ore tangári dojórigo ayoré, mu jecucha ga ore botare ñane. Mu obiréjnapise áyipierane iji yocujade. Ore u gu uje ore tangári dojode ayoré enga ore doi ore uruode quigode.
11Pláta poidé bisidéguedie uje yijnángo mu jĩraque yejnángopó bisideque rĩ, enga jĩraque titapo yoquijmainie ome rĩ. Jé basa yoquisagode cucha pisaque oredie que jĩraque íjnoque. Uje yoquijogate yoquisagode cucha pisacho ga udire u uje chajnera dádi to.
12Ujetiga ayorérique jnatupúsu dajnatírique cucha yúrique, mu ijnati que di, ga cha dangoroné ome yui. Mu uté chimo dajnati cucha ga chachietai dajnati tuté uje di. Ga tijode cho pujnúringome.
13Ujetiga putocaidírase gosi ome putoquérique mu gosi chojninga: "Jé dóji, ca yipésu jne." Quigade ga a gosi chojningárasa: "¿Jé go uje que yipésu yajné casé putoqué diríca ya?" Jé basa a putocaidírase gosi ga gosi chojninga: "Yipésu uje ore chutṍri yu enga yiji uté utoquei jne," enga a ore cho oré gosi isagode udore jne.
14Mu áyipierã́tique a chacadírase ayorérique ga cho jetiga chaningára yotígaja uté gosi ga uyádi íjnonguiji. Chopo jetiga gosi chejñu pitoringai iji uté gosi údode to rĩ.
15Que piyaque ayoré parágode ore unerotiguérique ome dojode ayoréo. Áyipierãque ore gu. Jé basa que piyaque ayoré aringácachoquírique unétique ome ore. Cho jeta uté qui tu dagachodi yui uje jé cho daringaquéode, darapatáringane ore aja deruei yui gu.
16Ujetiga áyipierãque gosi ga gosi áyipie jogadípise gosi ipesutígo cucha iji uté iquéode gatuaque. Jé basa ga táyipiegode que ore chucué dáyipierangome dapesutique cucha yúrique. Mu ore chapúsaja dapesudode cucha údode ga ore chojninga: "Que cucha gotique ome yoque gu jetiga yapúcoja údode."
17Mu ujetiga ayorérique chutõrirase dojórique ayoré enga chojninga: "Bo, ga angoma yuruode aja uté jne enga ósi tome barúrigo ome jne..." Mu uté gosi jno enga chécãre datocaisṍri uruode quigode, enga jé u uje chijnime pujuredie ome datocaisṍri tuté gosi. Jé basa gosi utocaidi nápisaja datocaisṍri urúiso quigode ga que pésu pujuréraque ome datocaisṍri.
18Gosi ujetiga chetaque dáringárique po quique ga jogadi u uje petégome ujode ayoréo enga chise dáringai jmatágome cucha ponáyone. Mu ujetiga gosi ca chetaque dáringáringo po quique ga ujode ayoré ore chicotápise uté ome úringai angoninguite guesac.
19Uje yipótago cuchade ome yoque ga yimáco yocajegaidi cucha aja yoque ga yoquirasiguipise yoque. Jé basa ga táyipiegode que ore pota jeta ore irasique re ome datique uje ore áyipiedie chejna raja dapesudode date gajnarécho gu. Ga ore chetaque jetiga gosi chojninga: "Aya bate gajnaréngone udore to."
20Ujetiga ajína áyipierane ore aja quedéjnane ga a araja páyuquetotiguéode quigode to jne. Jé basa ga a ajína ate gajnaréngone ore to ga baminingara ua ome ore adode to. Enga báringai táyipieque quene pijóguiji uté.
21Cho jetiga ayoré ate gajnaréngone udore ore ate gajnaréngone chajna ore aja quedéjnane. Mu cho jetiga ayoré ate arégode udore ore ate arégode tẽrája ore ome pisoca arégode gatuaque.
22Mu ujetiga paraque gosi ga que chuseque dabode, dájnamone ore ga jecucha chañuru ore gajnéone cucha guio ome ore jetiga ore cho dajnenguíji cuchade udore iji quigáningo ujetiga ga toi. Ujetiga ayoré ugúcharã́tique Dupade guetésonique chojningárasa: "Jé yajnei yiplátadie udire jnese," mu a torási paque ga que cho gojni dajnéngu damáta casé diríca daplátai, uje Dupade chisi ome ayoré ate arégode ore iji, iji quigade.
23Ayoré jmatátique narásu dacatígo cucha pacacho ga ujuya dacade udore mu que nunaji dacade udore gu uje pajnoñángome ga que ujórique ayoré chirota.
24Ujetiga gosi chijnóra datique enga uté gosi cho dabi tuté quique to ome cuchade yúode jnese. Chamáñaje a ca ayorérique cho datique quique enga obiréjna uje que chijnóra dabi gotique.
25Uje ayoré ate arégode ore tagu dabosode ga jĩraque subudé ore iji. Jé basa ga ayoré sijnángone ore tṍra jóronguiji dedo ome chagúi mu que doi ore uchábejnarique.
Currently Selected:
Provérbios 13: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
