Provérbios 15
15
1Ujetiga gosi pojna dajõrárique marínga, jõrai chajnai uruode ome daru omone enga e deroque uté gosi uruode. Jé basa ga jõrai chajnai uruode to enga jogadi u uje ore pojna ñane údode.
2Uje áyipierane ore narare ga dara omone u uje ore doi. Jé basa ga ayoré táyipiegode ore narare ga dara gajnaréngone u ore gaidode.
3Pangarádejnai déji punirone iji erámi údode jnese, enga chajire parágode, sijnángone ore adode aja quedéjnane.
4Gosi uru ueradode u uje chisi ome pijóningai ome dacatecãraitique dojo ayoré. Jé basa ga gosi uru dosógode u uje pésu gosi áyuguhebátigai.
5Obiréjnapise táyipiegode ore gu uje que ore doi dayode acajnaquérique quitique. Mu obiréjnapise áyipierane ore gu uje ore tangaripísi dayode ore uru quigode.
6Jnani parágode ore chiraja ujeta ore chagutíyame dagúcha dipeséode uje que ore chuseque dagúchade udore. Jé basa ga jnani sijnángone que ore áyipieraque déji jeta ore chagutíyame dagúchade ga que ore chañuru guio.
7Cho jetiga ayoré irajatade ore irajatigai chisite raja ujode ayoré iji dajesúode jnese. Mu que pirajatigárique cunguésõri ayoré táyipiegode gotique to.
8Ujetiga ayoré ate gajnarétique pota jóroga jeta chisi Pangarádejnai iji dagúcharique jne mu chujãpise uté guẽrapáidode cucha. Mu Pangarádejnai irasiguipise re ome ayoré ate arégode ore icatecãraitigade quigode enga tangaripísi ore.
9Pangarádejnai chujãpise ayoré ate gajnaréngone ore adode. Jé basa ga chijnorapise ayoréode uje ore chajnapise pate arégode quigode iji jnumone.
10Ujetiga gosi cha dajnai dajeque caputaque jne enga a gosi chejnáreque Dupade atique ome re jne. Ujetiga ca gosi tangaripísi Dupade aquĩraquéode ome re jne enga gosi cachodi tupúsu uje gosi a topísi jne.
11Uje que yimóngo ayoré totique ore iji jnumi údi mu gusu Pangarádejnai Dupade uje pañaji ore iji ore ódedie údi. Jétapũré uje yugúcoji guesi tome Pangarádejnai Dupade uje chirajapise jnanione ore áyipiedie quigode jnese.
12Pijoguipise ayoré dicotárechoquíode ore gu uje que ore tangári dojórique ayoré uje ore chaquĩ́ra jóroque ore ome ore ate gajnaréngone jóroque. Mu que toque jetiga ayoré dicotárechoquírique chise ayoré irajatátique unétique. Jecute ore cãra daquigode gatuac ome ayoré áyipierane ore quigode.
13Obiréjna ayorérique jeta pirasitigai déji gosi ga jecucha gosi canája dajesúode. Yirajágo to uje gosi cho dáyugu rome cuchade, ga gosi betája dajesúode.
14Yirajágo uje áyipierãque gosi ga ucuéquedaté darajatigárique ome re. Yirajágo uje turuturéode jecucha ga ore ucuéquedatéode u daturuturéringane gatuac.
15Ujetiga ducañerájma gosi ga gosi ucutaquéode jé cho ñane gatuaque iji deréjnane jnese. Ujetiga ijõre gosi ga cho jetiga déji ore ajñamítedatérique gatuaque uje que chimo pucutaquéringome re gu.
16Cho jetiga pininaquérique jogadípise ayoré atai, mu que jogate gotique gu uje uté ujuredie cuse to. Jé basa ga pininaquei gajnesṍri tu ayorérique ujetiga cho deduguéjna cuchábi iji Pangarádejnai Dupade, uje garósi ugúchade mu pininaquei jiei gu anguretigai.
17Ujetiga ayorérique chedu dabosode dacaque cucha piboso uje garósi iplátadie, mu ujetiga pijnoraquei déji uté abode, acoté ore ga dépoji ore acayade to ga cuchadaté u uté ome ore. Jé basa ga jeta ataque gosi ga gosi jecucha tagu dosipéode gatuaque, mu ujetiga uté abode, acoté ore chetaque ñane iji uté iguíjnai ga que ore bisitique pijoque.
18Ujetiga gosi jĩraque cho júruru ome cuchade jnese enga chijnime petétigade ome dojode ayoré ore gatuaque. Jé basa ga gosi uje chidota rome darade ga uté gosi u uje ipesute pajesereringai iji dojode ayoré ore ujade.
19Ducutáquechoquíode cho jetiga ore chajna dajetique jetiga ojnatígo piéjnapis. Jé basa ga ayoré parágode cho jetiga ore isoca arégode pésu ore iquéode ga icha jnumi ome ojnane enga guesája qui.
20Jecucha ga abechugode ore irasique rome dape áyipierane ore adode. Jé basa ga disi táyipiegode ore chácariji dayode údode ome date noñángone.
21Táyipiegode ore chiraja jóroque dáringane táyipiecho mu jé ore irasique rome datáyipietigade. Jé basa ga áyipierane ore chirajaque datique ga jé ore o quique raque ome uté.
22Mu ujetiga gusu ayoréringome áyipie quitique ga tocade mu que ujñapeque. Jé basa ujetiga gosi chingo dáyipie quitígaja dojode ayoré ore ga ore chucué quicho to, ga jé u uje tocade ga uerate isocai. Chamáñaje jiépisi udore gu uje ore cho quigome ñane.
23Cucha ueradi u ujetiga gosi nararome cuchárique ga jé upúsu ojningai. Cuchiyi tupúsu ome gosi jeta ca chiraja dasocáringome cuchárique mu jõrai cho quigome ga e chiraja quigode.
24Áyipierane uje ore dopísi Dupade adode ore u uje ore quique obiréjnai u pucuecaringué eyúgojmai iji gaté. Enga pitoringai a juseque uté gosi jne uje changureta Dupade gu.
25A diga chise dínique jne jetiga Pangarádejnai socárome ayoré dicotárechoquíode ore iguíjnane. Jé basa ga chosõripise chequé ecadie ore enga que juéga ore iguíjnane ome josipíerane ore gotique.
26Pangarádejnai chujãpise ayoré ate gajnaréngone ore áyipiedie quigode. Mu irasiguipise ayoréode ore uje que puru dosótique tṍraji ore pijnani to go.
27Uje gosi jnari dojode ayoré ugúchade ome re ga cho jetiga jé ipesute daguíjnai iñoñaringuei. Ca apota ayorérique ugúcharique jetiga araja eti aringaquei gajneque ome ua, ga ca asa, enga a aqueta ua ome uté aringaquéode aja ua jne.
28Jnani ate arégode ore u uje ore chucué dáyipie bajaque ome cucha dacadode yui enga que ore toria darárique ome dojórique ayoré. Jé basa ga ayoré sijnángone ore jĩraque ore nararome cuchade ome dojode ayoré ore ga que ore chucué dáyipie bajaque.
29Pangarádejnai jĩraque noñome ayoré sijnángone ore iji dore jmete. Jé basa ga nonapísa jnani uréone ore gatuaque ga tangaripísi ore icatecãraitigade.
30Ujetiga pajesereringai déji gosi edodie ga obiréjna ome yoque uje chijnóra yoque, enga pésu yoquirasitigai. Uje pujnomei ueradode di iji yoque ga tijode cho jnángome yoque uje yudúco yocajnei pujnomé.
31Uje gosi tangaripísi dajnei paquĩraqué ga Dupade cho ayoré áyipieránguiji ayoré chojmarai uté iji ujode ayoré áyipierãque ujade.
32Mu ujetiga gosi chetaque dajnei paquĩraqué ome re, ga cho jetiga gosi guetei jé tu re. Mu ujetiga gosi tangári dajnei paquĩraqué ga Dupade tẽrája uté gosi ome gajnei páyuquetotigué gaté.
33Ujetiga gosi cho deduguéjna cuchábi iji Pangarádejnai Dupade ga a pacadique gosi áyipie ome Dupade enga Dupade tẽrája uté ome payuquetotiguei gaté. Ujetiga gosi pota dáringai pangarate ga uté gosi doi ga ca chicota re ome dojode ayoré ore ga a ore tangaripísi uté gosi jne.
Currently Selected:
Provérbios 15: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
